Maan e “bo yo kun” e yi Ɲanmiɛn i ayɛ

‘Maan amun bo yo kun sɔ naan amun kwlaa an yi e Min Zezi Klist i Si Ɲanmiɛn’n i ayɛ.’—Rɔmfuɛ Mun 15:6.

 1. ?Ninnge’m be su angunndan bulɛ fanunfanun’n i su afɔtuɛ mennin yɛ Pɔlu klɛ ko mannin i niaan Klistfuɛ mun ɔn?

Ɔ LE Klistfuɛ kun i like m’ɔ klo i ɔ, annzɛ kusu ajalɛ mɔ i ninnge’m be yolɛ nun’n ɔ klo be falɛ ɔ. Sanngɛ nguan atin’n i su nantilɛ nun liɛ’n, ɔ fata kɛ be kwlaa be bo yo kun be fa ajalɛ kunngba’n. ?I sɔ’n kwla yo ye? Sɛ y’a faman e ninnge’m be su angunndan bulɛ fanunfanun’n y’a yoman ndɛ dan’n, é kwlá sé kɛ ɛɛn ɔ́ yó ye! I sɔ’n i su afɔtuɛ yɛ afuɛ ya kpɔlɛ klikli nun’n, akoto Pɔlu klɛ ko mannin i niaan Klistfuɛ mun ɔn. ?Wafa sɛ yɛ afɔtuɛ sɔ m’ɔ mannin’n nun’n, ɔ kleli kɛ bo kun yolɛ’n ti cinnjin ɔn? ?Yɛ wafa sɛ yɛ andɛ e kwla fa afɔtuɛ sɔ’n su wie ɔ?

Klistfuɛ’m be bo kun yolɛ’n ti cinnjin kpa

 2. ?Ngue yɛ Pɔlu yoli fa kleli kɛ bo kun yolɛ’n ti cinnjin ɔn?

² Pɔlu si kɛ Klistfuɛ’m be bo kun yolɛ’n ti cinnjin kpa. I sɔ’n ti’n, ɔ mannin be afɔtuɛ ng’ɔ kwla uka be naan be wun klolɛ’n ti’n, ninnge nga be wiengu yo be’n w’a sɔn be nun’n (Efɛzfuɛ Mun 4:1-3; Kolɔsfuɛ Mun 3:12-14). Sanngɛ, kɛ Pɔlu fali afuɛ ko ju 20 tra su takali asɔnun kpanngban mɔ i sin ɔ sinnin wie’m be su’n, yɛ ɔ wunnin kɛ bo kun yolɛ’n timan aɔwi ndɛ ɔ (1 Korɛntfuɛ Mun 1:11-13; Galasifuɛ Mun 2:11-14). I sɔ’n ti’n, ɔ wlali Rɔmu lɔ Klistfuɛ’m be su nun kpa kɛ: ‘Maan Ɲanmiɛn m’ɔ wla sran fanngan mɔ maan be tra be awlɛn’n, ɔ maan amun bo yo kun sɔ naan amun kwlaa an yi e Min Zezi Klist i Si Ɲanmiɛn’n i ayɛ.’ (Rɔmfuɛ Mun 15:5, 6). Andɛ kusu’n, e mɔ e ti Ɲanmiɛn i nvle nunfuɛ’n, ɔ fata kɛ e “bo yo kun” wie naan y’a kwla yi Ɲanmiɛn i ayɛ. ?I lɛ’n nun’n, wafa sɛ yɛ e kle kɛ e bo ti kun Ɲanmiɛn i ayɛ yilɛ’n nun ɔn?

3, 4. (a) ?Rɔmu lɔ Klistfuɛ’m be finwlɛ’n i fanunfanun m’ɔ ti’n yɛle mennin? (b) ?Ngue yɛ Rɔmu lɔ Klistfuɛ’m be kwla yo naan be ‘bo w’a yo kun’ Zoova i sulɛ’n nun ɔn?

