Wafa nga Zezi kleli kɛ Ɲanmiɛn ti kpa dan’n

“Kɛ ɔ́ yó naan y’a si kɛ [Nyanmiɛn] ti kpa’n ti’n, ɔ fa Jésus mannin kɛ ɔ́ fá yi e ti tɛ naan kɛ be ko kun i’n, be bɔ be lafi i su’n, sa tɛ nga be yoli’n, ɔ yaci cɛ be Jésus mmoja’n ti.”—RƆM. 3:25.

1, 2. (a) ?Sa ng’ɔ o klɔ sran’m be su’n, i su ndɛ benin yɛ Biblu’n kan ɔn? (b) ?Kosan benin yɛ like suanlɛ nga wá tɛ́ be su ɔ?

ƝIN kekle nga be yoli i Edɛni fie’n nun lɔ mɔ be kɛn i ndɛ Biblu’n nun’n, sran’m be sunman lika be si i su ndɛ’n i kpa. E kwlakwla e wun sa tɛ nga Adam yoli’n i sin sa mun kɛ nga be fa yiyili nun ndɛ nga nun’n sa. Ndɛ sɔ’n waan: “Sran kun ti yɛ sa tɛ yolɛ’n bali mɛn nun-ɔn, yɛ sa tɛ sɔ’n ti yɛ maan wie’n bali-ɔ. Yɛ i ti yɛ maan wie’n wo sran’m be kwlaa be su-ɔ, afin be kwlaa be yo sa tɛ.” (Rɔm. 5:12) Kannzɛ e mian e ɲin kɛ é yó sa kpa sɛ, sanngɛ saan é fɔ́n. Ɔ maan ɔ fata kɛ Ɲanmiɛn yaci e sa tɛ mun cɛ e. Akoto Pɔlu bɔbɔ kokoli kɛ: “Sa kpa nga n klo kɛ ń yó’n, n yo-man, sanngɛ sa nga n klo-man kɛ ń yó’n, yɛ n yo-ɔ. Eee, n ti nyrɛnnɛnfuɛ dan! ?Wan yɛ ɔ́ tú min nzuɛn nga b’ɔ maan ń wú’n, i su-ɔ?”—Rɔm. 7:19, 24.

² Like suanlɛ nga nun’n, é wá bú kosan cinnjin nga’m be akunndan. Yɛle kɛ: ?Kɛ mɔ e nin sa tɛ yolɛ’n e fin e nin klun’n, ɔ yoli sɛ yɛ kɛ bé wú Zezi m’ɔ fin Nazarɛti’n, sa tɛ yolɛ’n w’a sɛmɛn i ɔ? ?Yɛ ngue ti yɛ be yoli i batɛmu ɔ? ?Wafa sɛ yɛ mɛn nga Zezi dili’n, ɔ yi i nglo kɛ Zoova yo sa i nuan su ɔ? Kosan’m be nun cinnjin kpafuɛ’n yɛ: ?Ngue yɛ Klist i wie’n yo i ye ɔ?

Ɲanmiɛn i suɛn tɔnlɛ

 3. ?Wafa sɛ yɛ Satan lakali Ɛvu ɔ?

³ Adam nin Ɛvu mɔ be ti e si nin e nin klikli’n be dili sinnzin. Yɛle kɛ be kpaloli Ɲanmiɛn i sielɛ’n kpɛkun be fali anzi nga be flɛ i “wuo lalaa, nin mmusu’m be si, nin Satan” i sielɛ liɛ’n. (Ngl. 12:9) Maan e nian wafa nga i sɔ sa’n juli’n. Satan kpɛli Ɲanmiɛn Zoova i sran sielɛ wafa’n i su akplowa. I sɔ’n i ɲin fite kosan ng’ɔ usali Ɛvu yɛ’n i nun. Ɔ usɛli i kɛ: “?Naan Nyanmiɛn seli amun sakpa kɛ: ‘Nán amun di fie’n su waka’m be mma’n wie fi?’” Ɲanmiɛn i mmla weiin nga i waan waka kun o lɛ naan ɔ fataman kɛ be kɛn i naan sɛ be kɛn i’n bé wú’n, Ɛvu kan kleli i. Kɛ ɔ yoli sɔ’n, Satan waan Ɲanmiɛn su bua ato. Mmusu’m be si’n seli kɛ: “Amun su wu-man.” Ɔ lakali Ɛvu naan ɔ bu i kɛ Ɲanmiɛn kunndɛman kɛ ɔ di waka mma’n naan ɔ ɲan like kpa. Ɔ seli i kɛ sɛ ɔ di waka mma’n, ɔ́ káci kɛ Ɲanmiɛn sa. Ɔ́ fɛ́ i klunklo ajalɛ.—Bob. 3:1-5.

