Sɛ aja’n w’a wie saci’n

1, 2. ?Kɛ kekle’n ko tɔ aja’n nun’n, kosan benin yɛ ɔ nin i fata kɛ be usa ɔ?

AFUƐ nga be flɛ i 1988 nun’n, Itali lɔ bla kun mɔ be flɛ i Lucia’n i wla boli i wun dan.a Kɛ ɔ jali bian m’ɔ dili afuɛ blu’n yɛ i aja’n sacili ɔ. Kpalɛ sunman ɔ miɛnnin i ɲin naan ɔ́ síesíe ɔ nin i wun be afiɛn, sanngɛ ɔ yoli ngbɛn. Ɔ maan be wun aniɛn’n mɔ be timan’n ti’n, be titili nun. Siɛn’n ɔ nin i fata kɛ i ngunmin tɛ i mma bla nɲɔn’n. Kɛ Lucia bu i sɔ blɛ’n i akunndan’n, i waan: “N seli min wun kɛ nanwlɛ, e aja’n su kwlá yoman ye le.”

² Sɛ amun aja’n nun’n i sɔ sa kunngba’n o amun su’n, amun kwla wun wafa nga Lucia i wun fa yo i’n i wlɛ. Atrɛkpa’n, amun aja’n su bo nvaka, ɔ maan amun kwla usa amun wun kɛ ɔ kwla yo ye ekun. Sɛ ɔ ti sɔ’n, maan amun bu kosan nga i akunndan nian, ɔ́ kwlá úka amun. Yɛle kɛ: ?N nantili Biblu’n nun afɔtuɛ kpakpa kwlaa nga Ɲanmiɛn mannin’n su naan min aja’n w’a yo kpa?—Jue Mun 119:105.

 3. ?Kannzɛ bɔbɔ be wun ralɛ’n w’a tru lika’n nun’n, ngue yɛ be sieli i nzɔliɛ sran sunman mɔ be rali’n ɔ nin be osufuɛ’m be lika ɔ?

³ Kɛ yasua’n nin bla’n be afiɛn’n sɛman kun mlɔnmlɔn’n, like nga be bu i pɔpɔ’n yɛle be wun ralɛ’n.b Kannzɛ bɔbɔ nvle sunman nun’n, be wun ralɛ’n su tru kpa’n, sanngɛ nga be sie i nzɔliɛ koko nga nun’n, yɛle kɛ ɔ wa yoli yasua nin bla nga be rali’n, be pɛ lika be nsisɔ. I sɔ sa’n ɔ wa mannin be nun wie’m be tukpacɛ. Be nga be kali aja’n nun’n be liɛ’n w’a yoman sɔ. Be wun ralɛ i sin nzanngan’n nin aklunfian’n m’ɔ o ba’m be su’n, ɔ tuman be su ndɛ. Be nga be rali’n, be si nin be nin mun nin be janvuɛ’m be kusu be fɛ wie. ?Yɛ wafa sɛ yɛ Ɲanmiɛn m’ɔ kpɛli aja’n bɔbɔ i ba’n, ɔ bu i sɔ aeliɛ’n niɔn?

 4. ?Wafa sɛ yɛ ɔ fata kɛ be tra aja’n nun ndɛ mun ɔn?

⁴ Kɛ nga e fa wunnin i ndɛ tre nga be dun mmua sinnin’n be nun sa’n, wafa nga Ɲanmiɛn siesieli aja’n yɛle kɛ, kɛ be ko ja’n nn b’a ja. (Bo Bolɛ 2:24) ?Yɛ ngue ti yɛ aja sunman be saci ɔ? I sɔ’n baman cɛn kunngba sa. Blɛ sunman ɔ le i nzɔliɛ. Aja’n nun ndɛnngan kanngan’m be kwla yo lele be kaci ndɛ dan mɔ be to nun yɛbuɛ ɔ, ɔ yoman ye kun ɔn. Sanngɛ sɛ be nian Biblu’n nun mmla’m be su naan be ja nun lɛ’n be siesie ndɛ sɔ’n, aja kpanngban be kwla yo ye.

