Like nga e ɲin o su’n, maan ɔ yo like kpa

“Maan ninnge nga be de wunmiɛn’n be kwlaa be manman Anannganman.”—JUE MUN 150:6.

 1. Gbanflɛn kun mɔ like kpa kun m’ɔ kwla fɛ i ɲin sie su’n yɛ ɔ kunndɛ’n, amun kɛn i ndɛ.

BE FLƐ bian kun kɛ Seung Jin, ɔ fin Kore. Ɔ seli kɛ: “Min liɛ min waan sran’m be fɛ dan naan like ng’ɔ fata kɛ n yo’n, yɛle be ukalɛ. I sɔ’n ti’n, n suannin dɔɔtrɔ dilɛ. Dɔɔtrɔ’n kusu sɛ n di’n, n si kɛ min dunman fú yɛ min sa nun yó fɛ. Sanngɛ kɛ ɔ́ kɔ́ i ɲrun’n, n wunnin kɛ kannzu nɛ́n i kpa’n wie ɔ. I sɔ’n ti’n, n toli min ti desɛn yilɛ su. Desɛn mɔ n yi’n kusu’n, n wunnin kɛ n kwlá fa ukaman sran mun. Min kunngba mɔ n di i sɔ junman’n, yɛ n di su ye ɔ. Ɔ maan, n ko kleli suklu. Lɔ kusu’n, be kwla kle sran’n i like sɔ. Sanngɛ, be kwlá tinngɛmɛn i atin naan i klun w’a jɔ i wun.”a Kɛ Seung Jin sa’n, like kpa kun nga e ko fa e ɲin ko sie su’n, yɛ sran sunman be kunndɛ ɔ.

 2. (a) ?Sran ng’ɔ nunman mɛn’n nun ngbɛn’n, ngue yɛ ɔ yo ɔ? (b) ?Ngue yɛ ɔ kle kɛ like kun ti yɛ Ɲanmiɛn yili e ɔ?

² Sran ng’ɔ nunman mɛn’n nun ngbɛn’n, ɔ si like nga ti yɛ ɔ o lɛ’n. Yɛ ɔ le like kun mɔ i ɲin o su trele kɛ ɔ́ yó ɔ. ?Sanngɛ, sran’m be kwla wun like sɔ’n i wlɛ? Ɛɛn! I sɔ’n ti yɛ Ɲanmiɛn yili e nin ngwlɛlɛ silɛ nin akunndan’n niɔn. Ɔ maan kɛ e niɛn i sa’n, like kunngba cɛ ng’ɔ fata kɛ sran kwlaa yo’n, yɛle Ɲanmiɛn klun sa’n.

 3. ?Ngue yɛ Ɲanmiɛn kunndɛ kɛ sran’m be yo mɔ i ti yɛ ɔ yili be ɔ?

³ Ninnge nga Ɲanmiɛn kunndɛ kɛ e yo be’n, Biblu’n yiyi be nun kle e. Wafa nga Ɲanmiɛn yili e yilɛ klanman’n, ɔ kle kɛ ɔ klo e ti yɛ ɔ yili e ɔ. (Jue Mun 40:6; 139:14) I sɔ’n ti’n, maan e klo e wun wie. I sɔ’n yɛ be flɛ i Ɲanmiɛn klun sa yolɛ’n niɔn. (1 Zan 4:7-11) I wie ekun yɛle kɛ, e nanti i mmla’m be su.—Akunndanfuɛ’n 12:13; 1 Zan 5:3.

 4. (a) ?Wafa sɛ yɛ e kwla wun like nga ti yɛ e o lɛ’n i wlɛ kpa ɔ? (b) ?Like m’ɔ leman wunsu mɔ sran’m be kwlaa be kwla fa be ɲin sie su’n, yɛle benin?

