Maan e yi Klist i ayɛ e mɛnmɛn i Famiɛn Dan m’ɔ ti’n ti
“Á wá yó kwlafuɛ.”—JUE. 45:5.
?AMÚN TƐ́ SU SƐ?
?Ngue ti yɛ jue tofuɛ’n se kɛ Zezi ɲannin ɲrun trali i ‘wiengu’ mun ɔn?
?Afuɛ benin nun yɛ Klist fɛli i tokofi’n sɛnnin i nvɛn wun ɔn? ?Afuɛ sɔ nun’n, ngue yɛ ɔ yoli ɔ? ?E ɲrun lɔ’n, ngue yɛ Klist wá fɛ́ i tokofi’n yó ɔ?
?“Sa kpa’n” i danfuɛ mɔ Famiɛn Zezi Klist kun i ti alɛ’n yɛle benin?
1, 2. ?Ngue ti yɛ sa nga Jue Mun 45 kɛn i ndɛ’n ti e liɛ wie ɔ?
FAMIƐN kun w’a fu i nnɛn kpanngɔ’n su. Ɔ ti safuɲrɛn. Ɔ su ko kun sa kpa’n nin sa nga be yo be i nuan su’n be ti alɛ naan ɔ́ kwlɛ́ i kpɔfuɛ mun. I sin’n, ɔ́ kó fɛ́ i atɔnvlɛ’n. Sran’m be kwlaa bé bó i dunman tititi, yɛ be kwlaa nga bé jáso su uflɛ’n bé mɛ́nmɛ́n i. Sa cinnjin sɔ’m be ndɛ yɛ Jue Mun 45 kan ɔn.
2 Jue Mun 45 kan sa kun mɔ i bo gua kpa’n i ndɛ. Sa sɔ’n ti e liɛ wie. Afin sɛ andɛ nin ainman e liɛ yó ye’n, ɔ fin i wie. I sɔ’n ti, kɛ like suanlɛ nga wá yíyí Jue Mun 45 nun’n, maan e fa e ɲin sie su kpa.
“NDƐ FƐFƐ KPA’N BE KPƐN MIN KLUN”
3, 4. (a) ?Wan wun ‘ndɛ fɛfɛ kpa’ yɛ jue tofuɛ’n waan be kpɛn i klun ɔn? ?Wafa sɛ yɛ e bu ndɛ sɔ’n wie ɔ? (b) ?“Famiɛn’n” i wun ndɛ benin yɛ e kan ɔn? ?Blɛ benin nun yɛ e nuan nun ndɛ’n yo fɛfɛ kpa kɛ “be bɔ be si fluwa klɛ kpa’n be liɛ’n sa” ɔ?
3 An kanngan Jue Mun 45:2 nun. “Ndɛ fɛfɛ kpa’n” mɔ jue tofuɛ’n waan ‘be kpɛn i klun’n,’ be ti Famiɛn i wun ndɛ. Ebre nun ndɛ mma nga be kacili i Wawle’n nun kɛ ‘be kpɛn min klun’n,’ be fa kan like m’ɔ jin sin su’n i “tutulɛ m’ɔ tutu’n” i ndɛ. I sɔ’n kle kɛ ndɛ nga be kpɛn jue tofuɛ i klun’n, ɔ kwlá trɛnmɛn i wun. I wun yrɛyrɛ i, annzɛ i wun blibli i kɛ ɔ́ kán. I waan ɔ́ kɛ́n i fɛfɛ kpa naan ɔ yo klanman kɛ “be bɔ be si fluwa klɛ kpa’n be liɛ’n sa.”
4 E kusu e bu Ɲanmiɛn Sielɛ’n mɔ Klist ti i su Famiɛn’n i jasin fɛ’n i ndɛ fɛfɛ kpa. ?Nɛ́n i ɔ? Afuɛ nga be flɛ i 1914 nun’n, Ɲanmiɛn Sielɛ’n i jasin’n wa yoli “fɛ” dan. Yɛle kɛ afuɛ sɔ nun’n, Ɲanmiɛn sieli i sran’n i Famiɛn ɲanmiɛn su lɔ, yɛ Famiɛn’n su di i junman’n. “Nyanmiɛn sielɛ’n i jasin fɛ” sɔ’n, e kɛn i “mɛn wunmuan’n nun naan sran’n kwlaa be ti.” (Mat. 24:14) ?E wun blibli e kɛ é kán Ɲanmiɛn Sielɛ’n i jasin fɛ sɔ’n? ?Yɛ e kɛn i juejue su? Jue tofuɛ’n seli kɛ ɔ́ ‘kpɛ́ jue mán Famiɛn’n.’ ?I sɔ wie yɛ e kunndɛ kɛ é yó ɔ? Kɛ é bó jasin fɛ’n, e kan kɛ Zezi ti Ɲanmiɛn Sielɛ’n i su Famiɛn ɲanmiɛn su lɔ. Kpɛkun, e yia sran’m be kwlaa, maan ɔ yo asiɛ’n su famiɛn mun o, kɛ be lo be wun man Zezi naan ɔ sie be. (Jue. 2:1, 2, 4-12) Kɛ e fa Ɲanmiɛn Ndɛ’n e bo jasin fɛ’n, e nuan nun ndɛ’n yo fɛfɛ kpa kɛ “be bɔ be si fluwa klɛ kpa’n be liɛ’n sa.”