 5. ?Sa benin yɛ ɔ kwla tɔ aja kwlaa nun ɔn?

⁵ Like nga ti yɛ wie liɛ’n ndɛnngan’n ba’n, yɛle kɛ aja’n nun’n, like nga yasua’n nin bla’n be kunndɛ i be wiengu’n i lika’n, awlanmannun’n sran kun kwlá yomɛn i sɔ like’n. Ninnge nga be wun be fluwa nin zronali nin televiziɔn nin sriman be nun’n, be bu i kɛ i sɔ yɛ be aja’n wá yó ɔ. Yɛ kɛ i sɔ like mɔ be kunndɛ’n kpɛnman su’n, kpɛkun be kwla bu i kɛ be wiengu kun w’a laka be, yɛ i sɔ’n wla be klunngbɔ. ?Sanngɛ wafa sɛ yɛ sran nɲɔn mɔ fɔ o be nun’n, be kwla di aklunjuɛ aja’n nun ɔn? Ɔ nin i fata kɛ be mian be ɲin naan i sɔ’n w’a yo ye.

 6. (a) ?Ngue ndɛ yɛ Biblu’n kɛn i aja’n su ɔ? (b) ?Ngue yɛ ɔ kwla fa ndɛnngan ba aja’n nun ɔn?

⁶ Ndɛ nga Biblu’n kan’n ti nanwlɛ. Ɔ kle weiin kɛ aja’n man aklunjuɛ, sanngɛ kusu ɔ se kɛ be nga be o aja’n nun’n “bé wún be nyinsu.” (1 Korɛntfuɛ Mun 7:28) Kɛ nga e dun mmua fa kannin’n sa’n, fɔ o yasua’n nin bla’n nun, yɛ be fɔnlɛ yoman ya. Asa kusu ɔ le sran kun nin i akunndan bulɛ wafa liɛ, ɔ nin wafa nga be fa tɛli i ɔ. Ɔ ju wie’n, yasua’n nin bla’n be nuan sɛman sika ndɛ nin ba ndɛ ɔ nin wafa nga be nin be sia’m bé nánti’n be su. Be ti mɔ be ɲɛnmɛn i naan b’a yo ninnge mun likawlɛ’n ɔ nin be afiɛn nna ndɛ’n, ɔ kwla fa ndɛnngan ba awlo’n nun wie.c Ndɛ sɔ’m be siesielɛ’n leman ba, sanngɛ nán amun sa sin bubu amun! Sa kɛ ngalɛ sa’m be o sran sunman mɔ be o aja nun’n be su wie. Sanngɛ be tili be wun aniɛn.

7, 8. ?Sɛ ndɛ wie loli sran kun i ngasi’n, annzɛ sɛ b’a wunman i ndɛ ng’ɔ kan’n i wlɛ’n, ajalɛ benin yɛ Ɲanmiɛn Ndɛ’n kle ɔ?

⁷ Sran wie mun’n, sɛ ndɛ wie loli be ngasi’n, annzɛ b’a wunman be ndɛ nga be kan’n i wlɛ’n, annzɛ sɛ be fɔn naan be su kɛn i ndɛ’n, be kwlá traman be awlɛn. Kɛ ɔ yo naan be se be wiengu kun’n i trele kɛ: “Ɔ yo n kɛ ndɛ nga n kannin’n, a wunmɛn i wlɛ sa,” be yomɛn i sɔ, sanngɛ be kwla fa ya be blɔ ndɛ’n. Sran sunman bé sé kɛ: “Ɔ liɛ’n, ɔ ngunmin ɔ akunndan yɛ a bu ɔ,” annzɛ, “a kloman min.” Sɛ i wiengu kun’n kloman ndɛnngan’n, ɔ su tɛman su.