⁴ Ɲanmiɛn kunndɛ kɛ sran’m be di aklunjuɛ, be nin be wiengu tran fɔun naan ninnge onga m’ɔ yili be’n, be nian be su. I sɔ’n ti yɛ ɔ yili be ɔ. (Bo Bolɛ 1:26; 2:15) ?Sanngɛ ngue yɛ e bɔbɔ’n, é yó naan e wla w’a gua ase naan y’a di aklunjuɛ ɔ? Saan é yó kɛ bakan sa. Bakan ng’ɔ si kɛ i si nin i nin be o lɛ naan be niɛn i su’n, srɛ kunmɛn i. I wla gua ase. E kusu’n, ɔ fata kɛ e nin e Si m’ɔ o ɲanmiɛn su lɔ’n e san nun. Sɛ e yo sɔ’n, é wún sa nga ti yɛ e o lɛ’n i wlɛ kpa. Kpɛkun, e klun jɔ́. (Ebre Mun 12:9) I sɔ’n ti’n, Ɲanmiɛn bɔbɔ waan e fa e wun mɛntɛn i naan e srɛ i. (Zak 4:8; 1 Zan 5:14, 15) Sɛ e nin ‘Ɲanmiɛn e nuan sɛ’ naan e kaci i janvuɛ’n, i klun jɔ́. Kusu’n, é kwlá mɛ́nmɛ́n i. (Bo Bolɛ 6:10; Nyanndra Mun 23:15-17; Zak 2:23, 24) Like m’ɔ leman wunsu mɔ sran’m be kwlaa be kwla fa be ɲin sie su’n, yɛ ɔ o lɛ. Jue tofuɛ’n waan: “Maan ninnge nga be de wunmiɛn’n be kwlaa be manman Anannganman.”—Jue Mun 150:6.

?Ngue yɛ e ɲin o su kɛ é yó ɔ?

 5. ?Ngue ti yɛ aɲanbeun kunndɛlɛ mɔ be fa cici be ti’n, ɔ timan ngwlɛlɛ ayeliɛ ɔ?

⁵ Ɲanmiɛn waan, e kunndɛ like ng’ɔ ju e’n naan e kunndɛ wie man e awlofuɛ mun. Sanngɛ ɔ ti cinnjin yɛle kɛ, e fa e wun mɛntɛn i. Kpɛkun, e uka e fuɛ mun naan be yo sɔ wie. I sɔ’n ti’n, ɔ fataman kɛ like ng’ɔ ju e’n i kunndɛlɛ’n tra Ɲanmiɛn ninnge liɛ’m be yolɛ’n. (Matie 4:4; 6:33) Sanngɛ, ng’ɔ nin i kanlɛ fataman’n yɛle kɛ, sran wie’m be liɛ’n, be fa aɲanbeun kunndɛlɛ’n cici be ti. Sanngɛ nn, nán aɲanbeun i ngunmin ti yɛ be flɛ sran’n, i sran ɔn. Afin amun nian. Koko nun wa’n, be usausali Azi lɔ aɲanbeunfuɛ’m be kosan. Be wunnin kɛ kannzɛ be “ti sran dan’n, sanngɛ be wla guaman ase.”—Akunndanfuɛ’n 5:11.

 6. ?Afɔtuɛ benin yɛ Zezi mannin be nga be fa aɲanbeun kunndɛlɛ’n cici be ti’n niɔn?

⁶ Zezi buli ‘aɲanbeun i klolɛ’n’ i fɔ. (Mark 4:19) ?Ngue ti ɔ? Afin kɛ sika o lɛ’n, ɔ laka sran. Kɛ sran’m be lemɛn i’n, be bu i kɛ sɛ be ɲɛn i’n, yɛ be liɛ yó ye ɔ. Sanngɛ, ɔ yoman sɔ. Famiɛn Salomɔn m’ɔ ti ngwlɛlɛfuɛ’n seli kɛ: ‘Sran ng’ɔ klo aɲanbeun’n, ɔ ɲɛnmɛn i nun mmlusuɛ’n wie.’ (Akunndanfuɛ’n 5:9) ?Yɛ sɛ sran kun klo aɲanbeun naan i kunngba’n waan ɔ́ fɛ́ i wla’n kwlaa sú Ɲanmiɛn’n nin? ?Be yo sɔ ɔ, ɔ yo ye? Cɛcɛ, ɔ kwlá yoman ye. Zezi seli kɛ: ‘Sran kun i min kwlá yoman nɲɔn, saan ɔ́ kpɔ́ kun yɛ ɔ́ kló kun, ɔ́ fɛ́ i wun mántán kun yɛ ɔ́ yó kun finfin. An kwlá yoman Ɲanmiɛn i sran naan amun kunngba’n amun a yo sika’n i klofuɛ.’ I sɔ’n ti’n, ɔ seli i sɔnnzɔnfuɛ’m be kɛ be yaci asiɛ’n su wa ninnge’m be kunndɛlɛ naan be sie be ‘awlɛn su ninnge mun ɲanmiɛn su lɔ.’ Yɛle kɛ, Ɲanmiɛn m’ɔ ‘si like nga be sa miɛn i wun’n i sin naan b’a se i’n,’ ɔ bo e dunman kpa.—Matie 6:8, 19-25.