 4. ?Wafa sɛ yɛ Satan wa sieli klɔ sran mun ɔn?

⁴ Kɛ e niɛn i sa’n, Satan waan sɛ klɔ sran’m be kpalo Ɲanmiɛn i sielɛ’n naan be bɔbɔ be sie be wun’n, bé dí aklunjuɛ kpa liɛ su. Kɛ ɔ yo naan Adam jran Ɲanmiɛn i sielɛ’n i sin’n, w’a yoman sɔ. Ɔ fali ndɛ nga i yi kannin’n su yɛ ɔ nin i be dili waka mma nga be waan nán be di’n. Ɔ maan Adam ti’n, ɔ nin Zoova be afiɛn sacili. Kpɛkun ɔ fali sa tɛ’n nin wie’n mɔ be ti kɛ trɔ dan wie sa’n takali e ti su. Adam i sa ng’ɔ yoli’n, ɔ yoli maan Satan m’ɔ ti “mɛn nga i min’n” ɔ sie klɔ sran’m be siɛn’n.—2 Kor. 4:4; Rɔm. 7:14.

 5. (a) ?Wafa sɛ yɛ Zoova yiali ndɛ ng’ɔ kannin’n i nuan ɔn? (b) ?Ngue yɛ Ɲanmiɛn fa cicili Adam nin Ɛvu be osu nunfuɛ’m be wla ɔ?

⁵ Zoova i ndɛ ng’ɔ ko kan’n, saan ɔ́ kpɛ́n su. Ɔ maan kɛ ng’ɔ fa kannin’n sa’n, ɔ fali wie’n boli Adam nin Ɛvu be sannzan. (Bob. 3:16-19) Sanngɛ i sɔ’n kleman kɛ like nga Ɲanmiɛn waan ɔ́ yó’n w’a yoman ye. Be flɛ i kɛ blɛ li yɛ ɔ su wa yo kpa bɔbɔ ɔ! Kɛ Zoova bó Adam nin Ɛvu be sannzan’n, ɔ fali like kun cicili be osu’n nunfuɛ’m be wla. Ɔ kannin kɛ ɔ́ wá yó maan be “osu’n” nunfuɛ kun wá bá. Osu sɔ’n, Satan kɛ́ i ja sin. Sanngɛ osu sɔ mɔ Ɲanmiɛn waan ɔ́ bá’n, i kannin’n wíe kpɛkun ɔ́ ‘kpɔ́tɔ [Satan] i ti’n.’ (Bob. 3:15) Biblu’n yiyili ndɛ sɔ’n nun kpa. E wun i wlɛ ndɛ ng’ɔ kɛnnin i Zezi Klist su yɛ’n i nun. I waan: “Nyanmiɛn Wa’n bali sa nga mmusu’m be si Satan yo’n i nuan nnya bulɛ.” (1 Zan 3:8) ?Sanngɛ wafa sɛ yɛ Zezi i aeliɛ’n, ɔ nin i wie’n be yi Ɲanmiɛn i sran kpa m’ɔ ti’n i nglo ɔ?

Like nga ti yɛ be yoli Zezi i batɛmu’n

 6. ?Ngue yɛ maan e si kɛ Adam i sa tɛ’n w’a saman Zezi ɔ?

