Ɲanmiɛn bu sran oke’m be sran

SRAN oke’m be ɲrɛnnɛn mɔ be kle’n w’a tru mɛn nun andɛ. I sɔ’n boman e nuan, afin Biblu’n dun mmua boli su. I waan “kɛ mɛn’n ɔ́ kɔ́ i bue nuan’n,” sran’m bé wá ‘bú be bɔbɔ be wun angunndan, be su kloman sran.’ (2 Timote 3:​1-3) Kɛ be se kɛ ‘be su kloman sran’n,’ Glɛki aniɛn nun’n, i bo’n yɛle kɛ awlo kun i nunfuɛ’m be su kloman be wiengu. I sɔ’n yɛ e wun i andɛ ɔ.

Sanngɛ Zoova liɛ’n, ɔ bu sran oke’m be sran. Ɔ yoman be wannzo mlɔnmlɔn. Amun e nian wafa nga Biblu’n kle i sɔ liɛ’n.

‘Angbeti bla’m be sin jranfuɛ’

Biblu’n i bue nga be klɛli i Ebre aniɛn nun’n, ɔ kle weiin kɛ Zoova bu sran oke’m be sran. Jue Mun 68:6 nun’n, Davidi waan Zoova ti ‘angbeti bla’m be sin jranfuɛ.’ Nga e wun i titi’n yɛle kɛ angbeti bla’m sɔ’m be ti sran oke.a Sɛ Zoova jran be sin’n, i sɔ’n kle kɛ ɔ nian be lika. Yɛ Biblu’n se kɛ sɛ be yo be tɛtɛ’n, Ɲanmiɛn fa ya. (Lɔ Tulɛ 22:21-​23) Ndɛ ng’ɔ o Nyanndra Mun 16:31 nun kusu’n, ɔ kle weiin kɛ Ɲanmiɛn nin i sufuɛ’m be bu angbeti nin sran oke’m be kwlaa nga be su i kpa’n, be sran. Afin ndɛ sɔ’n se kɛ: “Be ti je’n ti kɛ famiɛn kle sa, afin nguan tɛnndɛn’n ti sran kpa’m be nvasuɛ.”

Mmla nga Zoova fa mannin Izraɛlifuɛ mun i nun’n, be kleli weiin kɛ maan be ɲin yi sran oke mun. Ɔ seli Izraɛlifuɛ’m be kɛ: ‘Amun wun sran oke mun ɔn, maan amun ɲin yi be. Amun bu min sran titi. Min yɛ n ti Anannganman amun Ɲanmiɛn’n niɔn.’ (Saun Yolɛ 19:32) Ɔ maan Izraɛli lɔ’n, sɛ Izraɛlifuɛ kun i ɲin yiman sran oke mun’n, ɔ nin Zoova be afiɛn’n kwlá sɛman. Sran kun kwlá seman kɛ ɔ klo Ɲanmiɛn naan i kunngba’n w’a kle sran oke’m be ɲrɛnnɛn.

E si kɛ Klistfuɛ’m be diman Izraɛlifuɛ’m be mmla’n su naan ‘Klist i mmla’n’ su yɛ be di ɔ. Mmla sɔ’n kusu waan maan e nzuɛn’n nin e ayeliɛ’n be yo kpa. Nzuɛn nin ayeliɛ kpa sɔ’n i wie yɛle kɛ maan e ɲin yi e si nin e nin, ɔ nin sran oke mun. (Galasifuɛ Mun 6:2; Efɛzfuɛ Mun 6:​1-3; 1 Timote 5:​1-3) I sɔ mmla mɔ be nanti su’n, be nanti su be klun klo su. Ɔ maan, akoto Piɛli seli kɛ: ‘An tu amun klun yo sa ng’ɔ kle kɛ an klo amun wun’n.’—1 Piɛr 1:​22.

