-
?Be kwla yo wɔ batɛmun?A kwla di aklunjɔɛ tititi!—Biblu’n nun like suanlɛ
-
-
3. ?Ngue ti yɛ ɔ fataman kɛ srɛ kun wɔ batɛmun yolɛ’n nun-ɔn?
Batɛmun yolɛ’n kun sran wie’m be srɛ afin be se be wun kɛ be su kwlá yiaman nda nga be tali Zoova’n i nuan. I yo, saan á fɔ́n sa wie’m be nun. I kpa bɔbɔ’n, Ɲanmiɛn i sufuɛ kpa mɔ Biblu’n kan be ndɛ’n, blɛ wie nun’n be fɔnnin. Zoova w’a seman kɛ nán maan i sufuɛ’m be fɔn kaan sa. (Kanngan Jue Mun 103:13, 14 nun.) Kɛ e mian e ɲin e yo e liɛ nga e kwlɛ i yo’n i sɔ’n yo Zoova i fɛ. Zoova wá úka wɔ. I bɔbɔ se e kɛ ‘like fi su kwlá yoman naan w’a kloman e kun.’—Kanngan Rɔmunfuɛ Mun 8:38, 39 nun.
-
-
A kwla jran yalɛ klelɛ’n i ɲrun kekleA kwla di aklunjɔɛ tititi!—Biblu’n nun like suanlɛ
-
-
Kɛ mɔ e ti Klisifuɛ’n ti’n saan bé klé e yalɛ, annzɛ bé tánndan e ɲrun cɛn wie. ?Ɔ fata kɛ i sɔ’n kun e srɛ?
1. ?Ngue ti yɛ e si kɛ bé klé e yalɛ-ɔ?
Biblu’n kɛn i weiin kɛ: “Sran kwlaa ng’ɔ kunndɛ kɛ ɔ́ tú i klun ɔ́ sú Ɲanmiɛn naan ɔ nin Klisi Zezi bé nánti’n, bé klé i ɲrɛnnɛn wie.” (2 Timote 3:12) Kɛ mɔ Zezi w’a yoman Satan i mɛn’n i nunfuɛ’n ti’n be kleli i yalɛ. E kusu, kɛ mɔ e timan mɛn’n nunfuɛ’n ti’n, kɛ awa mun nin Ɲanmiɛn sulɛ wafa’m be kle e yalɛ’n, i sɔ’n boman e nuan.—Zan 15:18, 19.
2. ?Wafa sɛ yɛ e kwla siesie e wun naan y’a jran yalɛ klelɛ’n i ɲrun kekle-ɔ?
Ɔ fata kɛ e lafi Zoova su kpa dɔ nga su. Srɛ Ɲanmiɛn, yɛ kɛnngɛn i nuan ndɛ’n nun cɛn kwlakwla. Tran aɲia’m be bo titi. Sɛ a yo ninnge kwlaa sɔ mun’n, kannzɛ bɔbɔ ɔ awlofuɛ mun yɛ be tanndan ɔ ɲrun’n, á kwlá jrán yalɛ klelɛ’n i ɲrun kekle. Akoto Pɔlu mɔ be kleli i yalɛ kpɛ sunman’n seli kɛ: “Zoova ti min ukafuɛ. Ɔ maan srɛ su kunman min.”—Ebre Mun 13:6.
Sɛ e bo jasin fɛ’n titi’n, é ɲán wunmiɛn naan y’a kwla jran yalɛ klelɛ’n i ɲrun kekle. Kɛ e bo jasin fɛ’n i sɔ’n yo maan e lafi Zoova su, yɛ e yoman srongble. (Ɲanndra Mun 29:25) Sɛ e mian e ɲin e bo jasin fɛ’n dɔ nga su’n, i sɔ’n yó maan sɛ awa’n tannin e jasin fɛ bolɛ’n e ɲrun lɔ’n, é kwlá bó jasin fɛ’n titi.—1 Tesalonikifuɛ Mun 2:2.
3. ?Kɛ e jran yalɛ klelɛ’n i ɲrun kekle’n i su ye benin yɛ e ɲɛn i-ɔ?
Nán kɛ e bɔbɔ e klo kɛ be kle e yalɛ ti-ɔ. Sanngɛ kɛ e jran yalɛ klelɛ’n i ɲrun kekle’n, i sɔ’n yo maan e lafi Ɲanmiɛn su kpa tra laa’n. Kɛ e wun kɛ blɛ kekle sɔ’n nun’n Zoova uka e’n, i sɔ’n yo maan e nin i e afiɛn mantan kpa tra laa’n. (Kanngan Zaki 1:2-4 nun.) Kɛ be kle e yalɛ’n, i sɔ’n yo Zoova i ya dan. Sanngɛ kɛ e jran kekle’n i klun jɔ. Biblu’n se kɛ: “Sɛ amun yo sa kpa naan be kle amun yalɛ naan amun tra amun awlɛn’n, i sɔ’n yo Ɲanmiɛn i fɛ.” (1 Piɛli 2:20) Sɛ e jran kekle’n, Zoova mán e nguan m’ɔ leman awieliɛ’n mɛn kun mɔ sran fi su kleman e yalɛ lɔ’n i nun.—Matie 24:13.
SI NDƐ’N NUN KPA EKUN
É wá wún kɛ kannzɛ bɔbɔ be kle e yalɛ’n, sanngɛ e kwla jran kekle. Asa’n, é wá kɛ́n i su ye nga e ɲɛn i’n i ndɛ.
