Be nin famiɛn dilɛ’n fata

‘I sɔ’n kle e weiin kpa kɛ Ɲanmiɛn yo sa i nuan su. Ɔ bu amun kɛ amun nin i famiɛn dilɛ’n wie fata.’—2 TƐS. 1:5.

1, 2. ?Jɔlɛ dilɛ benin yɛ Ɲanmiɛn w’a siesie ɔ? ?Yɛ wan yɛ ɔ́ dí jɔlɛ sɔ’n niɔn?

AFUƐ nga be flɛ i 50 nun’n, nn akoto Pɔlu o Atɛni lɔ. Ɔ wunnin kɛ klɔ sɔ’n sufuɛ’m be ti amuɛn sɔfuɛ ngunmin kokoko. I sɔ’n boli i wla dan. Ɔ maan, ɔ boli jasin fɛ’n kleli be ngwlɛlɛ su. I ndɛ’n i atabo’n nun’n, ɔ kannin ndɛ kun mɔ i ndɛ tiefuɛ mɔ be ti amuɛn sɔfuɛ’n be fali be ɲin sieli su ɔ. Ɔ seli kɛ: ‘Siɛn’n, Ɲanmiɛn kan kleli be kwlaa kɛ be kaci be nzuɛn’n. Yɛle kɛ w’a sie cɛn kun mɔ sɛ cɛn sɔ’n ju’n, bé fá sran mɔ be o mɛn’n nun’n be kwlaa bá sran m’ɔ sieli i’n i ja su, ɔ́ dí be jɔlɛ weinwein. Kɛ Ɲanmiɛn cɛnnin sran sɔ’n, ɔ ti nzɔliɛ m’ɔ kle sran’m be kwlaa kɛ ɔ sieli i jɔlɛ difuɛ sakpa.’—Yol. 17:30, 31.

² Klɔ sran’m be jɔlɛ mɔ Ɲanmiɛn w’a siesie i kɛ be di be’n, ɔ ti like cinnjin m’ɔ fata kɛ e bu su akunndan ɔn. Sran nga ɔ́ wá dí jɔlɛ sɔ’n, Pɔlu w’a bomɛn i dunman ndɛ ng’ɔ kɛnnin i Atɛni lɔ’n nun. Sanngɛ e si kɛ sran sɔ’n yɛle Zezi Klist mɔ Ɲanmiɛn cɛnnin i’n. Jɔlɛ sɔ mɔ Zezi wá dí’n, ɔ́ yó sran wie’m be wie like, sanngɛ ɔ́ yó wie’m be kusu be nguan like.

 3. ?Ngue ti yɛ Zoova nin Abraamu be trali aenguɛ ɔ? ?Yɛ aenguɛ sɔ’n i su kpɛnlɛ nun’n, wan mun yɛ be sa o nun cinnjin kpa ɔ?

³ Jɔlɛ Dilɛ Cɛn sɔ’n dí afuɛ 1.000. Jɔlɛ dilɛ sɔ’n nun’n, Zezi m’ɔ ti Ɲanmiɛn Sielɛ’n su famiɛn’n, yɛ ɔ́ yó Zoova i ja nun jranfuɛ ɔ. Sanngɛ nɛ́n i ngunmin yɛ ɔ́ dí sran’m be jɔlɛ’n niɔn. Zoova kpali klɔ sran wie mun kɛ be nin Zezi be di famiɛn naan be di sran’m be jɔlɛ afuɛ akpi sɔ’n m’ɔ ti i ɲrun kɛ cɛn kun sa’n i nun. (An nian Lik 22:29, 30 nun.) I afuɛ ko ju 4.000 yɛ, Zoova siesieli Jɔlɛ Dilɛ Cɛn sɔ’n i wun ninnge mun. Yɛle kɛ ɔ nin Abraamu m’ɔ yoli i sufuɛ dan’n, be trali aenguɛ kun. (An kanngan Bo Bolɛ 22:17, 18 nun.) Aenguɛ sɔ’n i su dilɛ’n boli i bo afuɛ nga be flɛ i 1943 nun ka naan y’a ju Zezi blɛ su’n. Nanwlɛ, like nga aenguɛ sɔ’n ti’n sran’m bé wá ɲɛ́n i’n, Abraamu w’a wunmɛn i wlɛ kpa. Sanngɛ e wun kɛ jɔlɛ nga Ɲanmiɛn waan ɔ́ dí sran mun’n, Abraamu i anunman’m be sa o nun cinnjin kpa.

