• ?Wafa sɛ yɛ e kwla su Ɲanmiɛn naan i klun w’a jɔ su-ɔ?
    A kwla di aklunjɔɛ tititi!—Biblu’n nun like suanlɛ

    • 1. ?Ngue su yɛ ɔ fata kɛ sulɛ nga e su Ɲanmiɛn’n ɔ taka-ɔ?

      Ɔ fata kɛ sulɛ nga e su Ɲanmiɛn’n ɔ taka ndɛ nga Biblu’n kan’n su. Zezi seli Ɲanmiɛn kɛ: “Ɔ ndɛ’n ti nanwlɛ.” (Zan 17:17) Ɲanmiɛn sulɛ wafa wie’m be faman be ɲin be siemɛn i ndɛ nanwlɛ ng’ɔ o Biblu’n nun’n su. Be fa be nannan’m be mmla’n ɔ nin like nga klɔ sran’m be kle’n, be fa kaci ndɛ nanwlɛ ng’ɔ o Biblu’n nun’n. Zoova i klun jɔman be nga be kpalo i mmla mun’n be wun. (Kanngan Marki 7:9 nun.) Sanngɛ kɛ e nian ndɛ nga Biblu’n kan’n su e su i mɔ e nanti i mmla’n su’n, i klun jɔ e wun.

  • ?Zoova i Lalofuɛ mun yɛ be ti Klisifuɛ kpa mun-ɔn?
    A kwla di aklunjɔɛ tititi!—Biblu’n nun like suanlɛ

    • 1. ?Ngue su yɛ like nga Zoova i Lalofuɛ’m be kle’n ɔ taka-ɔ?

      Zezi seli kɛ: ‘Ɲanmiɛn ndɛ’n ti nanwlɛ.’ (Zan 17:17) Kɛ Zezi sa’n ndɛ nga Zoova i Lalofuɛ’m be kan’n ɔ taka Ɲanmiɛn Ndɛ’n su. Maan e fa e ɲin e sie i ninnge wie mɔ e yoli be’n be su. Afuɛ 1870 be nun lɔ’n, sran wie mɔ be klo Biblu’n nun ndɛ’n i kpa’n, be fali be ɲin be sieli Biblu’n nun ndɛ’n su naan bé wún like nga Biblu’n kle i sakpasakpa’n. Ndɛ nga be wunnin i Biblu’n nun’n i su yɛ be fali-ɔ. Kannzɛ ndɛ sɔ’n ɔ nin ndɛ nga Ɲanmiɛn sulɛ wafa’m be kle’n ɔ timan kun’n, sanngɛ Biblu’n i ndɛ liɛ’n su yɛ be fali-ɔ. I sin’n, be kannin ndɛ nanwlɛ mɔ be wunnin i Biblu’n nun’n i ndɛ be kleli be wiengu mun.a