LIKE SUANLƐ 52
?Wafa nga e wlawla e wun’n ɔ ti cinnjin?
E wun wlawlalɛ’n nun’n, ɔ le sran kun nin i liɛ ng’ɔ klo i’n. Kannzɛ e wun wlawlalɛ’n timan kun’n, sanngɛ sɛ e nanti Biblu’n nun ndɛ’n su’n, e wun wlawlalɛ wafa’n ɔ́ jɔ́ Zoova klun. Maan e fa e ɲin e sie i Biblu’n nun ndɛ sɔ’m be nun wie’m be su.
1. ?Biblu’n nun ndɛ benin yɛ ɔ kwla uka e e wun wlawlalɛ’n nun-ɔn?
Ɔ fata kɛ e ‘wlawla e wun kpa, nán maan e fa e wun e kle. Yɛ i sɔ yolɛ’n nun’n maan e fa ngwlɛlɛ.’ Maan e wun wlawlalɛ’n wafa’n kle kɛ e ti sran m’ɔ “sro Ɲanmiɛn-ɔn.” (1 Timote 2:9, 10) Maan e fa e ɲin e sie i ninnge nnan sɔ’m be su kpa. (1) Maan e “wlawla e wun kpa.” Kɛ nga a fa wun i e aɲia’m be bo’n sa’n, Zoova i sufuɛ’m be wun wlawlalɛ wafa’n timan kun. Sanngɛ i sɔ yolɛ’n nun’n e kle kɛ e ɲin yi e Ɲanmiɛn mɔ e su i’n. (2) “Nán e fa e wun e kle.” I sɔ’n kle kɛ ɔ fataman kɛ e wun wlawlalɛ’n ti’n, e niaan’m be bu bla annzɛ bian kunndɛlɛ akunndan. Asa’n, ɔ fataman kɛ e wun wlawlalɛ’n ti’n sran be fa be ɲin be sie e su dan. (3) ‘Maan e fa ngwlɛlɛ.’ I sɔ’n kle kɛ ɔ fataman kɛ e se kɛ, kɛ mɔ tralɛ kun w’a ju su’n ti’n, saan é wlá wie. (4) Maan wafa nga e wlawla e wun blɛ kwlaa nun’n ɔ kle kɛ “e sro Ɲanmiɛn.” I sɔ’n klé sran’m be kɛ e ti Ɲanmiɛn Kpli i sufuɛ.—1 Korɛntifuɛ Mun 10:31.
2. ?Ngue ti yɛ ɔ fata kɛ e bu e niaan’m be akunndan e wun wlawlalɛ’n nun-ɔn?
Kannzɛ e le atin e wla like nga e klo’n, sanngɛ ɔ fata kɛ e bu wafa nga i sɔ’n yó e wiengu mun’n i akunndan. E mian e ɲin naan y’a sannganman sran wie i akunndan. E yo “like ng’ɔ jɔ e wiengu klun naan ɔ yo i ye, naan ɔ wlɛ i fanngan.”—Kanngan Rɔmunfuɛ Mun 15:1, 2 nun.
3. ?Wafa sɛ yɛ e wun wlawlalɛ’n kwla yo maan sran kun ba Zoova sulɛ-ɔ?
E wlawla e wun kɛ ng’ɔ nin i fata’n sa blɛ kwlaa nun. Sanngɛ e aɲia’m be bo, ɔ nin jasin fɛ bolɛ’n nun’n yɛ e mian e ɲin e yo sɔ kpa’n niɔn. E kunndɛman kɛ e wun wlawlalɛ’n ti’n sran’m be kpalo jasin fɛ nga e bo’n. E wun wlawlalɛ’n kwla yo maan sran’m be ba Ɲanmiɛn i sulɛ, yɛ be wun i wlɛ kɛ e “Defuɛ Ɲanmiɛn i ndɛ ng’ɔ kle’n, ɔ yo ɲɛnmɛn.”—Titi 2:10.
SI NDƐ’N NUN KPA EKUN
É wá fá e ɲin é sie i like ng’ɔ kwla uka e naan y’a wlawla e wun kɛ ng’ɔ nin i fata’n sa’n su.
Sɛ e ɲin yi be nga be le kwlalɛ’n, kɛ é kɔ́ be ɲrun’n é wláwlá e wun kpa. Kannzɛ Zoova si e klun akunndan’n, sanngɛ maan wafa nga e wlawla e wun’n ɔ kle kɛ e bu i sran.
4. Kɛ e wlawla e wun kɛ ng’ɔ nin i fata’n sa’n i sɔ’n kle kɛ e ɲin yi Zoova
?Like cinnjin benin ti yɛ ɔ fata kɛ e wlawla e wun kpa-ɔ? An kanngan Jue Mun 47:2 nun, i sin’n an koko kosan yɛ’m be su yalɛ:
?Ngue ti yɛ Zoova i sufuɛ mɔ e ti’n ti’n, ɔ fata kɛ e nian wafa nga e wlawla e wun’n su-ɔ?
