?A kunndɛ kɛ sa kwlaa nun’n Ɲanmiɛn man e mmla?
I NUN mɔ a te yo kaan kpa’n, atrɛkpa’n ɔ si nin ɔ nin be kpɛli mmla kpanngban mannin wɔ. Kɛ a ɲinnin sɛsɛ kan’n, a wunnin kɛ ɔ ndɛ lo be ti yɛ be mannin wɔ mmla sɔ mun-ɔn. Yɛ kɛ a yoli kaklaka’n, kannzɛ bɔbɔ a tranman be bo wun kun’n, atrɛkpa’n a te di mmla nga be fa mannin wɔ’n be nun wie’m be su.
E Si Ɲanmiɛn Zoova man e mmla trele wie mun Biblu’n nun. I wie yɛle kɛ i waan nán e sɔ amuin, nán e kunndɛ bian annzɛ bla sukusuku annzɛ e yo i wunsu ɲannzuɛn sa, nán e kunndɛ bian e wun bo annzɛ bla e yi bo, yɛ nán e wua. (Ezipti Lɔ Tulɛ 20:1-17; Sa Nga Be Yoli’n 15:28, 29) Kɛ e nin Zoova e afiɛn mántan kɔ́ mɔ ‘e ɲin tí sa kwlaa nun’n,’ e wun i kɛ e kpa yolɛ ti yɛ ɔ man e mmla’n niɔn, naan nán e mianmianlɛ ti-ɔ.—Efɛzifuɛ Mun 4:15; Ezai 48:17, 18; 54:13.
Sanngɛ sa sunman nun’n, Ɲanmiɛn w’a manman e mmla trele. I sɔ’n ti’n, sran wie’m be se kɛ, kɛ mɔ Biblu’n w’a manman e mmla trele sa wie’m be nun’n ti’n, be liɛ nga be klo kɛ bé yó’n, yɛ bé yó-ɔ. Be waan sa kɛ ngalɛ’n sa’m be nun’n, sɛ ɔ ti kɛ like nga é yó’n ɔ ti Ɲanmiɛn i cinnjin’n, nn ɔ kleli e mmla trele ng’ɔ fata kɛ e di su’n.
Blɛ sunman’n be nga be bu i sɔ akunndan’n, be faman ajalɛ kpa. Ɔ maan ajalɛ nga be fa’n, ɔ yo be nsisɔ kasiɛn su. Be siman kɛ nán mmla ngunmin yɛ be o Biblu’n nun-ɔn, sanngɛ akunndan nga Ɲanmiɛn bu’n, ɔ o Biblu’n nun wie. Kɛ e suan Biblu’n nun like mɔ e wun sa’m be su akunndan nga Zoova bu’n, Biblu’n yo maan e klun akunndan’n yo kpa. Kpɛkun i sɔ’n uka e naan y’a fa ajalɛ nga be yo i fɛ’n. Kɛ e fa ajalɛ kpa’n, Ɲanmiɛn i klun jɔ. Kpɛkun e bɔbɔ e ɲan su mmlusuɛ.—Efɛzifuɛ Mun 5:1.
Biblu’n kan kɛ sran wie’m be fali ajalɛ kpa
Biblu’n nun’n, be kan Ɲanmiɛn i sufuɛ wie’m be ndɛ. Sa wie’m be nun’n, Ɲanmiɛn w’a manman be mmla trele kun. Sanngɛ sa sɔ’m be nun’n, akunndan nga Zoova bu’n i su yɛ be jrannin be fali ajalɛ-ɔ. I wie yɛle Zozɛfu liɛ’n. Blɛ wie nun’n, Potifaa i yi’n jrɛnnin i wun kɛ ɔ nin i bé lá. Blɛ sɔ’n nun’n, nn Ɲanmiɛn nin-a kpɛman mmla trele kɛ be wun bo bian kunndɛlɛ’n annzɛ be yi bo bla kunndɛlɛ’n ti sa tɛ. Kannzɛ bɔbɔ mmla sɔ’n nunman lɛ’n, sanngɛ Zozɛfu wunnin kɛ sran yi kunndɛlɛ’n ti sa tɛ, naan sɛ ɔ yo sɔ’n, i akunndan’n bú i fɔ kpɛkun ɔ́ fɔ́n “Ɲanmiɛn wun.” (Bo Bolɛ 39:9) Zozɛfu wunnin i wlɛ kɛ sran yi kunndɛlɛ’n nin akunndan nga Ɲanmiɛn bu’n ɔ nin i klun sa m’ɔ yili i nglo Edɛnin fie’n nun lɔ’n, be kɔman likawlɛ.—Bo Bolɛ 2:24.
