Maan e kunndɛ ‘Ɲanmiɛn bɔbɔ i akunndan’n’ i bo

‘Ɲanmiɛn wawɛ’n kunndɛ sa’n kwlaa bo’n ti’n, ɔ si Ɲanmiɛn bɔbɔ i akunndan’n.’—1 KORƐNTFUƐ MUN 2:10.

 1. ?Biblu’n nun ndɛ nanwlɛ benin yɛ kɛ sran m’ɔ su suan Biblu’n nun like uflɛuflɛ’n si be’n, ɔ yo i fɛ dan ɔn?

KƐ E nun sunman e boli Biblu’n nun ndɛ nanwlɛ’n i suanlɛ bo mɔ e wunnin ndɛ wie’m be bo’n, ɔ yoli e fɛ dan. I wie yɛle kɛ, e wunnin Ɲanmiɛn i dunman Zoova’n i cinnjin m’ɔ ti’n i bo. Asa ekun’n, e wunnin like nga ti yɛ Ɲanmiɛn yaci sran’m be lɛ mɔ be wun ɲrɛnnɛn’n. Kpɛkun, like nga ti yɛ sran wie’m bé kɔ́ ɲanmiɛn su’n, ɔ nin like nga Ɲanmiɛn i sufuɛ’m be onga’m bé ɲɛ́n i’n, e wunnin be bo wie. Atrɛkpa laa e kanngan Biblu’n nun, sanngɛ e wunman ndɛ sɔ’m be bo. Blɛ sɔ nun’n, e ti kɛ sran m’ɔ w’a ɔ jenvie’n i bo lɔ ninnge’m be nianlɛ m’ɔ w’a wlaman lunɛti ng’ɔ nin i fata’n sa. Ɔ wunman nzue’n i bo lɔ ninnge’m be klanman lika’n, i kpa. Sanngɛ kɛ ɔ ko wla lunɛti sɔ’n, kpɛkun jenvie’n i bo lɔ ijre ɲɛnmɛn mun nin jue mun, ɔ nin nnɛn uflɛ mun’n, sɛ be ti sɛ be ti sɛ o, w’a ka lɛ w’a wun be kwlaa. I sɔ kunngba’n, kɛ i bo bolɛ nun be kleli e ‘Ɲanmiɛn bɔbɔ i akunndan’n,’ e wunnin i tisutisu.—1 Korɛntfuɛ Mun 2:8-10.

 2. ?Ngue ti yɛ Ɲanmiɛn Ndɛ’n i silɛ’n kwla man e aklunjuɛ tititi ɔ?

² ?Biblu’n nun ndɛ nanwlɛ mɔ e wunnin i tisutisu’n, i su yɛ ɔ fata kɛ e ka ɔ? Cɛcɛ, afin ‘Ɲanmiɛn bɔbɔ i akunndan’n’ mɔ yɛle i ngwlɛlɛ’n, ɔ fa fiɛ i sran’m be ɲrun. Sanngɛ, i wawɛ’n yi i nglo kle Klistfuɛ mun. (1 Korɛntfuɛ Mun 2:7) I yo, e si kɛ Ɲanmiɛn i ngwlɛlɛ’n ti kploun naan kannzɛ e yo sɛ’n, e kwlá simɛn i ɲrun nin i sin’n kwlaa le! Sanngɛ kusu’n, i kunndɛlɛ’n kwla man e aklunjuɛ dan. I sɔ aklunjuɛ’n yɛ i klikli nun’n, kɛ e sili Biblu’n nun ndɛ suanlɛ’n i bo bolɛ ninnge mun’n, e dili ɔ. Sɛ ɔ́ kɔ́ i ɲrun naan y’a yaciman ‘Ɲanmiɛn bɔbɔ i akunndan’n’ i bo kunndɛlɛ’n, aklunjuɛ sɔ’n, é dí i tititi.

 3. ?Sɛ e lafi Ɲanmiɛn su’n, ngue ti yɛ ɔ fata kɛ e wun like nga ti yɛ e lafi i su’n, i bo kpa ɔ?

