LIKE SUANLƐ 11
?Ngue yɛ a kwla yo naan w’a ɲan Biblu’n nun kannganlɛ’n i su ye-ɔ?
Sɛ be man wɔ junman kun mɔ i dilɛ’n fá blɛ kpanngban’n, a kwla se kɛ á yó i blɛblɛblɛ naan w’a kwla wie i yo. I kunngba’n yɛle Biblu’n nun kannganlɛ’n. A kwla usa ɔ wun kɛ: ‘?Ń yó sɛ naan m’an wie nun kanngan?’ Like suanlɛ nga nun’n é wá wún ninnge wie mɔ a kwla yo naan w’a klo Biblu’n nun kannganlɛ’n, ɔ nin i nun like suanlɛ’n.
1. ?Ngue ti yɛ ɔ fata kɛ e kanngan Biblu’n nun titi-ɔ?
Sran ng’ɔ kanngan Biblu’n m’ɔ ti “Zoova i mmla’n” i nun titi’n, ɔ́ dí aklunjɔɛ yɛ i liɛ yó ye. (Kanngan Jue Mun 1:1-3) I bo bolɛ’n nun’n a kwla fa blɛ kpe kan kanngan nun cɛn kwlakwla. Sɛ a yo sɔ titi’n Biblu’n nun kannganlɛ’n yó ɔ fɛ.
2. ?Ngue yɛ a kwla yo naan w’a ɲan Biblu’n nun kannganlɛ’n i su ye-ɔ?
Kɛ é kánngan Biblu’n nun’n maan e jran kan naan e bu ndɛ nga e su kanngan’n i su akunndan. Ɔ ti cinnjin kɛ e ‘bu ndɛ nga e su kanngan’n i su akunndan.’ (Zozie 1:8, ja ngua lɔ ndɛ) Kɛ á kánngan’n a kwla usa ɔ wun kɛ: ‘?Ngue yɛ ndɛ nga kle min Zoova su-ɔ? ?Wafa sɛ yɛ n kwla nanti su-ɔ? ?Wafa sɛ yɛ n kwla fa uka sran uflɛ-ɔ?’
3. ?Á yó sɛ naan w’a ɲan blɛ w’a kanngan Biblu’n nun?
?Kɛ ɔ ko yo naan w’a ɲan blɛ w’a kanngan Biblu’n nun’n ɔ ti kekle man ɔ? Kɛ ɔ yo e nun kpanngban e sɔ wie-ɔ. Sɛ ɔ ti sɔ’n, mian ɔ ɲin naan w’a ‘fa ɔ blɛ’n w’a yo ninnge nga be ti cinnjin’n.’ (Efɛzifuɛ Mun 5:16) I sɔ yolɛ nun’n a kwla sie blɛ trele kun naan w’a kanngan Biblu’n nun cɛn kwlakwla. Sran wie’m be kanngan nun nglɛmun ndɛ kpa. Wie’m be liɛ’n kɛ bé ló wunmiɛn mindi su’n yɛ be kanngan nun-ɔn. Kpɛkun wie’m be liɛ’n nnɔsua’n kwlaa naan b’a la’n yɛ be kanngan nun-ɔn. ?Ɔ liɛ’n blɛ benin nun yɛ a kwla kanngan nun-ɔn?
SI NDƐ’N NUN KPA EKUN
Ninnge wie mɔ a kwla yo be naan w’a klo Biblu’n nun kannganlɛ’n, ɔ nin wafa nga a kwla siesie ɔ wun naan w’a ɲan Biblu’n nun like suanlɛ’n i su ye’n.
Aliɛ wie o lɛ’n i bo bolɛ’n nun’n i dilɛ kwla yo kekle, sanngɛ kɛ ɔ́ kɔ́ i ɲrun’n e kwla klo i. I kunngba’n yɛle Biblu’n nun kannganlɛ’n
4. Like nga a kwla yo naan w’a klo Biblu’n nun kannganlɛ’n
I klikli nun’n Biblu’n nun kannganlɛ kwla yo kekle. Sanngɛ sɛ a mian ɔ ɲin’n, ɔ ‘konvi kwla sɔ Ɲanmiɛn Ndɛ’n’ i kannganlɛ’n. Ɔ ti kɛ aliɛ kun mɔ a nin-a dimɛn i le’n sa. I bo bolɛ’n nun’n atrɛkpa’n ɔ su yoman ɔ fɛ. Sanngɛ sɛ a di i titi’n a kwla klo i. An kanngan 1 Piɛli 2:2 nun. I sin’n an koko kosan yɛ’n i su yalɛ:
?Sɛ a kanngan Biblu’n nun titi’n i sɔ’n kwla uka ɔ naan w’a klo i nun kannganlɛ?
An bo VIDEO’n, ɔ kan like ng’ɔ ukali sran wie mun naan b’a klo Biblu’n nun kannganlɛ’n i ndɛ. I sin’n an koko kosan yɛ’m be su yalɛ.
?Video nun’n, ngue yɛ ɔ kleli gbanflɛn nin talua wie’m be yalɛ-ɔ? ?Yɛ i sin’n ngue yɛ be kwla yoli-ɔ?
?Ngue yɛ ɔ ukali be naan b’a kwla kanngan Biblu’n nun titi-ɔ?
?Ngue yɛ be yoli naan Biblu’n nun kannganlɛ’n w’a yo be fɛ-ɔ?