Like ti m’ɔ fata kɛ e bu sran oke’m be sran’n, Zezi i sɔnnzɔnfuɛ Zaki yili i nglo kleli e. Ɔ seli kɛ: ‘Ɲanmiɛn sulɛ m’ɔ ti kpa m’ɔ fiɛn fi nunmɛn i wun e Si Ɲanmiɛn ɲrun’n, yɛle aika mun nin angbeti mmla’m mɔ be wun ɲrɛnnɛn’n be lika nianlɛ, ɔ nin be wun su nianlɛ mɛn nun sa tɛtɛ yolɛ’m be nun.’ (Zak 1:​27) Zaki i ndɛ sɔ’n, ɔ fa e ɲin sie sa cinnjin kpa kun su. Yɛle kɛ aika nin angbeti’m be ti Zoova i sran nanndoliɛ.

Ɔ maan, nán sran oke’m be tɛtɛ yolɛ ngunmin yɛ ɔ fataman kɛ e yo ɔ. Sanngɛ, ɔ fata kɛ e bu be sran yɛ e nian be lika. (An nian kuku nga be flɛ i “Sran klolɛ’n i nuan su like yolɛ,” m’ɔ o fluwa’n i bue 6-7 nun’n.) Zaki seli kɛ: ‘Sɛ sran kun se kɛ ɔ lafi Ɲanmiɛn su mɔ be wunmɛn i sɔ i nzuɛn’n nun’n, nn i Ɲanmiɛn sulafilɛ’n ti ngbɛn.’​—Zak 2:​26.

‘Be wun ɲrɛnnɛn’ sanngɛ be ɲan fɔnvɔlɛ

Zaki i ndɛ’n fa e ɲin sie i like cinnjin kpa kun ekun su. Amun e sie i nzɔliɛ kɛ Zaki seli Klistfuɛ’m be kɛ be nian angbeti bla mɔ be ‘wun ɲrɛnnɛn’n’ be lika. Glɛki aniɛn nun ndɛ nga be kacili i kɛ ‘ɲrɛnnɛn’n’ i bo’n yɛle awlabɔɛ annzɛ awunyalɛ annzɛ sa kekle m’ɔ o sran su’n. E si kɛ sran oke sunman be wun i sɔ afɛ’n. Wie’m be kunngba yɛ be tran ɔn. Wie mun kusu like mɔ be kwlá yomɛn i kun kɛ laa’n sa’n ti’n, be wla bo be wun. Wie liɛ bɔbɔ’n, be nga be tu be klun be yo Ɲanmiɛn klun sa’n be sa sin kwla bubu be. Amun e fa Zanb m’ɔ ti jasin fɛ’n bofuɛ w’a di afuɛ ablanan tra su’n, i ndɛ’n e nian. Zan dili titi atin bofuɛ junman lele afuɛ ablasan. Kɛ é sé yɛ’n, ɔ le afuɛ 80. W’a fiaman su kɛ ɔ ju cɛn wie’n i wla bo i wun. I waan: “Kɛ n wla kpɛn min laa nun’n, nanwlɛ, ɔ yo min kɛ m’an diman junman kpa. Sa tɛ ngunmin yɛ n yoli be ɔ.”

I lɛ nun’n, ndɛ ng’ɔ kwla fɔnvɔ be’n yɛle kɛ sɛ bɔɔ Zoova ti kpli’n sanngɛ ɔ kpliman e wun kɛ e yo sa nga e kwlá yoman’n. Ɔ si kɛ e fɔn. Yɛ Biblu’n waan: ‘?Anannganman, sɛ ɔ waan á nían tɛ nga e yo’n, wan cɛ yɛ ɔ ka lɛ ɔ ɔ́ yó ye ɔ?’ (Jue Mun 130:3) Nanwlɛ, sran i awlɛn’n yɛ Zoova nian ɔn. Ɔ fɛmɛn i ɲin siemɛn i sa tɛ’n su. ?Wafa sɛ yɛ e si sɔ ɔ?