 7. ?Wafa sɛ yɛ e kwla yo naan y’a ɲan “nguan sakpa” ɔ?

⁷ Kɛ akoto Pɔlu klɛ́ i wiengu junman difuɛ Timote fluwa’n, ɔ buli aɲanbeun kunndɛlɛ ngboko’n i fɔ wie. Ɔ seli i kɛ: ‘Kan kle blɛ nga e o nun yɛ’n i nun aɲanbeunfuɛ’m be kɛ nán maan be fa be wla gua be aɲanbeun m’ɔ su kaman lɛ’n su, sanngɛ be fa gua Ɲanmiɛn m’ɔ man e like kwlaa mɔ maan e klun jɔ’n i su. Maan be yo aklunye, yɛ be cɛ sran like. Sɛ be yo sɔ’n, nn bɛtrɔ kpa kun m’ɔ saciman’n yɛ b’a kpɛ b’a sie ɔ, yɛ bé ɲán nguan sakpa.’—1 Timote 6:17-19.

?Ngue yɛle ‘nguan sakpa’n?’

 8. (a) ?Ngue ti yɛ sran sunman be kunndɛ kɛ saan fii bé ɲán be wun ɔn? (b) ?Ngue yɛ be nga be yo sɔ’n, be wunmɛn i wlɛ ɔ?

⁸ Sran sunman be bu i kɛ ‘nguan sakpa’n,’ yɛle mɛn dilɛ’n. Azi lɔ fluwa kun seli kɛ: “Ninnge nga sran’m be wun be televiziɔn nin flimu’m be nun’n, be ɲin blo be su. Ɔ ka be ngunmin ɔn, b’a ɲɛn i sɔ ninnge mun.” Like ng’ɔ ti sran’m be cinnjin’n, yɛle aɲanbeun nin dunman dan kunndɛlɛ’n. Ninnge sɔ’m be kunndɛlɛ’n ti’n, be gbanflɛn blɛ’n sín’n, be wunman nun. Sɛ bé tɔ́ tukpacɛ annzɛ be tɔman o, be bumɛn i ndɛ. Be sieman be awlo’n kun, yɛ be siman Ɲanmiɛn. Sran sɔ’m be dan lika be wunmɛn i wlɛ kɛ “akunndan nga sran’m be bu’n,” yɛ be yi i nglo televiziɔn nun ɔn. Naan akunndan sɔ’n ti yɛ sran’m be yoman Ɲanmiɛn klun sa’n niɔn. (1 Korɛntfuɛ Mun 2:12; Efɛzfuɛ Mun 2:2) Ɔ maan, sɛ andɛ sran’m be wunman be wun fɛ’n, i sɔ’n boman e nuan!—Nyanndra Mun 18:11; 23:4, 5.

 9. ?Ngue yɛ sran’m be kwlá yomɛn i le ɔ? ?Yɛ ngue ti ɔ?

⁹ Sran wie’m be liɛ kusu’n, be kunndɛ kɛ bé úka be wiengu mun naan be fite ɲrɛnnɛn’n nun. I sɔ’n ti’n, be man sran’m be aliɛ naan awe’n w’a nunkunman be. Be yo be ayre, yɛ be kpli be ti. ?É sé i sɔfuɛ’m be liɛ sɛ? Nanwlɛ, ninnge sɔ mɔ be klɛn be wun be yo’n, sran sunman be ɲan su ye. Sanngɛ, mankun wieman towa nun. Yɛle kɛ, Satan “klunwifuɛ’n sie mɛn wunmuan’n,” yɛ ɔ kunndɛman kɛ mɛn’n kaci.—1 Zan 5:19.