³ ?Ngue ti yɛ ɔ fata kɛ e si Ɲanmiɛn bɔbɔ “i akunndan’n” i bo ɔ? Kɛ Zoova o lɛ’n, ɔ fata kɛ e lafi i su. Sanngɛ, sɛ e wunman like nga ti yɛ e lafi i su’n, e su lafimɛn i su kpa. I sɔ’n ti’n, Biblu’n waan e “si ngwlɛlɛ” naan e ‘wun Ɲanmiɛn i klun sa’n i wlɛ, yɛ é sí sa ng’ɔ ti kpa, m’ɔ jɔ i klun, mɔ maan é yó kpa’n.’ (2 Timote 1:13; Rɔmfuɛ Mun 12: 2) Kɛ e wun like nga ti yɛ Zoova se kɛ e yo sa wie annzɛ nán e yo’n i wlɛ’n, e ɲin yi i titi e kaciman. I sɔ kunngba’n, sɛ e si Ɲanmiɛn bɔbɔ “i akunndan’n” i bo’n, i sɔ’n yó maan sɛ sa wie tanndan e ɲrun’n, é ɲán wunmiɛn é jrán kekle. Asa ekun’n, i sɔ’n sú e bo maan é ‘tú e klun yó sran ye.’—Tit 2:14.

 4. ?Kɛ be se kɛ e suan Biblu’n nun like’n, yɛle kɛ sɛ?

⁴ Nán Biblu’n nun kannganlɛ ngbɛn’n yɛ maan é wún Ɲanmiɛn i akunndan’n i bo ɔ. Saan é súan Biblu’n nun like naan y’a wun i bo. Kɛ be se kɛ e suan Biblu’n nun like’n, yɛle kɛ like nga e suan’n, e kan e ɲin ase e kunndɛ wafa ng’ɔ nin like nga e si i laa’n, be kɔ likawlɛ’n. (2 Timote 1:13) Asa ekun’n, ɔ fata kɛ e kunndɛ like nga ti yɛ be klɛli like sɔ’n, i ngblɛsungblɛsu’n kwlaa i bo. I sin’n, wafa nga e kwla nanti su klanman naan y’a kwla fa uka sran uflɛ’n, e tran e bu i akunndan kpa. Kusu’n, kɛ mɔ ‘Ɲanmiɛn ndɛ nga be klɛli’n, i bɔbɔ yɛ ɔ fɛ i kwlaa mannin sran mun yɛ be klɛli mɔ be fa kle like’ ti’n, ɔ fata kɛ e suan ‘ndɛ kwlaa ng’ɔ fin Ɲanmiɛn nuan fite’n.’ (2 Timote 3:16, 17; Matie 4:4) Biblu’n nun like suanlɛ leman ba. Sanngɛ kusu’n, e kwla wun kɛ i suanlɛ yo fɛ naan ‘Ɲanmiɛn bɔbɔ i akunndan’n’ i bo wunlɛ timan kekle sɔ liɛ.

Zoova yi i akunndan’n i nglo kle wun ase kanfuɛ mun

 5. ?Wan yɛ ɔ kwla wun ‘Ɲanmiɛn bɔbɔ i akunndan’n’ i bo ɔ?

