Abonuan sa klikli nga Zezi yoli’n

Zezi nin i sɔnnzɔnfuɛ klikli’m be nun wie mun be su kɔ Kana, Galile mɛn’n nun lɔ. Afin be yiali be aja kun bo. Klɔ sɔ’n wo okaoka’m be afiɛn. Ɔ nin Nazarɛti be afiɛn’n timan nun dan. Nazarɛti lɔ yɛ Zezi ɲinnin-ɔn. Yɛ Kana lɔ yɛ be wuli Natanaɛli-ɔ. Kɛ Natanaɛli kacili Zezi i sɔnnzɔnfuɛ’n, w’a di cɛn ba nsan.

Mari ɔli aja sɔ’n i bo wie. Kɛ mɔ Mari ti be nga be su ja’n be osufuɛ’m be janvuɛ’n ti’n, atrɛkpa’n, ɔ ukali be nga be sɔ sran’m be nun’n wie. Mari wunnin kɛ nzan’n w’a wie. I sɔ’n ti’n, ɔ seli Zezi kɛ: “Be leman duvɛn kun.”​—Zan 2:3.

I lɛ nun’n, Mari su se Zezi kɛ ɔ ti be wun ɲanman nun. Sanngɛ Zezi tɛli su kɛ “?Mmo, e ndɛ o nun?” (Zan 2:4) Nán kɛ Zezi su kan Mari i ndɛ tɛ-ɔ. Sanngɛ be lɔ ijɔlɛ wafa kun-ɔn. Zezi yɛ Ɲanmiɛn sieli i Famiɛn-ɔn. Ɔ maan nán i osufuɛ annzɛ i janvuɛ mun yɛ ɔ fata kɛ be kle i like ng’ɔ́ yó’n niɔn. Sanngɛ Ɲanmiɛn-ɔn. Mari yacili ndɛ sɔ’n i wa’n i sa nun. I lɛ’n nun’n, ɔ yoli ngwlɛlɛfuɛ. Ɔ maan ɔ seli nzan sufuɛ’m be kɛ: “Like kwlaa ng’ɔ se amun kɛ amun yo’n, amun yo.”​—Zan 2:5.

Yɔbuɛ sɛ nsiɛn be o lika sɔ’n nun lɛ. Kun tra litri ablanan (40), kun tra litri ablanan (40). Ɔ maan Zezi seli nzan sufuɛ’m be kɛ: “An gua sɛ’m be nun nzue.” Kɛ be yoli sɔ’n, Zezi seli kɛ: “An sa wie ko man aja’n i sunianfuɛ’n.”​—Zan 2:7, 8.

Duvɛn’n yoli aja’n i sunianfuɛ’n i fɛ kpa. Sanngɛ ɔ siman kɛ atrɛ yɛ be yoli fa yili-ɔ. Ɔ maan ɔ flɛli yasua ng’ɔ su ja bla’n naan w’a se i kɛ: “Sran kwlaa dun mmua fa duvɛn’n i kpafuɛ’n man ka. Kpɛkun kɛ sran’m be ko bo’n, i sin yɛ ɔ fa ng’ɔ yoman fɛ’n man-ɔn. Ɔ liɛ’n, a fɛli i kpafuɛ’n sieli i siɛn lele dɔ nga su.”​—Zan 2:10.

Zezi i abonuan sa klikli ng’ɔ yoli’n yɛ ɔ o lɛ-ɔ. Kɛ i sɔnnzɔnfuɛ’m be wunnin i sɔ’n, be lafili i su kpa ekun. I sin’n, Zezi nin i nin ɔ nin i niaan’m be ɔli Kapɛɛnaɔmun lɔ. Klɔ sɔ’n wo Galile Jenvie’n i nglo lɔ lika’n nun, wia atɔliɛ lɔ bue liɛ’n su.