Ninnge wie mɔ a kwla yo’n
Fa Biblu kun mɔ be kwla lafi i nun ndɛ’n su’n, mɔ i wlɛ wunlɛ timan kekle’n. Sɛ amun le Biblu Mɛn Uflɛ’n amun aniɛn’n nun’n fɛ i lifuɛ’n.
A kwla bo i bo nin Biblu’n nun fluwa nga a klo i kpa’n, i nun kannganlɛ. Nian fluwa’n i lika nga be klɛli i lɛ kɛ ‘Bo Biblu’n nun kannganlɛ’n i bo’n’ i nun.
Kɛ á kánngan Biblu’n nun’n sie lika nga a juli lɛ’n i nzɔliɛ. A kwla sie i nzɔliɛ fluwa’n i lika nga be klɛli i lɛ kɛ “Min Biblu’n nun kannganlɛ’n” i nun.
A kwla kanngan nun JW Library® nun. I liɛ’n kan kwlaa nga a wo’n a kwla kanngan nun annzɛ a tie i nun ndɛ’n ɔ pɔɔtablu’n nun, annzɛ i wunsu mannzin uflɛ wie nun.
Nian Mɛn uflɛ Biblu’n i nun ndɛ ng’ɔ suan ndɛ uflɛ wie mun’n i nun. Desɛn wie’m be o lɔ, yɛ be tuli ndɛ wie’m be bo lɔ mɔ be kwla yo naan Biblu’n nun kannganlɛ’n w’a yo ɔ fɛ-ɔ.
5. Kwlaa naan b’a ba ɔ like klelɛ’n dun mmua siesie ɔ wun
An kanngan Jue Mun 119:34 nun, yɛ an koko kosan yɛ’n i su yalɛ:
?Kwlaa naan w’a kanngan Biblu’n nun’n, annzɛ kwlaa naan w’a siesie ɔ wun’n, ngue ti yɛ ɔ ti cinnjin kɛ a dun mmua srɛ Ɲanmiɛn-ɔn?
?Ngue yɛ á yó naan w’a ɲan Biblu’n nun like nga be kle wɔ’n i su ye-ɔ? Kɛ á síesíe ɔ wun’n nian ajalɛ nga su:
Kanngan ndɛ kpɔlɛ nga be o like suanlɛ’n i bue klikli’n su’n be nun.
Kunndɛ Biblu’n nun ndɛ mma mun, kanngan be nun yɛ bu wafa nga be nin ndɛ ng’ɔ o ndɛ kpɔlɛ’n nun be kɔ likawlɛ’n i akunndan.
Sie kosan’m be su tɛlɛ’n i nzɔliɛ. I liɛ’n, kɛ a nin sran ng’ɔ kle ɔ like’n bé kókó like suanlɛ’n i su yalɛ’n, i sɔ’n úka ɔ.
Nian nga wie
Zoova i Lalofuɛ’m be fali Biblu fanunfanun be suannin Ɲanmiɛn Ndɛ’n i nun like. Sanngɛ Biblu nga be klo i kpa’n yɛle Ɲanmiɛn Ndɛ’n—Mɛn Uflɛ Biblu’n, afin be kwla lafi i nun ndɛ’n su. I nun ndɛ’n ti weiin yɛ Ɲanmiɛn dunman’n wo nun.—jw.org su ndɛ “?Zoova i Lalofuɛ’m be le be Biblu liɛ?”
SRAN WIE’M BE WAAN: “Biblu’n nun like suanlɛ’n ti kekle dan. N leman blɛ, m’an fɛ.”
?A bu i sɛ?
NDƐ’N I KPƆLƐ BOLƐ
Kɛ ɔ ko yo naan w’a ɲan Biblu’n nun like suanlɛ’n i su ye’n, sie blɛ trele kun naan w’a kanngan nun. Srɛ Ɲanmiɛn ka naan w’a kanngan nun. Kpɛkun kwlaa naan b’a kle ɔ Biblu’n nun like’n siesie ɔ wun.
Ndɛ’n i nun flanlɛ
?Ngue yɛ a kwla yo naan w’a ɲan Biblu’n nun like suanlɛ’n i su ye-ɔ?
?Blɛ benin nun yɛ a kwla kanngan Biblu’n nun annzɛ a suan nun like-ɔ?
?Ngue ti yɛ ɔ ti cinnjin kɛ a dun mmua siesie ɔ wun ka naan b’a kle ɔ Biblu’n nun like-ɔ?
NDƐ WIE MUN EKUN
Ninnge wie mɔ a kwla yo naan w’a ɲan Biblu’n nun kannganlɛ’n i su ye’n.
“Biblu’n nun kannganlɛ’n kwla yo wɔ fɛ” (Sasafuɛ Tranwlɛ’n, afuɛ 2017 No. 1)
Ninnge nsan mɔ be kwla uka ɔ Biblu’n nun kannganlɛ’n nun.
“?Wafa sɛ yɛ Biblu’n kwla uka min-ɔn?—Akpasua 1: Suan Biblu’n i nun like kpa” (jw.org su ndɛ)
Like nga a kwla yo naan Biblu’n nun kannganlɛ’n w’a yo ɔ fɛ’n.
Ajalɛ wie mɔ be ukali sran wie mɔ be kanngan Biblu’n nun w’a cɛ’n.