⁸ Ɔ flunman kɛ amun fa Biblu’n nun mmla’n su. I waan: “Sɛ an fa ya’n, nán an yo sa tɛ. Nán an fa ya sɔ’n lele maan wia’n tɔ su.” (Efɛzfuɛ Mun 4:26) Kɛ be usali sran nɲɔn mɔ b’a di afuɛ 60 be aja’n nun’n kɛ ngue ti yɛ be aja’n cɛli sɔ’n, yasua’n tɛli su kɛ: “E wunnin i wlɛ kɛ sɛ ndɛ tɔ e afiɛn’n, i li m’ɔ yo kaan sɛ, ɔ nin i fata kɛ e siesie ndɛ sɔ’n kwlaa naan y’a ko la.”

 9. (a) ?Ɲanmiɛn Ndɛ’n nun’n, ngue yɛ ɔ ti cinnjin yalɛ kokolɛ nun ɔn? (b) ?Blɛ sunman ngue yolɛ nun yɛ ɔ nin i fata kɛ yasua’n nin bla’n be yo wun ase kanfuɛ nin yakpafuɛ ɔ?

⁹ Sɛ yasua kun nin i yi be nuan sɛman be wun’n, like ng’ɔ fata kɛ be yo’n yɛle kɛ maan “be sie be su be tie ndɛ nga be kan’n kpa, nán maan sran fi kan ndɛ ndɛnndɛ, yɛ nán maan ɔ fa ya ndɛnndɛ.” (Zak 1:19) Ndɛ nga be wiengu kun’n kan’n, kɛ be ko sie be su be ko tie i kpa’n, atrɛkpa’n, be nɲɔn’n bé wún kɛ ɔ nin i fata kɛ be kpata be wiengu. (Zak 5:16) Ɔ nin i fata kɛ amun yo wun ase kanfuɛ nin yakpafuɛ naan amun a kwla se kɛ: “Yaci, n loli ɔ ngasi.” Sanngɛ ndɛ siesielɛ wafa sɔ’n ɔ uka yasua nin bla mun. Nán ndɛ m’ɔ tɔli’n i kunngba yɛ be siesie ɔ, sanngɛ i sɔ’n yo maan be afiɛn’n sɛ kpa, ɔ maan bé kló be wiengu titi.

10. ?Ndɛ benin yɛ Pɔlu kan kleli Korɛntifuɛ mun mɔ Klistfuɛ’m be kwla di su andɛ ɔ?

¹⁰ Kɛ akoto Pɔlu klɛ́ Korɛntfuɛ Mun’n, ɔ seli be kɛ ‘kɛ ɔ́ yó naan b’a kunndɛ-man bla i sukusuku’n,’ maan be ja bla nin bian. (1 Korɛntfuɛ Mun 7:2) Andɛ mɛn’n ti tɛ kɛ laa Korɛnti klɔ’n sa, annzɛ i tɛ liɛ’n tra Korɛnti klɔ’n bɔbɔ. Sa sukusuku yolɛ ndɛ mɔ be kɛn i nzra nun’n, tralɛ ng’ɔ fa be wun kle’n mɔ be wla’n, ɔ nin bian nin bla ndɛ mɔ be kɛn i fluwa’m be nun nin televiziɔn nin sriman nun’n, i kwlaa sɔ’n yo maan be konvi tran sa sukusuku yolɛ su. Akoto Pɔlu seli Korɛntifuɛ nga be tran lika kɛ ngalɛ sa nun’n be kɛ: “Maan be ja bla nin bian, afin sɛ be ja kun’n, ɔ ti kpa tra kɛ be konvi tran bla nin bian su’n.”—1 Korɛntfuɛ Mun 7:9.

11, 12. (a) ?Ngue yɛ ɔ fata kɛ yasua kun nin i yi be yo man be wiengu ɔ? ?Yɛ wafa sɛ yɛ ɔ fata kɛ be yo i sɔ ɔ? (b) ?Sɛ ɔ nin i fata kɛ be fa blɛ kan be kpɛ be wun ainngba’n, wafa sɛ yɛ ɔ fata kɛ be yo i sɔ ɔ?