⁶ Kɛ Zezi wá ɲín’n, ɔ fata kɛ ɔ yo kɛ i nun mɔ fɔ nin a wluman Adam nun’n sa. (Rɔm. 5:14; 1 Kor. 15:45) Kɛ ɔ ko yo naan i sɔ’n w’a yo ye’n ɔ fata kɛ, kɛ bé wú i’n, nán fɔ trɛn i nun. ?Wafa sɛ yɛ ɔ kwla yo sɔ ɔ? Anzi Gabliɛli yiyili nun weiin kleli Zezi i nin Mali kɛ: “Nyanmiɛn Wawɛ’n ɔ́ bá ɔ wun, yɛ Nyanmiɛn bɔ like fi nun-mɛn i sin’n, ɔ́ jrán ɔ sin. I sɔ’n ti’n, ba’n bɔ á wú i b’ɔ ti Nyanmiɛn liɛ klonglo’n, bé flɛ́ i Nyanmiɛn Wa.” (Lik 1:35) Zezi i bakan nun’n, Mali kannin i awuliɛ’n i su ndɛ’n wie kleli i. Ɔ maan Zezi i kaan nun’n, kɛ Mali nin Zozɛfu m’ɔ tali Zezi’n be ko wunnin Zezi Ɲanmiɛn i sua’n nun lɔ cɛn kun’n, ɔ usali be kɛ: “?An si-man kɛ min Si ninnge’m be mian n sa-a?” (Lik 2:49) Ɔ ti weiin kɛ Zezi i bakan nun’n, ɔ si kɛ ɔ ti Ɲanmiɛn Wa. I sɔ’n ti’n, Ɲanmiɛn i kpa m’ɔ ti’n i nglo yilɛ’n, ɔ yoli cinnjin kpa mɛnnin i.

 7. ?Like cinnjin benin yɛ Zezi le i ɔ?

⁷ Zezi kleli kɛ Ɲanmiɛn ninnge’m be loli i kpa. Yɛle kɛ ɔ ɔli aɲia’m be bo titi ɔ ko suli Ɲanmiɛn. Kɛ mɔ fɔ nunmɛn i akunndan’n nun’n ti’n, ndɛ ng’ɔ tili be’n, ɔ nin ng’ɔ kɛnngɛnnin i Biblu’n i bue nga be klɛli i Ebre nun’n i nun’n, be kwlaa be kɛli i klun. Yɛ ɔ wunnin be ngba be wlɛ. (Lik 4:16) Asa ekun’n, ɔ le like cinnjin kpa kun ekun. Yɛle i wunnɛn mɔ fɔ nunman nun m’ɔ kwla fa yi klɔ sran’m be ti tɛ’n. I nun mɔ bé yó Zezi i batɛmu’n, ɔ srɛli Ɲanmiɛn. Atrɛkpa’n, ɔ buli ndɛ ng’ɔ o Jue Mun 40:7-9 nun’n i akunndan.—Lik 3:21; an kanngan Ebre Mun 10:5-10 nun.a

 8. ?Ngue ti yɛ Zan batɛmu yofuɛ’n waan nán Zezi yo i batɛmu ɔ?

⁸ I klikli nun’n, Zan batɛmu yofuɛ’n waan nán Zezi yo i batɛmu. ?Ngue ti ɔ? Afin kɛ Zan fa Zuifu mun wlɛ i nzue’n nun’n, ɔ kle kɛ b’a yaci be fɔnlɛ nga be fɔnnin Mmla’n wun’n. Kɛ mɔ Zan nin Zezi be ti osufuɛ’n ti’n, ɔ si kɛ Zezi timan sa tɛ yofuɛ. Zezi guali Zan i awlɛn su nzue kɛ ɔ nin i fata kɛ be yo i batɛmu. Zezi yiyili nun kɛ: “Afin ɔ ti i su kɛ e yo sa kwlaa ng’ɔ ti Nyanmiɛn klun su’n.”—Mat. 3:15.

 9. ?Zezi i batɛmu’n ti ngue nzɔliɛ?