³ Rɔmu lɔ Klistfuɛ sunman be ti Pɔlu i janvuɛ klonglo (Rɔmfuɛ Mun 16:3-16). Kannzɛ bɔbɔ be finwlɛ’n ti fanunfanun’n, sanngɛ Pɔlu sɔli be kwlaa be nun kɛ be ti i “sran kpa.” Ɔ seli kɛ: ‘Zezi Klist ti n la min Ɲanmiɛn’n i ase amun ndɛ mɔ n tili’n ti, afin be kan amun Ɲanmiɛn sulafilɛ ndɛ’n mɛn wunmuan’n nun.’ Nanwlɛ, Rɔmu lɔfuɛ’m be kleli ajalɛ kpa sa sunman nun (Rɔmfuɛ Mun 1:7, 8; 15:14). Sanngɛ kusu’n, be nun wie’m be angunndan’n yoli fanunfanun ninnge wie’m be yolɛ’n su. Kɛ mɔ andɛ Klistfuɛ’m be kusu be finwlɛ’n, ɔ nin be ninnge’m be yolɛ’n ti fanunfanun ti’n, afɔtuɛ nga Pɔlu mannin’n i su like suanlɛ’n ɔ kwla uka be wie naan be ‘bo w’a yo kun.’

⁴ Rɔmu lɔ asɔnun’n nun’n, sran’m be ngba be timan Zuifu (Rɔmfuɛ Mun 4:1; 11:13). Be nga be ti Zuifu’n, kannzɛ be wunnin i wlɛ weiin kɛ, ɔ timan cinnjin kɛ be di Moizi Mmla’n su ekun naan b’a fite nun’n, sanngɛ atrɛkpa be nun wie’m b’a yacimɛn i su dilɛ. Be nun wie’m be kusu be fali su kpa kɛ Klist i tɛ ng’ɔ yili’n, ɔ wlali mmla’n i su falɛ’n i ase. I sɔ’n ti’n, be kacili be ninnge’m be yolɛ’n (Galasifuɛ Mun 4:8-11). Sanngɛ i kwlaa yoli o, kɛ nga Pɔlu dun mmua fa kannin’n sa’n, be kwlaa be ti “sran kpa.” Ɔ maan, sɛ be angunndan’n ti kpa be wiengu lika titi’n, be kwlaa be “bo yó kun” bé mánmán Ɲanmiɛn. Andɛ kusu’n, e angunndan’n kwla yo ngunminngunmin ninnge wie’m be yolɛ’n su. I sɔ’n ti’n, ɔ fata kɛ e fa e ɲin sie afɔtuɛ nga Pɔlu mannin’n su kpa.—Rɔmfuɛ Mun 15:4.

“An fa amun wiengu bu amun niaan”

5, 6. ?Ngue ti yɛ Rɔmu lɔ asɔnun’n nun sran’m be angunndan yoli ngunminngunmin ninnge wie’m be yolɛ’n su ɔ?

⁵ Rɔmufuɛ’m be fluwa nga Pɔlu klɛli’n i nun’n, like kun mɔ i yolɛ’n su Rɔmufuɛ’m be angunndan’n ti ngunminngunmin’n, ɔ kɛnnin i ndɛ. Ɔ seli kɛ: ‘Sran wie o lɛ’n, ɔ lafi su kɛ ɔ kwla di like’n kwlaa, sanngɛ sran ng’ɔ nin a wunman sa ng’ɔ yo ɔ, ɔ ti su’n i wlɛ’n, aliɛ ngunmin yɛ ɔ di ɔ, ɔ diman nnɛn.’ ?Ngue ti ɔ? I wie yɛle kɛ, Moizi Mmla nun’n, be diman kɔkɔti nnɛn’n (Rɔmfuɛ Mun 14:2; Saun Yolɛ 11:7). Sanngɛ kɛ Zezi wuli’n, Mmla sɔ’n i su dilɛ’n wieli (Efɛzfuɛ Mun 2:15). I kpa bɔbɔ’n, kɛ Zezi wuli m’ɔ dili afuɛ nsan nin sin’n, anzi kun seli akoto Piɛli kɛ Ɲanmiɛn waan ɔ fataman kɛ be bu nnɛn wie mun ekun kɛ be ti like kain (Sa Nga Be Yoli’n 11:7-12). Sa nɲɔn sɔ’m be ti’n, Klistfuɛ wie mun mɔ be ti Zuifu’n be seli be wun kɛ be kwla di kɔkɔti nnɛn’n, annzɛ nnɛn wie mun ekun mɔ Mmla’n tannin be dilɛ laa’n.