10. ?Blɛ benin nun yɛ Ɲanmiɛn i sran’m bé ɲán “nguan sakpa” ɔ?

¹⁰ Kɛ sran kun o sa mɔ andɛ mɛn’n ngunmin yɛ i wla o su’n, nanwlɛ, i liɛ’n ti tɛ dan! Pɔlu waan: ‘Sɛ blɛ nga e o nun yɛ’n ngunmin yɛ e wla o Klist su’n, mɔ kɛ e ko wu’n nn w’a wie’n, e ɲrɛnnɛn liɛ’n tra sran’n kwlaa.’ I sɔfuɛ mɔ andɛ mɛn’n yɛ be wla o su’n, akunndan nga be bu’n yɛle kɛ: ‘Maan e di like e nɔn nzan, ainman é wú, nn e liɛ a wie.’ (1 Korɛntfuɛ Mun 15:19, 32) Ɔ yoli kusu m’ɔ timan sɔ ɔ. Afin Biblu’n waan: ‘Ɲanmiɛn seli kɛ ɔ́ mán e ɲanmiɛn su lɔ nin asiɛ uflɛ, lɔ yɛ be nga be yo sa kpa’n bé trán ɔn. I yɛ e su minndɛ i ɔ.’ (2 Piɛr 3:13) I blɛ sɔ nun’n, Klistfuɛ’m bé ɲán “nguan sakpa.” Yɛle kɛ, wie’m bé ɲán “anannganman nguan” ɲanmiɛn su lɔ. Kpɛkun, wie’m be trán asiɛ’n su wa tititi!—1 Timote 6:12.

11. ?Ngue ti yɛ Ɲanmiɛn Sielɛ’n i junman’n yɛ ɔ ti like kpa mɔ e kwla fa e ɲin sie su ɔ?

¹¹ Sa kwlaa ng’ɔ o sran’m be su’n, Ɲanmiɛn Sielɛ’n i kunngba cɛ yɛ ɔ́ wá yí be ɔ. Ɔ maan, like kpa ng’ɔ fata kɛ sran’m be kwlaa be mian be ɲin be yo’n, yɛle Sielɛ sɔ’n i bo sualɛ. (Zan 4:34) Sɛ e di i sɔ junman’n, klɔ sran kɛ e sa’n, e nin e Si m’ɔ o ɲanmiɛn su lɔ’n e afiɛn’n mántan. Asa kusu’n, e nin e niaan kpanngban kpa mɔ be di junman kunngba’n wie’n, é bó yó kun.

Maan e mian e ɲin e fa ajalɛ kpa

12. An kan ngbaciɛ ng’ɔ o andɛ mɛn’n, ɔ nin “nguan sakpa” mɔ é wá ɲɛ́n i’n be afiɛn’n, i ndɛ.

¹² Biblu’n waan ‘mɛn’n nin i nun ninnge kwlaa mɔ sran ɲin blo su’n, bé wíe.’ Ɔ leman Satan i mɛn’n nun like kun m’ɔ́ ká lɛ ɔ. Sanngɛ, ‘sran ng’ɔ yo Ɲanmiɛn klun sa’n, ɔ́ ká lɛ tititi.’ (1 Zan 2:15-17) I sɔ’n ti’n, maan e fa ajalɛ kpa. Afin, mɛn’n nun ninnge’m be ti le nɲɔn kun like, bé wíe. Sanngɛ, sɛ e mian e ɲin e suan Ɲanmiɛn Sielɛ’n i bo’n, é ɲán “nguan sakpa” mɔ yɛle anannganman nguan’n.

13. ?Ajalɛ kpa benin yɛ sran kun nin yi be fali ɔ?