⁹ Fɔ nunman Zezi nun. I ti’n ɔ kwla se i wun kɛ, kɛ Adam sa’n, ɔ kwla wu ba mɔ fɔ su tranman be nun ɔn. Sanngɛ Zezi i konvi w’a trɛnmɛn i sɔ liɛ’n su, afin nɛ́n i sɔ yɛ Zoova kunndɛ kɛ ɔ yo ɔ. Ɲanmiɛn sunmannin Zezi asiɛ’n su wa kɛ ɔ wa di Osu nga Ɲanmiɛn waan ɔ́ bá’n mɔ yɛle Mɛsi’n, i junman’n. Junman sɔ’n i wie yɛle kɛ Zezi fɛ́ i nguan mɔ fɔ nunman nun’n, ɔ́ fá yí tɛ. (An kanngan Ezai 53:5, 6, 12 nun.) Ɔ ti su kɛ Zezi i batɛmu liɛ’n nin e liɛ’n timan kun. Afin Zezi liɛ’n, ɔ nunman nun kɛ ɔ fɛ i wun man Zoova. Yɛle kɛ ɔ ti Izraɛli nvle m’ɔ ti Ɲanmiɛn liɛ’n i nunfuɛ. Kɛ nga be fa boli su Ɲanmiɛn Ndɛ ng’ɔ kan Mɛsi’n i ndɛ’n nun’n sa’n, Zezi i batɛmu liɛ’n ti i wun m’ɔ fa kleli kɛ ɔ́ yó Ɲanmiɛn i klun sa’n, i nzɔliɛ.

10. ?Ɲanmiɛn i klun sa ng’ɔ fata kɛ Mɛsi’n yo’n i wie yɛle benin? ?Yɛ wafa sɛ yɛ i sɔ yolɛ’n yoli Zezi ɔ?

¹⁰ Like nga Zoova waan Zezi yo’n i wie yɛle Ɲanmiɛn Sielɛ’n i jasin fɛ’n i bolɛ nin i sɔnnzɔnfuɛ’m be kunndɛlɛ. I wie ekun yɛle be like klelɛ naan kɛ ɔ́ jú i ɲrun’n, b’a kwla di Zezi i sɔnnzɔnfuɛ kunndɛlɛ junman’n. Zezi i wun m’ɔ fa kleli Ɲanmiɛn’n i wie yɛle kɛ ɔ kplinnin su kɛ ɔ́ wún ɲrɛnnɛn naan be kun i. Ɔ yoli sɔ naan ɔ́ klé kɛ Ɲanmiɛn Zoova i sran m’ɔ si i sie’n, ɔ suɛn i bo mlɔnmlɔn. Zezi kloli i Si m’ɔ o ɲanmiɛn su lɔ’n sakpa. Ɔ maan Ɲanmiɛn i klun sa’n i yolɛ’n yoli i fɛ kpa. Kpɛkun i wun m’ɔ́ fá yí tɛ’n, ɔ yoli i aklunjuɛ like. (Zan 14:31) Kusu ɔ si kɛ ɔ kwla fɛ i nguan mɔ fɔ nunman nun’n, ɔ man Ɲanmiɛn naan w’a kpɔ sran’m be ti naan b’a fin sa tɛ’n nin wie’n nun b’a fite. I sɔ like mɔ i nguan’n kwla yo’n, ɔ yoli i fɛ. ?Kɛ Zezi fɛli i wun kleli kɛ ɔ́ dí i sɔ junman dan liɛ’n, Ɲanmiɛn i klun jɔli su? Ɛɛn, i klun jɔli su!

11. ?Wafa sɛ yɛ Zoova kleli kɛ ɔ ti i klun su kɛ Zezi kaci Mɛsi annzɛ Klist’n niɔn?

¹¹ Kɛ Zezi fin Zurdɛn nzue ba’n nun fiteli’n, wafa nga Ɲanmiɛn Zoova kɛnnin i weiin kɛ i klun jɔ i wun’n, sran nnan nga be klɛli Zezi i junman’n i su ndɛ’n, be kɛnnin i ndɛ. Zan batɛmu yofuɛ’n waan: ‘N wunnin Nyanmiɛn Wawɛ’n, ɔ fin nyanmiɛn su lɔ kɛ auble sa, ɔ wa trannin Zezi su. N liɛ’n n wunnin i yɛ maan n se kɛ i yɛ ɔ ti Nyanmiɛn Wa nin-ɔn.’ (Zan 1:32-34) Asa ekun’n, blɛ sɔ’n nun Zoova seli kɛ: “Min anwlɛn su ba’n yɛ, i su yɛ m’an fa n wla kwlaa m’an gua-a.”—Mat. 3:17; Mar. 1:11; Lik 3:22.

Zezi nantili seiin lele fa wuli

12. ?Kɛ be yoli Zezi i batɛmu’n, afuɛ nsan nin sin ng’ɔ bɛli i sin’n nun’n, ngue yɛ ɔ yoli ɔ?