4, 5. (a) ?Wan yɛ ɔ ti Abraamu i anunman’m be nun cinnjinfuɛ’n niɔn? ?Yɛ Ɲanmiɛn Sielɛ’n i su ndɛ benin yɛ ɔ kannin ɔn? (b) ?Blɛ benin nun yɛ Ɲanmiɛn i sufuɛ’m be kwla lafili su kɛ bé kwlá yó Ɲanmiɛn Sielɛ’n i nun famiɛn ɔn?

⁴ Zezi yɛ ɔ yoli Abraamu i anunman’m be nun cinnjinfuɛ’n niɔn. Afuɛ nga be flɛ i 29 nun’n, kɛ Ɲanmiɛn wawɛ’n jrali m’ɔ wa trannin Zezi su’n, yɛ ɔ kacili Mɛsi’n annzɛ Klist’n niɔn. (Gal. 3:16) Kɛ ɔ yoli sɔ’n, Zezi fali afuɛ nsan nin sin nga be sinnin’n, ɔ boli Ɲanmiɛn Sielɛ jasin fɛ’n kleli Zuifu mun. Kɛ be trali Zan m’ɔ ti batɛmu yofuɛ’n, Zezi kleli kɛ sran wie’m bé yó Ɲanmiɛn Sielɛ’n i nun famiɛn wie. Ɔ seli kɛ: ‘Kɛ ɔ fin Zan batɛmu yofuɛ’n i blɛ su lele m’ɔ́ fá jú ndɛ’n, be fa be wun man Ɲanmiɛn kekle su, yɛ yakpafuɛ mun yɛ be yo maan Ɲanmiɛn sie be ɔ.’—Mat. 11:12.

⁵ Ka naan Zezi w’a kan be nga ‘Ɲanmiɛn síe be’ ɲanmiɛn su lɔ’n be ndɛ’n, ɔ seli kɛ: ‘Nanwlɛ, be kwlaa nga bla wuli be’n, be nun wie fi nunman lɛ mɔ i dan tra Zan batɛmu yofuɛ’n niɔn. Sanngɛ be nga Ɲanmiɛn sie be’n be nun kaanfuɛ’n i dan trɛ i.’ (Mat. 11:11) ?Ngue ti yɛ Zezi seli sɔ ɔ? Afin kɛ ɔ fin afuɛ nga be flɛ i 33 nun Pantekɔtu nun’n, mɔ Ɲanmiɛn wawɛ’n wluli Ɲanmiɛn i sufuɛ’m be nun’n, yɛ Ɲanmiɛn i sufuɛ’m be kwla lafili su kɛ bé kwlá dí famiɛn Ɲanmiɛn Sielɛ’n nun ɔn. Kɛ ɔ yo sɔ’n, nn Zan batɛmu yofuɛ’n w’a dun mmua w’a wu.—Yol. 2:1-4.

Ɲanmiɛn buli Abraamu i anunman mun sran kpa

6, 7. (a) ?Wafa sɛ yɛ Abraamu i anunman’m be sɔnnin kɛ ‘ɲanmiɛn su lɔ nzraama mun sa’ ɔ? (b) ?Mmlusuɛ benin yɛ Abraamu ɲɛnnin i ɔ? ?Yɛ mmlusuɛ benin yɛ i anunman’m be ɲɛnnin i wie ɔ?

⁶ Ɲanmiɛn seli Abraamu kɛ i anunman’m bé trɛ́ yɛ ‘bé sɔ́n kɛ ɲanmiɛn su lɔ nzraama mun sa,’ annzɛ kɛ jenvie nuan aunɲan’n sa. (Bob. 13:16; 22:17) Ndɛ sɔ’n i bo’n yɛle kɛ Abraamu blɛ su’n, sran’m be kwlá siman be nga bé yó i anunman sɔ’n be nuan’n. Sanngɛ kasiɛn nun’n, Ɲanmiɛn ninnge’m be nun’n, sran’m be wa sili Abraamu i anunman sɔ’m be nuan. Be nga bé úka Zezi su’n, bé yó sran 144.000.—Ngl. 7:4; 14:1.