⁵ Sɛ y’a diman suklu y’a ɔman mmua annzɛ kusu e kloman fluwa suanlɛ’n, e kwla bu i kɛ e kwlá wunman ‘Ɲanmiɛn bɔbɔ i akunndan’n’ i bo. Sanngɛ, nán e bu i sɔ mlɔnmlɔn. I nun mɔ Zezi o asiɛ’n su wa’n, Zoova w’a yimɛn i akunndan’n i nglo w’a kleman ngwlɛlɛfuɛ nin be mɔ be si sa mun. Sanngɛ, be mɔ b’a diman suklu mɔ be timan sran dandan mɔ be ti wun ase kanfuɛ’n, be yɛ ɔ yili i nglo kleli be ɔ. I sɔfuɛ’m be ti kɛ bakanngan mɔ b’a bo be like klelɛ bo’n sa. (Matie 11:25; Sa Nga Be Yoli’n 4:13) Akoto Pɔlu seli i wiengu Klistfuɛ mun kɛ: ‘Like sɔ’n yɛ Ɲanmiɛn yo mɛnnin i klofuɛ mun ɔn. E liɛ’n, Ɲanmiɛn maan i wawɛ’n yi like sɔ’n nglo kleli e. Afin kɛ Ɲanmiɛn wawɛ’n kunndɛ sa’n kwlaa bo’n ti’n, ɔ si Ɲanmiɛn bɔbɔ i akunndan’n.’—1 Korɛntfuɛ Mun 2:9, 10.

 6. ?Ndɛ nga 1 Korɛntfuɛ Mun 2:10 kan’n, i bo yɛle benin?

⁶ ?Kɛ Pɔlu se kɛ ‘Ɲanmiɛn wawɛ’n kunndɛ sa kwlaa bo ti’n, ɔ si Ɲanmiɛn bɔbɔ i akunndan’n,’ wafa sɛ yɛ ɔ yo i sɔ liɛ’n niɔn? Nán kɛ Zoova wawɛ’n yi ndɛ nanwlɛ’n i nglo kle Klistfuɛ mun be tinuntinun ɔn. Sanngɛ, Zoova fɛ i wawɛ sie i anuannzɛ m’ɔ yiyi Biblu’n nun kle i sufuɛ mɔ be bo ti kun’n. (Sa Nga Be Yoli’n 20:28; Efɛzfuɛ Mun 4:3-6) I wie yɛle kɛ asiɛ wunmuan’n su’n, Zoova i sufuɛ’m be kwlaa be nanti Biblu’n nun like suanlɛ’n i siesielɛ kunngba’n su be asɔnun’m be nun. Ɔ maan blɛ kun nun sa’n, sɛ afuɛ kun annzɛ afuɛ nɲɔn nun o, like kunngba’n yɛ be suan ɔn. Ɲanmiɛn wawɛ m’ɔ o asɔnun’n su’n, ɔ uka Klistfuɛ mun. Ɔ maan, be fa nzuɛn mɔ maan be kwla wun ‘Ɲanmiɛn bɔbɔ i akunndan’n’ i bo’n.—Sa Nga Be Yoli’n 5:32.

‘Ɲanmiɛn bɔbɔ i akunndan’n’ i nun ninnge mun

 7. ?Ngue ti yɛ sran sunman be wunman ‘Ɲanmiɛn bɔbɔ i akunndan’n’ i bo ɔ?

⁷ Nán maan e bu i kɛ Ɲanmiɛn bɔbɔ “i akunndan’n” i bo wunlɛ’n, ɔ ti kekle ngboko. Sɛ sran sunman be wunman ‘Ɲanmiɛn bɔbɔ i akunndan’n’ i bo’n, nɛ́n i kekle m’ɔ ti’n ti ɔ. Sanngɛ, ninnge nga Zoova sin i anuannzɛ’n i lika fa man be naan b’a wun i akunndan’n i bo’n, Satan laka be maan be kpalo i sɔ ninnge mun.—2 Korɛntfuɛ Mun 4:3, 4.

 8. ?Efɛzifuɛ’m be fluwa’n i ndɛ tre nsan nun’n, Ɲanmiɛn i akunndan’n i nun ninnge benin yɛ Pɔlu kannin be ndɛ ɔ?