‘FAMIƐN’N SI IJƆ MAAN Ɔ YO KLANMAN’
5. (a) ?Ngue ti yɛ e kwla se kɛ Zezi yoli sran “klanman” ɔn? (b) ?Ngue ti yɛ e kwla se kɛ Zezi “si ijɔ maan ɔ yo klanman” ɔn? ?Wafa sɛ yɛ e kwla yo kɛ Zezi sa wie ɔ?
5 An kanngan Jue Mun 45:3 nun. Ɲanmiɛn Ndɛ’n faman e ɲin siemɛn i Zezi i sran waka’n su dan. Sanngɛ e kwla se kɛ ɔ yoli sran “klanman” afin lɛ w’a trɛnmɛn i wun. Wafa ng’ɔ nin Zoova be nantili mɔ w’a kpɔcimɛn i’n, yɛ ɔ yi i klanman’n i nglo dan ɔn. Asa ekun’n, kɛ Zezi bó Ɲanmiɛn Sielɛ’n i jasin fɛ’n, ɔ ‘sili ijɔ maan ɔ yoli klanman.’ Afin i ndɛ’n yoli sran’m be fɛ. (Lik 4:22; Zan 7:46) Kɛ é bó jasin fɛ’n, maan e mian e ɲin e yo kɛ Zezi sa. Yɛle kɛ maan ndɛ nga é kán’n, ɔ yo sran’m be fɛ.—Kol. 4:6.
6. ?Wafa sɛ yɛ Ɲanmiɛn yrali Zezi su dan ɔn? ?Ngue ti yɛ ɔ́ ká sɔ “tititi” ɔ?
6 Zezi kloli i Si Zoova dan, yɛ ɔ nin i be nantili klanman. I sɔ’n ti, i nun nga Zezi o asiɛ’n su wa’n, Zoova yrali jasin fɛ ng’ɔ boli’n su. Kpɛkun kɛ ɔ fɛli i wun kpɔli sran’m be ti’n, Zoova yoli i mo dan. Akoto Pɔlu kán Zezi ndɛ’n, ɔ seli kɛ: “Kɛ ɔ kacili i wun sran sɔ’n, ɔ yoli i wun aenvuɛ, ɔ yoli anyinyiɛfuɛ lele ɔ fa wuli, waka’n su yɛ ɔ wuli-ɔ. I sɔ’n ti yɛ Nyanmiɛn fɛ i sieli like’n kwlaa su bɔ i dunman’n fu trali dunman’n kwlaa nin-ɔn, naan kɛ like nga be o nyanmiɛn su lɔ’n, nin asiɛ’n su wa’n, nin asiɛ’n i bo lɔ’n, be kwlaa be ti i dunman Jésus’n, be koto i bo, yɛ ɔ fite be kwlaa be nuan kɛ Jésus-Krist ti be Min, naan e Si Nyanmiɛn’n nyan nyrun.” (Fil. 2:8-11) Zezi i cɛnlɛ mɔ Zoova cɛnnin i’n, ɔ ti i su yralɛ dan. Yɛ ɔ́ ká sɔ “tititi.” Yɛle kɛ Zezi su wuman kun.—Rɔm. 6:9.
FAMIƐN’N ƝANNIN ƝRUN TRƐLI I ‘WIENGU MUN’
7. ?Ngue ti yɛ jue tofuɛ’n se kɛ Zezi ɲannin ɲrun trali i ‘wiengu’ mun ɔn?
7 An kanngan Jue Mun 45:7, 8 nun. Zezi klo sa ng’ɔ ti kpa’n, ɔ kloman sa m’ɔ saci i Si dunman’n mlɔnmlɔn. I sɔ’n ti’n, i Si Zoova guɛli i su “be klun jɔlɛ ngo,” ɔ sieli i Famiɛn ɲanmiɛn su lɔ. Yɛ ɔ ɲannin ɲrun trali i ‘wiengu’ nga Davidi i awlo’n nun be yoli Zida famiɛn’n. ?Ngue ti yɛ jue tofuɛ’n se kɛ Zezi ɲannin ɲrun trali i ‘wiengu’ mun ɔn? I klikli’n yɛle kɛ Zoova bɔbɔ yɛ ɔ sieli Zezi famiɛn ɔn. I nɲɔn su’n yɛle kɛ nán famiɛn ngunmin yɛ Zoova sieli Zezi ɔ. Sanngɛ ɔ sieli i Ɲanmiɛn ɲrun jranfuɛ’m be su kpɛn wie. (Jue. 2:2; Ebr. 5:5, 6) I nsan su’n yɛle kɛ nán ngo kpakpa sa yɛ Zoova fa guɛli i su ɔ. Sanngɛ i wawɛ’n yɛ ɔ fa mannin Zezi ɔ. I kasiɛn’n yɛle kɛ ɲanmiɛn su lɔ yɛ Ɲanmiɛn sieli Zezi Famiɛn ɔn.