⁶ Sanngɛ be nun wie’m be liɛ’n, nnɛn nga be ti fiɛn’n be dilɛ’n i ndɛ kanlɛ bɔbɔ ngbɛn sa’n, ɔ yo be kain. Atrɛkpa’n, kɛ i sɔfuɛ’m be wun kɛ be niaan Zuifu’m be su di i sɔ nnɛn mun’n, w’a yoman be fɛ. Sanngɛ, be nga be timan Zuifu mɔ be di nnɛn sɔ mun titi’n, atrɛkpa b’a wunman sa nga ti yɛ sran wie’m be kwla fɛ i sɔ’n yo ndɛ ɔ. Nanwlɛ, sɛ sran wie fali aliɛ kun yoli i ciliɛ naan w’a jranman su fii kɛ i sɔ’n ti yɛ maan be kwla fite nun’n, ɔ timan tɛ. Sanngɛ, ɔ ka kan naan ninnge’m be su angunndan bulɛ ngunminngunmin sɔ’n w’a saci asɔnun’n. Ɔ maan ɔ nin i fatali kɛ Rɔmu lɔ Klistfuɛ’m be nian be wun su kpa naan ‘bo kun yolɛ’ nun’n, be ninnge’m be su angunndan bulɛ ngunminngunmin’n w’a tanndanman be ɲrun naan b’a kwlá yiman Ɲanmiɛn i ayɛ.

 7. ?Cɛn cilɛ’n i su akplowa ng’ɔ tɔli’n yɛle mennin?

⁷ Pɔlu kannin sa kun ekun i ndɛ. I waan: ‘Sran wie bu kɛ cɛn’n wie ti kpa tra wie, sanngɛ wie ɲrun’n, i kwlaa ti kun.’ (Rɔmfuɛ Mun 14:5a). Moizi Mmla nun’n, be diman junman fi wunmiɛn-lolɛ-cɛn’n nun. Ajalɛ tulɛ bɔbɔ’n, ɔ ti sa tɛ yolɛ dan kpa (Ezipt Lɔ Tulɛ 20:8-10; Matie 24:20; Sa Nga Be Yoli’n 1:12). Sanngɛ kɛ Mmla’n i su dilɛ’n wieli’n, ciliɛ sɔ’m be kusu be wieli mlɔnmlɔn. Sanngɛ atrɛkpa’n, Klistfuɛ wie mun mɔ be ti Zuifu’n be liɛ’n, cɛn sɔ nun junman dilɛ’n, annzɛ lika mmuammua kɔlɛ’n, ɔ yoli kekle be sa nun. Afin, kannzɛ bɔbɔ wunmiɛn-lolɛ-cɛn’n w’a yoman Ɲanmiɛn i ɲrun i like cinnjin kun’n, sanngɛ be liɛ’n, atrɛkpa b’a yacimɛn i su dilɛ. ?I sɔ’n mɔ be yoli’n, ɔ ti like tɛ? Sɛ b’a jranman su fii kɛ Ɲanmiɛn yɛ ɔ seli kɛ be yo sɔ’n, i sɔ’n timan tɛ. Sanngɛ, Klistfuɛ’m be klun m’ɔ kwla titi be’n ti’n, Pɔlu seli kɛ: ‘Maan sran kun wun like ng’ɔ yo’n i wlɛ naan w’a yo.’—Rɔmfuɛ Mun 14:5b.