¹² Kɛ be yoli Zezi i batɛmu’n, afuɛ nsan nin sin nga be bɛli i sin nun’n, ɔ fɛli i wun wlɛli i Si nin i sielɛ’n m’ɔ ti kpa’n be su like klelɛ’n nun mlɔnmlɔn. Kɛ m’ɔ wlanwlannin nvle nga Ɲanmiɛn fa mannin Izraɛlifuɛ mun’n i wunmuan’n i nun i ja nun ti’n, ɔ fɛli. Sanngɛ like fi w’a kwlá yoman naan w’a kanman ndɛ nanwlɛ’n lele w’a guɛguɛ i bo. (Zan 4:6, 34; 18:37) Zezi kleli sran’m be Ɲanmiɛn Sielɛ’n i su like. Ɔ yoli abonuan sa fa yoli sran’m be juejue. Ɔ mannin sran kpanngban mɔ awe kun be’n be aliɛ, kpɛkun ɔ cɛnnin be nga be wuli mun bɔbɔ. Ɔ yoli sɔ fa kleli like nga Ɲanmiɛn Sielɛ’n wá yó mán klɔ sran mun’n.—Mat. 11:4, 5.

13. ?Ngue yɛ Zezi kleli i Ɲanmiɛn srɛlɛ’n su ɔ?

¹³ Zezi w’a seman kɛ ninnge ng’ɔ kle’n nin sran’m be juejue yolɛ’n fin i. Ɔ kɛnnin i wun ase fali sran’m be ɲin sieli i Zoova su kɛ manmanlɛ’n ti i liɛ. I sɔ’n nun’n, ɔ kleli ajalɛ klanman kpa. (Zan 5:19; 11:41-44) Asa ekun’n, Zezi kleli like cinnjin kpafuɛ mɔ i ti yɛ ɔ fata kɛ e srɛ Ɲanmiɛn’n. Kɛ é srɛ́ Ɲanmiɛn’n, ɔ fata kɛ e srɛ naan ‘sran’m be wun i wlɛ kɛ i ngunmin yɛ ɔ ti Nyanmiɛn nin-ɔn,’ yɛle kɛ Ɲanmiɛn i dunman Zoova’n [“ɔ yo sanwun,” NW]. Kpɛkun e srɛ naan Ɲanmiɛn i sielɛ m’ɔ ti kpa’n, ɔ kaci Satan i sielɛ tɛ’n naan ‘e bɔ e wo asiɛ’n su wa’n, e yo [Nyanmiɛn] i klun sa kɛ be bɔ be o nyanmiɛn su lɔ’n be yo’n sa.’ (Mat. 6:9, 10) Zezi wlali e fanngan kusu kɛ e yo e srɛlɛ sɔ’n i nuan su sa. Yɛle kɛ ‘e dun mmua fa e wun man Nyanmiɛn maan ɔ sie e, yɛ e yo i klun sa’n.’—Mat. 6:33.

14. ?Kannzɛ fɔ nunman Zezi nun’n, sanngɛ ngue ti yɛ Ɲanmiɛn i klun sa’n i yolɛ nun’n, ɔ fata kɛ ɔ miɛn i ɲin ɔn?

