Zoova kacimɛn i ndɛ ng’ɔ kan’n

Sa Nglo Yilɛ fluwa’n i nun ndɛ cinnjin mun—akpasua 2

?NGUE yɛ be nga be su Ɲanmiɛn Zoova nin be nga be sumɛn i’n bé ɲɛ́n i ɔ? ?Sa benin yɛ ɔ́ jú Satan nin i mmusu’m be su ɔ? ?Klist i afuɛ akpi famiɛn dilɛ blɛ’n nun’n, ye benin yɛ klɔ sran nga be ti aɲinyiɛfuɛ’n bé dí ɔ? Kosan sɔ mun nin kosan cinnjin kpa wie mun ekun be su tɛlɛ’n o Sa Nglo Yilɛ 13:1–22:21 nun.a Aolia nun ninnge 16 nga akoto Zan wunnin be afuɛ nga be flɛ i 96 nun’n, be nun 9 kasiɛn’n yɛ be o ndɛ tre sɔ’m be nun ɔn.

Zan klɛli i kɛ: “Sran ng’ɔ kanngan ndɛ nga’n, ɔ nin be nga be ti sa nga bé wá yo’n be ndɛ’n, bɔ be fa su’n, be liɛ su ti ye!” (Sa Nglo Yilɛ 1:3; 22:7) Sɛ e kanngan ndɛ ng’ɔ o Sa Nglo Yilɛ fluwa’n nun naan e fa su’n, ɔ kwla kaci e awlɛn’n, yɛ ɔ kwla yo naan y’a lafi Ɲanmiɛn nin i Wa Zezi Klist be su kpa. Asa ekun’n, ɔ kwla yo naan y’a lafi su kɛ e ɲrun lɔ’n yó kpa mán e.b—Ebre Mun 4:12.

BE UTU ƝANMIƐN I YA DAN’N M’Ɔ O KLOWA NSO’M BE NUN’N

(Sa Nglo Yilɛ 13:1–16:21)

Sa Nglo Yilɛ 11:18 se kɛ: “Ya kunnin mɛnmɛnfuɛ mun, yɛ [Nyanmiɛn] kusu ɔ ya falɛ’n [...] w’a ju. Cɛn nga á núnnún be nga be saci asiɛ’n w’a ju.” Kɛ ɔ ko yo naan y’a wun like nga ti yɛ Ɲanmiɛn w’a fa ya’n i wlɛ’n, aolia nun like i mɔcuɛ su’n kan ‘nnɛn kun mɔ i ti’n ti nso, mɔ i wuɛ’n ti blu’n,’ i aeliɛ’n i ndɛ.—Sa Nglo Yilɛ 13:1.

Aolia nun like ngwlan su nun’n, Zan wunnin kɛ “Bua Gbanflɛn’n jin Siɔn Oka’n su.” Ɔ nin “sran akpi-akpi ya sran akpi-akpi ablanan-nin-nnan” mɔ ‘be kpɔli be ti sran’m be nun’n,’ yɛ be jin lɛ ɔ. (Sa Nglo Yilɛ 14:1, 4) I sin’n, anzi’m be bo jasin wie mun. Aolia nun like ng’ɔ su i su’n nun’n, Zan ‘wun anz nso bɔ nyrɛnnɛn nso’n wo be sa nun’n.’ Zoova bɔbɔ yɛ ɔ se anzi sɔ’m be kɛ be utu “i ya dan’n b’ɔ o klowa nso’n be nun’n,” Satan i mɛn’n i wafawafa kwlaa be su ɔ. Fɔ nga Ɲanmiɛn wá bú sran mun nin jɔlɛ nga ɔ́ wá dí’n, yɛ be o klowa sɔ’m be nun ɔn. (Sa Nglo Yilɛ 15:1; 16:1) Ɲrɛnnɛn i nsan su’n, ɔ nin awɛ’n nso su’n i bolɛ’n, be kle kɛ Ɲanmiɛn i Sielɛ’n wá dí sran’m be jɔlɛ. I sɔ liɛ’n yɛ aolia nun like nɲɔn sɔ’m be yiyi nun ɔn.—Sa Nglo Yilɛ 11:14, 15.