 8. ?Sɛ be waan bé bú be wiengu’m be angunndan’n naan b’a yo ninnge mun, ngue yɛ ɔ fataman kɛ be yo ɔ?

⁸ Kannzɛ bɔbɔ Pɔlu seli i niaan Klistfuɛ’m be amanniɛn su kɛ be tra be awlɛn be niaan nga be angunndan’n kwla sanngan’n be wun’n, sanngɛ be nga be mian be wiengu mun fii kɛ be di Moizi Mmla’n su naan b’a fite nun’n be liɛ’n, ɔ buli be fɔ kekle kpa. I wie yɛle kɛ, afuɛ 61 nun E Blɛ liɛ Nun (E.B.N.), Pɔlu klɛli Ebre’m be fluwa. Fluwa sɔ m’ɔ klɛli nun’n, ɔ yiyili nun weiin kleli Klistfuɛ nga be ti Zuifu’n be kɛ, Moizi Mmla’n leman ɲrun kun. Afin, Klistfuɛ’m be le like kpa kun mɔ sɛ be fa be wla’n guɛ i Zezi i wun m’ɔ fa kpɔli e ti’n i su’n, bé kwlá ɲɛ́n i ɔ.—Galasifuɛ Mun 5:1-12; Tit 1:10, 11; Ebre Mun 10:1-17.

9, 10. ?Ngue yɛ ɔ fataman kɛ Klistfuɛ’m be yo ɔ? Amun yiyi nun.

⁹ Kɛ nga Pɔlu fa kannin mɔ e wunnin i’n sa’n, sɛ e klunklo e fa ajalɛ ngunminngunmin naan be fɔnman Ɲanmiɛn mmla’n, bo kun yolɛ’n su saciman. I sɔ’n ti Pɔlu usali Klistfuɛ mɔ i angunndan sanngan’n kɛ: ‘Ɔ kpa’n, a fin ɔ liɛ nin mɔ a kan ɔ niaan i wun ndɛ ɔ?’ Kpɔkun Klistfuɛ nga i angunndan’n sannganman’n (atrɛkpa be nga be di nnɛn nga mmla tannin be dilɛ’n, annzɛ be di junman wunmiɛn-lolɛ-cɛn nun’n), ɔ usali be kusu kɛ: ‘?Ɔ kpa’n, a fin ɔ liɛ nin mɔ a yo i finfin’n niɔn?’ (Rɔmfuɛ Mun 14:10). Pɔlu i ndɛ sɔ’n kle kɛ ɔ fataman kɛ Klistfuɛ nga be angunndan sanngan’n, be kan be niaan’m be ndɛ. Be nga be angunndan liɛ’n sannganman’n kusu’n, ɔ fataman kɛ be yo be nga’m be finfin. I lɛ nun’n, ɔ fataman kɛ e kpli e di e wiengu’m be jɔlɛ. Kpɔkun nán maan e ‘bu e wun sran dan tra wafa nga e ti’n su.’—Rɔmfuɛ Mun 12:3, 18.

¹⁰ Ninnge’m be su angunndan ng’ɔ ti sɛsɛ kɛ e bu’n, Pɔlu yiyili nun seli kɛ: ‘Nán maan sran ng’ɔ di like’n kwlaa’n, ɔ yo sran ng’ɔ diman’n i finfin, yɛ nga kusu m’ɔ diman’n, nán maan ɔ kan sran ng’ɔ di’n i ndɛ, afin Ɲanmiɛn bɔbɔ a sɔ i nun.’ Kpɔkun ɔ kan guali su ekun kɛ: ‘Kɛ Klist kusu fa amun buli i niaan’n sa, i sɔ’n ba Ɲanmiɛn ɲrunɲan.’ Kɛ mɔ be nga be angunndan sanngan o, ɔ nin be nga be angunndan sannganman o, Ɲanmiɛn nin Klist be sɔ be nun klanman ti’n, ɔ fata kɛ e nian be ajalɛ’n su naan e ‘fa e wiengu bu e niaan.’ (Rɔmfuɛ Mun 14:3; 15:7). ?Wan yɛ ɔ kwla se kɛ ndɛ nga timɛn i klun su ɔ?

