1. ?Wan yɛle Zezi?

Zezi ti aolia nun sran, yɛ ɔ tran ɲanmiɛn su lɔ. I yɛ Ɲanmiɛn dun mmua yili i naan w’a yi ninnge onga mun-ɔn. Ɔ ti “ninnge kwlaa nga Ɲanmiɛn yili be’n be nun klikli’n.” (Kolɔsufuɛ Mun 1:15) Biblu’n se kɛ Zezi ti Ɲanmiɛn i ‘Wa kunngba cɛ,’ afin i ngunmin yɛ Ɲanmiɛn w’a sinman sran uflɛ lika naan w’a yi i-ɔ. (Zan 3:16) Zezi nin i Si Zoova be dili junman likawlɛ. Ɔ ukali Zoova naan b’a yi ninnge onga mun. (Kanngan Ɲanndra Mun 8:30 nun.) Zezi nin Zoova be afiɛn mantan kpa. Ɔ ijɔ Ɲanmiɛn nuan. I sɔ’n ti’n, Biblu’n flɛ i kɛ “Ndɛ’n.”—Zan 1:14.

Ɲin kekle nga Adan nin Ɛvu be yoli i Ɲanmiɛn su’n, i ti yɛ e yo sa tɛ, e fɛ mɔ e wu’n niɔn.a Sanngɛ e liɛ w’a wieman mlɔnmlɔn. Zoova fɛli i wa Zezi Klisi mannin naan e ɲan e ti sa tɛ’n nin wie’n be sa nun. Biblu’n se kɛ Zezi i nguan’n yɛ ɔ fa kpɔli e ti-ɔ. Like nga be fa kpɔ sran kun ti’n, yɛle like nga be fa man naan sran sɔ’n w’a ɲɛn i ti’n. Zezi liɛ’n, i nguan’n yɛ ɔ fa mannin-ɔn. (Kanngan Matie 20:28 nun.) Zezi fɛli i nguan’n mannin naan cɛn wie lele’n klɔ sran’m b’a kwla ɲan nguan m’ɔ leman awieliɛ’n, m’ɔ fili Adan nin Ɛvu be sa’n i ekun. Zezi kleli kɛ i bɔbɔ ɔ nin Zoova be klo e dan. Like suanlɛ nga wá úka ɔ naan w’a kle kɛ a si like nga Zezi yo mannin e’n i su ye.

1. ?Zezi i wie’n i su ye benin yɛ e ɲɛn i andɛ-ɔ?

Kɛ mɔ e ti sa tɛ yofuɛ’n ti’n, e yo ninnge kpanngban mɔ be jɔman Zoova klun-ɔn. Sanngɛ sɛ sa tɛ nga e yo’n ɔ yo e nsisɔ naan e srɛ Zoova kɛ ɔ yaci cɛ e Zezi dunman nun’n, naan kusu e yoman sa sɔ’n kun’n, e nin Zoova e afiɛn mántan kpa. (1 Zan 2:1) Biblu’n se kɛ: “Klɔ sran’m be sa tɛ’m be ti yɛ Klisi wuli-ɔ. Ɔ yoli sɔ kpɛ kunngba cɛ. I m’ɔ ti sran kpa’n, ɔ wuli be nga be timan kpa’n be ti. Ɔ yoli sɔ naan ɔ́ fá amun kɔ́ Ɲanmiɛn wun lɔ.”—1 Piɛli 3:18.

2. ?Zezi i wie’n i su ye benin yɛ e ɲrun lɔ’n é ɲɛ́n i-ɔ?

Zoova sunmannin Zezi asiɛ’n su wa naan ɔ fɛ i nguan’n man “naan sran kwlaa ng’ɔ kle kɛ ɔ lafi i su’n w’a mlinman, sanngɛ ɔ ɲan nguan m’ɔ leman awieliɛ’n.” (Zan 3:16) Zezi dunman nun’n, cɛn wie lele’n Zoova wá yó maan sa tɛ nga Adan i ɲin kekle yolɛ’n kpɛli i ba’n i kwlaa wíe. I sɔ’n kle kɛ sɛ e lafi tɛ nga Zezi yili’n su’n, é kwlá trán nguan nun titi asiɛ m’ɔ́ wá káci mɛn klanman’n su.—Ezai 65:21-23.

SI NDƐ’N NUN KPA EKUN

3. Zezi i wie’n ti’n e kwla ɲan e ti sa tɛ nin wie’n be sa nun

VIDEO: ?Ngue ti yɛ Zezi wuli ɔ?—Bue 1 (2:01)

• ?Kɛ Adan yoli ɲin kekle Ɲanmiɛn su’n, ngue yɛ ɔ fili i sa-ɔ?

An kanngan Rɔmunfuɛ Mun 5:12 nun, i sin’n an koko kosan yɛ’n i su yalɛ:

• ?Adan i sa tɛ ng’ɔ yoli’n i su afɛ benin yɛ a wun i-ɔ?

An kanngan Zan 3:16 nun, i sin’n an koko kosan yɛ’n i su yalɛ:

• ?Ngue ti yɛ Zoova sunmɛnnin i Wa’n asiɛ’n su wa-ɔ?