Sa kun ekun yɛ. Sa Nga Be Yoli’n ndɛ tre 16, i mma 3 se kɛ kwlaa naan Pɔlu w’a fa Timote naan b’a wɔ likalika’m be nun’n, Pɔlu wlɛli i klɛn. Sanngɛ i ndɛ mma 4 nun’n, be kɛnnin i kɛ, kɛ Pɔlu nin Timote be sinnin klɔ’m be su’n, “mmla nga akoto mun nin kpɛnngbɛn nga be o Zerizalɛmun lɔ’n be nuan sɛli su’n,” be boli be su kleli aniaan mun naan be nian su be nanti. Mmla sɔ’m be nun kun yɛle kɛ Klisifuɛ’m be diman Moizi mmla’n su kun naan ɔ nunman nun kɛ be wla be klɛn. (Sa Nga Be Yoli’n 15:5, 6, 28, 29) ?Sɛ ɔ ti sɔ’n, ngue ti yɛ Pɔlu seli kɛ maan be wla Timote i klɛn-ɔn? Afin ‘Zifu nga be o lika sɔ’m be nun’n, be kwlaa be si kɛ Timote i si ti Glɛki.’ Pɔlu kunndɛman kɛ sran’m be akunndan sanngan. Ɔ si kɛ ɔ fata kɛ Klisifuɛ’m be ‘kle sran’m be kwlaa be ajalɛ kpa Ɲanmiɛn ɲrun’ titi.—2 Korɛntifuɛ Mun 4:2; 1 Korɛntifuɛ Mun 9:19-23.
I sɔ akunndan’n yɛ Pɔlu nin Timote be buli i titi-ɔ. Sɛ amun kanngan Rɔmunfuɛ Mun 14:15, 20, 21 nin 1 Korɛntifuɛ Mun 8:9-13 ɔ nin 10:23-33 be nun’n, amún wún kɛ wafa nga aniaan’m be nin Zoova be afiɛn’n mantan’n, ɔ yoli Pɔlu i cinnjin. Ɔ maan kannzɛ bɔbɔ like kun i yolɛ timan tɛ’n, sɛ ɔ wun kɛ i sɔ’n kwla sanngan be nun wie’m be akunndan’n, ɔ yoman. Pɔlu kannin Timote i ndɛ seli kɛ: “N leman sran fi mɔ amun ndɛ lo i kpa kɛ i sa-ɔ. Be onga’m be liɛ’n, be bɔbɔ be ninnge liɛ’n yɛ ɔ lo be-ɔ, Zezi Klisi i liɛ’n loman be. Sanngɛ amun si kɛ i liɛ’n, ɔ kleli kɛ be kwla lafi i su. Yɛ ɔ nin min trannin kɛ ba kun nin i si be fa tran’n sa. Kpɛkun ɔ nin min dili junman kekle kpa naan jasin fɛ’n tru lika kwlaa.” (Filipufuɛ Mun 2:20-22) Nanwlɛ Klisifuɛ nɲɔn sɔ’m be kle e ajalɛ kpa. Sɛ sa wie su’n, Zoova w’a kpɛman mmla trele’n, nán like ng’ɔ kwla yo be bɔbɔ be fɛ’n, annzɛ ɔ kwla yo be ye’n, yɛ be yoli-ɔ. Be yili i nglo kɛ be klo sran kɛ Zoova nin i Wa Zezi be sa. Ajalɛ nga be ko fa naan be wiengu’m be nin Ɲanmiɛn be afiɛn w’a mantan kpa’n, i sɔ ajalɛ’n yɛ be fa-ɔ.