¹⁴ Kɛ blɛ nga Zezi wá fɛ́ i wun yí e ti tɛ’n wá jú’n, ɔ wunnin kɛ junman ng’ɔ fata kɛ ɔ di’n, ɔ timan aɔwi. Sɛ be kle Zezi i ɲrɛnnɛn lele naan be kun i ɲrɛnnɛn wie’n, yɛ like nga i Si waan ɔ́ yó’n, ɔ kwla kpɛn su ɔ. Kpɛkun yɛ bé bó i Si i dunman fɛ’n ekun ɔn. Cɛn ba nnun ka naan Zezi w’a wu’n, ɔ srɛli Ɲanmiɛn kɛ: “Siɛn’n, min akunndan’n w’a sanngan. ?Ń sé sɛ? ?Ń sé kɛ: N Si, de min sa ng’ɔ́ wá jú yɛ’n nun? Sa sɔ’n ti yɛ m bali lele yɛ w’a fa ju kɛ é sé yɛ nin-ɔn.” Blɛ kɛ ngalɛ sa’n nun’n, ndɛ nga Zezi kannin’n klɔ sran kwlaa kwla kan. Kɛ Zezi kannin sɔ’n, i sin’n ɔ fɛli i ɲin sieli i like ng’ɔ ti cinnjinfuɛ’n su. Yɛ ɔ srɛli Ɲanmiɛn kɛ: “N Si, yo maan ɔ dunman’n fu.” Zoova kali lɛ tɛli i su kɛ: “M’an dun mmua yo maan n dunman’n w’a fu, yɛ ń yó maan ɔ́ wá fú ekun.” (Zan 12:27, 28) Ɲanmiɛn sulɛ’n i ti ɲrɛnnɛn nga be nin a fa kleman sran kun le’n, Zezi kplinnin su kɛ be fa kle i. Sanngɛ e kwla lafi su kɛ, kɛ Zezi tili ndɛ nga i Si m’ɔ o ɲanmiɛn su lɔ’n kannin’n, ɔ wlɛli i fanngan dan. Ɔ maan, ɔ lafili su kpa kɛ ɔ́ kwlá yɛ́yɛ́ Zoova i sielɛ m’ɔ fata kɛ ɔ sie’n. Yɛ ɔ lafili su kɛ ɔ́ kwlá tú Zoova klunngbɔ. Kusu ɔ kwla yoli sɔ sakpa!

Like nga Zezi i wie’n ɔ yo i ye’n

15. Kɛ Zezi wá wú’n, ɔ seli kɛ: “I kwlaa w’a wie.” ?Ngue ti yɛ ɔ seli sɔ ɔ?

¹⁵ I nun mɔ be boboli Zezi i waka’n su m’ɔ́ wá wú’n, ɔ seli kɛ: “I kwlaa w’a wie.” (Zan 19:30) Kɛ be yoli Zezi i batɛmu lele m’ɔ́ fá wú’n, ɔ dili afuɛ nsan nin sin. Ninnge nga Ɲanmiɛn maan Zezi kwla yoli i blɛ sɔ’n nun’n, be timan aɔwi! Kɛ Zezi wuli’n, asiɛ’n kejeli dan kpa. Ɔ maan Rɔmufuɛ’m be sonja su kpɛn kun mɔ be fali Zezi i kunlɛ’n be wlɛli i sa nun’n, ɔ seli kɛ: “Bian sɔ’n ti Nyanmiɛn Wa sakpa” (Mat. 27:54) I nun mɔ Zezi seli kɛ ɔ ti Ɲanmiɛn i Wa mɔ sran’m bé yó i finfin’n, sonja sɔ’n wunnin nun. Ɲrɛnnɛn kwlaa nga Zezi wunnin i’n nun’n, w’a kpɔciman Ɲanmiɛn le. Yɛ ɔ kleli kɛ Satan ti ato buafuɛ tɛ kpa. Satan tɔnnin be kwlaa nga be suan Ɲanmiɛn i sielɛ’n bo’n be suɛn kɛ: “Kannzɛ sran kun i anyanbeun’n ɔ ti sɛ, sɛ sa’n tɔ cinnjin’n kpa’n, ɔ fɛ i anyanbeun’n fa to i ti-ɔ ɔ yo ye.” (Zɔb 2:4) Kɛ mɔ Zezi w’a kpɔciman Ɲanmiɛn le’n, ɔ kleli kɛ sɛ ɔ ti kɛ Adam nin Ɛvu be waan be nin Ɲanmiɛn bé nánti titi’n, nn be yoli sɔ. Afin sa ng’ɔ tɔli be su’n w’a yoman kekle kɛ Zezi liɛ’n sa. I ng’ɔ ti cinnjin trɛ i ngba’n, yɛle kɛ mɛn nga Zezi dili’n ɔ nin i wie’n, be suan Zoova i sran sielɛ m’ɔ si sie’n i bo. Kpɛkun be yi sielɛ sɔ’n i ayɛ. (An kanngan Nyanndra Mun 27:11 nun.) ?Sanngɛ like uflɛ o lɛ mɔ Zezi i wie’n yoli i ye ɔ? Ɛɛn, ɔ yoli like uflɛ ye!