E wiengu’m be klolɛ kɛ e niaan sa’n ɔ yo maan andɛ e bo yo kun

11. ?Pɔlu blɛ su’n, sa mennin yɛ ɔ tɔli ɔ?

¹¹ Rɔmufuɛ’m be fluwa nga Pɔlu klɛli nun’n, kɛ ɔ́ kán sa sɔ’n i ndɛ’n, nn blɛ sɔ’n nun be nin a wunmɛn i wunsu le. Yɛle kɛ, kɛ sa sɔ’n yo’n, nn Zoova w’a nunnun aenguɛ laa’n i uflɛuflɛ, kpɔkun ɔ nin sran’m b’a tra aenguɛ uflɛ. I sɔ’n ti’n, aenguɛ uflɛ sɔ’n m’ɔ nin i fata kɛ be nian su be nanti siɛn’n, ɔ yoli kekle mannin sran wie mun. Andɛ’n, ɔ timan sɔ. Sanngɛ sa kɛ ngalɛ’n sa’n kwla tɔ cɛn wie.

12, 13. ?Ninnge mennin wie mun yɛ be yolɛ nun’n, ɔ fata kɛ andɛ Klistfuɛ’m be bu be wiengu angunndan naan b’a yo ɔ?

¹² Amun e fa sunnzun ase kun e nian. Ka naan e niaan bla kun w’a kaci Zoova i Lalofuɛ’n, asɔnun ng’ɔ o nun lɔ laa nun’n, be seli be kɛ be wlawla be wun ngbɛn, naan nán be wla kɔmin ɲanman, yɛ nán be kpɛ klɛyɔn. I sɔ’n ti’n, kannzɛ bɔbɔ aniaan bla’n ɔ si siɛn’n kɛ sɛ be yo i sɔ ninnge mun sɛsɛ su’n, Ɲanmiɛn Ndɛ’n bumɛn i fɔ’n, sanngɛ ɔ kwla yo kekle mɛn i kɛ ɔ yo i sɔ ninnge mun i wun wlawalɛ nun. Kɛ mɔ i sɔ’n kanman Biblu’n nun mmla’n ti’n, ɔ fataman kɛ sran kun se aniaan bla sɔ’n kɛ saan fii ɔ yo like nga i angunndan’n mɛnmɛn i atin kɛ ɔ yo’n. Aniaan bla sɔ’n kusu’n, ɔ fataman kɛ ɔ kɛn i niaan Klistfuɛ nga be fa ninnge sɔ mun wlawla be wun mɔ be angunndan’n buman be fɔ’n, be ndɛ.

¹³ Amun e fa sunnzun ase kun ekun. Wie liɛ’n, lika nga Klistfuɛ kun ɲinnin’n nun lɔ’n, nzan ng’ɔ bo sran’n, be bu i nɔnlɛ’n i like tɛ. Nanwlɛ ndɛ m’ɔ si i siɛn’n ti’n, w’a wun kɛ divɛn’n ti like kpa naan Zoova yɛ ɔ mannin naan i nɔnlɛ sɛsɛ su’n, ɔ timan like tɛ (Jue Mun 104:15). Ɔ kplin i sɔ liɛ’n su. Sanngɛ, kɛ mɔ nzan nɔnlɛ’n ɔ nunmɛn i nzuɛn nun laa’n ti’n, ɔ kpɛ i kpo kɛ ɔ nɔnman nzan’n wie fi. Sanngɛ kusu’n, ɔ kanman be nga be nɔn i sɛsɛ su’n be ndɛ. I lɛ nun’n, ɔ fa ndɛ nga Pɔlu kannin’n su. I waan: ‘Maan e yo sa ng’ɔ jɔ e wiengu klun mɔ maan e kwlaa é yó kpa’n.’—Rɔmfuɛ Mun 14:19.

