“Blɛ nga e o nun yɛ’n, i yɛ ɔ ti blɛ kpa nin-ɔn”

“An nian, blɛ nga e o nun yɛ’n, i yɛ ɔ ti blɛ kpa nin-ɔn, ɔ ti be ti nyanlɛ cɛn.” —2 KOR. 6:2.

 1. ?Kɛ blɛ kun ju sa’n, ngue ti yɛ ɔ fata kɛ e si like cinnjin kpafuɛ ng’ɔ fata kɛ e yo’n niɔn?

“LIKE kwlakwla lɛ i yolɛ blɛ. Nyanmiɛn’n bo wa’n, like kwlakwla lɛ i yolɛ nuan.” (Aku. 3:1) Salomɔn klɛli i kɛ ɔ ti cinnjin kɛ e wun blɛ ng’ɔ nin like kun yolɛ fata’n i wlɛ. Maan ɔ yo fie dilɛ o, annzɛ lika kɔlɛ o, annzɛ kusu yalɛ kokolɛ o, ɔ fata kɛ e wun be yolɛ blɛ’n i wlɛ. Sanngɛ kusu kɛ blɛ kun ju sa’n, junman cinnjin kpafuɛ’n m’ɔ ti mɔ e di’n, ɔ nin i fata kɛ e wun i wlɛ weiin. Yɛle kɛ maan ninnge nga be ti e cinnjin’n, be yo weiin e akunndan’n nun.

 2. ?Wafa sɛ yɛ e si kɛ i nun mɔ Zezi o asiɛ’n su wa’n, ɔ wunnin blɛ ng’ɔ o nun’n i wlɛ weiin ɔn?

² I nun mɔ Zezi o asiɛ’n su wa’n, ɔ wunnin blɛ ng’ɔ o nun’n ɔ nin like ng’ɔ fata kɛ ɔ yo’n be wlɛ weiin. Kɛ mɔ like nga be ti i cinnjin kpafuɛ’n be trɛnnin i klun titi ti’n, ɔ si kɛ Mɛsi’n i su ndɛ nga Ɲanmiɛn nuan ijɔfuɛ’m be kannin’n, be su kpɛnlɛ blɛ mɔ b’a minndɛ i lele’n, w’a ju siɛn’n. (1 Piɛ. 1:11; Ngl. 19:10) Ɔ le junman wie m’ɔ fata kɛ ɔ di naan sran’m b’a wun i weiin kɛ i yɛ ɔ ti Mɛsi mɔ be waan ɔ́ bá’n niɔn. Yɛle kɛ, ɔ fata kɛ ɔ kan Ɲanmiɛn Sielɛ’n i ndɛ nanwlɛ’n i kpa liɛ su, naan ɔ kunndɛ be nga cɛn wie lele be nin i bé dí famiɛn’n Ɲanmiɛn Sielɛ’n nun’n. Asa ekun’n, ɔ fata kɛ Zezi wla Klistfuɛ asɔnun’n i bo ase. Afin i yɛ maan asiɛ wunmuan’n su’n, bé dí jasin fɛ’n i bolɛ junman’n, yɛ bé úka sran mun naan b’a kaci Zezi i sɔnnzɔnfuɛ ɔ.—Mar. 1:15.

 3. ?Kɛ mɔ Zezi wunnin blɛ ng’ɔ o nun’n i wlɛ ti’n, wafa sɛ yɛ ɔ dili Ɲanmiɛn junman’n niɔn?

³ Kɛ mɔ Zezi wunnin blɛ ng’ɔ o nun’n i wlɛ’n ti’n, i sɔ’n wlɛli i fanngan kɛ ɔ yo i Si i klun sa’n juejue su. Ɔ seli i sɔnnzɔnfuɛ’m be kɛ: “Awie’n w’a yo ye dan, sanngɛ junman difuɛ’m b’a sɔn-man. I sɔ’n ti’n, an se fie i fuɛ’n maan ɔ fa sran naan be wɔ i fie’n su.” (Lik 10:2; Mal. 3:23, 24) Zezi kpali i sɔnnzɔnfuɛ’m be nun sran 12, i sin ɔ kpali sran 70 kpɛkun ɔ kleli be ajalɛ wie mun, yɛ ɔ sunmannin be kɛ be ko bo jasin’n be se kɛ: “Nyanmiɛn i sielɛ blɛ’n w’a mantan.” Biblu’n kan Zezi bɔbɔ i su ndɛ se kɛ: “Kɛ Jésus nin i sɔnnzɔnfuɛ blu-nin-nnyɔn’m be dili ngaliɛ sɔ’n wieli’n, ɔ tu i bo lɛ ɔli be klɔ’m be su like klelɛ nin ndɛ kanlɛ.”—Mat. 10:5-7; 11:1; Lik 10:1.a