16, 17. (a) ?Ngue ti yɛ maan Zoova kwla buli i Lalofuɛ nga be sinnin asiɛ’n su ka naan Zezi w’a ba’n, be sran kpa ɔ? (b) ?Nantilɛ nga Zoova i Wa’n ɔ nin i be nantili klanman’n ti’n, wafa sɛ yɛ ɔ yoli i mo ɔ? ?Yɛ ngue yɛ e Min Zezi Klist te yo ɔ?

¹⁶ Zoova i sufuɛ kpanngban be sinnin asiɛ’n su ka naan Zezi w’a ba. Ɲanmiɛn buli be sran kpa. Ɔ maan ɔ fali sran cɛnlɛ’n sieli be ɲrun. (Eza. 25:8; Dan. 12:13) ?Sanngɛ ngue su yɛ Ɲanmiɛn mɔ fɔ nunmɛn i nun’n kwla jran naan w’a ra klɔ sran mɔ be fɔn’n be su klanman kɛ ngalɛ’n sa ɔ? Biblu’n yiyi nun kɛ: “Kɛ ɔ́ yó naan y’a si kɛ ɔ ti kpa’n ti’n, ɔ fa Jésus mannin kɛ ɔ́ fá yí e ti tɛ naan kɛ be ko kun i’n, be bɔ be lafi i su’n, sa tɛ nga be yoli’n, ɔ yaci cɛ be Jésus mmoja’n ti. Afin laa sa nga be yoli i’n, ɔ blu su. Sanngɛ olɛ nga e o yɛ’n, ɔ kle ye wafa ng’ɔ fa bu sran sran kpa’n, afin ɔ kle i wun kɛ ɔ ti kpa yɛ ɔ bu be nga be lafi Jésus su’n be sran kpa.”—Rɔm. 3:25, 26.

¹⁷ Zoova yoli Zezi i mo. Yɛle kɛ ɔ cɛnnin i nguan kpɛkun ɔ mɛnnin i sasu trali su. Ɔ maan ɔ ɲannin ɲrun trali ng’ɔ le i ka naan w’a ba asiɛ’n su wa’n. Dɔ nga su’n, Zezi ti aolia nun sran m’ɔ le ɲrun m’ɔ kwlá wuman kun ɔn. (Ebr. 1:3) Kɛ mɔ Zezi Klist ti Ɲanmiɛn ɲrun jranfuɛ’m be su kpɛn’n, ɔ nin Famiɛn’n ti’n, ɔ te ukɛ i sɔnnzɔnfuɛ mun naan b’a yɛyɛ Ɲanmiɛn m’ɔ ti sran kpa’n. Zoova m’ɔ ti e Si m’ɔ o ɲanmiɛn su lɔ’n, ɔ yo be kwlaa nga be yo i sɔ liɛ’n mɔ be su i titi kɛ i Wa’n sa’n, be mo. I sɔ’n ti’n, é lɛ́ i ase lele!—An kanngan Jue Mun 34:4 nin Ebre Mun 11:6 nun.

18. ?Ngue yɛ like suanlɛ ng’ɔ́ bá lɛ’n, ɔ́ wá yíyí nun ɔn?

¹⁸ Kɛ ɔ fɛ i Abɛli blɛ su lele’n, sran nga be nin Zoova be nantili klanman’n be nin i be afiɛn mantannin kpa. Afin be lafili i su kpɛkun be lafili Osu ng’ɔ tali nda kɛ ɔ́ bá’n i su wie. Zoova si kɛ i Wa’n su kpɔcimɛn i le. Naan i wie’n ‘yí mɛn’n i ti tɛ’ klanman kpa. (Zan 1:29) Andɛ’n, sran’m be ɲan Zezi i wie’n i su ye wie. (Rɔm. 3:26) ?Ɔ maan suralɛ benin yɛ e ti tɛ mɔ Klist yili’n ti’n, e kwla ɲɛn i ɔ? Like suanlɛ ng’ɔ́ bá lɛ’n, ɔ́ wá yíyí nun.

[Ja ngua lɛ ndɛ’n]

?Amún tɛ́ su sɛ?

• ?Wafa sɛ yɛ akplowa tɔli Ɲanmiɛn i sran kpa m’ɔ ti’n su ɔ?

• ?Zezi i batɛmu’n ti ngue nzɔliɛ?

• ?Ngue yɛ Zezi i wie’n yoli i ye ɔ?

[Foto, bue 15]

?Amun si Zezi i batɛmu’n i bo?