Ɲanmiɛn Ndɛ’n i su kosan’m be su tɛlɛ:

13:8—?Ngue yɛle ‘Bua Gbanflɛn’n i nguan fluwa’n’? Fluwa sɔ’n ti nzɔliɛ like. Be nga be nin Zezi Klist bé dí famiɛn ɲanmiɛn su lɔ’n, be ngunmin yɛ be dunman o nun ɔn. Be nunfuɛ nga be te o asiɛ’n su wa’n, be kusu dunman o nun wie.

13:11-13—?Wafa sɛ yɛ nnɛn ng’ɔ le wuɛ nɲɔn’n, ɔ ijɔ kɛ dragɔn sa yɛ ɔ yoli maan sin fin ɲanmiɛn su lɔ guali ɔ? Nnɛn ng’ɔ le wuɛ nɲɔn’n ti Angle nin Amlɛnkɛn mɔ be bo yo kun be sie mɛn’n i nzɔliɛ. Kɛ be waan ɔ ijɔ kɛ dragɔn sa’n, i sɔ’n kle kɛ ɔ wlanwlan sran mun, ɔ mianmian be kpɛkun ɔ yo be kpokokpoko naan b’a kplin i sran sielɛ wafa’n su. Asa ekun’n, ɔ yoli maan sin fin ɲanmiɛn su lɔ guali. I sɔ’n kle kɛ ɔ yo i wun kɛ Ɲanmiɛn nuan ijɔfuɛ sa. Blɛ nga be kunnin mɛn wunmuan nun alɛ dandan nɲɔn’n, ɔ yili i sɔ aeliɛ’n i nglo. Yɛle kɛ ɔ dili i nuan seli kɛ ɔ kwlali be nga be ti sa tɛ yofuɛ mun nin sran sielɛ wafa nga be flɛ i blɔfuɛ nun Communisme.

16:17—Be utuli klowa nso su’n i nun ninnge’n kɛ aunngban’n fa wɔ. ?Ngue yɛle “aunngban’n” sɔ’n? “Aunngban” sɔ’n ti akunndan nga sran’m be bu’n m’ɔ ti Satan liɛ’n, i nzɔliɛ. Afin Satan “yɛ ndɛkɛn ɔ wlawla sran nga be nyin yi-man Nyanmiɛn nin-ɔn.” I sɔ aunngban fita mɛn wunmuan’n nun. I ti’n, akunndan sɔ’n yɛ ɔ sie sran mun ɔn.—Efɛ. 2:2.

Afɔtuɛ ng’ɔ man e’n:

13:1-4, 18. ‘Nnɛn’n’ ti klɔ sran’m be awa’n i nzɔliɛ. Yɛ kɛ m’ɔ ‘fin jenvie nun fite’n’ ti’n, ɔ ti klɔ sran’m be mɛn’n mɔ w’a tɔ nvati’n i nzɔliɛ. (Ezai 17:12, 13; Daniɛl 7:2-8, 17) Satan yɛ ɔ yili nnɛn sɔ’n niɔn, yɛ i yɛ ɔ mɛn i kwlalɛ ɔ. Nnɛn sɔ’n i dunman’n ti kɛ like nuan sa. Ɔ ti 666. I sɔ’n kle kɛ fɔ ng’ɔ i nun’n tratra su. Sɛ e wun nnɛn’n i wlɛ’n, ɔ́ úka e naan y’a klomɛn i naan y’a su i su. Annzɛ kusu naan y’a su i kɛ nga klɔ sran’m be dan lika be fa yo’n sa.—Zan 12:31; 15:19.

13:16, 17. Kannzɛ bɔbɔ e ninnge nga e yo be titi’n, yɛle kɛ e ‘like atɛ yolɛ nin e ninnge’m be tolɛ’ nun e sa mian’n, sanngɛ ɔ nin i fataman kɛ e lo e wun e man nnɛn’n naan ɔ sie e. Sɛ e kplin su kɛ ‘nnɛn’n yo maan be sie e nzɔliɛ e sa fama su annzɛ e ngban su’n,’ nn e su yaci i nun naan ɔ kle e ninnge nga e yo be’n ɔ nin akunndan nga e bu’n.