 4. ?Wafa sɛ yɛ Pɔlu niannin Zezi Klist liɛ’n su yoli ɔ?

⁴ Junman mɔ be wla be wun ase be di i juejue su’n, i dilɛ nun’n, Zezi kleli i sɔnnzɔnfuɛ’m be ajalɛ kpa m’ɔ leman wunsu ɔ. I nun mɔ Akoto Pɔlu wlɛ́ i wiengu Klistfuɛ’m be fanngan’n, aeliɛ sɔ’n i ndɛ yɛ ɔ kannin ɔn. Ɔ seli be kɛ: “Kɛ n nian like nga Krist yo’n su n yo’n, amun kusu an nian nga n yo’n su, an yo.” (1 Kor. 11:1) ?Wafa sɛ yɛ Pɔlu niannin Klist liɛ’n su yoli ɔ? I klikli’n yɛle kɛ ɔ wlɛli i wun ase boli jasin fɛ’n. Fluwa nga Pɔlu klɛli ko mannin asɔnun mun’n be nun’n, ɔ kannin kɛ: “Nán an yo fuɛn, sanngɛ an yo keklefuɛ,” “an di e Min’n i junman’n kpa.” Ɔ kannin ekun kɛ: “An di e Min’n i junman’n kpa wɔ amun nyrun tititi,” “like kwlaa nga amún yó’n, an tu amun klun yo i kɛ e Min’n yɛ an su yo mɛn i sa, nán an bu i kɛ sran yɛ an su yo mɛn i-ɔ.” (Rɔm. 12:11; 1 Kor. 15:58; Kol. 3:23) Sa ng’ɔ juli Damasi atin’n su lɔ’n, Pɔlu i wla w’a fiman su le. Zezi i ndɛ nga Ananiasi wa kan kleli i kasiɛn su’n, i wla w’a fiman su wie. Zezi seli kɛ: “Bian sɔ’n, m’an fɛ i kɛ ɔ di n junman’n, naan ɔ bo n dunman’n nvle wie’m be nun famiɛn mun nin Izraɛlfuɛ’m be nyrun.”—Yol. 9:15; Rɔm. 1:1, 5; Gal. 1:16.

‘Blɛ ng’ɔ ti kpa’n’

 5. ?Ngue yɛ ɔ wlali Pɔlu fanngan kɛ ɔ bo jasin fɛ’n i juejue su ɔ?

⁵ Kɛ e kanngan Sa Nga Be Yoli’n fluwa nun’n, wafa nga Pɔlu dili Ɲanmiɛn junman’n juejue su’n, e wun i weiin. (Yol. 13:9, 10; 17:16, 17; 18:5) Pɔlu wunnin i wlɛ kɛ blɛ ng’ɔ o nun’n ti blɛ cinnjin kpa kun. Ɔ seli kɛ: “An nian, blɛ nga e o nun yɛ’n, i yɛ ɔ ti blɛ kpa nin-ɔn, ɔ ti be ti nyanlɛ cɛn.” (2 Kor. 6:2) Be nga be trali be lomuɛn ɔli Babilɔni’n, blɛ ng’ɔ ti kpa mɔ bé fá sá be sin’n, ɔ juli afuɛ nga be flɛ i 537 nun ka naan b’a wu Zezi. (Eza. 49:8, 9) ?Sanngɛ ngue ndɛ yɛ Pɔlu su kɛn i wa ɔ? Ndɛ ng’ɔ dun mmua kannin’n ɔ nin nga ɔ wa kɛnnin i kasiɛn’n, be uka e naan y’a wun i ndɛ’n i wlɛ.

