LIKE SUANLƐ 54
Junman nga ‘junman difuɛ nanwlɛfuɛ m’ɔ si ngwlɛlɛ’n’ di’n
Zezi yɛ ɔ ti asɔnun’n i su kpɛn’n niɔn. (Efɛzifuɛ Mun 5:23) Kɛ Zezi o ɲanmiɛn su lɔ’n, ɔ sin ‘junman difuɛ nanwlɛfuɛ m’ɔ si ngwlɛlɛ’n’ i lika naan w’a kle i sɔnnzɔnfuɛ nga be o asiɛ’n su wa’n be atin. (Kanngan Matie 24:45 nun.) Zezi bɔbɔ yɛ ɔ sieli junman difuɛ sɔ’n niɔn, yɛ ɔ mɛnnin i atin kɛ ɔ fa ajalɛ wie mun. “Junman difuɛ” sɔ’n lo i wun man Zezi, yɛ ɔ uka Zezi i niaan mun. ?Wan yɛle junman difuɛ sɔ’n? ?Yɛ wafa sɛ yɛ ɔ nian e lika-ɔ?
1. ?Wan yɛle ‘junman difuɛ nanwlɛfuɛ m’ɔ si ngwlɛlɛ’n’?
Kɛ ɔ fɛ i laa lele andɛ’n, Zoova sin sran kun, annzɛ sran wie’m be lika naan w’a kle i sufuɛ’m be atin. (Malasi 2:7; Ebre Mun 1:1) Kɛ Zezi wuli’n, i akoto mun nin kpɛnngbɛn nga be o Zerizalɛmun lɔ’n, be yɛ be dunnin aniaan’m be ɲrun mmua-ɔ. (Sa Nga Be Yoli’n 15:2) Andɛ kusu’n, asɔnun kpɛnngbɛn akpasua kaan kun yɛ be ti Zoova i Lalofuɛ’m be anuannzɛ’n i ɲrun difuɛ mun-ɔn. Be yo maan e ɲan like kwlaa nga e sa miɛn i wun naan e nin Zoova e afiɛn w’a mantan’n, kpɛkun be siesie jasin fɛ bolɛ junman’n. Sran akpasua sɔ’n be yɛ be ti ‘junman difuɛ nanwlɛfuɛ m’ɔ si ngwlɛlɛ’n mɔ Zezi fɛ i sieli i sran’m be su’n niɔn.’ (Matie 24:45a) Anuannzɛ’n i ɲrun dinfuɛ’m be kwlaa be ti Klisifuɛ mɔ Ɲanmiɛn kpali be sieli be ngunmin-ɔn. Ɔ maan be ɲin o blɛ mɔ be nin Zezi bé kó dí famiɛn ɲanmiɛn su lɔ’n i sin kpa.
2. ?Aliɛ wafa benin yɛ junman difuɛ nanwlɛfuɛ m’ɔ si ngwlɛlɛ’n man-ɔn?
Zezi seli kɛ junman difuɛ nanwlɛfuɛ’n ɔ́ wá ‘mán Klisifuɛ’m be aliɛ blɛ ng’ɔ nin i fata’n nun.’ (Matie 24:45b) Kɛ e di aliɛ’n e ɲan wunmiɛn, yɛ e tɔman tukpacɛ ngbɛnngbɛn. I wafa kunngba’n, kɛ be yiyi Ɲanmiɛn Ndɛ’n nun be kle e’n, e nin Zoova e nanti klanman, kpɛkun e kwla di junman nga Zezi fa wlali e sa nun’n. (1 Timote 4:6) E aɲia kanngan nin e aɲia dandan’m be bo’n, be yiyi Ɲanmiɛn Ndɛ’n nun be kle e naan e nin Ɲanmiɛn e afiɛn w’a mantan naan y’a kwla yo i klun sa’n. Asa’n, e fluwa mun nin e video mun be uka e sɔ wie.
SI NDƐ’N NUN KPA EKUN
É wá wún like nga ti yɛ e mian anuannzɛ’n i ɲrun dinfuɛ mɔ be yɛle ‘junman difuɛ nanwlɛfuɛ m’ɔ si ngwlɛlɛ’n’ be wun’n.
Zoova i Lalofuɛ’m be anuannzɛ’n i ɲrun dinfuɛ mun be kle be like, be kle be atin, yɛ be kle be ajalɛ nga be kwla fa’n.
3. Zoova i sufuɛ’m be yo ninnge mun i nuan su sɛsɛ
Zezi sin e anuannzɛ’n i ɲrun dinfuɛ’m be lika siesie junman nga e di’n. Klisifuɛ klikli’m be blɛ su’n, Zezi yoli sɔ wie. An bo VIDEO’N.
An kanngan 1 Korɛntifuɛ Mun 14:33, 40 nun, i sin’n an koko kosan yɛ’n i su yalɛ:
?Wafa sɛ yɛ ndɛ mma sɔ’m be kle kɛ Zoova kunndɛ kɛ i sufuɛ’m be yo ninnge mun sɛsɛsɛ-ɔ?
4. Junman difuɛ nanwlɛfuɛ m’ɔ si ngwlɛlɛ’n siesie jasin fɛ bolɛ junman’n
Junman cinnjin kpafuɛ nga Klisifuɛ klikli’m be dili’n yɛle jasin fɛ bolɛ’n. An kanngan Sa Nga Be Yoli’n 8:14, 25 nun, i sin’n an koko kosan yɛ’m be su yalɛ:
?Klisifuɛ klikli’m be blɛ su’n, wan yɛ ɔ siesie jasin fɛ bolɛ junman’n niɔn?
?Kɛ Piɛli nin Zan be wiengu akoto mun be mannin be junman’n, ngue yɛ be yoli-ɔ?
