3. Nian ɔ wun su naan w’a tɔman tukpacɛ

Klisifuɛ mɔ be fali be wun be mannin Ɲanmiɛn’n, like ng’ɔ ti be cinnjin’n yɛle Ɲanmiɛn i klun sa’n i yolɛ. Ɔ ti kɛ b’a fa be wun b’a yi tɛ b’a man Ɲanmiɛn sa. An kanngan Rɔmunfuɛ Mun 12:1, 2 nun, i sin’n an koko kosan yɛ’m be su yalɛ:

• ?Ngue ti yɛ ɔ fata kɛ e nian e wun su naan y’a tɔman tukpacɛ-ɔ?

• ?Ninnge benin wie mun yɛ e kwla yo naan i sɔ liɛ’n w’a yo ye-ɔ?

Kɛ a boli Biblu’n nun like suanlɛ bo lele m’ɔ́ fá jú yɛ’n, a suannin Zoova i su ninnge kpanngban. Asa’n, kɔlɛ’n a miannin ɔ ɲin kpa naan w’a kwla kaci ɔ sa ninnge wie’m be yolɛ’n nun. Sanngɛ atrɛkpa’n sa wie ti’n, kɛ ɔ ko yo naan w’a fa ɔ wun w’a man Zoova naan b’a yo ɔ batɛmun’n ɔ ti kekle. Like suanlɛ nga nun’n, é wá kán ninnge sunman mɔ be tanndan sran wie’m be ɲrun mɔ i ti yɛ be kwlá yoman be batɛmun’n be ndɛ. Asa ekun’n, é wá kán wafa nga a kwla jran ninnge sɔ’m be ɲrun kekle’n i ndɛ.

1. ?Ɔ fata kɛ a si Biblu’n nun ndɛ’n kwlaa ka naan b’a yo ɔ batɛmun?

Kɛ ɔ ko yo naan b’a kwla yo ɔ batɛmun’n, ɔ fata kɛ a “wun ndɛ ng’ɔ ti nanwlɛ’n i wlɛ kpa.” (1 Timote 2:4) I sɔ’n kleman kɛ ɔ fata kɛ a si Biblu’n nun ndɛ’m be kwlaa ka naan b’a yo wɔ batɛmun. Be nga be yoli be batɛmun w’a cɛ kpa bɔbɔ’n be te suan Biblu’n nun like. (Kolɔsufuɛ Mun 1:9, 10) Sanngɛ ɔ fata kɛ a wun Biblu’n nun ndɛ’n i bo bolɛ ninnge’m be wlɛ kpa. Asɔnun’n nun asɔnun kpɛnngbɛn’m bé wá úka ɔ naan w’a wun i wlɛ sɛ a si ninnge sunman naan be kwla yo wɔ batɛmun-o.

2. ?Ajalɛ benin yɛ ɔ fata kɛ a fa ka naan b’a yo wɔ batɛmun-ɔn?

Kwlaa naan b’a yo wɔ batɛmun’n, ɔ fata kɛ a kaci ɔ akunndan yɛ a ‘kaci ɔ sa ninnge wie’m be nun.’ (Kanngan Sa Nga Be Yoli’n 3:19 nun.) I sɔ’n kle kɛ ɔ fata kɛ sa tɛ kwlaa nga a yoli be’n, be yo wɔ nsisɔ naan a srɛ Zoova kɛ ɔ yaci ɔ wun sa’n cɛ wɔ. Asa’n, ɔ fata kɛ a kpalo sa tɛ’n yɛ a fua kpa kɛ á yó sa nga be jɔ Ɲanmiɛn klun’n. Kpɛkun ɔ fata kɛ a tran asɔnun aɲia’m be bo, kpɛkun a nin asɔnun’n be bo jasin fɛ’n.

3. ?Ngue ti yɛ ɔ fataman kɛ srɛ kun wɔ batɛmun yolɛ’n nun-ɔn?