⁷ Ɲanmiɛn Ndɛ’n kan Abraamu i Ɲanmiɛn sulafilɛ’n i ndɛ. Ɔ se kɛ: ‘Ndɛ nga Zoova kɛnnin i lɛ’n, Abraamu lafili su, ɔ maan Zoova buli i sran kpa’ (Bob. 15:5, 6) Nanwlɛ, klɔ sran kwlaa yo sa tɛ. (Zak 3:2) Sanngɛ kɛ mɔ Abraamu lafili Ɲanmiɛn su dan’n ti’n, Zoova buli i sran kpa yɛ ɔ flɛli i kɛ i janvuɛ bɔbɔ. (Eza. 41:8) Be nga Ɲanmiɛn ninnge’m be nun’n, be nin Zezi be ti Abraamu i anunman’n, be kusu Ɲanmiɛn bu be sran kpa wie. Yɛ mmlusuɛ nga be ɲɛn i sɔ’n su’n, i dan’n tra nga Abraamu ɲɛnnin i’n lele.

 8. ?Mmlusuɛ benin yɛ Abraamu i anunman’m bé ɲɛ́n i ɔ?

⁸ Ɲanmiɛn bu Klistfuɛ nga i wawɛ’n kpali be sieli be ngunmin’n be sran kpa. Afin be lafili e ti kpɔlɛ tɛ nga Zezi yili’n su. (Rɔm. 3:24, 28) Zoova ɲrun’n, be yacili be sa tɛ’n cɛli be. Ɔ maan, ɔ kwla fɛ i wawɛ’n gua be su maan be kaci Ɲanmiɛn i mma mun, yɛ be kaci Zezi Klist i niaan mun. (Zan 1:12, 13) Be yo aenguɛ uflɛ’n i nunfuɛ. Ɔ maan, be kaci nvle uflɛ kun. Nvle sɔ’n yɛle ‘Izraɛlifuɛ nga be ti Ɲanmiɛn liɛ sakpa’n.’ (Gal. 6:16; Lik 22:20) Nanwlɛ, i sɔ’n ti cenjele like dan! Like sɔ mɔ Ɲanmiɛn yoli mannin Klistfuɛ nga i wawɛ’n kpali be sieli be ngunmin’n ti’n, be lafiman su kɛ bé ɲán anannganman nguan asiɛ’n su wa. Be liɛ’n like nga be ɲin o i sin’n, yɛle kɛ Jɔlɛ Dilɛ Cɛn nun’n, be nin Zezi bé dí sran’m be jɔlɛ, kpɛkun be nin i bé dí famiɛn ɲanmiɛn su lɔ. Aklunjuɛ nga bé wá dí’n, ɔ́ yó dan.—An kanngan Rɔmfuɛ Mun 8:17 nun.

9, 10. (a) ?Blɛ klikli nga Ɲanmiɛn wawɛ’n kpali Klistfuɛ mun sieli be ngunmin’n, yɛle benin? ?Yɛ ngue yɛ ɔ nin i fatali kɛ be yo ɔ? (b) ?Wafa sɛ yɛ Ɲanmiɛn uka Klistfuɛ ng’ɔ kpa be sie be ngunmin’n mun ɔn?

⁹ Afuɛ nga be flɛ i 33 nun Pantekɔtu nun’n, sran wie mun mɔ be su Ɲanmiɛn kpa’n, be kwla yoli be nga Jɔlɛ Dilɛ Cɛn nun’n, be nin Zezi bé dí famiɛn’n be nunfuɛ. Ɲanmiɛn wawɛ’n wluli Zezi i sɔnnzɔnfuɛ kɔe 120 be nun. Be yɛ be ti Klistfuɛ nga Ɲanmiɛn wawɛ’n kpa be sie be ngunmin’n be nun klikli mun ɔn. Sanngɛ sɛ é kwlá sé’n, nn ɔ ti kɛ b’a bo be ɲanmiɛn su lɔ kɔlɛ’n i atin’n falɛ’n bo sa. Kɛ ɔ fin lɛ’n, kannzɛ bɔbɔ Satan klé be ɲrɛnnɛn sɛ’n, ɔ nin i fata kɛ be su Zoova titi. Sɛ kunlɛ bɔbɔ yɛ bé kún be’n, ɔ fata kɛ be tra be awlɛn naan b’a kwla ɲan nguan m’ɔ ti kɛ famiɛn kle sa’n ɲanmiɛn su lɔ.—Ngl. 2:10.