6, 7. ?Cenjele like benin yɛ be fa wlali Klistfuɛ nga be kpali be sieli be ngunmin’n be sa nun andɛ ɔ? ?Yɛ wan mun yɛ be nin be nga be kpali be sieli be ngunmin’n be di junman’n niɔn?

⁶ Cenjele like dan nga Pɔlu nin i wiengu Klistfuɛ nga be kpali be sieli be ngunmin’n be le i’n, ɔ kɛnnin i ndɛ i fluwa kun nun. (An kanngan 2 Korɛntfuɛ Mun 5:18, 20 nun.) Biblu’n Traduction du monde nouveau kɛn i 2 Korɛntfuɛ Mun 5:19 nun kɛ: “Ɲanmiɛn sinnin Klist i lika naan mɛnmɛnfuɛ’m be kwlaa be nin i be afiɛn’n w’a sɛ. W’a nianman sa tɛ nga be yoli’n, yɛ ɔ fali afiɛn siesielɛ ndɛ sɔ’n wlali e sa nun.” Pɔlu yiyili nun kɛ like trele kun ti yɛ Ɲanmiɛn kpali be ɔ. Yɛle kɛ be di “sran nin i be afiɛn siesielɛ junman’n,” naan be srɛ sran’m be kɛ ‘maan Nyanmiɛn siesie be nin i be afiɛn.’

⁷ Kɛ sran’m be yoli ɲin kekle Edɛni fie’n nun lɔ’n, yɛ be nin Zoova be afiɛn’n sacili ɔ. (Rɔm. 3:10, 23) I sɔ’n ti’n, klɔ sran’m b’a siman Zoova yɛ b’a siman like nga i waan ɔ́ yó’n kun. Ɔ maan ɲrɛnnɛn nin wie’n be wa tɔli be su. Pɔlu klɛli i kɛ: “E si kɛ, kɛ ɔ fin lalaa lele bɔ w’a fa ju ndɛ’n, like nga Nyanmiɛn yili be’n, be kwlaa be oto, yɛ be wun nyrɛnnɛn.” (Rɔm. 8:22) Sanngɛ Ɲanmiɛn fali ajalɛ naan be ‘srɛ’ sran’m be kɛ be sa be sin i wun, naan be nin i be afiɛn’n sɛ ekun. I sɔ junman’n yɛ laa’n, ɔ fa wlɛli i Pɔlu nin i wiengu Klistfuɛ nga be kpali be sieli be ngunmin’n be sa nun ɔn. ‘Blɛ ng’ɔ ti kpa’n’ sɔ’n, ɔ kwla yo be nga be lafi Zezi su’n “be ti nyanlɛ cɛn.” Klistfuɛ nga be kpali be sieli be ngunmin’n ɔ nin be nga be flɛ be “bua’m be wie” mun mɔ be nin be di junman’n, be te yia sran mun naan be ɲan ‘blɛ ng’ɔ ti kpa’n’ i su ye’n wie.—Zan 10:16.

 8. ?Ngue ti yɛ yialɛ nga be yia sran’m be kɛ be nin Ɲanmiɛn be afiɛn’n sɛ’n, ɔ yo ɲɛnmɛn ɔn?

⁸ Yialɛ nga be yia sran’m be kɛ be nin Ɲanmiɛn be afiɛn’n sɛ’n, ɔ yo ɲɛnmɛn. Afin kannzɛ klɔ sran’m be bɔbɔ be kunngba ti yɛ be nin Ɲanmiɛn be afiɛn’n sacili’n, sanngɛ Ɲanmiɛn bɔbɔ yɛ ɔ fali ajalɛ kɛ ɔ́ síesíe be afiɛn ɔn. (1 Zan 4:10, 19) ?Ngue ti yɛ ɔ yoli sɔ ɔ? Pɔlu tɛli su kɛ: “Ɲanmiɛn sinnin Klist i lika naan mɛnmɛnfuɛ’m be kwlaa be nin i be afiɛn’n w’a sɛ. W’a nianman sa tɛ nga be yoli’n, yɛ ɔ fali afiɛn siesielɛ ndɛ sɔ’n wlali e sa nun.”—2 Kor. 5:19, NW; Eza. 55:6.

 9. ?Ngue yɛ Pɔlu yoli fa kleli kɛ ɔ si Ɲanmiɛn i aunnvuɛ silɛ’n i su ye ɔ?