Batɛmun yolɛ’n kun sran wie’m be srɛ afin be se be wun kɛ be su kwlá yiaman nda nga be tali Zoova’n i nuan. I yo, saan á fɔ́n sa wie’m be nun. I kpa bɔbɔ’n, Ɲanmiɛn i sufuɛ kpa mɔ Biblu’n kan be ndɛ’n, blɛ wie nun’n be fɔnnin. Zoova w’a seman kɛ nán maan i sufuɛ’m be fɔn kaan sa. (Kanngan Jue Mun 103:13, 14 nun.) Kɛ e mian e ɲin e yo e liɛ nga e kwlɛ i yo’n i sɔ’n yo Zoova i fɛ. Zoova wá úka wɔ. I bɔbɔ se e kɛ ‘like fi su kwlá yoman naan w’a kloman e kun.’—Kanngan Rɔmunfuɛ Mun 8:38, 39 nun.

SI NDƐ’N NUN KPA EKUN

4. Si Zoova kpa tra laa’n

?Ɔ fata kɛ a si Zoova i su ndɛ kwlaa ka naan b’a yo ɔ batɛmun? Cɛcɛ. Sanngɛ ɔ fata kɛ a si i kpa naan a klo i, yɛ a kunndɛ kɛ á yó i klun sa’n. An bo VIDEO’N. Ɔ kan wafa nga mɛn wunmuan’n nun’n Biblu’n nun like suanfuɛ’m be miannin be ɲin naan b’a kwla yo sɔ’n i ndɛ. I sin’n an koko kosan yɛ’n i su yalɛ.

VIDEO: Ninnge ng’ɔ fata kɛ a yo be naan b’a yo ɔ batɛmun’n (3:56)

• ?Video’n nun, ngue yɛ ɔ ukali sran wie mun naan b’a kwla yo be batɛmun-ɔn?

An kanngan Rɔmunfuɛ Mun 12:2 nun, i sin’n an koko kosan yɛ’m be su yalɛ:

• ?Biblu’n nun ndɛ wie’m be o lɛ mɔ a lafiman be su kpa-ɔ? ?A lafi su kpa kɛ ndɛ nga Zoova i Lalofuɛ’m be kan’n ti nanwlɛ?

• ?Sɛ ɔ akunndan’n ti nɲɔnnɲɔn ndɛ sɔ’m be su’n ngue yɛ ɔ fata kɛ a yo-ɔ?

5. Jran sa nga be kwla tanndan ɔ ɲrun’n be ɲrun kekle

Sran kwlaa ng’ɔ fa ajalɛ kɛ ɔ́ fɛ́ i wun mán Zoova naan be yo i batɛmun’n, sa wie’m bé tɛ́nndɛn i ɲrun. Maan e nian sa kun m’ɔ kle sɔ’n, an bo VIDEO’N, i sin’n an koko kosan yɛ’m be su yalɛ.

VIDEO: Zoova i klolɛ’n kwla uka e naan y’a jran kekle (5:22)

• ?Video’n nun’n, sa benin wie mun yɛ ɔ fata kɛ Nanzerɛli ɔ jran be ɲrun kekle naan w’a kwla su Zoova-ɔ?

• ?Wafa sɛ yɛ Zoova i klolɛ’n ukɛli i naan w’a jran sa sɔ’m be ɲrun kekle-ɔ?

An kanngan Ɲanndra Mun 29:25 nin 2 Timote 1:7 nun, i sin’n an koko kosan yɛ’n i su yalɛ:

• ?Ngue yɛ ɔ kwla uka e naan y’a jran sa’m be ɲrun kekle-ɔ?

6. Fa ɔ wla gua Zoova su, ɔ́ úka wɔ

Zoova wá úka wɔ naan w’a yo i klun sa’n. An bo VIDEO’N, i sin’n an koko kosan yɛ’m be su yalɛ.