¹³ Amun e fa Anri nin i yi Suzani be ndɛ e nian. Ɲanmiɛn seli kɛ sran ng’ɔ dun mmua fɛ i wun mɛn i naan ɔ sie i’n, ɔ́ níɛn i sɔfuɛ’n i lika. Ndɛ sɔ’n, Anri nin Suzani be lafili su kpa. (Matie 6:33) Ɔ maan, be ko fali sua mɔ i gua’n w’a cɛnman’n naan be nin be wa bla nɲɔn’n, b’a kwla di Ɲanmiɛn junman’n i kpa liɛ su. Afin sɛ sua’n i gua’n cɛnnin’n, naan be nɲɔn’n be di junman naan b’a tuɛ i kalɛ’n, be su ɲanman be ti. (Ebre Mun 13:15, 16) Bla kun m’ɔ ti be janvuɛ kpa’n, w’a wunman kɛ ajalɛ kpa yɛ be su fa ɔ. Sua nga be tran nun’n ti’n, ɔ seli Suzani kɛ: “Min niaan kpa, sɛ cɛn wie lele ɔ́ wán á dí fɛ’n, saan á cí fɛ.” Sanngɛ, Suzani nin i wun Anri be liɛ’n, be si kɛ Zoova klun sa’n yolɛ’n ti’n, bé ‘ɲán nguan kɛ e o yɛ’n nin blɛ ng’ɔ ba lɔ’n nun.’ (1 Timote 4:8; Tit 2:12) Be wa bla’m be kusu kɛ bé ɲín’n, be yoli blɛ kwlaa nun Ɲanmiɛn junman difuɛ juejuefuɛ. “Nguan sakpa” mɔ Anri nin i yi nin i mma’m be fali be ɲin sieli su’n, w’a yoman be nzisɔ le. Afin, be dili ye ngunmin.—Filipfuɛ Mun 3:8; 1 Timote 6:6-8.

Nán maan e ‘ɲin blo mɛn’n nun ninnge’n i kunndɛlɛ su ngboko’

14. ?Sɛ sran kun siman like kpa ng’ɔ fata kɛ e ɲin tran su’n, ngue sa yɛ ɔ kwla ɲɛn i ɔ?

¹⁴ Sɛ e lafiman su kɛ é ɲán ‘nguan sakpa’n,’ ɔ kwla yo tɛ kpa man e. Afin, ɔ cɛman naan ‘mɛn’n nun ninnge’n i ngokoɛ’n nin aɲanbeun’n nin like nga be klo be’n b’a mian e.’ (Lik 8:14) Kɛ sran kun i ɲin blo aɲanbeun’n i su m’ɔ ‘koko ninnge’m be ti’n,’ ɔ fɛ i kunndɛlɛ’n cici i ti mlɔnmlɔn. (Lik 21:34) I sɔ’n ti’n, andɛ sran sunman be ‘lafiman Ɲanmiɛn su kun, ɔ maan awlaboe’n kun be kpo.’ Nanwlɛ, kɛ sran’m be lafiman su kɛ bé ɲán ‘anannganman nguan’n naan b’a trɛ i kekle’n,’ ɔ ti tɛ kpa mɛn be!—1 Timote 6:9, 10, 12; Nyanndra Mun 28:20.

15. ?Kɛ be se kɛ nán be ‘ɲin blo mɛn’n nun ninnge’n i kunndɛlɛ su ngboko’n,’ wafa sɛ yɛ awlo kun nunfuɛ’m be nantili su ɔ?

¹⁵ Pɔlu seli kɛ: ‘Be nga be fa mɛn’n nun ninnge’n yo be wun sa ye’n, nán maan be ɲin blo i kunndɛlɛ su ngboko.’ (1 Korɛntfuɛ Mun 7:31) Kɛti nin i yi Boni be fali afɔtuɛ sɔ’n su. Kɛti waan: “Kɛ n wieli be je ayre yolɛ suklu’n i di cɛ’n, yɛ n yoli Zoova i Lalofuɛ ɔ. Kɛ ń dí min junman’n, sɛ min waan ń yó tukpacifuɛ kpanngban be ayre naan ń ɲán sika’n, nn n yoli sɔ. Sanngɛ, n wunnin kɛ sɛ n yo sɔ’n, n su kwlá ɲanman n ti naan m’an di Ɲanmiɛn i junman liɛ’n. Ɔ maan, m’an yoman sɔ. Kɛ n yoli sɔ kusu’n, nán sika yɛ n ɲɛnnin i ɔ. Sanngɛ i kan nga n ɲɛn i’n, ɔ ju e. E kwla sie wie bɔbɔ. Asa ekun’n, min nin min yi, ɔ nin e mma mun e bo ti kun, yɛ e tran awlo tranlɛ fɛ. Kɛ ɔ́ kɔ́ i ɲrun’n, e kwlaa e wa yoli blɛ kwlaa nun Ɲanmiɛn junman difuɛ. Andɛ e mma’m be kwlaa b’a ja bian. Be nin be wun’m be tran kpa. Be nun nsan b’a wu be mma mun. Yɛ be tran be awlo tranlɛ fɛ. Afin, Zoova i ninnge liɛ mun yɛ be dun mmua fa be ɲin sie su titi ɔ.”