¹¹ I sɔ’n ti Biblu’n se Klistfuɛ nga be o aja nun’n kɛ: “Like nga yasua yo mɛn i yi-ɔ ɔ ti su’n, maan ɔ yo mɛn i, maan bla’n kusu yo i sɔ mɛn i wun’n.” (1 Korɛntfuɛ Mun 7:3) Maan amun sie i nzɔliɛ kɛ like nga be kɛn i ndɛ wa’n yɛle like fa manlɛ’n, nɛ́n i usalɛ ɔ. Aja’n nun’n, sɛ sran kun bu i wiengu’n i akunndan’n, yɛ bian nin bla nna nun’n bé dí aklunjuɛ ɔ. I wie yɛle kɛ Biblu’n se yasua mun kɛ be nin be yi’m “be tran kpa.” (1 Piɛr 3:7) Bian nin bla nna ndɛ nun’n, like nga sran kun yo man i wiengu m’ɔ ti kpa’n yɛ ɔ fata kɛ ɔ yo ɔ. Sanngɛ sɛ yasua’n yo bla’n i kpokokpoko’n, be afiɛn nna ndɛ’n yó kekle mɛ́n i.

¹² Ɔ ju blɛ wie’n yasua’n nin i yi’n be kwlá laman. Afin bla’n o mannza nun annzɛ w’a fɛ kpa. (An nian Saun Yolɛ 18:19.) Ɔ kwla yo yasua’n kusu yɛ afɛ’n o i su annzɛ junman su lɔ ndɛ wie wo i su ɔ. Sɛ yasua’n nin bla’n be ‘nnyɔn’n be bo yo kun’ kɛ bé fá blɛ kan naan bé kpɛ́ be wun ainngba’n, ɔ́ kwlá sɔ́n be nun. (1 Korɛntfuɛ Mun 7:5) I sɔ’n yó maan be nun wie fi su kpliman buman i wiengu kun’n i wun akunndan tɛ. Sanngɛ kusu’n, sɛ yasua kun nin i yi be ɲinfu be fɔnndɔn be wiengu’n, i sɔ’n kwla fɛ i sie i sa tɛ yolɛ atin su. I lɛ ngalɛ nun’n, ndɛnngan kwla tɔ aja’n nun.

13. ?Wafa sɛ yɛ Klistfuɛ’m be kwla mian be ɲin naan be akunndan’n w’a ka sanwun ɔn?

¹³ Kɛ nga Klistfuɛ kwlaa fa yo’n sa’n, ɔ nin i fataman kɛ Ɲanmiɛn i sufuɛ nga be o aja nun’n, be sa kan bian nin bla nna nga be fa fite nzra nun’n, afin ɔ kwla fa sa sukusuku yolɛ akunndan ba be ti nun. (Kolɔsfuɛ Mun 3:5) Sɛ sran nga e nin i su yo like wie’n, ɔ timan e wiengu yasua annzɛ e wiengu bla’n, maan e nian e wun su. Zezi seli kɛ: “Sran kwlaa ng’ɔ wun bla kun b’ɔ bu i kunndɛlɛ akunndan i anwlɛn nun’n, wuun ɔ’a kunndɛ bla sɔ’n.” (Matie 5:28) Biblu’n nun mmla’n m’ɔ kan bian nin bla nna i ndɛ’n, sɛ yasua’n nin bla’n be nanti su’n, be konvi su sɔman sa sukusuku yolɛ, yɛ be su kunndɛman bian be wun bo annzɛ bla be yi bo. Bé dí aklunjuɛ be aja’n nun’n. I nun like ɲɛnmɛn kun nga Zoova m’ɔ kpɛli aja’n i ba’n fa mannin be’n, yɛle bian nin bla nna’n.—Nyanndra Mun 5:15-19.

14. ?Ɲrɛnnɛn sa benin yɛ wie liɛ’n ɔ ju ɔ? ?Ngue ti ɔ?