14:6, 7. Jasin nga anzi’n bo’n, ɔ kle e kɛ ɔ fata kɛ Ɲanmiɛn Sielɛ’n mɔ w’a taka’n, i jasin fɛ’n bolɛ’n yo e cinnjin kpa. Asa ekun’n ɔ fata kɛ e uka be nga e kle be Biblu’n nun like’n naan be sro Zoova yɛ be yi i ayɛ.

14:14-20. ‘Asiɛ’n su awie’n i kpɛlɛ’n,’ ɔ ti be nga bé ɲán be ti’n be nuan yialɛ’n i nzɔliɛ. Kɛ i sɔ’n ko wie’n, anzi’n fá ‘asiɛ’n su vinyi mma nga be kpɛli’n ɔ́ gúɛ i i nzue cuɛnwlɛ dan’n nun. I nzue cuɛnwlɛ sɔ’n yɛlɛ ya’n bɔ Nyanmiɛn fa’n.’ Viɲi fie sɔ’n ti Satan i sran sielɛ wafa tɛtɛ ng’ɔ o asiɛ’n su wa’n ɔ nin i ‘mma tɛtɛ sɔsɔwa-sɔsɔwa’n,’ be nzɔliɛ. Bé núnnún viɲi fie sɔ’n mlɔnmlɔn. Ɔ fata kɛ e mian e ɲin naan asiɛ’n su viɲi fie’n w’a sieman e.

16:13-16. ‘Like tɛtɛ’n’ ti mmusu’m be ndɛ nga be kan’n i nzɔliɛ. Be kan ndɛ sɔ’n naan kɛ be utu like ng’ɔ o Ɲanmiɛn i ya klowa nso’m be nun’n, srɛ w’a kunman famiɛn mun naan b’a tanndan Zoova ɲrun titi.—Matie 24:42, 44.

16:21. Kɛ mɛn nga i awieliɛ’n ɔ́ wá jú cɛ’n, jɔlɛ nga Zoova wá dí Satan i mɛn tɛ nga’n, kɛ é kɛ́n i ndɛ’n e su nianman e sin kun. Jɔlɛ dilɛ ndɛ sɔ’n, i kekle’n ti kɛ laglasi sa. Ɔ nin i sɔ ngba’n, klɔ sran’m be dan lika be su yaciman Ɲanmiɛn dunman’n i sacilɛ.

FAMIƐN M’Ɔ KWLA’N Ɔ SU SIE

(Sa Nglo Yilɛ 17:1–22:21)

“Babilɔni klɔ dan’n” yɛle mɛn wunmuan’n nun Ɲanmiɛn sulɛ wafa kwlaa ng’ɔ timan su’n. Ɔ ti Satan i mɛn tɛ nga i akpasua kain kun. Aolia nun like 11 su’n waan i yɛ be flɛ i “tekle bla dan’n” niɔn, kpɛkun “ɔ ti nnɛn ɔkwlɛ kun su.” Nnɛn ng’ɔ ti i su’n i ‘wuɛ’n ti blu.’ I sɔ nnɛn kunngba’n yɛ ɔ́ núnnún i mlɔnmlɔnmlɔn ɔn. (Sa Nglo Yilɛ 17:1, 3, 5, 16) Aolia nun like ng’ɔ bɛ i sin’n, ɔ fa tekle bla’n sunnzun “klɔ dan” kun. Kpɛkun ɔ se kɛ klɔ sɔ’n tɔ́ naan Ɲanmiɛn i sufuɛ nga be o klɔ sɔ’n su’n be “fin klɔ’n nun fite” ndɛndɛ. Klɔ dan sɔ’n i tɔlɛ’n ti’n, sran kpanngban bé bó awuyomo. Sanngɛ “Bua Gbanflɛn’n i atɔnvlɛ falɛ’n” ti’n, ɲanmiɛn su lɔfuɛ’m be di aklunjuɛ. (Sa Nglo Yilɛ 18:4, 9, 10, 15-19; 19:7) Aolia nun like 13 su’n nun’n, sran ng’ɔ fu ‘nnɛn kpanngɔ ufue’n’ su’n, ɔ nin nvlenvlefuɛ’m be ko kun alɛ. Kpɛkun ɔ nunnun Satan i mɛn tɛ’n.—Sa Nglo Yilɛ 19:11-16.