Maan e kan Zezi Klisi m’ɔ ti e ajalɛ klefuɛ’n i ndɛ. I nun ng’ɔ kannin Ɲanmiɛn ndɛ’n oka’n su lɔ’n, ɔ kɛnnin i weiin kɛ sran ng’ɔ wun akunndan ng’ɔ o Ɲanmiɛn i mmla’m be sin’n i wlɛ’n, like nga mmla se i kɛ ɔ yo annzɛ nán maan ɔ yo’n, nɛ́n i su falɛ ngbɛn sa yɛ ɔ fa-ɔ. (Matie 5:21, 22, 27, 28) Maan ɔ yo Zezi-o, annzɛ Pɔlu-o, annzɛ Timote-o, annzɛ Zozɛfu-o, be nun wie fi w’a seman kɛ Ɲanmiɛn w’a kpɛman sa trele wie i su mmla ti’n, like nga be klo kɛ bé yó’n yɛ bé yó-ɔ. Sanngɛ mmla cinnjin nɲɔn nga be yi akunndan nga Ɲanmiɛn bu’n i nglo’n, i su yɛ be niannin be fali ajalɛ-ɔ. Mmla sɔ’m be se kɛ maan be klo Ɲanmiɛn nin sran.—Matie 22:36-40.
?Yɛ andɛ Klisifuɛ’m be li?
Biblu’n timan kɛ mmla fluwa wie sa. Yɛle kɛ b’a klɛman ninnge tɛkɛtɛkɛ kwlaa ng’ɔ fata kɛ sran kun yo be’n, annzɛ nán ɔ yo be’n. Kannzɛ bɔbɔ sa wie nun’n, Zoova w’a kpɛman mmla trele kun’n, sanngɛ kɛ e jran akunndan ng’ɔ bu’n su e fa ajalɛ’n, i sɔ’n yo maan i klun jɔ. Ɔ maan nán e se kɛ Ɲanmiɛn kle e mmla trele ng’ɔ fata kɛ e nian su e nanti’n blɛ’n kwlaa nun. Sanngɛ maan e mian e ɲin naan e “wun Zoova i klun sa’n i wlɛ” (Efɛzifuɛ Mun 5:17; Rɔmunfuɛ Mun 12:2) ?Ngue ti yɛ i sɔ mɔ e yo’n, ɔ yo Zoova i fɛ-ɔ? Afin kɛ e yo sɔ’n, e kle kɛ nán like nga e le atin e yo’n, ɔ nin like nga e klo kɛ é yó’n, be su yɛ e jran e fa ajalɛ-ɔ. Sanngɛ ng’ɔ ti e cinnjin’n yɛle kɛ maan Zoova i klun jɔ e wun. Ɔ kle ekun kɛ e klo i dan ti’n, e kunndɛ kɛ é níɛn i ayeliɛ’n su, naan i sɔ klolɛ liɛ’n yɛ ɔ su e bo naan y’a fa ajalɛ-ɔ. (Ɲanndra Mun 23:15; 27:11) Asa kusu’n, kɛ e nian ndɛ ng’ɔ o Ɲanmiɛn Ndɛ’n nun su e fa ajalɛ’n, e nin Ɲanmiɛn e afiɛn mantan kpa, kpɛkun blɛ sunman’n e kplo nun sanndi e.
?Kɛ e tinuntinun é fá ajalɛ wie mun’n, wafa sɛ yɛ ndɛ sɔ’n kwla uka e-ɔ?
Kɛ é yíyí e ɲin su’n
Wienun-ɔn, aniaan bian gbanflɛn kun waan ɔ́ tó kasɛti. Jue nga be to i kasɛti’n nun’n, ɔ yo i fɛ kpa. Sanngɛ kɛ ɔ niannin kasɛti’n i sin fluwa’n su’n, ɔ wunnin kɛ ɔ ti bian nin bla kunndɛlɛ ndɛ ngunmin. Asa ekun’n, ɔ si kɛ jue tofuɛ sɔ’n i jue’m be nun’n, ɔ kan ndɛ ya su, kpɛkun ɔ kan sran’m be ndɛ tɛtɛ. Kɛ mɔ e niaan sɔ’n klo Zoova’n ti’n, akunndan nga Zoova bu’n ti i cinnjin. ?Ɔ maan ngue yɛ ɔ kwla yo naan w’a wun Ɲanmiɛn i klun sa’n i wlɛ sa sɔ’n nun-ɔn?