14. ?Ninnge mennin nun yɛ Klistfuɛ’n kwla nian afɔtuɛ nga Pɔlu mannin Rɔmufuɛ mun’n i su nanti ɔ?

¹⁴ Ninnge wie mun ekun be yolɛ nun’n, ɔ fata kɛ e fa afɔtuɛ nga Pɔlu mannin Rɔmufuɛ mun’n i su e nanti. Klistfuɛ’m be asɔnun’n nun sran’m be ti fanunfanun. Kpɔkun, ɔ le sran kun i like m’ɔ klo i ɔ. Ɔ kwla yo be wun wlawlalɛ’n nun, annzɛ be ti yolɛ’n, annzɛ kusu be ti yilɛ’n nun. I lɛ nun kusu’n, Biblu’n kle wafa trele ng’ɔ fata kɛ Klistfuɛ kpa kwlaa ɔ yo’n. Ɔ maan, ɔ fataman kɛ e yi e ti’n annzɛ e yo e ti’n, annzɛ kusu e wlawla e wun kɛ mɛn’n nunfuɛ mɔ be ɲin yiman sran’n be fa yo’n sa (1 Zan 2:15-17). Ɔ fata kɛ Klistfuɛ’m be fa sie be ti nun titi kɛ, be ɲin su yiyilɛ’n nun bɔbɔ’n, be ti nglo nin asiɛ’n be Min’n i sran (Ezai 43:10; Zan 17:16; 1 Timote 2:9, 10). Sanngɛ ninnge kpanngban wie’m be nun’n, Klistfuɛ’m be kwla fa be tiawun ajalɛ m’ɔ timan tɛ’n.a

Nán e yo like ng’ɔ kwla saci e wiengu’n

15. ?Sa mennin yɛ Klistfuɛ kun i wiengu’m be kpa yolɛ’n ti’n, ɔ su yoman ɔn?

¹⁵ Ndɛ nga Pɔlu klɛ ko mannin Rɔmu lɔ Klistfuɛ mun’n, ɔ man e afɔtuɛ cinnjin kpa kun ekun. Ɔ ju cɛn wie’n, Klistfuɛ kun m’ɔ wun sa wlɛ kpa’n, ɔ kwla kpɛ i kpo se kɛ ɔ yoman ninnge wie mun, sanngɛ nn ninnge sɔ’m be fɔnman mmla’n. ?Ngue ti ɔ? Afin ɔ bu i kɛ sa sɔ’n i yolɛ’n kwla saci i wiengu. ?I lɛ nun’n, ngue yɛ ɔ fata kɛ e yo ɔ? Pɔlu waan: ‘Like nga sɛ an yo ɔ, ɔ ti kpa’n yɛ: nnɛn dilɛ o, nzan nɔnlɛ o, nán an yo like fi mɔ sɛ amun yo ɔ, ɔ saci amun niaan’n.’ (Rɔmfuɛ Mun 14:14, 20, 21). Sanngɛ, ‘e mɔ e wun sa sɔ’n i wlɛ kpa’n, maan e uka be nga be wunmɛn i wlɛ kpa’n, nán maan e yo like ng’ɔ jɔ e bɔbɔ e klun’n. Maan e kwlaa e yo like ng’ɔ jɔ e wiengu klun’n, i sɔ’n nun e ukɛ i maan ɔ yo kpa.’ (Rɔmfuɛ Mun 15:1, 2). Sɛ sa nga e waan é yó’n ɔ kwla saci e niaan Klistfuɛ wie’n, klolɛ mɔ e klo e niaan’n ti’n, é bú i angunndan kpɔkun e su yoman sa sɔ’n. Nzan nɔnlɛ nun’n, e kwla fa ajalɛ kunngba’n su. Klistfuɛ’m be kwla nɔn nzan m’ɔ bo be’n i sɛsɛ su kan. Sanngɛ sɛ i sɔ’n kwla saci i niaan’n, ɔ su seman kɛ kɛ m’ɔ le atin nɔn ti’n, saan fii ɔ́ nɔ́n.