¹⁰ I sɔ’n ti’n, Ɲanmiɛn Ndɛ’n, ɔ nin Klistfuɛ’m be asɔnun’n yɛ Zoova fa wla Klistfuɛ nga Ɲanmiɛn wawɛ’n kpali be sieli be ngunmin’n be fanngan, yɛ ɔ fa man be afɔtuɛ ng’ɔ nin i fata’n niɔn. I wie yɛle ndɛ nga akoto Pɔlu klɛli ko mannin Klistfuɛ nga Ɲanmiɛn wawɛ’n kpali be sieli be ngunmin mɔ be o Tɛsaloniki lɔ’n. Ɔ seli kɛ: ‘E yoli amun kwlakwla kɛ sran kun fa yo i mma mun’n sa, afin e mannin amun afɔtuɛ, e wlali amun fanngan, yɛ e kan kleli amun kɛ an yo sa ng’ɔ ti Ɲanmiɛn m’ɔ flɛli amun kɛ an di i famiɛn’n wie naan an ɲan ɲrun kɛ i liɛ’n sa’n, i klun sa’n.’—1 Tɛs. 2:11, 12.

11. ?Ngue yɛ Zoova maan be klɛli mannin ‘Izraɛlifuɛ nga be ti Ɲanmiɛn liɛ sakpa’n’ mun ɔn?

¹¹ Kɛ Zoova kpali Klistfuɛ nga bé kɔ́ ɲanmiɛn su’n be nun klikli mun’n, m’ɔ dili afuɛ kɔe 60, ɔ wunnin kɛ junman nga Zezi dili i asiɛ’n su wa’n, ɔ nin wafa nga ɔ nin Klistfuɛ klikli’m be trannin’n, ɔ nin afɔtuɛ ng’ɔ mannin be’n, ɔ nin i fata kpa kɛ be klɛ be su ndɛ be sie. I sɔ’n ti’n, Zoova maan be klɛli Ɲanmiɛn Ndɛ’n i bue kun Glɛki nun’n be fa ukali nga be dun mmua klɛli i Ebre nun’n i su. I nun mɔ Izraɛli nvle’n te yo Ɲanmiɛn i liɛ klonglo’n, i ti yɛ Ɲanmiɛn maan be klɛli Ɲanmiɛn Ndɛ’n i bue Ebre nun ɔn. Yɛ Ɲanmiɛn Ndɛ’n i bue nga be klɛli i Glɛki nun’n kusu, ‘Izraɛlifuɛ nga be ti Ɲanmiɛn liɛ sakpa’n’ be ti yɛ Ɲanmiɛn maan be klɛli ɔ. Ɲanmiɛn wawɛ m’ɔ guali sran sɔ’m be su’n ti, be ti Klist i niaan yɛ Ɲanmiɛn ninnge’m be nun’n, be ti Ɲanmiɛn mma mun. I sɔ’n kleman kɛ be nga be timan Izraɛlifuɛ’n, sɛ be suan Ɲanmiɛn Ndɛ’n i bue nga be klɛli i Ebre nun’n i nun like’n, be su ɲanman su mmlusuɛ dan. Klistfuɛ nga be nunman be nga Ɲanmiɛn kpali be sieli be ngunmin be nun’n, be kusu sɛ be suan Ɲanmiɛn Ndɛ’n i bue nga be klɛli i Glɛki nun’n i nun like’n, naan be niɛn i nun afɔtuɛ’m be su nanti’n, bé ɲɛ́n i sɔ yolɛ’n su mmlusuɛ dan kpa.—Kanngan 2 Timote 3:15-17 nun.

12. ?Ngue ndɛ yɛ Pɔlu fa kpɛnnin Klistfuɛ nga Ɲanmiɛn kpali be sieli be ngunmin’n be wla ɔ?