?Yɛ “wuo lalaa’n, bɔ be flɛ i ekun kɛ mmusu’m be si Satan’n,” nin? ?Blɛ benin nun yɛ ‘bé tó i yí i sin dan’n’ nun ɔn? I sɔ ndɛ liɛ’n wo aolia nun like 14 su’n i nun wie. (Sa Nglo Yilɛ 20:2, 10) Klist i afuɛ akpi famiɛn dilɛ blɛ’n nun’n, wafa nga mɛn’n yó’n, aolia nun like nɲɔn kasiɛn’m be kɛn i ndɛ kpe kan. Kɛ Zan wá wíe “sa nga ɔ cɛ kaan bé wá yó’n,” i wun’n, ɔ wunnin ‘nzue ba bɔ i nun nzue’n man nguan’n. Ɔ la klɔ’n i gua’n i afiɛn.’ I sin’n, be yiali ‘sran kwlaa nga nzue we kun i’n’ kɛ ɔ bla.—Sa Nglo Yilɛ 1:1; 22:1, 2, 17

Ɲanmiɛn Ndɛ’n i su kosan’m be su tɛlɛ:

17:16; 18:9, 10—?Ngue ti yɛ ‘asiɛ’n su famiɛn’m’ be sun like kunngba nga be bɔbɔ be nunnunnin i’n niɔn? Be bɔbɔ be wun akunndan mɔ be bu’n, i ti yɛ be sun i ɔ. Kɛ be wieli Babilɔni klɔ dan’n i nunnun’n, yɛ asiɛ’n su famiɛn’m be wunnin i wlɛ kɛ kannzu ɔ yoli be ye ɔ. Yɛle kɛ i yɛ maan sran’m be buman sa tɛtɛ nga famiɛn’m be yo’n, be like tɛ ɔ. Asa ekun’n, Babilɔni klɔ dan’n yɛ ukali be naan b’a ɲan gbanflɛn mun b’a kun be alɛ mun ɔn. Asa kusu’n, sɛ sran’m be loli be wun be mannin be siefuɛ mun’n, i dan lika fin i.

19:12—?Ngue ti yɛ sran fi siman Zezi i dunman ng’ɔ klɛ i wun’n saan i bɔbɔ yɛ ɔ si i ɔ? Atrɛkpa’n e Min’n i cɛn’n nun’n, junman nga be ti be liɛ ngunmin mɔ Zezi di be’n, ɔ nin i ɲrun ng’ɔ le i’n mɔ Ezai 9:5 kan be wie’m be ndɛ’n, i su dunman yɛle i sɔ’n. Sran fi siman dunman sɔ’n saan Zezi bɔbɔ. Afin ninnge ng’ɔ yo be’n be ti be liɛ ngunmin kpɛkun i kunngba cɛ yɛ ɔ kwla wun i sɔ ninnge’m be wlɛ ɔ. Sanngɛ Zezi fa ninnge sɔ’m be bue man bla ng’ɔ fɛli i atɔnvlɛ’n. Ɔ ti kɛ ɔ fɛ ‘i bɔbɔ i dunman uflɛ’n, ɔ klɛ i be wun’ sa.—Sa Nglo Yilɛ 3:12.

19:14—?Armagedɔn alɛ’n nun’n, wan mun yɛ be nin Zezi bé kɔ́ alɛ kunlɛ’n niɔn? Be nga be o “nyanmiɛn su lɔ alɛ kunfuɛ’m” be nun’n, mɔ be nin Zezi be kó dí Ɲanmiɛn i alɛ sɔ’n yɛle anzi mun, yɛ be nga be kpali be sieli be ngunmin’n mɔ kɛ i sɔ blɛ’n jú’n be o ɲanmiɛn su lɔ’n.—Matie 25:31, 32; Sa Nglo Yilɛ 2:26, 27.