¹⁴ Ɲanmiɛn sa mɔ Klistfuɛ aja sunman nun’n sa kwlaa ng’ɔ tɔ’n be kwla siesie ɔ. Sanngɛ nán cɛn ngba yɛ ɔ kwla yo ye ɔ. Kɛ mɔ fɔ o klɔ sran’m be nun’n, mɔ be tran Satan i mɛn’n nun’n ti’n, aja wie’m be saci. (1 Zan 5:19) ?Wafa sɛ yɛ ɔ fata kɛ Klistfuɛ’m be trɛ i sɔ sa mun ɔn?

15. (a) ?Like kunngba cɛ nga ti yɛ Ɲanmiɛn Ndɛ’n man atin kɛ be kwla ra kpɛkun be ja bian annzɛ bla uflɛ’n, yɛle benin? (b) ?Ngue ti yɛ wie’m be nin be wun m’ɔ kunndɛli bla be bo annzɛ be yi m’ɔ kunndɛli bian be bo’n b’a raman’n niɔn?

¹⁵ Kɛ nga be kɛnnin i fluwa nga i ndɛ tre 2 nun’n sa’n, like kunngba cɛ nga ti yɛ be kwla ra kpɛkun be ja bian annzɛ bla uflɛ’n, yɛle bian nin bla kunndɛlɛ sukusuku’n.d (Matie 19:9) Sɛ ɔ ti weiin kɛ amun yi w’a kunndɛ bian amun bo annzɛ amun wun w’a kunndɛ bla amun bo’n, ajalɛ cinnjin kun falɛ w’a to amun. ?Amún jɛ́ i ekun annzɛ amún rá? Mmla nunman ngalɛ’n su. Kɛ Klistfuɛ wie’m be wunnin kɛ be wiengu’n i sa tɛ m’ɔ yoli’n, ɔ yoli i nsisɔ’n, be yaci cɛli i, yɛ be aja’n i bo’n wa wlali ase kpa. Wie’m be kusu’n, ba’m be ti’n, b’a raman.

16. (a) ?Ngue ti yɛ sran wie’m be rali be wiengu kun ng’ɔ yoli sa sukusuku’n niɔn? (b) ?Sɛ sran nga be fɔnnin i wun’n, ɔ fa ajalɛ kɛ be ra, annzɛ w’a fɛmɛn i sɔ ajalɛ’n, ngue ti yɛ ɔ nin i fataman kɛ be kɛn i wun ndɛ tɛ ɔ?

¹⁶ Wie liɛ kusu’n, sa sukusuku sɔ’n i sin sa’n kwla yo kuɛ annzɛ tukpacɛ wie. Annzɛ kusu, atrɛkpa’n siɛ’n annzɛ niɛn’n w’a yo sa sukusuku ba’m be su, ɔ maan ɔ nin i fata kɛ be sasa be. Nanwlɛ, ɔ nin i fata kɛ amun bu akunndan kpa naan amun a fa ajalɛ. Sanngɛ sɛ amun si kɛ amun yi w’a kunndɛ bian amun bo annzɛ amun wun w’a kunndɛ bla amun bo’n, naan i sin’n, amun si sua ekun’n, i sɔ’n kle kɛ amun a yaci i wun sa’n b’a cɛ i, naan amun te ja. Amun kwlá jranman Ɲanmiɛn i Ndɛ’n su kun be raman be wun. Sran wie fi leman atin fɛmɛn i nuan wlaman amun ndɛ nun naan w’a kle amun ajalɛ nga amun ko fa’n. Annzɛ kusu ɔ leman atin kanman ajalɛ nga amun fali’n i wun ndɛ tɛ. Ajalɛ nga amun fali’n, amun bɔbɔ yɛ amún súɛ i sin sa mun ɔn. “Sran kun bɔbɔ yɛ ɔ́ súɛ i trɔ nin-ɔn.”—Galasifuɛ Mun 6:5.

17. ?Sɛ sran kun w’a kunndɛman bian annzɛ bla i wiengu kun bo’n, be nun titilɛ nin be wun ralɛ i su mmla benin yɛ Ɲanmiɛn Ndɛ’n mannin ɔn?

