NDƐ NG’Ɔ KLƐ FLUWA’N SU’N | ?KƐ SRAN WU’N, I LIƐ W’A WIE MLƆNMLƆN?

Kɛ sran wu’n, i liɛ w’a wieman mlɔnmlɔn!

Be flɛ klɔ kaan kun kɛ Betani. Ɔ nin Zerizalɛmu klɔ’n be afiɛn’n ti nun kilo 3. (Zan 11:18) Kɛ ɔ ka kan naan cɛn nga bé kun Zezi w’a ju’n, sa yalɛ kun tɔli klɔ sɔ’n su. Yɛle kɛ Lazali m’ɔ ti Zezi i janvuɛ kpa’m be nun kun’n, ɔ tɔli tukpaciɛ kekle yɛ ɔ wuli.

Kɛ Zezi tili’n, ɔ seli i sɔnnzɔnfuɛ’m be kɛ Lazali su lafi naan ɔ su kɔ i tinngelɛ. (Zan 11:11) Sanngɛ i sɔnnzɔnfuɛ’m b’a wunmɛn i ndɛ sɔ’n i wlɛ. Ɔ maan Zezi seli be weiin kɛ: “Lazar a wu.”​—Zan 11:14.

Kɛ be sieli Lazali’n, i cɛn nnan’n su yɛ Zezi juli Betani lɛ ɔ. Ɔ́ fɔnvɔli Marti m’ɔ ti ɔwuliɛ’n i niaan bla’n. Marti seli i kɛ: “Nannan, sɛ ɔ ti kɛ a o wa sa’n, wuun n niaan’n w’a wu-man.” (Zan 11:17, 21) Zezi tɛli i su kɛ: “Min yɛ n cɛn sran mun-ɔn, m bɔbɔ min yɛ be flɛ min nguan nin-ɔn. Sran kwlaa ng’ɔ lafi n su’n, sɛ ɔ wu’n, ɔ́ nyán nguan ekun.”​—Zan 11:25.

Kɛ ɔ ko yo naan Zezi w’a kle kɛ i ndɛ’n timan ndɛ kanlɛ sa ngbɛn’n, ɔ suli ndia’n i wun lɔ. Yɛ ɔ kpannin kekle kpa kɛ: “Lazar, fite!” (Zan 11:43) Bé nían ɔn, ɔwuliɛ’n yɛ ɔ́ bá yɛ. Be kwlaa nga be yiali lɛ’n, be nuan boli be wun dan.

Sran nga Zezi dun mmua cɛnnin be naan w’a cɛn Lazali’n, be kwla tra be liɛ sran nɲɔn. Le kun liɛ’n, Zairisi i wa bla’n yɛ ɔ cɛnnin i ɔ. Ka naan w’a cɛn i’n, ɔ seli ekun kɛ talua kan’n su lafi.​—Lik 8:52.

Maan e sie i nzɔliɛ kɛ Zezi fali Lazali nin Zairisi i wa bla’n be wie’n sunnzunnin lafilɛ. I sɔ’n ti su. Afin sran ng’ɔ su lafi’n, ɔ wunman sa fi nun. Ɔ nunman afɛ nun, yɛ ɔ wunman ɲrɛnnɛn. (Akunndanfuɛ’n 9:4, 5; An nian lika nga be klɛli lɛ kɛ “Wie’n ti kɛ lafilɛ’n sa.”) Sa ng’ɔ ju be nga be wuli’n be su’n, Zezi i sɔnnzɔnfuɛ klikli’m be wunnin i wlɛ kpa. Fluwa kun se kɛ: “Zezi i sɔnnzɔnfuɛ’m be liɛ’n, be nga be lafi Ɲanmiɛn su mɔ be wuli’n, ɔ ti kɛ be su lafi sa, naan ndia’n ti kɛ be wunmiɛn lolɛ lika sa.”a​—Encyclopedia of Religion and Ethics.

Kɛ e si kɛ be nga be wuli’n be su lafi naan be wunman ɲrɛnnɛn’n, i sɔ’n gua e awlɛn su nzue. Ɔ maan e sroman wie’n kun.

‘?SRAN WU-Ɔ Ɔ BA?’

E kwlaa e klo kɛ kɔnguɛ é láfi é ló wunmiɛn. ?Sanngɛ e nun onin yɛ ɔ kunndɛ kɛ ɔ́ láfi trilili naan ɔ tinngeman le ɔ? ?Ngue ti yɛ e kwla lafi su kɛ be nga be wuli’n mɔ sɛ é kwlá sé’n, be su lafi’n, bé ɲán nguan ekun kɛ Lazali nin Zairisi i wa bla’n sa ɔ?

Kɛ Zɔbu buli i kɛ ɔ su wa wu’n, ɔ usɛli i wun sɔ wie. I ti ɔ seli kɛ: “Sɛ ɔ ti kɛ sran wu-ɔ ɔ ba’n, wuun ń trán ḿ mínndɛ kɛ junman difuɛ b’ɔ minndɛ lelee, kpɛkuun be fa sran kaci i’n sa.”​—Zɔb 14:14.