⁹ Zoova yili e ti kpɔlɛ tɛ’n, naan be nga be lafi i sɔ tɛ’n su’n, w’a yaci be sa tɛ mun w’a cɛ be, naan ɔ nin be b’a kaci janvuɛ ekun. Asa ekun’n, ɔ sunmɛnnin i sran mun lika kwlaa naan be srɛ sran mun kɛ blɛ nga be nin Ɲanmiɛn be te kwla siesie be afiɛn’n be siesie. (An kanngan 1 Timote 2:3-6 nun.) Pɔlu wunnin Ɲanmiɛn i klun sa’n i wlɛ yɛ ɔ wunnin blɛ ng’ɔ o nun’n i wlɛ wie. Ɔ maan ɔ wlɛli i wun ase dili “sran nin i [Ɲanmiɛn] be afiɛn siesielɛ junman’n.” Zoova i klun sa’n w’a kaciman. Ɔ te yo i klun su kɛ ɔ nin klɔ sran m’ɔ nin be titili nun’n, be afiɛn’n sɛ ekun. Ndɛ nga Pɔlu kɛnnin i kɛ “blɛ nga e o nun yɛ’n, i yɛ ɔ ti blɛ kpa” ɔ nin ‘be ti nyanlɛ cɛn’n,’ be te di su. Nanwlɛ, Ɲanmiɛn Zoova ti aunnvuɛ sifuɛ dan!—Tul. 34:6, 7.

Nán maan “ye nga Nyanmiɛn yoli amun’n ɔ yo ngbɛn”

10. ?Ngue yɛ Klistfuɛ nga be kpali be sieli be ngunmin laa nin andɛ’n be ɲɛn i ‘be ti nyanlɛ cɛn’n’ nun ɔn?

¹⁰ Sran klikli nga be ɲannin Ɲanmiɛn i aklunye’n su mɔ be nin i be afiɛn’n sɛli ekun’n, yɛle be nga be ‘nin Krist be ti sran wunmuan’n.’ (2 Kor. 5:17, 18) Be liɛ’n, ‘be ti nyanlɛ cɛn’n’ boli i bo afuɛ nga be flɛ i 33 nun Pantekɔtu nun. Kɛ ɔ fɛ i lɛ’n, be fali ‘afiɛn siesielɛ ndɛ’n’ wlɛli i sɔfuɛ’m be sa nun kɛ be kan. Andɛ’n, Klistfuɛ nga be kpali be sieli be ngunmin’n be onga mɔ be te o asiɛ’n su wa’n, be te di “sran nin i [Ɲanmiɛn] be afiɛn siesielɛ junman’n.” Be wun i wlɛ kɛ anzi nnan nga akoto Zan wunnin be aolia nun’n, ‘aunngban b’ɔ fin asiɛ’n i bue nnan su’n, be tra nun kɛ nán maan ɔ fita asiɛ’n’ su. Ɔ maan lele nin andɛ e te o “be ti nyanlɛ cɛn” nin ‘blɛ ng’ɔ ti kpa’n’ nun. (Ngl. 7:1-3) I sɔ’n ti’n, i afuɛ ko ju ya kun tra su yɛ’n, be nga be kpali be sieli be ngunmin’n be onga’n, be fali be wun wlɛli i “sran nin i [Ɲanmiɛn] be afiɛn siesielɛ junman’n” nun. Be dili junman sɔ’n lele juli asiɛ’n i bue kwlaa su.

11, 12. ?Kɛ afuɛ nga be flɛ i 1900 wá jú’n, wafa sɛ yɛ Klistfuɛ nga be kpali be sieli be ngunmin’n, be kleli kɛ be wun blɛ nga be o nun’n i wlɛ ɔ? (An nian foto ng’ɔ o bue 23 su’n.)