¹⁷ ?Kannzɛ bɔɔ e wiengu kun’n w’a kunndɛman bian annzɛ bla e bo’n, ɔ le sa wie ti mɔ e kwla titi nun annzɛ e kwla ra ɔ? Ɛɛn, sanngɛ sɛ ɔ ti sɔ’n, Klistfuɛ kun leman atin kɔman sran uflɛ i wun kɛ ɔ nin i bé já. (Matie 5:32) Be nun titilɛ wafa sɔ’n, Biblu’n mɛn i wun atin, sanngɛ ɔ se weiin kɛ ɔ fata kɛ sran ng’ɔ ɔli’n, “ɔ ka lɛ annzɛ ɔ sɛ i sin.” (1 Korɛntfuɛ Mun 7:11) ?Sa kekle wie benin ti yɛ be kwla titi nun ɔn?

18, 19. ?Kannzɛ bɔɔ sran kun kwlá jaman bla nin bian uflɛ’n, sa kekleekle wie benin be ti yɛ ɔ kwla se kɛ awa mɛn i atin naan be titi nun annzɛ be ra ɔ?

¹⁸ Wie liɛ’n, yasua’n m’ɔ ti fuɛnfuɛ ɔ nin i aeliɛ’n tɛtɛ’n ti’n, awlobofuɛ’m be kwla tran yalɛ nun.e Atrɛkpa’n ɔ saci sika’n sika nun mma tolɛ nun annzɛ nzan nin drɔgi nɔnlɛ nun. Biblu’n se kɛ: “Sran ng’ɔ niɛn-mɛn [...] i bɔbɔ i awlo’n i lika’n, ɔ ti-man Nyanmiɛn sufuɛ, i tɛ liɛ’n tra sran ng’ɔ lafi-man Krist su’n.” (1 Timote 5:8) Sɛ i sɔ yasua’n kacimɛn i nzuɛn’n naan atrɛkpa ɔ fa sika nga i yi ɲɛn i fa yo ninnge sukusuku mun’n, bla’n bɔbɔ nin ba’m be sasalɛ ti’n, bla’n kwla se kɛ awa mɛn i atin naan ɔ nin bian’n be titi nun.

¹⁹ Sɛ kusu yasua’n nin bla’n be nun kun ti nzajefuɛ naan ɔ yo i wiengu kun’n i like yaya kpa’n, atrɛkpa bɔbɔ ɔ bo i titi naan ɔ o wie nuan’n, ɔ kwla fa be nun titilɛ ajalɛ sɔ’n wie. Asa ekun’n, be nun kun kwla jin i wiengu kun’n wun naan ninnge wie’m be nun’n ɔ fɔn Ɲanmiɛn i mmla mun. Sɛ ɔ ti sɔ naan Ɲanmiɛn ninnge’m be nun’n sran sɔ’n o afɛ nun kpa’n, ɔ kwla fa ajalɛ kɛ be titi nun. Sran ng’ɔ o afɛ nun’n kwla se kɛ ajalɛ kunngba ng’ɔ kwla fa naan i ‘nyin w’a yi Nyanmiɛn w’a tra sran mun’n,’ yɛle kɛ awa mɛn i atin naan be titi nun.—Sa Nga Be Yoli’n 5:29.

20. (a) ?Sɛ aja’n su saci’n, ngue yɛ janvuɛ nga be ɲin w’a ti’n ɔ nin asɔnun kpɛnngbɛn’m be kwla yo ɔ? ?Yɛ ngue yɛ ɔ fataman kɛ be yo ɔ? (b) ?Ɔ ti su kɛ Biblu’n kan be nun titilɛ nin be wun ralɛ ndɛ, sanngɛ ngue yɛ ɔ nin i fataman kɛ yasua nin bla’m be jran ndɛ sɔ’n su be yo ɔ?