Galasifuɛ Mun fluwa’n nun’n, akoto Pɔlu kannin klɔ sran nzuɛn’n, nin nzuɛn nga Ɲanmiɛn wawɛ’n yo maan klɔ sran fa’n, be ndɛ. Nzuɛn nga be fin Ɲanmiɛn wawɛ’n i wie yɛle klolɛ, nin aklunjɔɛ dilɛ, nin fɔundi dilɛ, nin awlɛn tralɛ, nin klun ufue yolɛ, nin sran ye yolɛ, nin Ɲanmiɛn su lafilɛ, nin wɛtɛɛ yolɛ, nin be wun su nianlɛ. ?Yɛ klɔ sran nzuɛn’n yɛle benin? Pɔlu klɛli i kɛ: “Klɔ sran nzuɛn’n fiaman. Yɛle bla nin bian kunndɛlɛ sukusuku nin i wunsu ɲannzuɛn sa mun, nin sa kainkain’m be yolɛ, nin ɲin kekle ayeliɛ mun, ɔ nin amuin sɔlɛ, nin bae dilɛ, nin sran kpɔlɛ, nin utre dilɛ, nin klunngbɔ tulɛ, nin ya falɛ tikatika, nin be nuan m’ɔ sɛman’n, nin be wun nun bubulɛ, nin like nga klɔ sran’m be kle’n i su falɛ, ɔ nin aɲinblɔɛ, nin nzanbɔɛ, nin cɛn mɔ be di i sinnzin su’n, ɔ nin i wunsu sa tɛtɛ wie mun ekun. Ndɛ nga n kan kleli amun laa’n, ń kán klé amun ekun. Yɛle kɛ be nga be yo i sɔ ninnge mun’n, be su diman Ɲanmiɛn Sielɛ’n i aja’n wie.”—Galasifuɛ Mun 5:19-23.
Kɛ Pɔlu kán klɔ sran nzuɛn’n i ndɛ’n, i agualiɛ su’n ɔ seli kɛ “ɔ nin i wunsu sa tɛtɛ wie mun ekun.” Pɔlu w’a boboman ninnge nga be ti klɔ sran nzuɛn’n be kwlaa. Ɔ maan sran kun kwla se i wun kɛ: ‘Ninnge nga be timan klɔ sran nzuɛn mɔ Pɔlu w’a boboman be’n, Biblu’n man min atin kɛ n yo be.’ Ɔ fataman kɛ e bu akunndan kɛ ngalɛ’n sa. Sanngɛ maan e bu akunndan naan e wun ninnge nga be ti klɔ sran nzuɛn “i wunsu sa tɛtɛ wie mun” ekun’n be wlɛ. Be nga be yo ninnge nga Pɔlu w’a boboman be mɔ sanngɛ be ti klɔ sran nzuɛn “i wunsu sa tɛtɛ wie mun” mɔ be kaciman be nzuɛn’n, be su ɲanman like nga Ɲanmiɛn Sielɛ’n wá yó’n i su ye wie.
I sɔ’n ti’n, ɔ fata kɛ e bu akunndan, naan e wun sa nga be yoman Zoova fɛ’n be wlɛ. ?Sanngɛ i sɔ yolɛ’n ti klekle? Maan e se kɛ sa wie ti’n, dɔɔtrɔ’n se amun kɛ amun di ninnge kɛ afuka nin nɲa mun sa’n be kpanngban kpa. Sanngɛ nán amun di gbofloto mun annzɛ nán amun nɔn nzan nga be ti mlɛnmlɛn’n, nin popito mun nin be wunsu ninnge’m be kun. ?I lɛ nun’n, sɛ ɔ fata kɛ amun di gato annzɛ nán amun di’n, i sɔ’n i wlɛ wunlɛ kwla yo kekle man amun? Siɛn’n, maan e sa e sin e kan klɔ sran nzuɛn’n nin nzuɛn nga Ɲanmiɛn wawɛ’n yo maan klɔ sran fa’n be ndɛ ekun. ?Ndɛ nga be kɛn i kasɛti nga aniaan’n waan ɔ́ tó’n nun’n, ɔ nin klɔ sran nzuɛn’n kɔ likawlɛ, annzɛ ɔ nin nzuɛn ng’ɔ fin Ɲanmiɛn wawɛ’n yɛ be kɔ likawlɛ-ɔ? Nanwlɛ, jue sɔ’n i nun ndɛ’n ɔ nin klolɛ, nin sran ye yolɛ, nin be wun su nianlɛ, nin nzuɛn uflɛ wie ekun mɔ be fin Ɲanmiɛn wawɛ’n, be kɔman likawlɛ kaan sa. Ɔ maan ɔ nunman nun kɛ Ɲanmiɛn kpɛ mmla trele kun sa naan w’a wun i wlɛ kɛ jue wafa sɔ’n, nin akunndan nga Ɲanmiɛn bu’n be kɔman likawlɛ. Ndɛ sɔ’n kwla uka e naan y’a kpa fluwa nga e kanngan be nun’n, nin flimun nga e nian be’n, nin ninnge nga be kle be televiziɔn nun’n, nin ze-video mun, nin ninnge nga e nian be ɛntɛnɛti su’n, ɔ nin be wunsu ninnge mun be nun.