I sin’n, Zɔbu kannin ndɛ kleli Ɲanmiɛn m’ɔ kwla sa kwlaa yo’n. Ɲanmiɛn Ndɛ fluwa kun nun’n, be kacili ndɛ sɔ’n kɛ: “Blɛ nga a kleli kɛ sɛ ɔ ju-ɔ á wún min’n, sɛ ɔ ju naan a flɛ min’n ń sró, afin ɔ wun blibli ɔ kɛ á wún ɔ sa nuan ninnge mun.” (Zɔb 14:15, NW) Zɔbu lafili su kpa kɛ i m’ɔ su Zoova nanwlɛ su’n, sɛ ɔ wu’n, Zoova i wun blíblí i kɛ ɔ́ mɛ́n i nguan ekun. ?Sa kun m’ɔ su juman le’n, i su yɛ Zɔbu lafili ɔ? Cɛcɛ.

Zezi cɛnnin sran wie mun. I sɔ’n kle weiin kpa kɛ Ɲanmiɛn tinnin i naan ɔ kwla wie’n. I kpa bɔbɔ’n, Biblu’n se kɛ “blɔlɔ lɔ lakle’n” wo i sa nun. (Sa Nglo Yilɛ 1:18) Kɛ mɔ Zezi kwla cɛnnin Lazali ti’n, ɔ́ kwlá cɛ́n be nga be wuli’n.

Biblu’n kan sran cɛnlɛ’n i ndɛ flan nun. Anzi kun seli Ɲanmiɛn nuan ijɔfuɛ Daniɛli kɛ: “Á wá dé wunmiɛn. I sin á wá jáso kó fá wɔ akatua’n mɛn’n i awieliɛ lɔ.” (Daniɛl 12:13) Zuifu’m be su kpɛn nga be flɛ be Sadisefuɛ mun’n, be lafiman sran cɛnlɛ’n su. Zezi seli be kɛ: “Amu’an fɔn, afin an wun-man Nyanmiɛn Ndɛ nga be klɛli’n i wlɛ, yɛ kusu an si-man kɛ Nyanmiɛn kwla like kwlaa yo.” (Matie 22:23, 29) Akoto Pɔlu seli kɛ: “N lafi Nyanmiɛn su kɛ sran kpa mun o, sran tɛ mun o, bé cɛ́n.”​—Sa Nga Be Yoli’n 24:15.

?CƐN BENIN YƐ BE NGA BE WULI’N BÉ CƐ́N ƆN?

?Cɛn benin yɛ sran kpa mun nin sran tɛ mun bé cɛ́n ɔn? Anzi kun seli Daniɛli m’ɔ ti sran kpa’n kɛ ɔ́ wá jáso “mɛn’n i awieliɛ.” Marti kusu lafili su kɛ “mɛn’n i awieliɛ bɔ sran’m bé cɛ́n’n,” i niaan bian Lazali cɛ́n wie.​—Zan 11:24.

Biblu’n kle kɛ “mɛn’n i awieliɛ” sɔ’n yɛle blɛ mɔ kɛ Klist wá dí i Famiɛn’n. Pɔlu klɛli kɛ: “Afin Klist síe lele san Nyanmiɛn maan ɔ́ tíɛ i kpɔfuɛ’m be kwlaa be su, be kwlaa be nun kasiɛnfuɛ’n yɛlɛ wie’n.” (1 Korɛntfuɛ Mun 15:25, 26) I sɔ’n ti’n, ɔ fata kɛ e srɛ kɛ Ɲanmiɛn Sielɛ’n i blɛ ju naan be mɔ be o asiɛ’n su wa’n be yo Ɲanmiɛn klun sa.b

Zɔbu lafili su kpa kɛ Ɲanmiɛn cɛ́n be nga be wuli’n. Kɛ cɛn sɔ’n wá jú’n, wie’n su tranman lɛ kun. Ɔ maan kosan kɛ, kɛ sran wu’n, i liɛ w’a wie mlɔnmlɔn’n e su fa usaman e wun kun. ▪

[Ja ngua lɛ ndɛ mun]

[Kuku, bue 5]

Wie’n ti kɛ lafilɛ’n sa

“Be kwlaa be sun, be bo awuyomo. Yɛ Jésus seli be kɛ: ‘Nán an su, w’a wu-man, lafilɛ yɛ ɔ su lafi-ɔ.’ Be srili i, afin be si kɛ w’a wu.”​—Lik 8:52, 53.

“‘E janvuɛ Lazar a lafi, sanngɛ ń kɔ́ i tinngelɛ.’ I sɔnnzɔnfuɛ’m be seli i kɛ: ‘Nannan, sɛ ɔ su lafi’n, wuun ɔ́ yó juejue.’ I wie ndɛ yɛ Jésus kannin-ɔn, sanngɛ be buli i kɛ lafilɛ kpakpa ndɛ yɛ ɔ kannin-ɔn.”​—Zan 11:11-13.

[Kuku, bue 6]

Be nga be wuli’n bé cɛ́n

“Amun fuɛ nga be wuli’n bé sá be sin wa ekun. Min sran nga be sinnin wie nun’n bé cɛ́n. [...] Bé tínnge, be klun jɔ́, yɛ bé bó sro.”​—Ezai 26:19.

“Sran kpanngban bɔ be o ndia nun’n bé jáso.”​—Daniɛl 12:2.

“Cɛn wie lele be kwlaa nga be o ndia nun’n, bé tí i nɛn, yɛ bé fín ndia’n nun fíte.”​—Zan 5:28, 29.