⁸ Efɛzifuɛ’m be fluwa’n i ndɛ tre nsan nun’n, Pɔlu kannin ‘Ɲanmiɛn bɔbɔ i akunndan’n’ i nun ninnge’m be ndɛ. Ninnge sɔ’n, Zoova i sufuɛ’m be si be nun sunman be bo kpa. I wie yɛle kɛ, be si bla’n i osu nga Ɲanmiɛn seli kɛ ɔ́ bá’n. Kpɛkun, sran mɔ bé kɔ́ ɲanmiɛn su’n, ɔ nin Mɛsi i Sielɛ’n, be si be su ndɛ wie. Pɔlu seli kɛ: ‘Lalafuɛ nun’n, sa sɔ’n Ɲanmiɛn yimɛn i nglo kleman sran mun kɛ andɛ ɔ maan i wawɛ’n yi i nglo kle i sran’m mɔ Zezi sunmannin be’n nin i nuan ijɔfuɛ mun’n sa. Sa sɔ’n yɛle kɛ like nga Ɲanmiɛn waan ɔ́ fá mɛ́n i sran mun’n, ɔ nin like ng’ɔ se kɛ ɔ́ yó mán be’n, be nga be timan Zuifu’n be dunman tɛ́ nun wie, yɛ be nin Zuifu mun b’a yo kun jasin fɛ mɔ maan be nin Klist Zezi b’a kaci sran wunmuan’n ti.’ Pɔlu seli ekun kɛ junman nga Ɲanmiɛn maan ɔ di’n, yɛle kɛ ‘sa nga sran’m be yo naan w’a yo i klun su’n weiin, ɔ kle be. Lalafuɛ nun ɔ fiɛli i klun sa sɔ’n sran’m be ɲrun.’—Efɛzfuɛ Mun 3:5-9.

 9. ?Ngue ti yɛ ‘Ɲanmiɛn bɔbɔ i akunndan’n’ mɔ e wun i bo’n, ɔ ti e cenjele ɔ?

⁹ Pɔlu seli ekun kɛ ‘ɲanmiɛn su lɔ be wun Ɲanmiɛn i ngwlɛlɛ’n ninnge ng’ɔ yo be asɔnun’n nun’n be kwlaa, be nun.’ (Efɛzfuɛ Mun 3:10) I yo, wafa nga Zoova yi i ngwlɛlɛ’n i nglo asɔnun’n nun’n, anzi’m be fa be ɲin sie su naan bé wún i bo. ?Ninnge sɔ mɔ be ti Anzi’m be nnana mɔ e liɛ e si be’n, nán e cenjele nun ɔn? (1 Piɛr 1:10-12) I sin’n, Pɔlu waan maan e mian e ɲin naan ‘e nin Ɲanmiɛn sran’m be kwlaa e wun kɛ klolɛ sɔ’n mɔ Ɲanmiɛn fa klo e’n ti dan. Sɛ e kwla fa sunnzun like wie’n, nn é sé kɛ ɔ ti tɛtrɛ, ɔ ti tɛnndɛnndɛiin, ɔ ti kploun kpa, yɛ ɔ ti kendengleiin.’ (Efɛzfuɛ Mun 3:11, 18) Amun e fa Ɲanmiɛn i akunndan nun ninnge sɔ’m be nun wie mɔ be kwla uka e like silɛ su’n, e nian.

‘Ɲanmiɛn bɔbɔ i akunndan’n’ i nun ninnge wie mun

10, 11. Kɛ nga Biblu’n fa yiyi nun sa’n, blɛ benin nun yɛ Zezi yoli Ɲanmiɛn i anuannzɛ’n i bue ng’ɔ o ɲanmiɛn su lɔ m’ɔ ti kɛ “bla” sa’n, i “osu” klikli’n niɔn?

¹⁰ Kɛ nga Bo Bolɛ 3:15 fa kan’n sa’n, e si kɛ “bla’n” mɔ yɛle Ɲanmiɛn i anuannzɛ’n i bue ng’ɔ o ɲanmiɛn su lɔ’n, i “osu’n” yɛle Zezi. Sanngɛ, kɛ ɔ ko yo naan y’a wun i wlɛ kpa’n, e kwla usa e wun kosan wie mun. Yɛle kɛ: ‘?Blɛ benin nun yɛ Zezi yoli bla’n i osu’n niɔn? ?I nun m’ɔ o ɲanmiɛn su lɔ’n niɔn, annzɛ kɛ be wuli i asiɛ’n su wa’n niɔn? ?I nun mɔ be yoli i batɛmu’n niɔn, annzɛ kɛ ɔ wuli mɔ Ɲanmiɛn cɛnnin i’n niɔn?’

