?Ngue ti yɛ sran’m be yo sa tɛtɛ’n niɔn?

LIKE kun o lɛ mɔ sran sunman lika be su simɛn i akplowa ɔ. Yɛle kɛ fɔ o e ngba e nun. Ɔ maan e fɔn yɛ e yo sa tɛ kpɛkun i sin’n ɔ yo e nsisɔ. ?Kannzɛ bɔbɔ ɔ ti sɔ’n, sanngɛ fɔ m’ɔ o e nun ti yɛ maan sran’m be yo sa tɛtɛ wafa’n kwlaa e ɲin bo lɛ annzɛ nga e wun be televiziɔn annzɛ zronali’m be nun’n niɔn?

Kannzɛ bɔbɔ fɔ m’ɔ o klɔ sran’m be nun’n ti yɛ be yo sa tɛ’n, sanngɛ sran’m be kaka lika be di i nanwlɛ kɛ ninnge wie’m be o lɛ’n, be nin yolɛ fataman. Naan klɔ sran’m be kwla tra be awlɛn naan b’a yoman sa tɛ. Kusu ato ndɛ nga ɔ floflo be nuan’n, ɔ nin lare nga sran kun i ɲinfu ɔ kpɛ yi i sran nɲɔn be afiɛn’n, sran sunman se kɛ sa nɲɔn sɔ’m be sansan be wun. Asa kusu’n, be di i nanwlɛ kɛ ngbaciɛ o sanvuɛsa m’ɔ ɲan sran’n, ɔ nin sran kun m’ɔ bu sran kunlɛ’n i akunndan’n, be afiɛn. Wie liɛ’n, sran nga e nin be e o mɔ e wun be titi’n, be yɛ be yo sa tɛtɛ kpa’n niɔn. ?Sanngɛ ngue ti yɛ sran’m be yo sa tɛtɛ bɔbɔ kpa’n niɔn?

Biblu’n tu ndɛ sɔ’n i ɲin weiin. Ɔ kle sa cinnjin nga ti yɛ sran’m be ɲinfu be yo like tɛ’n. Maan e nian ndɛ ng’ɔ kan’n.

▪ “Sa sɔ bɔ amún wá wún be’n, bé wlá amun sinnzin.”—MMLA’N 28:34.

Biblu’n di i nanwlɛ kɛ ɔ ju wie’n, sa ng’ɔ o sran wie’m be su’n ti’n, be yo like nga be yomɛn i titi’n. Wie’m be liɛ’n kɛ kekle’n o be su annzɛ be bu i kɛ sa kun timɛn i su mɔ be kunndɛ kpa kɛ bé síesíe’n ti’n, be kwla kun sran bɔbɔ. Fluwa kun waan: “Like klikli ng’ɔ su kakawlonga’m be bo kɛ be yo sa tɛ’n, yɛle politiki ndɛ wie annzɛ be tranwlɛ’n nun ndɛ wie annzɛ kusu sika ndɛ wie mɔ be wunmɛn i trawlɛ’n.”—Urban Terrorism.

▪ “Sika klolɛ’n yɛ ɔ ti sa tɛtɛ’n kwlaa i bo nin-ɔn.”—1 TIMOTE 6:10.

Sran wie’m be waan sɛ be man sran kun i sika kpanngban’n, ɔ́ yáci like ng’ɔ ti kpa’n i yolɛ. Kpɛkun ɔ́ yó ng’ɔ ti tɛ’n. Sran wie’m be o lɛ’n be nin sran’m be bo nzɛmunlɛ yɛ be yo sran ye titi. Sanngɛ sɛ sika ndɛ ko tɔ’n, kpɛkun b’a kaci kpɛ kunngba. Be kaci sran mɔ i like yolɛ yo ya kpa ɔ. Sa tɛtɛ kpanngban nga aɲinblɔɛ’n ti be yo’n, amun bu i akunndan be nian. I wie yɛle akpo bolɛ’n nin sran’m be mianmianlɛ’n nin ndrunmun dilɛ’n yɛ sran kunlɛ’n bɔbɔ.

▪ “Kɛ be ka-man be ja nun lɛ be tu-man sran ng’ɔ yo sa tɛ’n i fɔ kɛ ɔ nin i fata’n sa’n, i ti yɛ sa tɛ yolɛ’n i akunndan’n wo sran’m be anwlɛn’n nun b’ɔ wie-man le nin-ɔn.”—AKUNNDANFUƐ’N 8:11.