4. Sɛ ɔ osufuɛ’m be tanndan ɔ ɲrun’n a kwla jran kekle
Zezi seli kɛ e awlofuɛ’m be kwla tanndan e ɲrun Zoova i sulɛ’n nun. An kanngan Matie 10:34-36 nun, i sin’n an koko kosan yɛ’n i su yalɛ:
?Awlo kun nun’n, kɛ sran kun fa ajalɛ kɛ ɔ́ sú Zoova’n, ngue sa yɛ ɔ kwla ju-ɔ?
Sa kun m’ɔ kwla ju’n yɛ, an bo VIDEO’N, i sin’n an koko kosan yɛ’n i su yalɛ.
?Sɛ ɔ osufuɛ wie, annzɛ ɔ janvuɛ wie tanndan ɔ ɲrun Zoova i sulɛ’n nun’n, ngue yɛ á yó-ɔ?
An kanngan Jue Mun 27:10 nin Marki 10:29, 30 nun. Kɛ amun ko wie ndɛ mma kun nun kanngan’n, an koko kosan yɛ’n i su yalɛ:
?Sɛ ɔ osufuɛ kun annzɛ ɔ janvuɛ kun tanndan ɔ ɲrun Zoova sulɛ’n nun’n, wafa sɛ yɛ Biblu’n nun ndɛ nga kwla uka wɔ-ɔ?
5. Kannzɛ be kle ɔ yalɛ’n su Zoova titi
Kɛ sran’m be kle e yalɛ Zoova mɔ e su i’n ti’n, ɔ kwla yo kekle. Ɔ maan ɔ fata kɛ e yo yakpafuɛ. An bo VIDEO’N, i sin’n an koko kosan yɛ’n i su yalɛ.
?Video’n nun’n, ngue yɛ ɔ wlali ɔ fanngan-ɔn?
An kanngan Sa Nga Be Yoli’n 5:27-29 nin Ebre Mun 10:24, 25 nun. Kɛ amun ko wie ndɛ mma kun nun kanngan’n, an koko kosan yɛ’n i su yalɛ:
?Sɛ bɔbɔ be tannin e jasin fɛ’n i bolɛ’n annzɛ aɲia’m be bo tranlɛ’n, ngue ti yɛ ɔ ti cinnjin kɛ e su Zoova titi-ɔ?
6. Zoova úka wɔ naan w’a jran kekle
Be kleli Zoova i sufuɛ kpanngban mɔ be afuɛ’n nin be finwlɛ’n timan kun’n be yalɛ. Sanngɛ be jrannin kekle. Maan e nian like ng’ɔ ukali be’n. An bo VIDEO’N, i sin’n an koko kosan yɛ’n i su yalɛ.
?Video’n nun’n, ngue yɛ ɔ ukali aniaan mun naan b’a kwla jran kekle-ɔ?
An kanngan Rɔmunfuɛ Mun 8:35, 37-39 nin Filipufuɛ Mun 4:13 nun. Kɛ amun ko wie ndɛ mma kun nun kanngan’n, an koko kosan yɛ’n i su yalɛ:
?Wafa sɛ yɛ ndɛ mma nga kle kɛ a kwla jran yalɛ klelɛ’n i ɲrun kekle-ɔ?
An kanngan Matie 5:10-12 nun, i sin’n an koko kosan yɛ’n i su yalɛ:
?Kannzɛ be kle wɔ yalɛ’n, ngue ti yɛ a kwla di aklunjɔɛ?
Zoova i sufuɛ miliɔn kpanngban be jrannin yalɛ klelɛ’n i ɲrun kekle. A kwla yo sɔ wie.
SRAN WIE’M BE WAAN: “Sɛ be kle min yalɛ’n, n su kwlá jranman kekle.”
?Biblu’n nun ndɛ mma benin yɛ ɔ kwla uka be naan b’a wun i wlɛ kɛ be kwla jran kekle-ɔ?
NDƐ’N I KPƆLƐ BOLƐ
Kɛ be kle e yalɛ mɔ e mian e ɲin e su Zoova’n, i sɔ’n yo i fɛ dan. Zoova fanngan nun’n é kwlá jrán kekle.
Ndɛ’n i nun flanlɛ
?Ngue ti yɛ e si kɛ bé wá klé e yalɛ-ɔ?
?Wafa sɛ yɛ a kwla siesie ɔ wun dɔ nga su naan w’a jran yalɛ klelɛ’n i ɲrun kekle-ɔ?
?Ngue yɛ ɔ kwla uka wɔ naan w’a lafi su kɛ kannzɛ bɔbɔ be kle ɔ yalɛ’n, a kwla su Zoova titi-ɔ?
NDƐ WIE MUN EKUN
Kɛ be wlali aniaan kun m’ɔ i waan ɔ diman sonja’n i bisua’n, wafa nga Zoova ukɛli i’n i su video.
Like ng’ɔ ukali bian kun nin yi mɔ be kleli be yalɛ afuɛ kpanngban’n naan b’a kwla jran kekle’n.
Wafa nga e kwla jran yalɛ klelɛ’n i ɲrun kekle’n.
?Sɛ e osufuɛ’m be tanndan e ɲrun’n, wafa sɛ yɛ ɔ fata kɛ e bu i sɔ liɛ’n niɔn? ?Yɛ wafa sɛ yɛ e kwla jran kekle-ɔ?
-