An dun mmua fa amun wun man Ɲanmiɛn maan ɔ sie amun

16, 17. ?Sran mɔ be si be junman’n i di kpa’n benin yɛ Biblu’n kan be ndɛ ɔ? ?Sanngɛ ngue yɛ be fa sieli be nzɔliɛ ɔ?

¹⁶ Biblu’n kan sran wie mɔ be yoli Ɲanmiɛn klun sa’n, ɔ nin be mɔ b’a yoman’n, be ndɛ. Andɛ sran kwlaa, i bakan o, i kpɛnngbɛn o, be kwla fa sran sɔ mɔ Biblu’n kan be ndɛ’n be ajalɛ’n tu be wun fɔ. (Rɔmfuɛ Mun 15:4; 1 Korɛntfuɛ Mun 10:6, 11) Sran sɔ’n kun yɛle Nimrɔdu. Ɔ kplannin klɔ dandan mun. Sanngɛ, ɔ yoli sɔ fa klɔklɔli Zoova. (Bo Bolɛ 10:8-12) Sran wie’m be liɛ kusu’n, be kleli ajalɛ kpa. I wie yɛle Moizi liɛ’n. Ɔ ti Ezipti famiɛn’n i awlo lɔfuɛ. Sanngɛ, w’a bumɛn i sɔ liɛ’n i like. Ɔ wunnin i kɛ junman nga Ɲanmiɛn fa mɛnnin i kɛ ɔ di’n, ‘ɔ ti kpa tra Ezipti lɔ like kpakpa’n kwlaa.’ (Ebre Mun 11:26) Liki kusu ti dɔɔtrɔ. Ɔ yoli Pɔlu nin sran wie’m be ayre. Sanngɛ, junman ng’ɔ dili naan w’a yo sran’m be ye dan’n, yɛle jasin fɛ’n bolɛ. Kpɛkun, ɔ yoli Biblu’n i klɛfuɛ kun. Pɔlu liɛ’n, ɔ ti mmla sifuɛ. Sanngɛ like nga be fa sie i nzɔliɛ’n, yɛle ngaliɛ difuɛ junman m’ɔ dili’n. Afin, ‘Ɲanmiɛn sunmɛnnin i be mɔ be timan Zuifu’n be sin.’—Rɔmfuɛ Mun 11:13.

¹⁷ Davidi kusu’n, ɔ yoli sonja nin jue tofuɛ. Sanngɛ, kɛ be bo i dunman’n, like nga be wla kpɛn su’n yɛle kɛ ɔ ‘ti Ɲanmiɛn i awlɛn su sran.’ (1 Samiɛl 13:14) Daniɛli liɛ’n, e si kɛ ɔ dili junman Babilɔni famiɛn’n i awlo lɔ. Sanngɛ like nga e fa sie i nzɔliɛ’n yɛle kɛ, ɔ yoli Zoova i nuan ijɔfuɛ nanwlɛfuɛ. Ɛstɛr yoli Pɛrsi famiɛn’n i yi. Sanngɛ nɛ́n i li ti yɛ e ɲin yi i ɔ. I yakpa m’ɔ yoli’n, ɔ nin i Ɲanmiɛn sulafilɛ’n ti ɔ. Piɛli nin Andre nin Zaki, ɔ nin Zan be ti jue trafuɛ dan kpa. Sanngɛ, Zezi i akoto mɔ be yoli’n, i ti yɛ e kan be ndɛ ɔ. Zezi kusu’n, ɔ yoli “ajuin difuɛ.” Sanngɛ, ɔ ti sran’m be nun dan, afin i yɛ ɔ ti ‘Klist’ ɔ. (Mark 6:3; Matie 16:16) E wun kɛ be kwlaa nga y’a kan be ndɛ lɛ’n, be si be junman’n i di kpa, be le ɲrun. Sanngɛ, b’a bumɛn i sɔ’n i like. Ɲanmiɛn i junman liɛ’n, yɛ be fa cicili be ti ɔ. Afin, be si kɛ sran ng’ɔ sro Ɲanmiɛn’n, ɔ lemɛn i wunsu.