?Kɛ a niɛn i sa’n, wafa nga e wlawla e wun aɲia’m be bo, ɔ nin jasin fɛ bolɛ’n nun’n, ɔ ti cinnjin? ?Ngue ti-ɔ?
5. ?Ngue yɛ ɔ kwla uka e naan y’a wlawla e wun kɛ ng’ɔ nin i fata’n sa-ɔ?
Kannzɛ e tralɛ’m be le gua-o annzɛ be leman gua-o, ɔ fata kɛ be yo yɛin. Yɛ maan e nian like nga e su yo’n su naan y’a wlawla e wun. An kanngan 1 Korɛntifuɛ Mun 10:24 nin 1 Timote 2:9, 10 nun, i sin’n an koko kosan yɛ’m be su yalɛ.
?Ngue ti yɛ ɔ fataman kɛ e wla tralɛ fiɛn-ɔn? ?Yɛ ngue ti yɛ ɔ fataman kɛ e wlawla e wun kɛ e ɲin yiman sran nga e su kan ndɛ é klé i’n sa-ɔ?
?Ngue ti yɛ ɔ fataman kɛ e wun wlawlɛ’n yo maan e wiengu’m be ɲin tran bla annzɛ bian kunndɛlɛ’n su-ɔ? ?Ngue ti yɛ ɔ fataman kɛ e tralɛ’m be mian e dan-ɔn?
Kannzɛ Klisifuɛ’m be diman Moizi Mmla’n su kun’n, sanngɛ mmla sɔ’n uka e naan y’a wun akunndan nga Zoova bu’n. An kanngan Mmla’n 22:5 nun, i sin’n an koko kosan yɛ’n i su yalɛ:
?Ngue ti yɛ ɔ fataman kɛ bla kun wlɛwlɛ i wun kɛ yasua sa naan kusu yasua kun wlɛwlɛ i wun kɛ bla sa-ɔ?
An kanngan 1 Korɛntifuɛ Mun 10:32, 33 nin 1 Zan 2:15, 16 nun, i sin’n an koko kosan yɛ’m be su yalɛ:
?Ngue ti yɛ ɔ fata kɛ e usa e wun sɛ wafa nga e wlawla e wun’n, ɔ sanngan asɔnun’n nunfuɛ mun annzɛ sran uflɛ wie’m be akunndan-ɔn?
?Wafa sɛ yɛ sran’m be wlawla be wun lika nga a tran lɛ’n nun-ɔn?
?Kɛ a niɛn i sa’n, be wun wlawlalɛ wafa sɔ’n i wie o lɛ m’ɔ nin Klisifuɛ fataman-ɔn? ?Ngue ti yɛ a bu i sɔ-ɔ?
E wun wlawlalɛ wafa’n ti fanunfanun. Sanngɛ e kwla mian e ɲin naan e wun wlawlalɛ’n w’a jɔ Zoova klun.
SRAN WIE’M BE WAAN: “Like nga n klo kɛ ń wlá’n yɛ ń wlá-ɔ. Min ndɛ nunman sran ndɛ nun.”
?A bu i sɛ? ?Ngue ti-ɔ?
NDƐ’N I KPƆLƐ BOLƐ
Kɛ e wlawla e wun kɛ ng’ɔ nin i fata’n sa’n e kle kɛ e ɲin yi Zoova. Yɛ e ɲin yi e wiengu mun wie.
Ndɛ’n i nun flanlɛ
?Ngue ti yɛ e wun wlawlalɛ wafa’n ti Zoova i cinnjin-ɔn?
?Biblu’n nun ndɛ benin yɛ be kwla uka e naan y’a wlawla e wun kɛ ng’ɔ nin i fata’n sa-ɔ?
?Kɛ e wlawla e wun kpa’n, wafa sɛ yɛ i sɔ’n kwla yo be nga be suman Zoova’n niɔn?
NDƐ WIE MUN EKUN
?Wafa nga n fa wlawla min wun’n ti’n wafa sɛ yɛ sran’m be bu min-ɔn?
?Kwlaa naan y’a se kɛ be yi e wunnɛn’n su desɛn’n, ngue ti yɛ ɔ fata kɛ e bu i akunndan kpa-ɔ?
“?Ngue ndɛ yɛ Biblu’n kɛn i be wunnɛn’n su desɛn yilɛ’n su-ɔ?” (jw.org su ndɛ)
Biblu’n nun ndɛ wie mun ekun mɔ be kwla uka e e wun wlawlalɛ’n nun’n.
“Maan e wlawla e wun kpa naan Ɲanmiɛn ɲan ɲrun” (Sasafuɛ Tranwlɛ’n, afuɛ 2016, Sɛptanblu)
Like ng’ɔ ukali bla kun naan w’a yaci i wiengu’m be wun akunndan tɛ bulɛ be wun wlawlalɛ’n ti’n.