¹¹ Ɲanmiɛn seli kɛ i anuannzɛ’n i bue ng’ɔ o ɲanmiɛn su lɔ m’ɔ fɛ i sunnzun “bla’n,” ɔ́ wá ɲán osu kun naan osu sɔ’n, ɔ́ kpɔ́tɔ wuo’n i ti’n. Sanngɛ lele m’ɔ afuɛ akpi fá sín’n, osu sɔ’n baman naan w’a nunkun Satan naan w’a bu sa nga Satan yo be’n i nuan nɲa. I sɔ’n ti’n, Ɲanmiɛn nuan ijɔfuɛ Ezai flɛli bla sɔ’n kɛ “klun kpanfuɛ” mɔ “i wla ti bowa.” (Ezai 54:1, 5, 6) Lelee m’ɔ́ kɔ́ i ɲrun’n, be wa wuli Zezi Bɛtleɛmu lɔ. Sanngɛ, kɛ Zezi ɲinnin mɔ be yoli i batɛmu mɔ Zoova fɛli wawɛ’n jrɛli i su’n, yɛ Zoova fɛli i yoli i wa ɔ. Afin, ɔ seli kɛ: ‘Min awlɛn su ba yɛ.” (Matie 3:17; Zan 3:3) Kɛ ɔ fin i lɛ’n, yɛ be wunnin bla’n i “osu’n” i wlɛ ɔ. Kɛ ɔ́ kɔ́ i ɲrun’n, Ɲanmiɛn fɛli i wawɛ’n mannin Zezi i sɔnnzɔnfuɛ mun, kpɛkun ɔ fa be yoli i mma mun wie. Ɔ maan, “bla” m’ɔ ti kɛ klun kpanfuɛ sa mɔ lala ɔ ‘ɲanman ba’n,’ siɛn’n, ɔ kwla “bo sro.”—Ezai 54:1; Galasifuɛ Mun 3:29.

12, 13. ?Biblu’n nun ndɛ mma benin yɛ be kle kɛ Klistfuɛ nga Ɲanmiɛn fɛli i wawɛ’n mannin be’n, be akpasua’n yɛ ɔ ti ‘sran kpa nanwlɛfuɛ m’ɔ si ngwlɛlɛ’n’ niɔn?

¹² Sa’n i nɲɔn su ng’ɔ o Ɲanmiɛn bɔbɔ i akunndan nun m’ɔ wa yili i nglo kleli e’n, yɛle kɛ ɔ́ kpá sran 144.000 naan ɔ́ fá be yó i liɛ. (Sa Nglo Yilɛ 14:1, 4) Klistfuɛ kwlaa nga Ɲanmiɛn fɛli i wawɛ’n mannin be’n, e si kɛ be akpasua’n yɛ blɛ kwlaa nun’n, ɔ ti ‘sran kpa nanwlɛfuɛ m’ɔ si ngwlɛlɛ’n’ mɔ Zezi sieli i kɛ ɔ mɛn i sran’m be “aliɛ” blɛ ng’ɔ ti i nuan su’n i su’n niɔn. (Matie 24:45) ?Sanngɛ, wafa nga e fa wun ndɛ sɔ’n i wlɛ lɛ’n, Biblu’n nun ndɛ mma benin yɛ ɔ kle kɛ ɔ ti nanwlɛ ɔ? ?Nán Klistfuɛ kwlaa ng’ɔ fa Ɲanmiɛn ndɛ’n m’ɔ ti kɛ aliɛ sa’n fa tɛ i wiengu’n, yɛ Zezi kɛn i ndɛ kɛ ɔ ti sran kpa nanwlɛfuɛ’n niɔn?