¹² Kɛ ɔ ko yo naan Klistfuɛ klikli’m b’a kwla ɔ ɲanmiɛn su lɔ’n, i ti yɛ Ɲanmiɛn buli be sran kpa yɛ ɔ fɛli i wawɛ’n guali be su ɔ. Ɲanmiɛn i wawɛ m’ɔ kpali be sieli be ngunmin’n, ɔ kleman kɛ blɛ mɔ be te o asiɛ’n su wa’n, be di famiɛn be niaan nga Ɲanmiɛn wawɛ’n kpali be sieli be ngunmin wie’n be su. Klistfuɛ klikli’m be nun wie’m be ɲin kpali i sɔ’n su. Ɔ maan, be yoli be wun dandan be niaan nga be o asɔnun’n nun’n be su. I sɔ’n ti’n, Pɔlu seli be kɛ: ‘Kɛ e o yɛ’n, like kwlaa nga an kunndɛ’n, amun a ɲɛn i, amun a ɲan amun wun! An su di famiɛn e sin! Sɛ an di famiɛn’n, ɔ yo e fɛ, maan e kusu e di wie!’ (1 Kor. 4:8) Ɔ maan, Pɔlu kpɛnnin i blɛ su Klistfuɛ nga Ɲanmiɛn kpali be sieli be ngunmin’n be wla kɛ: ‘Nán kɛ e waan é mían amun Ɲanmiɛn atin’n su ti ɔ, sanngɛ e klo kɛ é úka amun é dí junman naan amun klun jɔ.’—2 Kor. 1:24.

Be nuan nga be boli’n su yia

13. ?Klistfuɛ klikli’m be blɛ su’n, kɛ afuɛ nga be flɛ i 33 sinnin’n, wafa sɛ yɛ be nga Ɲanmiɛn kpa be sie be ngunmin’n be kpalɛ’n ɔli i ɲrun ɔn?

¹³ Nán Klistfuɛ klikli’m be blɛ su yɛ Ɲanmiɛn kpali sran 144.000 nga bé kɔ́ ɲanmiɛn su’n be ngba ɔ. Klistfuɛ sɔ’m be kpalɛ’n boli i bo akoto’m be blɛ su, yɛ kɛ ɔ́ kɔ́ i ɲrun’n, be nga Ɲanmiɛn kpali be’n, be nuan’n wa kannin ase. Sanngɛ afuɛ ya kpɔlɛ nga bé bɛ́ i sin’n be nun’n, lele m’ɔ́ fá jú e blɛ nga su’n, Ɲanmiɛn te kpa Klistfuɛ wie mun te sie be ngunmin. (Mat. 28:20) Kasiɛn nun’n, kɛ Zezi boli famiɛn dilɛ’n bo afuɛ nga be flɛ i 1914 nun’n, Klistfuɛ nga bé kɔ́ ɲanmiɛn su’n be kpalɛ’n wa ɔli i ɲrun ndɛndɛ kpa.

14, 15. ?Be nga bé kɔ́ ɲanmiɛn su’n be kpalɛ nun’n, ngue yɛ e wun i e blɛ liɛ’n su ɔ?

¹⁴ Like klikli nga Zezi yoli’n, yɛle kɛ be kwlaa nga be tanndan Ɲanmiɛn i sielɛ’n i ɲrun ɲanmiɛn su lɔ’n, ɔ fuannin be. (An kanngan Sa Nglo Yilɛ 12:10, 12 nun.) I sin’n, kɛ ɔ ko yo naan be nga be nin i kó dí famiɛn’n, be nuan’n w’a ju sran 144.000 ti’n, ɔ fɛli i ɲin sieli be onga’n be yialɛ’n su. Afuɛ nga be flɛ i 1935 nun’n, nn Klistfuɛ sɔ’m be nuan’n su wa yia. Yɛ be nga be sɔ jasin fɛ’n nun klanman’n be nun sunman be kunndɛman kɛ bé kɔ́ ɲanmiɛn su. Ɲanmiɛn wawɛ’n w’a kleman be be awlɛn’n nun lɔ kɛ be ti Ɲanmiɛn i wa. (An nian Rɔmfuɛ Mun 8:16 nun.) I kpa’n be liɛ’n be wunnin i wlɛ kɛ be ti “bua’m be wie” mun be nunfuɛ. Be lafi su kɛ bé ɲán anannganman nguan asiɛ’n su wa mɛn klanman’n nun. (Zan 10:16) Ɔ maan, kɛ ɔ fɛ i afuɛ nga be flɛ i 1935 nun’n, jasin fɛ’n bolɛ nun’n, like cinnjin nga jasin bofuɛ’m be fa be ɲin sie su’n, yɛle ‘sran kpanngban kpa’m’ be yialɛ’n. Akoto Zan wunnin sran sɔ mun aolia nun. Be fin “afɛ dan’n” nun fiteli.—Ngl. 7:9, 10, 14.