¹¹ I wie yɛle ndɛ nga fluwa Les Témoins de Jéhovah : Prédicateurs du Royaume de Dieu kannin’n. I waan kɛ afuɛ nga be flɛ i 1900 wá jú’n, “Charles Russell nin i janvuɛ’m be lafili su kpa kɛ be o awie’n i kpɛlɛ blɛ’n nun, naan ɔ fata kɛ sran’m be tie ndɛ nanwlɛ mɔ maan be kwla ɲan be ti’n.” ?Ngue yɛ be yoli ɔ? Kɛ aniaan sɔ’m be wunnin kɛ be o awie’n i kpɛlɛ blɛ’n m’ɔ ti ‘blɛ ng’ɔ ti kpa’n’ nun’n ti’n, b’a yiaman sran’m be kɛ be bla be asɔnun aɲia’m be bo sa ngbɛn. Be nga be tɔn be wun suɛn kɛ be ti Klistfuɛ’n, kɛ be su kpɛnngbɛn’m be yo i sɔ titi ɔ. Be yia sran mun be asɔnun aɲia’m be bo sa ngbɛn. Klistfuɛ nga be kpali be sieli be ngunmin sɔ’n be liɛ’n, be fali ajalɛ uflɛ naan jasin fɛ’n w’a tru lika’n nun. Ninnge nga be yoli be’n, i wie yɛle kɛ be fali mannzin uflɛuflɛ nga be yili be’n be dili junman naan be junman’n w’a wɔ i ɲrun.

¹² Kɛ ɔ ko yo naan Ɲanmiɛn Sielɛ’n i jasin fɛ’n w’a tru’n, sran ba nɲɔn kun sɔ mɔ be bo jasin fɛ’n i juejue su’n, be fali Biblu’n i akua wafawafa’m be dili junman. Asa ekun’n, be klɛli ndɛ wie mun be mannin zronali yifuɛ kpanngban kpa. Ɔ maan be ndɛ sɔ’m be fiteli zronali sɔ’m be nun. Be ko fali ijɔlɛ blɛ nvlenvle’m be aladio’m be nun naan kɛ blɛ sɔ’n ju’n, b’a yiyi Ɲanmiɛn Ndɛ’n nun b’a kle sran mun. Be fali foto wie mun be yoli kɛ flimu sa yɛ be fa sran nɛn be sie su, kpɛkun be yili flimu wie mun ekun. Be yoli sɔ lele naan be nga be junman’n yɛle flimu yilɛ’n, b’a yi be b’a man sran kpanngban mun. ?Junman mɔ be dili i juejue su sɔ’n i bo’n guali sɛ? Andɛ’n, sran ko ju akpinngbin nso be sɔli be jasin fɛ’n nun. Ɔ maan be kusu be se sran’m be wie kɛ: “Maan Nyanmiɛn siesie amun nin i bɔbɔ amun afiɛn.” Kannzɛ bɔbɔ Zoova i sufuɛ sɔ’m b’a sɔnman yɛ be siman junman wie’m be di kpa’n, sanngɛ nanwlɛ, be kleli ajalɛ kpa Ɲanmiɛn sulɛ juejue su’n i nun.

13. ?Like cinnjin benin yɛ Ɲanmiɛn waan ɔ́ yó m’ɔ fata kɛ e fa e ɲin e sie su ɔ?

¹³ “Blɛ nga e o nun yɛ’n,” mɔ Pɔlu kɛnnin i ndɛ kɛ ‘i yɛ ɔ ti blɛ kpa’n,’ e te o i sɔ blɛ’n nun. E mɔ e wunnin kɛ Zoova ti aklunyefuɛ’n, é lɛ́ i ase afin e kwla tili e nin i e afiɛn siesielɛ ndɛ’n, yɛ e sɔli nun. Nɛ́n i sɔ’n ti yɛ é búbú e sa nin e ja é trán su ɔ. Sanngɛ e fa e ɲin e sie Pɔlu i ndɛ yɛ’n su kpa. I waan: “É srɛ́ amun, nán maan ye nga Nyanmiɛn yoli amun’n ɔ yo ngbɛn.” (2 Kor. 6:1) Ye nga Ɲanmiɛn waan ɔ́ yó’n yɛle kɛ ɔ́ fá Klist yó naan “mɛnmɛnfuɛ’m be kwlaa be nin i be afiɛn a sɛ.”—2 Kor. 5:19.

14. ?Sa kpakpa benin yɛ be su ju nvle sunman nun ɔn?