¹³ Ɲanmiɛn seli Izraɛlifuɛ’m be kɛ: “Amun yɛ amun ti min lalofuɛ mun ɔn. Amun ti min sufuɛ, amun yɛ n kpali amun ɔn.” (Ezai 43:10) Sanngɛ afuɛ 33 Nisan i le 11 nun’n, Zezi seli Zuifu kpɛnngbɛn mun kɛ Ɲanmiɛn w’a yi Izraɛli nvle’n i ase naan be timɛn i sufuɛ kun. Ɔ seli be kɛ: ‘Bé wá dé Ɲanmiɛn famiɛn dilɛ’n amun sa nun, bé fá mán nvle uflɛ mɔ bé wá yó sa kpa mɛ́n i’n.’ Sran kpanngban be ɲrun’n, Zezi seli kɛ: ‘Amun nian, amun awlo’n ɔ́ wá ká amun sa nun.’ (Matie 21:43; 23:38) Izraɛli nvle mɔ Zoova fa yoli kɛ i sran sa’n, w’a yoman nanwlɛfuɛ nin ngwlɛlɛfuɛ. (Ezai 29:13, 14) Cɛn kunngba nga Zezi seli kɛ Ɲanmiɛn wá yí Izraɛli nvle’n i ase’n, ɔ usali kɛ: ‘?Sran kpa nanwlɛfuɛ m’ɔ si ngwlɛlɛ’n yɛle wan?’ Sɛ é kwlá sé’n, Zezi su usa kɛ: ‘?Nvlefuɛ kpa nanwlɛfuɛ mɔ Ɲanmiɛn wá fɛ́ i káci Izraɛli nvle’n yɛle benin?’ Kɛ ɔ́ kɔ́ i ɲrun’n, akoto Piɛli tɛli kosan sɔ’n su. Ɔ seli i wiengu Klistfuɛ mɔ Ɲanmiɛn fɛli i wawɛ’n mannin be mun kɛ: ‘Amun liɛ’n, an ti Ɲanmiɛn i nvle’n nun sran mun, yɛ an ti i liɛ mlɔnmlɔn.’ (1 Piɛr 1:4; 2:9) Nvle sɔ mɔ Zoova fɛ i nunfuɛ mun yo i sran’n, be ti ‘Izraɛlifuɛ nga be ti i liɛ sakpa’n.’ (Galasifuɛ Mun 6:16) Laa’n, Ɲanmiɛn fali Izraɛli nvle wunmuan yoli kɛ i “sran” sa. I sɔ kunngba’n, Klistfuɛ nga Ɲanmiɛn fɛli i wawɛ’n mannin be’n be akpasua’n, yɛ ɔ ti ‘sran kpa nanwlɛfuɛ m’ɔ si ngwlɛlɛ’n’ niɔn. Nanwlɛ, kɛ e wun kɛ Ɲanmiɛn maan i sran sɔ’n man e ‘aliɛ’n,’ ɔ yo e fɛ dan!

E kwla ɲan e bɔbɔ e Biblu’n nun like suanlɛ’n su ye

14. ?Ngue ti yɛ Biblu’n nun like suanlɛ’n yɛ ɔ kwla man e aklunjuɛ mɔ like nun kannganlɛ ngbɛn’n, ɔ kwlá manman e ɔ?

¹⁴ ?Kɛ e wun Biblu’n nun ndɛ kun bo uflɛuflɛ mɔ maan e lafi Ɲanmiɛn su kpa ekun’n, ɔ yoman e fɛ dan? I sɔ’n ti yɛ ɔ fata kɛ e suan Biblu’n nun like kpa’n niɔn. Afin, i sɔ aklunjuɛ liɛ’n, Biblu’n nun kannganlɛ sa ngbɛn’n kwlá manman e. Kɛ é súan Biblu’n i akua kun nun like’n, ɔ fata kɛ e bu i akunndan e usa e wun kɛ: ‘?Ngbaciɛ benin yɛ ɔ o like nga n su suɛn i yɛ’n, ɔ nin nga i si i laa’n be afiɛn ɔn? ?Biblu’n nun ndɛ mma uflɛ, annzɛ ndɛ’n i nun yiyilɛ uflɛ benin yɛ ɔ o like nga n suɛn i yɛ’n nun m’ɔ kwla yo min ye ɔ?’ Sɛ ndɛ wie o lɛ naan e wunmɛn i bo’n, maan e klɛ sie naan cɛn uflɛ’n, e suan su like.