Famiɛn Davidi m’ɔ yoli sa tɛ’n, Ɲanmiɛn maan ɔ kpɛli jue ng’ɔ o Jue Mun 139:1-3 nun’n. Ɔ seli kɛ: ‘Anannganman, a si min klun lɔ angunndan’n, a si min wafa mɔ n ti’n. Sɛ ń trán ase o, sɛ ń jáso o, a si. A si angunndan nga ń wá bú’n. Sɛ ń nánti ń sín o, sɛ ń lá o, a wun i. Sa nga n yo’n, a si i kwlakwla kpan.’ Ebre aniɛn nun’n ndɛ mma nga be kacili i kɛ ‘wun i’ i bo’n yɛle ‘like nun kpajalɛ’ kɛ nga sran kun kpaja awie nun m’ɔ gua i nun wla’n i blo’n sa. Ɔ maan ndɛ sɔ mɔ Ɲanmiɛn wawɛ’n maan Davidi klɛli’n, sɛ é kwlá sé’n, ɔ kle kɛ Zoova kpaja e ayeliɛ’n nun naan w’a fa ng’ɔ ti kpa’n.

Nanwlɛ, e Si aunnvuɛ sifuɛ m’ɔ o ɲanmiɛn su lɔ’n, i wla fiman i junman nga e di’n. I klun jɔ su kpa. Biblu’n se kɛ Ɲanmiɛn yoman sa m’ɔ timɛn i su’n, yɛ i wla fiman junman nga e dili nin klolɛ nga e fa kloli i’n.​—Ebre Mun 6:​10.

“Laa ninnge sɔ’m be su tranman lɛ kun.”

Biblu’n kle kɛ Ɲanmiɛn w’a boman sran kɛ cɛn wie lele’n, ɔ yo oke. Sanngɛ kɛ Adam nin i yi’n be fɔnnin Ɲanmiɛn wun’n, yɛ oke yolɛ’n wuli sran nun ɔn. (Bo Bolɛ 3:​17-​19; Rɔmfuɛ Mun 5:​12) I sɔ afɛ’n kusu su tranman lɛ sa tititi.

Kɛ nga e fa wunnin i sa’n, sa kekle kwlaa nga e wun be andɛ’n, ɔ nin sran oke’m be ɲrɛnnɛn klelɛ’n kle kɛ e o ‘mɛn’n nga i bue nuan.’ (2 Timote 3:1) Like nga Ɲanmiɛn waan ɔ́ yó’n, yɛle kɛ ɔ́ yí sa tɛ’n mɔ i ti yɛ e yo oke mɔ e wu’n. Biblu’n se kɛ: ‘Ɲanmiɛn núnnún be ɲinmuɛn’n kwlaa, wie’n su tranman lɛ kun. Be su yoman sɛ kun, be su sunman kun, be su wunman ɲrɛnnɛn kun, afin laa ninnge sɔ’m be su tranman lɛ kun.’​—Sa Nglo Yilɛ 21:4.

Ɲanmiɛn i mɛn uflɛ’n nun’n, afɛ ng’ɔ o sran oke’m be su’n, ɔ́ yó laa like. Kpɔkun be su yoman be wannzo kun mlɔnmlɔn. (Mise 4:4) Be nga be wuli’n bɔbɔ mɔ Ɲanmiɛn kunndɛ kɛ ɔ́ cɛ́n be’n, ɔ́ wá cɛ́n be. Kpɔkun bé trán asiɛ’n su wa tititi. (Zan 5:​28, 29) Blɛ sɔ’n nun, é wún kɛ Zoova nian sran oke nin be kwlaa nga be ɲin yi i’n, be lika sakpa.

[Ja ngua lɛ ndɛ mun]

[Kuku/Foto mun, bue 6, 7]

Sran klolɛ’n i nuan su like yolɛ

Zoova i Lalofuɛ’m be asɔnun kpɛnngbɛn’m be fa be niaan nga b’a yo oke’n be lika nianlɛ’n yo be ndɛ. Akoto Piɛli mannin be afɔtuɛ kɛ: ‘An nian Ɲanmiɛn i bua fa m’ɔ fa be mannin amun’n be lika.’ Afɔtuɛ sɔ’n ti be cinnjin kpa. (1 Piɛr 5:2) I sɔ’n ti’n, be nianman sran oke’m be lika be nuan bui su. ?Yɛle kɛ sɛ?