1. Laa’n fɔ nunman Adan nun. Sanngɛ ɔ yoli ɲin kekle Ɲanmiɛn su. I sɔ’n ti yɛ e yo sa tɛ mɔ e wu’n niɔn.

2. Zezi mɔ fɔ nunmɛn i nun’n w’a yoman ɲin kekle Zoova su. I dunman nun ti yɛ e kwla ɲan nguan m’ɔ leman awieliɛ’n niɔn.

4. Sran kwlaa kwla ɲan Zezi i wie’n i su ye

VIDEO: ?Ngue ti yɛ Zezi wuli ɔ?—Bue 2 (2:00)

• ?Wafa sɛ yɛ sran’m be kwlaa be kwla ɲan sran kunngba i wie’n i su ye-ɔ?

An kanngan 1 Timote 2:5, 6 nun, i sin’n an koko kosan yɛ’n i su yalɛ:

• Laa’n fɔ nunman Adan nun, sanngɛ kɛ m’ɔ yoli sa tɛ’n ti’n, sran’m be kwlaa be yo sa tɛ yɛ be wu. Zezi kusu fɔ nunmɛn i nun wie. ?Ngue ti yɛ e kwla se kɛ Zezi ‘fali like ng’ɔ nin i fata’n ɔ kpɔli sran’m be kwlaa be ti-ɔ’?

5. E ti kpɔlɛ tɛ’n ɔ ti like kun mɔ Zoova fa cɛli wɔ-ɔ

Zoova i janvuɛ’m be si kɛ e ti kpɔlɛ tɛ’n ɔ ti like mɔ Zoova fa cɛli be tinuntinun-ɔn. An kanngan Galasifuɛ Mun 2:20 nun, i sin’n an koko kosan yɛ’n i su yalɛ:

• ?Wafa sɛ yɛ akoto Pɔlu kleli kɛ e ti kpɔlɛ tɛ’n ɔ ti like mɔ Ɲanmiɛn fa cɛli i-ɔ?

Sa tɛ nga Adan yoli’n ti’n, ɔ fata kɛ i bɔbɔ ɔ nin i mma’m be kwlaa be wu. Sanngɛ Zoova sunmɛnnin i Wa’n naan ɔ fɛ i nguan’n man naan e kwla ɲan nguan m’ɔ leman awieliɛ’n.

An kanngan Zan 19:1-7, 16-18 nun. Kɛ amún kánngan ndɛ mma sɔ’m be nun’n, an bu wafa nga kɛ Zoova i Wa’n ɔ́ wún i ɲrun’n, Zoova i wun yoli i’n i akunndan. I sin’n, an koko kosan yɛ’n i su yalɛ:

• ?Kɛ a bu like nga Zoova nin Zezi be yo mannin wɔ’n i akunndan’n i sɔ’n yo ɔ sɛ?

NDƐ’N I KPƆLƐ BOLƐ

Zezi i wie’n ti’n Zoova kwla yaci e sa tɛ mun cɛ e. Yɛ e kwla ɲan nguan m’ɔ leman awieliɛ’n.

Ndɛ’n i nun flanlɛ

• ?Ngue ti yɛ Zezi wuli-ɔ?

• ?Ngue ti yɛ e kwla se kɛ Zezi fali like m’ɔ nin i fata’n ɔ kpɔli sran’m be ti-ɔ?

• ?Zezi i wie’n i su ye benin yɛ a kwla ɲɛn i-ɔ?

NDƐ WIE MUN EKUN

Like nga ti yɛ be flɛ tɛ nga Zezi fɛli i wun yili’n kɛ e ti kpɔlɛ tɛ’n.

“?Ngue ti yɛ e kwla se kɛ tɛ nga Zezi yili’n ‘ɔ kpɔli sran kpanngban be ti-ɔ’?” (jw.org su ndɛ)

Like ng’ɔ fata kɛ be yo naan y’a ɲan e ti sa tɛ nin wie’n be sa nun’n.

“?Wafa sɛ yɛ Zezi de e-ɔ?” (jw.org su ndɛ)

?Sɛ sran kun yo sa tɛ dan kpa bɔbɔ’n Zoova kwla yaci cɛ i?

“Biblu’n su kosan’m be su tɛlɛ” (Sasafuɛ Tranwlɛ’n, afuɛ 2013, Mɛ 1)

Nian wafa nga tɛ nga Zezi yili’n i silɛ’n yoli maan bian kun kacili mlɔnmlɔn’n.

“Nzaje sa yolɛ’n timan min nzuɛn kun. (jw.org su ndɛ)

1. ?Ngue yɛ e kwla yo naan y’a kle kɛ e si like nga Ɲanmiɛn nin Zezi be yo mannin e’n i su ye-ɔ?

Biblu’n se e kɛ ‘sran kwlaa ng’ɔ lafi Zezi su’n,’ ɔ́ ɲán nguan m’ɔ leman awieliɛ’n. (Zan 3:16) ?Wafa sɛ yɛ e kwla kle kɛ e lafi Zezi su-ɔ? Yɛle kɛ maan e yi i sɔ liɛ’n i nglo ninnge nga e yo be’n be nun. (Zaki 2:17) Kɛ e yo sɔ’n e nin Zezi e afiɛn mantan, kpɛkun e nin i Si Zoova e afiɛn mantan wie.—Kanngan Zan 14:21 nun.