15. ?Ngue yɛ sɛ e suan su like’n, é ɲán su ye ɔ? ?Wafa sɛ yɛ i sɔ like suanlɛ’n kwla yo e ye lele ɔ?

¹⁵ ?Ngue yɛ e sɛ e suan su like’n, i wlɛ wunlɛ’n mán e aklunjuɛ ɔ? Sran’m be ye yolɛ ti’n, aenguɛ fanunfanun nga Ɲanmiɛn nin be trali’n, e kwla suan be su like e wun be bo kpa. Annzɛ e kwla suan Zezi Klist i su ndɛ nga Ɲanmiɛn nuan ijɔfuɛ’m be kannin’n, i su like. Annzɛ kusu’n, e kwla fa Biblu’n nun Ɲanmiɛn nuan ijɔfuɛ’m be fluwa kun e suɛn i nun ndɛ mma kunngunngun’n, be su like. Sɛ e waan é láfi Ɲanmiɛn su kpa tra laa’n, like ng’ɔ kwla uka e ekun’n, yɛle fluwa Les Témoins de Jéhovah: Prédicateurs du Royaume de Dieu.a Ɔ kan sa nga e blɛ liɛ’n nun Zoova i Lalofuɛ’m be yoli’n, be ndɛ. Asa ekun’n, “Fluwa’n nun kannganfuɛ’m be kosan mun” mɔ be o laa Sasafuɛ Tranwlɛ’n be nun’n, e kwla suan be nun like naan y’a wun ndɛ wie’m be bo kpa. Wafa nga be yiyili Biblu’n nun ndɛ mma’m be nun be fa gua ndɛ’n i bo’n, maan e fa fluwa e klɛ sie. Sɛ e yo sɔ’n, é yó kɛ ‘sran mɔ be kunndɛ sa ng’ɔ ti kpa’n nin tɛ’n be ngbaciɛ lele b’a si i kpa’n,’ be sa. (Ebre Mun 5:14) Asa ekun’n, like nga e wun kɛ e kwla fa ti e wun ɲanman nun annzɛ e kwla fa uka sran uflɛ’n, maan e klɛ e Biblu’n nun, annzɛ fluwa kun nun.

Maan e uka e mma mun naan be klo Biblu’n nun like suanlɛ

16. ?Wafa sɛ yɛ amun kwla uka ba mun naan b’a klo Biblu’n nun like suanlɛ ɔ?

¹⁶ Siɛ nin niɛn’m be kwla yo ninnge kpanngban be uka be mma mun naan ba’m be nin Ɲanmiɛn b’a nanti klanman. Nán amun bu i kɛ Ɲanmiɛn i akunndan’n i nun ninnge’m be ti kekle naan amun mma’m be kwla wunman be bo. Awlo lɔ Biblu’n nun like suanlɛ nun’n, amun dun mmua man ba’m be ninnge wie’m be kunndɛlɛ’n i su junman. Kpɛkun, cɛn nga amún súan like’n, maan be yiyi nun kle amun. Asa ekun’n, amun uka ba mun maan be yi be Ɲanmiɛn sulafilɛ’n i nglo naan be kle kɛ ndɛ nanwlɛ yɛ be kleli be ɔ. Kusu’n, amun kwla fa fluwa ‘ Voyez le bon pays ’b kle amun mma mun Zuifu’m be blɛ su likalika mun naan Biblu’n i lika nga amun kɛnngɛnnin i le mɔcuɛ kwlaa nun’n, b’a wun be bo kpa.