¹⁵ Sanngɛ kɛ blɛ nga ɔ fɛ i afuɛ nga be flɛ i 1930 nun lele fa ju afuɛ nga be flɛ i 1939 nun’n sinnin’n, Ɲanmiɛn kpali Klistfuɛ wie mun ekun kɛ bé kɔ́ ɲanmiɛn su. ?Yɛ ngue ti ɔ? Wienun ɔn, sran sɔ’m be sinnin be nga Ɲanmiɛn kpali be sieli be ngunmin mɔ be kpɔcili i’n be osu. (An nian Sa Nglo Yilɛ 3:16 nun.) Pɔlu bɔbɔ kannin Klistfuɛ wie m’ɔ si be kpa’n, mɔ be yacili nanwlɛ atin’n be ndɛ. (Fil. 3:17-19) ?Yɛ wan mun yɛ Zoova fa be kaci i sɔfuɛ mun ɔn? I sɔ’n o Zoova bɔbɔ i sa nun. Sanngɛ ɔ ti su kɛ ɔ su faman be nga be fali be wun mɛnnin i ɔ nin a cɛman’n. Ɔ maan, saan be nga blɛ sunman nun be jrannin kekle ɲrɛnnɛn’m be ɲrun mɔ b’a kpɔcimɛn i’n, yɛ ɔ́ kpá be ɔ. Kɛ Zezi táka e Wla Kpɛnlɛ Cɛn’n i bo kɔlɛ’n, i sɔnnzɔnfuɛ nga ɔ kannin ndɛ kleli be’n, i sɔ yɛ be yoli ɔ.a—Lik 22:28.

16. ?Like nga Klistfuɛ nga be kpali be sieli be ngunmin’n bé wá ɲɛ́n i’n, i su ye benin yɛ e si ɔ? ?Yɛ ngue yɛ e kwla lafi su ɔ?

¹⁶ Sanngɛ kɛ e niɛn i sa’n, kɛ ɔ fɛ i afuɛ nga be flɛ i 1930 lele afuɛ nga be flɛ i 1939 nun’n, nán Klistfuɛ nga Ɲanmiɛn kpa be sie be ngunmin’n be ngba yɛ bé sín be nga be kpɔcili Ɲanmiɛn’n be osu ɔ. Zoova siesieli kɛ mɛn nga i blɛ kasiɛn’n nun lele m’ɔ́ fá jú “Babilɔni klɔ dan’n” i nunnunlɛ nun’n, maan Klistfuɛ nga ɔ kpali be sieli be ngunmin’n, be nun wie’m be tran e afiɛn.b (Ngl. 17:5) Yɛ e kwla lafi su kɛ sran 144.000 be nuan’n ɔ́ yía blɛ nga Zoova bɔbɔ siesieli’n i nun. Yɛ be kwlaa bé kó dí famiɛn Ɲanmiɛn i awa’n nun. Asa ekun’n, Ɲanmiɛn Ndɛ’n se kɛ sran kpanngban kpa mɔ be te sɔn te kɔ’n, be akpasua’n, ɔ́ sú Ɲanmiɛn titi. E kwla lafi ndɛ sɔ’n su wie. Ɔ cɛ kaan’n, sran kpanngban sɔ’m be akpasua’n ɔ́ wá ‘fín afɛ dan’n’ nga ɔ́ wá tɔ́ Satan i mɛn’n su’n i nun fíte. Yɛ ɔ́ wlú Ɲanmiɛn i mɛn uflɛ’n nun aklunjuɛ su.

Ɲanmiɛn i awa’n nun famiɛn’m be nuan’n w’a wie yia

17. ?Kɛ nga 1 Tɛsalonikfuɛ Mun 4:15-17 nin Sa Nglo Yilɛ 6:9-11 be fa kan sa’n, Klistfuɛ nga Ɲanmiɛn kpali be sieli be ngunmin mɔ be suli Ɲanmiɛn lele be wie cɛn’n, ngue yɛ be ɲɛnnin ɔn?