VIDEO: Ɲanmiɛn Zoova úka ɔ (2:50)

• ?Video’n nun’n, ngue yɛ ɔ kunnin bian’n i srɛ mɔ i ti yɛ ɔ sisi i bo ka naan b’a yo i batɛmun-ɔn?

• ?Ngue yɛ ɔ wunnin i wlɛ m’ɔ ukɛli i naan w’a lafi Zoova su kpa-ɔ?

An kanngan Ezai 41:10, 13 nun, i sin’n an koko kosan yɛ’n i su yalɛ:

• ?Ngue ti yɛ a kwla lafi su kɛ nda nga kɛ á fá ɔ wun mán Zoova a tali’n, a kwla yiɛ i nuan-ɔn?

7. Lafi su kpa titi kɛ Zoova klo wɔ

Sɛ a bu klolɛ nga Zoova fa klo wɔ’n i akunndan kpa’n, i sɔ’n yó maan á sí i ye, yɛ á kúnndɛ kɛ á sú i tititi. An kanngan Jue Mun 40:5 nun, i sin’n an koko kosan yɛ’n i su yalɛ:

• ?Ninnge nga Zoova yo mannin e’n be nun’n beninfuɛ’n yɛ ɔ klun jɔ su kpa-ɔ?

Ɲanmiɛn nuan ijɔfuɛ Zeremin kloli Zoova ɔ nin i nuan ndɛ’n. Ɔ buli Zoova i dunman m’ɔ o i su’n i like cinnjin. Ɔ seli kɛ: “Ɔ ndɛ’n ti’n, n bo sroli, yɛ min klun jɔli, afin ɔ dunman’n o min su.” (Zeremin 15:16) Tɛ kosan nga’m be su:

• ?Ngue ti yɛ kɛ e ti Zoova i Lalofuɛ’n i sɔ’n ti e cenjele like-ɔ?

• ?A kunndɛ kɛ be yo wɔ batɛmun naan á káci Zoova i Lalofuɛ wie?

• ?Like wie o lɛ m’ɔ tanndan ɔ ɲrun-ɔn?

• ?Kɛ a niɛn i sa’n, ngue yɛ a kwla yo naan b’a kwla yo wɔ batɛmun-ɔn?

NDƐ’N I KPƆLƐ BOLƐ

Zoova fanngan nun’n, á kwlá jrán sa nga be tanndan ɔ ɲrun’n be ɲrun kekle naan b’a kwla yo wɔ batɛmun.

Ndɛ’n i nun flanlɛ

• ?Ɔ fata kɛ a si Biblu’n nun ndɛ’n kwlaa ka naan b’a yo wɔ batɛmun?

• ?Ajalɛ benin yɛ ɔ fata kɛ a fa ka naan b’a yo wɔ batɛmun-ɔn?

• ?Ngue ti yɛ ɔ fataman kɛ batɛmun yolɛ’n kun ɔ srɛ-ɔ?

NDƐ WIE MUN EKUN

Like nga ti yɛ a kwla kunndɛ kɛ be yo wɔ batɛmun’n.

“?W’a ju batɛmun yolɛ?” (Sasafuɛ Tranwlɛ’n, afuɛ 2020 Marsi)

Wafa nga a kwla jran sa wie’m be ɲrun kekle naan b’a kwla yo wɔ batɛmun’n.

“?Ngue ti yɛ be kwlá yoman min batɛmun yɛ?” (Sasafuɛ Tranwlɛ’n, afuɛ 2019 Marsi)

Like ng’ɔ ukali bian kun naan w’a jran sa wie’m be ɲrun kekle naan b’a kwla yo i batɛmun’n.

‘?Ngue ti yɛ be nin-a kwlá yoman ɔ batɛmun-ɔn?’ (1:10)

I klikli nun’n, bian kun m’ɔ be flɛ i Ataa’n ɔ sisi i bo batɛmun yolɛ’n nun. Like ng’ɔ ukɛli i’n yɛ.

Zoova yrali min su dan (7:21)