17. ?Kannzɛ é súan e ngunmin e Biblu’n nun like’n, sanngɛ ngue yɛ ɔ fataman kɛ e ɲin kpa su ɔ?

¹⁷ E Biblu’n nun like suanlɛ’n kwla yo fɛ, kpɛkun ɔ uka e maan e lafi Ɲanmiɛn su kpa. Sanngɛ, nɛ́n i sɔ’n ti e ɲin kpá e aɲia m’ɔ fata kɛ e siesie e wun’n, be su ɔ. Afin, wafa nga Zoova maan ‘sran kpa nanwlɛfuɛ m’ɔ si ngwlɛlɛ’n’ ta e’n, i kun yɛle e aɲia mun. I sɔ’n ti’n, maan e siesie e wun kpa e kunndɛ ndɛ wie’m be bo naan sɛ ɔ ti asɔnun i fluwa nun ndɛ suanlɛ aɲia’n i bo lɔ’n, y’a kwla yiyi ndɛ’n nun klanman. Annzɛ kusu sɛ ɔ ti Biblu’n nun ndɛ kpɔlɛ fɛ’m be nun yiyilɛ Ɲanmiɛn junman dilɛ suklu’n i bo lɔ’n, y’a kwla yiyi Biblu’n i lika nga e kɛnngɛnnin i le mɔcuɛ nun’n, i ndɛ mma kun nun klanman.

18. ?Ngue ti yɛ e ɲin mɔ e mian e kunndɛ ‘Ɲanmiɛn bɔbɔ i akunndan’n’ i bo’n, ɔ timan afɛ ngbɛn ɔn?

¹⁸ Sɛ e fa e ɲin sie e ngunmin Biblu’n nun like suanlɛ’n su kpa’n, i sɔ’n yó maan e nin Zoova e afiɛn’n mántan kpa. I sɔ like suanlɛ’n, nanwlɛ, ɔ ti kpa dan. Biblu’n waan: ‘Be fa ngwlɛlɛ’n kpli be ti kɛ be fa sika kpli be ti’n sa. Sa nga ti mɔ ngwlɛlɛ silɛ’n ti kpa’n yɛle kɛ ɔ maan sran ng’ɔ si ngwlɛlɛ’n i nguan ɲanman’n ɔ yo tɛnndɛn.’ (Akunndanfuɛ’n 7:12) I sɔ’n ti’n, amun ɲin mɔ amun mian be suan Ɲanmiɛn ninnge mun’n, ɔ timan afɛ ngbɛn. Be nga be tu be klun be yo sɔ’n, Biblu’n waan: ‘Bé kwlá sí Ɲanmiɛn.’—Nyanndra Mun 2:4, 5.

[Ja ngua lɛ ndɛ mun]

?Amun kwla yiyi nun?

• ?Ngue yɛle ‘Ɲanmiɛn bɔbɔ i akunndan’n?’

• ?Ngue ti yɛ e su wieman Ɲanmiɛn i akunndan’n i nun ninnge’m be suanlɛ le ɔ?

• ?Ngue ti yɛ aklunjuɛ mɔ ‘Ɲanmiɛn bɔbɔ i akunndan’n’ i nun ninnge’m be bo wunlɛ man’n, Klistfuɛ kwlaa be kwla di ɔ?

• ?Wafa sɛ yɛ e kwla ɲan ‘Ɲanmiɛn bɔbɔ i akunndan’n’ i nun ninnge’m be suanlɛ’n i mmlusuɛ ɔ?

[Foto, bue 28]

?Blɛ benin nun yɛ Zezi yoli bla’n i osu’n niɔn?

[Foto, bue 31]

Awlo lɔ Biblu’n nun like suanlɛ nun’n, siɛ nin niɛn’m be kwla dun mmua fa like nga bé súan i su junman man be mma mun kɛ be di.