¹⁷ Kɛ ɔ fɛ i Klistfuɛ klikli’m be blɛ su afuɛ nga be flɛ i 33 nun lele andɛ’n, Klistfuɛ nga Ɲanmiɛn kpali be sieli be ngunmin’n be nun sunman be kleli kɛ be lafi Ɲanmiɛn su kpa, yɛ kannzɛ bɔbɔ bé kún be’n, sanngɛ be jrannin kekle. Kɛ é sé yɛ’n, Klistfuɛ sɔ’m be nin famiɛn dilɛ’n fata. Yɛ kɛ Ɲanmiɛn sieli Klist famiɛn’n, w’a cɛman yɛ be ɔli ɲanmiɛn su ɔ.—An kanngan 1 Tɛsalonikfuɛ Mun 4:15-17; Sa Nglo Yilɛ 6:9-11 be nun.

18. (a) ?Ngue yɛ be nga be kpali be sieli be ngunmin mɔ be te o asiɛ’n su wa’n be lafi su ɔ? (b) ?Akunndan benin yɛ be nga be ti bua’m be wie’m be nunfuɛ’n be bu i be niaan nga Ɲanmiɛn kpali be sieli be ngunmin’n be wun ɔn?

¹⁸ Klistfuɛ nga be kpali be sieli be ngunmin mɔ be te o asiɛ’n su wa’n, be lafi su kpa kɛ sɛ be su Ɲanmiɛn kpa titi’n, ɔ cɛ kaan’n, bé kɔ́ ɲanmiɛn su. Klistfuɛ nga be kpali be sieli be ngunmin’n be Ɲanmiɛn sulafilɛ’n, ɔ yo bua’m be wie’m be nunfuɛ mun mɔ be sɔnnin kpa’n, be ɲɛnmɛn. Yɛ ndɛ nga akoto Pɔlu kannin mannin Klistfuɛ nga be kpali be sieli be ngunmin mɔ be o Tɛsaloniki lɔ’n, ɔ ti bua’m be wie’m be nunfuɛ’m be klun su. Pɔlu seli kɛ: ‘E fa amun di e nuan Ɲanmiɛn i asɔnun’m be nun, afin yalɛ nga be kle amun’n nin ɲrɛnnɛn nga an wun i’n, i kwlaa sɔ’n nun’n, an tra amun awlɛn an lafi Klist su. I sɔ’n kle e weiin kpa kɛ Ɲanmiɛn yo sa i nuan su. Ɔ́ bú amun kɛ amun nin i famiɛn dilɛ’n wie fata, afin i ti yɛ an wun ɲrɛnnɛn ɔn.’ (2 Tɛs. 1:3-5) Be nga be kpali be sieli be ngunmin’n be onga nga be o asiɛ’n su wa’n, kɛ be nun kasiɛn’n ko wu’n, Ɲanmiɛn i awa’n i nunfuɛ’m be nuan’n ɔ́ yía ɲanmiɛn su lɔ. Yɛ i sɔ’n mán be nga be o ɲanmiɛn su lɔ’n nin be nga be o asiɛ’n su’n be kwlaa be aklunjuɛ.

[Ja ngua lɛ ndɛ mun]

?Amun kwla yiyi nun?

• ?Ndɛ benin yɛ Ɲanmiɛn kan kleli Abraamu m’ɔ kan Jɔlɛ Dilɛ Cɛn’n niɔn?

• ?Ngue ti yɛ Ɲanmiɛn buli Abraamu i sran kpa ɔ?

• ?Kɛ Ɲanmiɛn bu Abraamu i anunman’m be sran kpa’n, ngue yɛ be ɲɛn i nun ɔn?

• ?Ngue yɛ Klistfuɛ’m be kwlaa be lafi su ɔ?

[Foto, bue 24]

Zezi wlɛli i sɔnnzɔnfuɛ’m be fanngan kɛ be yo yakpafuɛ yɛ be yo maan Ɲanmiɛn sie be.

[Foto, bue 25]

Afuɛ nga be flɛ i 33 i Pantekɔtu nun’n, Zoova boli Abraamu i anunman’m be bue nɲɔn su’n i nunfuɛ’m be kpalɛ’n bo.

[Foto mun, bue 26]

Mɛn’n i blɛ kasiɛn’n nun’n, kɛ Klistfuɛ nga be kpali be sieli be ngunmin’n be nun wie’m be te o bua’m be wie’m be afiɛn’n, i sɔ’n yo bua’m be wie’m be fɛ kpa.