18. ?Junman benin yɛ Klistfuɛ gbanflɛn kun fa cicili i ti ɔ? ?Kɛ ɔ yoli sɔ’n, ngue yɛ ɔ wunnin i wlɛ ɔ?

¹⁸ Seung Jin mɔ e kɛnnin i ndɛ i bo bolɛ nun’n, ɔ wa wunnin i sɔ wie. Ɔ maan, ɔ seli kɛ: “N dili dɔɔtrɔ, n yili desɛn yɛ n kleli suklu. Sanngɛ siɛn’n, ń wá fá min wun mán Ɲanmiɛn. Kɛ é sé yɛ’n, n bo jasin fɛ’n lika nga be sa mian jasin fɛ’n bofuɛ dan be wun lɛ’n. Yɛ n kle sran’m be like naan be ɲan anannganman nguan. Laa’n, n siman kɛ atin bolɛ junman’n i dilɛ yo fɛ. Siɛn mɔ n ti i sɔfuɛ’n, n wun kɛ kannzu ɔ yo fɛ. Afin, n kle sran mɔ be finwlɛ’n ti fanunfanun’n, be like. I sɔ’n uka min maan n kaci min nzuɛn’n, ɔ nin wafa nga n kle sran’m be like’n. Siɛn’n, n si kɛ like kunngba cɛ m’ɔ fata kɛ sran kwlaa yo’n, yɛle Zoova klun sa yolɛ’n.”

19. ?Like kpa benin yɛ e kwla yo naan y’a wun kɛ e nunman mɛn’n nun sa ngbɛn ɔn?

¹⁹ E mɔ e ti Klistfuɛ’n, Ɲanmiɛn maan e si like nga e ko yo naan y’a ɲan anannganman nguan’n. Kpɛkun, e si kɛ é fíte nun. (Zan 17:3) Nán maan ‘ye sɔ mɔ Ɲanmiɛn yoli e’n ɔ yo ngbɛn.’ (2 Korɛntfuɛ Mun 6:1) Kɛ ɔ ko yo naan w’a yoman sɔ’n, maan e fa e blɛ’n e manman Zoova. Like nga é klé sran mun naan be klun w’a jɔ naan cɛn wie lele b’a anannganman nguan’n, maan e fa kle be. Sɛ e yo sɔ’n, é wún kɛ Zezi i ndɛ ng’ɔ seli kɛ “sɛ a cɛ sran like’n, ɔ ti kpa tra kɛ be cɛ wɔ like’n,” ɔ ti nanwlɛ. (Sa Nga Be Yoli’n 20:35) Kpɛkun, é wún kɛ e nunman mɛn’n nun sa ngbɛn.

[Ja ngua lɛ ndɛ’n]

?Amun kwla yiyi nun?

• ?Like m’ɔ leman wunsu mɔ e ɲin kwla tran su’n yɛle benin?

• ?Ngue ti yɛ aɲanbeun kunndɛlɛ mɔ be fa cici be ti’n, ɔ timan ngwlɛlɛ ayeliɛ ɔ?

• “?Nguan sakpa” mɔ Ɲanmiɛn seli kɛ ɔ́ mán e’n yɛle benin?

• ?Wafa sɛ yɛ e kwla fa e blɛ’n e yo Ɲanmiɛn klun sa ɔ?

[Foto mun, bue 20]

Maan e fa e blɛ’n e yo like ng’ɔ ti kpa’n.