An fa sa kpa’n be kwla sa tɛ’n

13, 14. (a) ?Ngue ti yɛ kɛ be kle e ɲrɛnnɛn’n, ɔ boman e nuan ɔn? (b) ?Wafa sɛ yɛ ɔ fata kɛ e yo be nga be kle e ɲrɛnnɛn’n niɔn?

¹³ An kanngan Rɔmfuɛ Mun 12:14, 21 nun. Kɛ mɔ e lafi su kpa kɛ Zoova wá yó i nda ng’ɔ tali be’n, be nuan su sa’n ti’n, e kwla fa e akunndan’n kwlaa e sie i junman ng’ɔ fa mannin e’n su. Yɛle kɛ ‘Nyanmiɛn sielɛ’n i jasin fɛ’n,’ e kwla kɛn i “mɛn wunmuan’n nun.” (Matie 24:14) E si kɛ Klistfuɛ junman sɔ’n ti’n, e kpɔfuɛ’m bé fá ya kpa. Afin Zezi wlali e su nun kɛ: “Nvle’n kwlaa bé kpɔ́ amun n dunman nun.” (Matie 24:9) Ɔ maan, kɛ be kle e yalɛ mɔ be tanndan e ɲrun’n, ɔ boman e nuan. Akoto Piɛli klɛli i kɛ: “N sran kpa mun, nán maan sa ng’ɔ tɔ amun su amun sa nianlɛ’n ti’n, ɔ bo amun nuan. Nán an bu i kɛ ɔ ti sa tɛ. Sanngɛ kɛ an wun nyrɛnnɛn kunngba nga Krist wunnin i’n wie’n, maan amun klun jɔ.”—1 Piɛr 4:12, 13.

15. ?Ajalɛ kpafuɛ nga e kwla fa naan y’a kwla sa tɛ’n yɛle benin?

¹⁵ I sɔ’n ti’n, Klistfuɛ kpa’n, ɔ nanti Rɔmfuɛ Mun ndɛ tre 12 i ndɛ mma kasiɛn’n su. Ɔ se kɛ: “Nán maan be nga be yo amun tɛ’n be kwla amun, sanngɛ an yo be kpa lele an kwla be.” Sa tɛ’n kwlaa fin mmusu’m be si Satan. (Zan 8:44; 1 Zan 5:19) Sa nga Zezi yili i nglo kleli akoto Zan nun’n, Zezi kleli kɛ i niaan nga be kpali be sieli be ngunmin’n, “Bua Gbanflɛn’n i mmoja’n nin ndɛ nanwlɛ bɔ i niaan sɔ’m be kan’n ti be kwlali [Satan].” (Sa Nglo Yilɛ 12:11) I sɔ’n kle kɛ ajalɛ kpafuɛ nga e kwla fa naan y’a kwla Satan nin i mɛn tɛ nga be aeliɛ’n, yɛle like ng’ɔ ti kpa’n i yolɛ. Yɛle kɛ e bo Ɲanmiɛn Sielɛ’n i jasin fɛ’n.