16. ?Wafa sɛ yɛ e jasin fɛ’n bowlɛ lɔ’n, e kwla kle kɛ e bu e wiengu’m be angunndan ɔn?

¹⁶ E nin e wiengu nga be timan Klistfuɛ’n e tranlɛ nun’n, e kwla fa afɔtuɛ kunngba’n su. Amun e fa sunnzun ase kun. Klɔ wie’m be su’n, lɔfuɛ’m be fa cɛn kun be yo be cɛn tɛ. Sɛ klɔ sɔ’n su yɛ e tran’n, kɛ ɔ ko yo naan y’a sannganman lɔfuɛ’m be angunndan’n naan i sɔ’n w’a tanndanman e jasin fɛ’n bolɛ’n i ɲrun’n ti’n, ɔ fata kɛ e mian e ɲin naan y’a diman junman fi cɛn sɔ’n nun naan e mantanfuɛ’m b’a faman ya. Sa’n kun ekun yɛle kɛ, Klistfuɛ kun m’ɔ ti aɲanbeunfuɛ’n, ɔ kwla ko tran klɔ kun mɔ be sa mian jasin fɛ’n bofuɛ wun’n mɔ sanngɛ lɔfuɛ’m be ti yalɛfuɛ’n, i su. I lɛ nun’n, ɔ kwla kle kɛ ɔ bu i wiengu mɔ be leman wie’n be angunndan, kpɔkun ɔ kɛn i wun ase i wun wlawlalɛ’n nun’n, annzɛ like kwlaa ng’ɔ le i m’ɔ fa di mɛn’n i nun.

17. ?Ngue ti yɛ ɔ ti kpa kɛ ninnge nga e yo be’n be nun’n, e bu e wiengu’m be angunndan ɔn?

¹⁷ ?Kɛ be se ‘be nga be wun sa wlɛ kpa’n,’ be kɛ be yo be ninnge mun kɛ ngalɛ’n sa’n, i su ɔ? Ɛɛn, amun e fa sunnzun ase nga naan y’a wun i wlɛ kpa. E su cisan loto nun akpɔ dan kun su kpɔkun y’a wun ba kanngan wie mun mɔ be su nanti akpɔ’n i ba’n su’n. ?É sé kɛ, kɛ mɔ e ndɛ yo fɛ’n ti’n, é císan loto nun kekle é sín kɔ́? Nanwlɛ, e su yomɛn i sɔ mlɔnmlɔn. Sanngɛ kɛ ɔ ko yo naan y’a siman ba sɔ mun’n ti’n, é kɔ́ blɛblɛ. Wie liɛ’n, i sɔ kunngba’n yɛ e nin e wiengu Klistfuɛ mun, annzɛ be nga be timan Klistfuɛ’n e tranlɛ nun’n, ɔ fata kɛ e yo ɔ. Yɛle kɛ, ninnge wie’m be yolɛ nun’n, sɛ e yo be’n, ndɛ fi baman nun. Kpɔkun ɔ fɔnman Biblu’n nun mmla wie fi wun. Sanngɛ, sɛ like sɔ’n i yolɛ’n kwla saci e niaan’n, klolɛ mɔ e klo i’n ti’n, ɔ fata kɛ e bu i angunndan (Rɔmfuɛ Mun 14:13, 15). E bo m’ɔ fata kɛ ɔ yo kun’n, ɔ nin Ɲanmiɛn Sielɛ Blɛ i ndɛ kanlɛ’n be ti cinnjin tra e bɔbɔ e ninnge nga e le atin e yo be mun.