20:11-15—?Wan mun yɛ be dunman o ‘nguan fluwa’n’ nun ɔn? Klistfuɛ nga be kpali be sieli be ngunmin’n nin sran kpanngban kpa mun yɛ Ɲanmiɛn i sufuɛ nga be ti ‘sran kpa mɔ bé cɛ́n’n,’ be yɛ be dunman o fluwa sɔ’n nun ɔn. (Sa Nga Be Yoli’n 24:15; Sa Nglo Yilɛ 2:10; 7:9) Zezi i afuɛ akpi famiɛn dilɛ blɛ nun’n, ‘sran tɛ’m bé cɛ́n.’ Sɛ be nian ‘fluwa’ nga bé trɛ́ be nun’n be nun afɔtuɛ’m be su nanti’n, yɛ bé klɛ́ be dunman ‘nguan fluwa’n’ nun ɔn. Sanngɛ nán kɛ be kwlá nunnunman dunman sɔ mun kun ɔn. Sɛ be nga be kpali be sieli be ngunmin’n, be su Ɲanmiɛn lele be fa wu’n yɛ be dunman ká nun mlɔnmlɔnmlɔn ɔn. (Sa Nglo Yilɛ 3:5) Be nga bé trán asiɛ’n su wa’n be liɛ’n, kɛ afuɛ akpi’n sin’n, sɛ be jran kekle sa nianlɛ kasiɛn’n nun’n, yɛ be dunman ká nguan fluwa’n nun mlɔnmlɔnmlɔn ɔn.—Sa Nglo Yilɛ 20:7, 8.

Afɔtuɛ ng’ɔ man e’n:

17:3, 5, 7, 16. ‘Bla’n nin nnɛn [ɔkwlɛ’n] b’ɔ ti su’n be like bɔ sran si-mɛn i bo’n,’ “ngwlɛlɛ b’ɔ fin nyanmiɛn su’n” uka e naan y’a wun i bo. (Zak 3:17) I bo bolɛ nun’n, nnɛn sɔ’n m’ɔ ti nzɔliɛ nun like’n yɛle nvlenvle’m be anuannzɛ nga blɔfuɛ’n flɛli i Société des Nations mɔ be wa kacili i kɛ Nations unies. Ɔ fata kɛ like mɔ sran simɛn i bo’n mɔ siɛn’n e wun i wlɛ’n, ɔ yo maan e bo Ɲanmiɛn Sielɛ’n i jasin fɛ’n ɔ nin jɔlɛ nga Zoova wá dí sran mun’n be jɔ juejue su.

21:1-6. E kwla lafi su kpa kɛ ninnge kpakpa nga Ɲanmiɛn seli kɛ ɔ́ fá mán e i Sielɛ Blɛ nun’n, é ɲán be sakpa. ?Ngue ti ɔ? Afin kɛ bé kán ninnge sɔ’m be ndɛ’n, be seli kɛ: “W’a wie!”

22:1, 17. “Nzue ba bɔ i nun nzue’n man nguan’n” yɛle ninnge nga Zoova yó naan sran kpa’m b’a ɲan be ti sa tɛ’n nin wie’n be sa nun’n. Dɔ nga su’n, e kwla ɲan nzue sɔ’n wie. Kɛ be yia e kɛ e ‘fa nzue ng’ɔ man nguan’n, naan dein su fite-man nun’n,’ maan e tɛ su klanman. Sanngɛ nán i sɔ ngunmin yɛ ɔ fata kɛ e yo ɔ. Maan e yia e wiengu’m be wie!

[Ja ngua lɛ ndɛ mun]

[Foto, bue 25]

Ɲanmiɛn Sielɛ’n i bo’n, klɔ sran nga be ti aɲinyiɛfuɛ’n bé dí ye dan!