Junman cinnjin kpa nga e anuannzɛ’n i ɲrun dinfuɛ’m be siesie’n yɛle jasin fɛ’n i bolɛ’n. An bo VIDEO’N.
Zezi kannin like nga ti yɛ jasin fɛ bolɛ’n ti cinnjin kpa’n i ndɛ. An kanngan Marki 13:10 nun, i sin’n an koko kosan yɛ’m be su yalɛ:
?Ngue ti yɛ jasin fɛ bolɛ’n ti cinnjin kpa e anuannzɛ’n i ɲrun dinfuɛ’m be ɲrun-ɔn?
?Ngue ti yɛ ɔ fata kɛ ‘junman difuɛ nanwlɛfuɛ m’ɔ si ngwlɛlɛ’n’ ɔ siesie jasin fɛ bolɛ’n mɛn wunmuan’n nun-ɔn?
5. Junman difuɛ nanwlɛfuɛ’n kle e atin
E anuannzɛ’n i ɲrun dinfuɛ mun yɛ be kle Klisifuɛ nga be o mɛn wunmuan’n nun’n like ng’ɔ fata kɛ be yo’n niɔn. ?Ngue su yɛ be jran naan b’a kle Klisifuɛ mun like ng’ɔ fata kɛ be yo’n niɔn? Nian like nga Klisifuɛ klikli’m be blɛ su’n aniaan nga be dun be ɲrun mmua’n be yoli’n. An kanngan Sa Nga Be Yoli’n 15:1, 2 nun, i sin’n an koko kosan yɛ’m be su yalɛ:
?Sa benin yɛ ɔ tɔli akplowa Klisifuɛ klikli’m be afiɛn-ɔn?
?Wan sin yɛ Pɔlu nin Baanabasi nin be onga’m be ɔli naan b’a kwla kpɛ ndɛ’n nun-ɔn?
An kanngan Sa Nga Be Yoli’n 15:12-18, 23-29 nun, i sin’n an koko kosan yɛ’n i su yalɛ:
?Klisifuɛ klikli’m be blɛ su’n, kwlaa naan aniaan nga be dun be ɲrun mmua’n b’a fa ajalɛ kun’n ngue yɛ be yo-ɔ?—Nian ndɛ mma 12, nin 15 ɔ nin 28 nun.
An kanngan Sa Nga Be Yoli’n 15:30, 31; 16:4, 5 nun, i sin’n an koko kosan yɛ’m be su yalɛ:
?Klisifuɛ klikli’m be blɛ su’n, kɛ aniaan nga be dun be ɲrun mmua’n be kleli be like ng’ɔ fata kɛ be yo’n, ngue yɛ aniaan’m be yoli-ɔ?
?Kɛ be yoli like nga aniaan’m be seli be kɛ be yo’n, wafa sɛ yɛ Zoova yrali be su-ɔ?
An kanngan 2 Timote 3:16 nin Zaki 1:5 nun, i sin’n an koko kosan yɛ’n i su yalɛ:
?Andɛ’n kɛ e anuannzɛ’n i ɲrun dinfuɛ’m be waan bé fá ajalɛ’n, ngue su yɛ be jran-ɔn?
SRAN WIE’M BE WAAN: “Sɛ anuannzɛ’n i ɲrun dinfuɛ’m be ndɛ nga be kan’n i su yɛ e fa’n, nn e su su klɔ sran’m be su.”
?Ngue yɛ ɔ kle wɔ kɛ Zezi yɛ ɔ fa e anuannzɛ’n i ɲrun dinfuɛ mun di junman-ɔn?
NDƐ’N I KPƆLƐ BOLƐ
‘Junman difuɛ nanwlɛfuɛ m’ɔ si ngwlɛlɛ’n’ mɔ Zezi fɛli i sieli i sɔnnzɔnfuɛ’m be su’n yɛle e anuannzɛ’n i ɲrun dinfuɛ mun. Yɛ ɔ yo maan e ɲan like kwlaa nga e sa miɛn i wun naan e nin Zoova e afiɛn w’a mantan’n.
Ndɛ’n i nun flanlɛ
?Wan yɛ ɔ sieli ‘junman difuɛ nanwlɛfuɛ m’ɔ si ngwlɛlɛ’n’ niɔn?
?Wafa sɛ yɛ e anuannzɛ’n i ɲrun dinfuɛ’m be nian e lika-ɔ?
?A lafi su kɛ e anuannzɛ’n i ɲrun dinfuɛ mun yɛ be ti ‘junman difuɛ nanwlɛfuɛ m’ɔ si ngwlɛlɛ’n’ niɔn?
NDƐ WIE MUN EKUN
Wafa nga e anuannzɛ’n i ɲrun dinfuɛ’m be junman’n ti siesiewa’n.
“?Junman benin yɛ e anuannzɛ’n i ɲrun dinfuɛ’m be di-ɔ?” (jw.org su ndɛ)
Ninnge nga e anuannzɛ’n i ɲrun dinfuɛ’m be yo naan y’a kwla ɲan ninnge kwlaa nga e sa mian be wun naan e nin Ɲanmiɛn e afiɛn w’a mantan’n.
Like nga e yo naan b’a kwla lafi e fluwa’m be nun ndɛ’n su’n (17:18)
?Wafa sɛ yɛ e anuannzɛ’n i ɲrun dinfuɛ’m be bu junman nga Zezi fa wlali be sa nun’n niɔn?
?Wafa sɛ yɛ e aɲia kanngan nin e aɲia dandan’m be kle kɛ Zoova sin e anuannzɛ’n i ɲrun dinfuɛ’m be lika kle e like-ɔ?