18, 19. (a) ?Sɛ e waan é bú e wiengu’m be angunndan’n, wafa sɛ yɛ é nían Zezi i ajalɛ’n su ɔ? (b) ?Sa mennin yolɛ’n nun yɛ e kwlaa e bo ti kun ɔn? ?Kpɔkun kosan mennin mun yɛ é wá kókó be su yalɛ like suanlɛ ng’ɔ́ bá lɛ’n nun ɔn?

¹⁸ Kɛ e yo sɔ’n, ajalɛ kpafuɛ mɔ be mannin e’n i su yɛ e nian ɔn. Pɔlu seli kɛ: ‘Klist w’a yoman like ng’ɔ jɔ i bɔbɔ i klun’n, yɛle kɛ be klɛli i kɛ: “Nzowa nga be ko kpɛ wɔ’n, min yɛ be fa kpɛli min ɔn.”’ Zezi kloli kɛ ɔ́ fɛ́ i nguan’n yí e ti tɛ. E kusu’n, kɛ ɔ ko yo naan e nin ‘be nga be wunman sa wlɛ kpa’n’ e bo w’a yo kun naan y’a yi Ɲanmiɛn i ayɛ’n ti’n, sɛ ɔ fata kɛ e yaci ninnge wie mun mɔ e le atin e yo be’n be yolɛ’n, maan e yaci. Nanwlɛ, kɛ e niaan Klistfuɛ nga be wunman sa wlɛ’n be ti’n e kaci e ninnge’m be yolɛ’n, annzɛ e tannin e wun ninnge wie mun mɔ be timan tɛ’n be yolɛ’n, e kle kɛ e ‘angunndan’n yo kun kɛ Klist Zezi bɔbɔ kle e kɛ e yo’n sa.’—Rɔmfuɛ Mun 15:1-5.

¹⁹ Kannzɛ bɔbɔ e angunndan’n kwla yo ngunminngunmin ninnge nga be yolɛ’n ɔ fɔnman Ɲanmiɛn mmla’n be su’n, sanngɛ maan e bo yo kun Ɲanmiɛn sulɛ’n nun (1 Korɛntfuɛ Mun 1:10). Wafa nga kɛ e kpɔfuɛ’m be tanndan e Ɲanmiɛn sulɛ’n i ɲrun’n, e bo yo kun e tɛ su’n, i nun yɛ bo kun yolɛ sɔ’n i ɲin fite kpa ɔ. Biblu’n waan e kpɔfuɛ sɔ’n ti sran wie mɔ e simɛn i ɔ. Kpɔkun ɔ wla e su nun kɛ e nian e wun su ‘sran mɔ e simɛn i nɛn’n’ i lika (Zan 10:5). ?Wafa sɛ yɛ e kwla wun sran sɔ mɔ e simɛn i’n i wlɛ ɔ? ?Ajalɛ mennin yɛ ɔ fata kɛ e fɛ i lika ɔ? Like suanlɛ ng’ɔ́ bá lɛ’n wá tɛ́ kosan sɔ’m be su.

[Ja ngua lɛ ndɛ’n]

?Wafa sɛ yɛ amún tɛ́ kosan’m be su ɔ?

• ?Ngue ti yɛ ɔ fataman kɛ angunndan ngunminngunmin mɔ e le i ninnge’m be yolɛ’n nun’n, ɔ tanndan e bo kun yolɛ’n i ɲrun ɔn?

• ?Ngue ti yɛ ɔ fata kɛ e bu e wiengu’m be angunndan’n niɔn?

• ?Sa mennin wie’m be nun yɛ e kwla fa bo kun yolɛ’n i su afɔtuɛ nga Pɔlu mannin’n i su andɛ ɔ? ?Kpɔkun, ngue ti yɛ ɔ fata kɛ e yo sɔ’n niɔn?