²⁰ Nzaje sa kekle kpa kwlaa nga be o awlobo’m be nun’n, be nun’n, sran fi leman atin seman sran nga kekle’n o i su’n kɛ ɔ nin i wiengu’n be titi nun annzɛ ɔ ka lɛ. Kannzɛ bɔbɔ be janvuɛ nga be ɲin w’a ti’n ɔ nin asɔnun kpɛnngbɛn’m be kwla jran Biblu’n su be man be afɔtuɛ’n, sanngɛ be kwlá siman sa ngba ng’ɔ o sran kun nin i yi be afiɛn’n. Saan Zoova kunngba cɛ yɛ ɔ si i kwlaa sɔ’n nun ɔn. I yo, sɛ Klistfuɛ bla kun jran ndɛ ng’ɔ timan ndɛ’n i su naan ɔ ra’n, i lɛ nun’n ɔ buman aja’n m’ɔ fin Ɲanmiɛn’n i like dan. Sanngɛ sɛ kekle ng’ɔ o i su’n, ɔ su tin i su kpa’n, sran fi leman atin kanman ajalɛ ng’ɔ fa’n i ndɛ tɛ. Kɛ Klistfuɛ yasua kun m’ɔ kunndɛ kɛ ɔ nin i yi bé títí nun’n, i liɛ’n kusu ti sɔ wie ɔ. “Bé wá fá e kwlaa kɔ́ Nyanmiɛn ja su.”—Rɔmfuɛ Mun 14:10.

21. ?Sa benin yɛ ɔ kle kɛ aja’n i su afɔtuɛ nga Biblu’n man’n, ɔ ti kpa ɔ?

²¹ Lucia mɔ e dun mmua kɛnnin i ndɛ’n, m’ɔ nin i wun’n be titili nun’n, i sin’n kɛ ɔ dili anglo nsan’n, ɔ nin Zoova i Lalofuɛ’m be wa yiali. Kpɛkun be wa boli i Biblu’n nun like klelɛ bo. I waan: “Ng’ɔ bo min nuan dan’n, yɛle kɛ ndɛ ng’ɔ o min su’n, Biblu’n kle i trawlɛ. Kɛ e suannin Biblu’n nun like m’ɔ dili le mɔcuɛ kun cɛ’n, e ja nun lɛ n fali ajalɛ kɛ ń sá n sin ń kɔ́ min wun sin. Siɛn’n, n kwla se kɛ aja nga be su saci’n, Zoova si wafa ng’ɔ́ síesíe be ye’n afin i like ng’ɔ kle’n, ɔ uka yasua’n nin i yi’n naan b’a klo be wun. Be nga be se kɛ Zoova i Lalofuɛ’m be saci sran’m be aja’n be bua ato. Min liɛ’n i siesielɛ li yɛ be siesieli mannin min ɔn.” Lucia suannin Biblu’n nun mmla’m be su nantilɛ siɛn’n.

22. ?Be nga be o aja nun’n, ngue yɛ ɔ nin i fata kɛ be kwlaa be lafi su ɔ?

²² Nán Lucia ngunmin yɛ i liɛ yoli ye kɛ ngalɛ sa ɔ. Ɔ nin i fata kɛ aja’n yo aklunjuɛ like, nán ɔ yo trɔ. I sɔ’n ti’n, aja’n su afɔtuɛ manlɛ like ɲɛnmɛn kun mɔ Zoova yili’n, yɛle Ɲanmiɛn Ndɛ’n. Biblu’n kwla “kle sran ng’ɔ siman sa’n i ngwlɛlɛ.” (Jue Mun 19:8-12) Ɔ yoli aja sunman mɔ be sacili’n be ye, yɛ aja kpanngban wie mun mɔ ndɛ kekle o be nun’n, ɔ yoli maan be wa yoli fɛ. Maan be nga be o aja nun’n, be kwlaa be lafi su kɛ aja’n i su afɔtuɛ nga Ɲanmiɛn Zoova man’n, be ti kpa. Nanwlɛ, be leman wunsu!