E wun wlawlalɛ’n nin e ti yolɛ’n
Biblu’n nun ndɛ’n kwla uka Klisifuɛ’m be kwlakwla naan b’a wlawla be wun yɛ b’a yo be ti’n kɛ ɔ nin i fata’n sa. Sran ng’ɔ klo Zoova’n, ɔ yoman like ng’ɔ yo i bɔbɔ i fɛ’n. Sanngɛ like ng’ɔ jɔ i Si Ɲanmiɛn i klun’n, yɛ ɔ miɛn i ɲin yo-ɔ. E wunnin i kɛ kannzɛ bɔbɔ Zoova w’a kpɛman sa trele wie’m be su mmla’n, sanngɛ nán e bu i kɛ like nga i sufuɛ’m be yo’n ɔ timɛn i cinnjin. Ɔ le lika kun nin wafa nga sran’m be fa wlawla be wun’n, ɔ nin wafa nga be yo be ti’n niɔn. Ɔ ju wie bɔbɔ’n, lika kunngba’n nun’n, wafa nga sran’m be fa wlawla be wun’n, ɔ nin wafa nga be yo be ti’n, blɛ wie’m be nun’n ɔ kacikaci. Ɔ nin i sɔ ngba’n, Biblu’n nun ndɛ’n kwla uka Ɲanmiɛn i sran mun naan b’a wlawla be wun kɛ ɔ nin i fata’n sa blɛ’n kwlaa nun, nin lika kwlaa nun.
I wie yɛle kɛ 1 Timote 2:9, 10 se kɛ: “Maan bla’m be wlawla be wun kpa, nán maan be fa be wun kle. Yɛ i sɔ yolɛ nun’n, maan be fa ngwlɛlɛ. Kusu kɛ bé yó be ti’n, nán maan i nun sika ɔkwlɛ wlalɛ’n annzɛ afle wlalɛ’n yo be cinnjin. Yɛ nán maan tralɛ nga be le gua’n, be wlalɛ’n yo be cinnjin wie. Sanngɛ maan be klanman’n i ɲin fite sa kpakpa nga be yo’n nun, naan be kle kɛ be ti bla mɔ be sro Ɲanmiɛn-ɔn.” I sɔ’n ti’n, ɔ fata kɛ Klisifuɛ’m be kwlakwla, i bla-o, i yasua-o, be usa be wun kɛ: “?Min asa’n su wa’n, wafa sɛ yɛ sran’m be kunndɛ kɛ sran nga i waan ɔ ‘sro Ɲanmiɛn’n,’ ɔ wlɛwlɛ i wun-ɔn? ?Wafa nga n wlawla min wun’n, ɔ kwla yo naan sran’m b’a sɔ Biblu’n nun ndɛ nga n kan’n nun, annzɛ ɔ kwla yo naan b’a sɔman nun?” (2 Korɛntifuɛ Mun 6:3) Klisifuɛ nga be kle ajalɛ kpa’n, nán like nga be le atin yo’n, ɔ nin like ng’ɔ yo be fɛ’n yɛ ɔ ti be cinnjin dan-ɔn. Sanngɛ like nga be ko yo naan w’a sannganman be wiengu’m be akunndan’n, yɛ ɔ ti be cinnjin dan-ɔn.—Matie 18:6; Filipufuɛ Mun 1:10.