Yɛle kɛ sɛ be ɲɛn i wun alaje’n, like nga sran oke’m be sa miɛn i wun’n, be fɛ i wun ajalɛ yɛ be yo i nuan su sa.c Sanngɛ like nga sran oke’m be sa miɛn i wun’n, nán cɛn kunngba yɛ asɔnun kpɛnngbɛn’m be kwla wun i wlɛ ɔ. Ɔ maan wie liɛ’n, saan bé kó nían be osu lele yɛ be nin bé kókó yalɛ amanniɛn su naan b’a wun be asamian like sɔ’n i wlɛ. Atrɛkpa’n, be ɲanman sran naan w’a di gua w’a man be, annzɛ naan w’a yo be sua’n nun yɛiin. Wie liɛ kusu’n, aɲia’m be bo kɔlɛ’n ti kekle man be. Biblu’n, ɔ nin i akua’m be nun kannganlɛ’n kwla yo kekle man be wie. Annzɛ like kpanngban uflɛ wie ekun kwla mian be sa.

?Yɛ sɛ aniaan oke kun i sa mian like kun wun kekle kpa’n nin? Ɔ kwla yo sika ndɛ. ?I lɛ nun’n, wafa sɛ yɛ be kwla ukɛ i ɔ? I klikli nun’n, ɔ fata kɛ be nian sɛ i osufuɛ wie o lɛ naan ɔ kwla niɛn i lika o. Afin, i sɔ’n yɛ 1 Timote 5:4 se kɛ e yo ɔ. Ndɛ sɔ’n waan: ‘Sanngɛ angbeti ng’ɔ le ba annzɛ anunman’n, maan ba sɔ’m be si kɛ be Ɲanmiɛn sulɛ’n nun’n, sa nga bé dún mmua yó’n yɛle be awlo’n i lika nianlɛ, ɔ nin like nga be si nin be nin, ɔ nin be nannan’m be yo mannin be’n i wunsu yolɛ. I sɔ’n yo Ɲanmiɛn fɛ.’

Wie liɛ kusu’n, sɛ awa nian sran oke’m be lika’n, aniaan wie’m be kwla uka be naan b’a ɲɛn i sɔ ukalɛ liɛ’n. Sɛ be fɛ i sɔ ajalɛ mɔ be wun kɛ ɔ yoman ye’n, i liɛ’n asɔnun kpɛnngbɛn’m be kwla nian sɛ ɔ fata kɛ asɔnun’n sua i sɔ trɔ’n nin o. Klistfuɛ klikli’m be blɛ su’n, asɔnun’n suɛli i sɔ trɔ’n wie. I sɔ’n ti’n, akoto Pɔlu seli Timote kɛ: ‘Bla nga i wun wuli mɔ be waan bé klɛ́ i dunman angbeti mmla’m be fluwa nun’n, maan ɔ yo mɔ w’a di afuɛ ablesiɛn, mɔ w’a ja bian kpɛ kunngba. Maan be wun kɛ ɔ yo sran’m be ye, yɛ ɔ niɛn i mma’m be su kpa, maan be wun kɛ ɔ ti aklunyefuɛ, yɛ ɔ wunnzin Ɲanmiɛn sran’m be ja, maan be wun ekun kɛ ɔ uka yalɛfuɛ mun, yɛ ɔ yo sa kpakpa’n kwlaa.’​—1 Timote 5:9, 10.

[Ja ngua lɛ ndɛ’n]

[Foto, bue 5]

Dɔrkasi niannin angbeti bla nga be sa miannin’n be lika.​—Sa Nga Be Yoli’n 9:36-39.