Ndɛ mma sɔ’n yi klɔ sran’m be nzuɛn kun i nglo. Yɛle kɛ sɛ be ng’ɔ fata kɛ be nian sran’m be su’n be nunman lɛ’n, sran’m be kwla yo like kwlaa nga be klo’n. Sran wie’m be cisan loto nun lele tratra su. Wie’m be kusu kɛ bé bó be ta suklu lɔ’n, be di nun ndrunmun. Yɛ wie’m be wua awa i sika’n annzɛ be yo sa tɛtɛ uflɛ wie mun. Sran sɔ’m be bu i kɛ sɛ sran nunman lɛ nianman be su’n, be kwla yo sa sɔ mun. Kɛ sran’m be nianman mmla’n su be yoman ninnge mun kɛ ɔ nin i fata’n sa’n, annzɛ kɛ srɛ kunman sran’m be kɛ sɛ be yo sa’n be kwla tra be’n, be nga be fa mmla’n su titi’n bɔbɔ’n, be kwla yo like nga be yomɛn i titi’n. Fluwa kun waan: “Kɛ sa tɛ yofuɛ’m be yo sa mɔ be fin nun fite blɛlɛlɛ’n, sran nga be timan sa tɛ yofuɛ’n be niɛn i sɔ’n su be yo sa tɛtɛ kpa.”—Arguments and Facts.

▪ “Sran kun i lakalɛ’n fin i bɔbɔ i konvi’n, yɛ maan be lɛkɛ i be nyɛn i-ɔ. Sɛ konvi’n ti sran’n, wuun é sé kɛ, ɔ wunnzɛ, yɛ ɔ wu sa tɛ’n.”—ZAK 1:14, 15.

Klɔ sran ngba kwla bu akunndan tɛ. Ninnge nga be kwla su e bo naan y’a yo sa tɛ’n, b’a tru kpokpaa. Cɛn kwlakwla e wun be. Laa kpa’n, be seli Klistfuɛ’m be kɛ: “Sa ng’ɔ tɔ amun su’n, nán amun ngunmin yɛ i kwlaa sɔ’n tɔ amun su-ɔ.” (1 Korɛntfuɛ Mun 10:13) Kannzɛ bɔbɔ sa nga be sa e nian’n be sɔnnin’n, sanngɛ ajalɛ nga sran kun fa’n yɛ maan ɔ kwla yo sa tɛ ɔ. Yɛle kɛ sran sɔ’n kwla kpalo akunndan tɛ sɔ’n i ndɛndɛ kpa. Annzɛ kusu ɔ fɛ i ɲin sie su lele maan ɔ tra ndin i awlɛn’n nun. Zaki i fluwa’n mɔ Ɲanmiɛn maan ɔ klɛli’n, i nun ndɛ mma nga e boli su lɛ’n, ɔ wla e su nun kɛ sɛ sran kun yaci i konvi’n mɔ e kwla fa sunnzun sran’n i lɛ naan ‘ɔ wunnzɛ’n,’ i agualiɛ su’n saan ɔ́ yó sa tɛ.

▪ “Sran ng’ɔ fɛ i wun mantan ngwlɛlɛfuɛ’n, ɔ kaci ngwlɛlɛfuɛ. Sran nga kusu b’ɔ fɛ i wun mantan sinnglinfuɛ’n, ɔ kaci sinnglinfuɛ.”—NYANNDRA MUN 13:20.

Be nga e nin be e san nun’n, be kwla ɲan ta dan kpa e su. Be kwla yo maan e yo sa kpa annzɛ sa tɛ. Kpɛ sunman’n, sran’m be yo like nga b’a sunnzunman kɛ bé yó’n, afin be wiengu mun ɔ nin sran tɛtɛ nga be nin be san nun’n, be mian be kɛ be yo sɔ. Ɔ maan i bo’n gua tɛ kpa. Kɛ Biblu’n kan “sinnglinfuɛ” ndɛ’n, nán sran ng’ɔ siman ngwlɛlɛ mlɔnmlɔn’n i ndɛ yɛ ɔ kan ɔn. Sanngɛ be nga be ɲinfu be faman ngwlɛlɛ ndɛ ng’ɔ o Ɲanmiɛn Ndɛ’n nun’n i su’n, be ndɛ yɛ ɔ kan ɔn. Maan e yo kpɛnngbɛn annzɛ gbanflɛn o, sɛ y’a faman ngwlɛlɛ y’a kunndɛman be nga e nin be é sán nun’n, maan e si kɛ ‘é káci sinnglinfuɛ [“i bo’n gúa tɛ kpa mán e,” NW].’

Like nga ti yɛ sran mɔ wie liɛ bɔbɔ be timan sran tɛ’n be yo sa tɛtɛ’n, Biblu’n nun ndɛ mma nga mun ɔ nin ndɛ mma uflɛ wie’m be yiyi nun weiin. Kɛ e wun ninnge nga ti yɛ sran’m be yo like tɛtɛ’n i wlɛ’n, ɔ ti kpa. ?Sanngɛ e kwla lafi su kɛ sran’m be kwla yaci sa tɛ’n i yolɛ? Ɛɛn. Afin nán like nga ti yɛ sran’m be yo sa tɛ’n i ngunmin yɛ Biblu’n yiyi nun ɔn. Sanngɛ ɔ ta e nda kɛ i sɔ sa’m bé wíe mlɔnmlɔn. ?Nda sɔ m’ɔ tali’n yɛle benin? ?Sa tɛtɛ nga be yo be mɛn’n nun’n bé wíe sakpa? Ndɛ ng’ɔ́ bá lɛ’n, ɔ́ wá tɛ́ kosan sɔ’m be su.