¹⁴ Satan sacili klɔ sran’m be nun sunman be akunndan’n. Ɔ maan dɔ nga su’n be nin Ɲanmiɛn be afiɛn’n ti saciwa yɛ be siman like nga Ɲanmiɛn i aklunye’n ti’n i waan ɔ́ yó’n. (2 Kor. 4:3, 4; 1 Zan 5:19) Sanngɛ lika’n te kete e su te kɔ i ɲrun. Ɔ maan kɛ e kle sran’m be kɛ e nin Ɲanmiɛn e afiɛn’n m’ɔ sacili’n ti yɛ sa tɛtɛ nin ɲrɛnnɛn’n be ɲan sran mun’n, sran sunman be kplin su. Nvle nga laa i nunfuɛ’m be buman jasin fɛ’n nga e bo’n, i like fi bɔbɔ’n, siɛn’n be sɔ nun yɛ be fa ajalɛ naan be nin Ɲanmiɛn be afiɛn’n w’a sɛ ekun. ?I sɔ’n ti’n, e wun i wlɛ kɛ blɛ nga nun yɛ ɔ ti mɔ e wla e wun ase e se sran’m be kɛ: “Maan Nyanmiɛn siesie amun nin i bɔbɔ amun afiɛn” ɔn?

15. ?Kɛ mɔ nán sran’m be su nun fɛ ti yɛ e bo jasin fɛ’n, ngue yɛ e kunndɛ kɛ sran’m be si i ɔ?

¹⁵ E jasin fɛ’n bolɛ junman’n, nɛ́n i yɛle kɛ e se sran’m be kɛ sɛ be sa be sin Ɲanmiɛn wun’n, ɔ́ úka be naan sa’n kwlaa ng’ɔ o be su’n ɔ wie. I sɔ ninnge’m be kunndɛlɛ’n i ngunmin ti yɛ sran sunman be kɔ asɔnun’m be nun ɔn. Ɔ maan kɛ ɔ ko yo naan sran kpanngban b’a ɔ be asɔnun’n nun lɔ’n, asɔnun’m be like klefuɛ’m be kusu be wun blibli be kɛ bé kán ndɛ ng’ɔ yo sran’m be fɛ’n klé be. (2 Tim. 4:3, 4) Sanngɛ nɛ́n i sɔ’n ti yɛ e bo jasin fɛ’n niɔn. Jasin fɛ’n nga e bo’n, yɛle kɛ Klist dunman nun’n, Zoova kplin su kɛ klolɛ su ɔ́ yáci e sa tɛ mun cɛ́ e. Ɔ maan sran’m be tinuntinun be nin Ɲanmiɛn be afiɛn’n kwla sɛ ekun. (Rɔm. 5:10; 8:32) Sanngɛ ɔ cɛ kaan sa’n, ‘blɛ ng’ɔ ti kpa’n’ wíe.

“An yo sran waka-wakafuɛ”

16. ?Ngue yɛ ɔ ukali Pɔlu naan w’a trɛ i awlɛn w’a di jasin fɛ’n i bolɛ junman’n juejue su ɔ?

¹⁶ ?Wafa sɛ yɛ Ɲanmiɛn sulɛ kpafuɛ’n nun’n, e kwla yo juejuefuɛ naan y’a ka sɔ titi ɔ? Sran wie’m be liɛ’n be sa ɲan annzɛ be timan ijɔfuɛ. I ti’n, be klun ndɛ kanlɛ’n annzɛ be nin sran be yalɛ kokolɛ’n kwla yo kekle man be. Sanngɛ ɔ ti kpa kɛ e wun i wlɛ kɛ juejue yolɛ’n nɛ́n i yɛle wlɛwlɛ yolɛ’n. Kusu nán sran’n i wafa nga e ti’n, i ti yɛ e kwlá yoman like juejue su ɔ. Like ng’ɔ fata kɛ sran kun yo naan w’a yo juejuefuɛ tititi’n, Pɔlu i ndɛ yɛ m’ɔ kannin’n ɔ yi i nglo. Ɔ wlɛli i wiengu Klistfuɛ’m be fanngan kɛ: “An yo sran waka-wakafuɛ.” (Rɔm. 12:11) Zoova i wawɛ’n ukali akoto Pɔlu dan kpa naan w’a trɛ i awlɛn w’a di jasin fɛ’n i bolɛ junman’n juejue su. Kɛ Zezi flɛli i lele mɔ bé fá wlɛ́ i bisua mɔ bé kún i Rɔmu lɔ’n, ɔ dili afuɛ 30 tra su. Blɛ sɔ’n nun’n i juejue yolɛ’n w’a kanman ase kaan sa le. Ɲanmiɛn yɛ ɔ niɛnnin i titi ɔ. Yɛ Ɲanmiɛn kusu fɛli i wawɛ’n wlali Pɔlu i fanngan. Pɔlu seli kɛ: “E kwlá yo-man like fi, sanngɛ Nyanmiɛn b’ɔ kwla like kwlaa yo’n yɛ ɔ yo sa-a.” (2 Kor. 4:7) Sɛ e niɛn i ajalɛ’n su’n, e kwla ɲan ye kpa!