Sɛ Klisifuɛ kun wun i kɛ wafa ng’ɔ wlɛwlɛ i wun’n, ɔ nin wafa ng’ɔ yo i ti’n ɔ sɛnngɛn i wiengu’m be akunndan’n, ɔ́ míɛn i ɲin nían akoto Pɔlu i ajalɛ’n su. Yɛle kɛ like ng’ɔ ko yo naan i wiengu’m be nin Ɲanmiɛn be afiɛn w’a mantan kpa’n, yɛ ɔ́ yó-ɔ. Nɛ́n i klunklo ninnge mun yɛ bé yó i cinnjin-ɔn. Pɔlu seli kɛ: “Maan amun nian min liɛ’n su yo kɛ nga n kusu n nian Klisi liɛ’n su n yo’n sa.” (1 Korɛntifuɛ Mun 11:1) Pɔlu kannin Zezi i ndɛ seli kɛ: “Klisi bɔbɔ w’a yoman like ng’ɔ jɔ i bɔbɔ i klun’n.” Ɔ maan ndɛ nga Pɔlu kunndɛ kɛ ɔ́ kán klé i wiengu Klisifuɛ mun’n, ɔ ti weiin. Yɛle kɛ “e mɔ e le wunmiɛn’n, ɔ fata kɛ e uka be nga be leman wunmiɛn’n naan be jran kekle ninnge nga be tin be su dan’n, be ɲrun. I sɔ’n ti’n, nán e yo ninnge nga be jɔ e ngunmin e klun’n. Maan e tinuntinun e yo like ng’ɔ jɔ e wiengu klun’n naan ɔ yo i ye, naan ɔ wlɛ i fanngan.”—Rɔmunfuɛ Mun 15:1-3.
Maan e yo sran m’ɔ bu sa sin-ɔn
?Sɛ Zoova w’a kpɛman sa trele kun i su mmla’n, ngue yɛ e kwla yo naan y’a yo like ng’ɔ yo i fɛ’n niɔn? Ɔ fata kɛ e kanngan Ɲanmiɛn Ndɛ’n nun cɛn kwlaa, e bu su akunndan titi, e suan nun like titi. I liɛ’n é yó sran m’ɔ bu sa sin-ɔn. Ɔ ti kɛ ba nga e wu be yɛ’n sa. Nán cɛn kunngba’n nun yɛ be ka lɛ be ɲin-ɔn. I wafa kunngba’n, kɛ ɔ ko yo naan e nin Ɲanmiɛn e afiɛn w’a mantan’n, ɔ fa blɛ wie. Yɛ be kwlá kaman lɛ be siemɛn i sɔ liɛ’n i nzɔliɛ. I sɔ’n ti’n, ɔ fata kɛ e tra e awlɛn. Ɔ maan sɛ e nian naan e kɔman e ɲrun ndɛndɛ’n, nán e sa sin bubu e. Kusu sɛ afuɛ’m bé sín naan e mianman e ɲin’n, e su kaciman sran m’ɔ bu sa sin-ɔn. Kɛ nga e dun mmua e kannin’n sa’n, maan e fa blɛ e suan Ɲanmiɛn Ndɛ’n nun like, naan e mian e ɲin e nanti like nga e suan’n su.—Ebre Mun 5:14.
E kwla se kɛ sɛ e ti aɲinyiɛfuɛ’n, Ɲanmiɛn i mmla’m bé yí i sɔ liɛ’n i nglo. Sanngɛ sɛ e nin Ɲanmiɛn e afiɛn mantan kpa naan e kunndɛ kɛ i klun jɔ e wun’n, akunndan nga be o i mmla’m be sin’n, bé yí i sɔ liɛ’n i nglo. Kɛ e nin Zoova e afiɛn’n mántan kɔ́’n, é mían e ɲin é nían like nga i bɔbɔ nin i Wa’n be yo’n su é yó wie. Asa ekun’n, akunndan nga Ɲanmiɛn bu mɔ be kɛn i ndɛ Ɲanmiɛn Ndɛ’n nun’n, i su yɛ é jrán é fá ajalɛ-ɔ. Ɔ maan like kwlaa nga é yó’n, ɔ́ yó e Si Ɲanmiɛn i fɛ. Kpɛkun e bɔbɔ é dí aklunjɔɛ kpa trá laa’n.
[Foto]
Ɔ le lika kun nin wafa nga sran’m be wlawla be wun-ɔn. Sanngɛ akunndan nga be o Biblu’n nun mmla’m be sin’n, be kwla uka e naan y’a fa ajalɛ kpa.