17. ?Ngue yɛ ɔ kwla uka e naan y’a yo “sran waka-wakafuɛ” ɔ?

¹⁷ Kɛ akoto Pɔlu kán ndɛ Rɔmfuɛ Mun 12:11 nun’n, ɔ fali ndɛ mma kun mɔ i bo’n yɛle like m’ɔ “tu kpuyakpuya’n.” Kɛ ɔ ko yo naan nzue m’ɔ o sin’n su’n w’a tu’n, ɔ fata kɛ be wlɛ i bo sin titi. I kunngba’n, sɛ e waan é yó ‘sran wakawakafuɛ’n,’ ɔ fata kɛ e ɲan Ɲanmiɛn wawɛ’n titi. Wafa nga e kwla ɲan wawɛ sɔ’n, yɛle kɛ e yo ninnge kwlaa nga Zoova siesieli be kɛ ɔ́ fá wlá e fanngan Ɲanmiɛn ninnge’m be nun’n. Yɛle kɛ e awlo lɔ nin asɔnun’n nun’n, maan Ɲanmiɛn sulɛ’n yo e cinnjin. Kpɛkun e bɔbɔ e Biblu’n nun like suanlɛ’n nin Ɲanmiɛn srɛlɛ’n ɔ nin e nin e wiengu Klistfuɛ mun e yialɛ’n nun’n, nán e kpɛ nun cɛn. I sɔ ninnge liɛ’m bé úka e naan y’a yo “sran waka-wakafuɛ” kɛ sin m’ɔ yo maan nzue’n tu kpuyakpuya’n sa.—An kanngan Sa Nga Be Yoli’n 4:20; 18:25 nun.

18. ?E mɔ e ti Klistfuɛ’n, ngue su yɛ ɔ fata kɛ e ɲin tran ɔn?

¹⁸ Sran ng’ɔ fɛ i wun mannin like kun’n, yɛle sran ng’ɔ bu like sɔ’n i yolɛ’n i ngunmin i akunndan’n. Ɔ maan ɔ fɛmɛn i ɲin siemɛn i like uflɛ su sa ngbɛn, yɛ i sa sin bubumɛn i like sɔ’n i yolɛ’n nun. E mɔ e ti Klistfuɛ’n, ɔ fata kɛ e nian Zezi i ajalɛ’n su naan e yo like kwlaa nga Zoova waan e yo’n. (Ebr. 10:7) Andɛ’n, like nga Zoova kunndɛ’n yɛle kɛ sran kpanngban be nin i be afiɛn’n sɛ ekun. I sɔ’n ti’n, maan e wla e wun ase kɛ Zezi nin Pɔlu sa naan e di junman cinnjin sɔ m’ɔ fata kɛ e di i ndɛndɛ andɛ’n.

[Ja ngua lɛ ndɛ’n]

?Amun wla kwla kpɛn su?

• ?Junman benin yɛ be fa wlɛli i Pɔlu nin i wiengu Klistfuɛ nga be kpali be sieli be ngunmin’n be sa nun ɔn?

• ?Wafa sɛ yɛ be nga be kpali be sieli be ngunmin’n be onga’n be fali ‘blɛ ng’ɔ ti kpa’n’ be dili junman kpa ɔ?

• ?Wafa sɛ yɛ Klistfuɛ’m be kwla yo “sran waka-wakafuɛ” be junman’n i dilɛ’n nun ɔn?

[Foto, bue 20]

Sa ng’ɔ juli Damasi atin’n su lɔ’n, Pɔlu i wla w’a fiman su le.