8. ?Ngue ti yɛ e se kɛ Zezi le atin di famiɛn ɔn? ?Ngue ti yɛ e lafi su kpa kɛ Zezi yó sa’m be nuan su ɔ?
8 Afuɛ 1914 nun’n, Ɲanmiɛn i Wa’n yoli Famiɛn ɲanmiɛn su lɔ. ‘Sielɛ nga Zezi sie sran mun’n, ɔ sie be kpa.’ I ti e lafi su kpa kɛ, ɔ́ yó sa’m be nuan su naan ɔ su diman sran’m be ndɛ kwlɛ. Zezi le atin di famiɛn’n, afin Zoova bɔbɔ yɛ ɔ sieli i Famiɛn ɔn. Yɛ i Famiɛn bia’n “wo lɛ tititi.” Kɛ é sú Zoova mɔ e si kɛ i sran ng’ɔ sieli i Famiɛn’n yɛ ɔ sie e’n, nanwlɛ ɔ yo e fɛ dan.
FAMIƐN’N FƐ I ‘TOKOFI’N SƐN I NVƐN WUN’
9, 10. (a) ?Afuɛ benin nun yɛ Klist fɛli i tokofi’n sɛnnin i nvɛn wun ɔn? ?Ngue yɛ ɔ fali tokofi’n yoli ɔ? (b) ?E ɲrun lɔ’n, ngue yɛ Klist wá fɛ́ i tokofi’n yó ɔ?
9 An kanngan Jue Mun 45:4 nun. Zoova se Famiɛn’n kɛ ɔ fɛ i tokofi’n sɛn i nvɛn wun. I sɔ’n kle kɛ Zoova w’a man Zezi i atin naan ɔ nin be nga be tɛnndɛn i ɲrun’n be kun naan ɔ nunnun be. (Jue. 110:2) Klist ti Famiɛn nin alɛ kunfuɛ m’ɔ leman kwlafuɛ’n. I ti be flɛ i “safunyrɛn.” Afuɛ 1914 nun’n, ɔ fɛli i tokofi’n sɛnnin i nvɛn wu. Blɛ sɔ nun’n, ɔ kwlali Satan nin mmusu mun yɛ ɔ kannin be bo guali asiɛ’n su wa.—Ngl. 12:7-9.
10 Blɛ sɔ’n nun yɛ ɔ boli i kwlalɛ’n i nglo yilɛ’n i bo ɔ. Sanngɛ ɔ fata kɛ ‘ɔ kwla’ i kpɔfuɛ mun mlɔnmlɔn. (Ngl. 6:2) Afin Zoova kunndɛ kɛ be nunnun ninnge kwlaa nga be ti Satan liɛ asiɛ’n su’n, naan Satan nin i mmusu’m b’a kleman sran’m be ɲrɛnnɛn kun. Be nunnunlɛ sɔ’n bó i bo mɛn wunmuan’n nun Ɲanmiɛn sulɛ wafa ng’ɔ timan su’n mɔ be flɛ i Babilɔni klɔ dan’n, i su. Klɔ sɔ mɔ be fɛ i sunnzun “tekle bla’n,” Zoova maan asiɛ’n su famiɛn’m bé núnnún i. (Ngl. 17:16, 17) I sin’n, Klist núnnún asiɛ’n su famiɛn’m be ngba. I agualiɛ su’n, ɔ́ fá Satan nin mmusu mun gúa kunman dan mɔ be simɛn i bo’n nun. Afin i bɔbɔ Klist yɛ be flɛ i ekun kɛ “kunman dan bɔ be si-mɛn i bo’n i anz’n” niɔn. (Ngl. 9:1, 11; 20:1-3) Amun e nian wafa nga Jue Mun 45 kan sa sɔ mɔ bé wá jú’n be ndɛ’n.
FAMIƐN’N SU KO “KUN SA KPA’N I TI ALƐ”
11. ?“Sa kpa’n” mɔ Klist kun i ti alɛ’n yɛle benin?
11 An kanngan Jue Mun 45:5 nun. Alɛ nga Famiɛn su kɔ i kunlɛ’n, ɔ ti i liɛ ngunmin. Ɔ kunman alɛ kɛ ɔ́ dé nvle wie naan ɔ́ trɛ́ i nun sran mun lomuɛn. Sanngɛ like uflɛ ti yɛ ɔ kun alɛ ɔ. Ɲanmiɛn Ndɛ’n se kɛ: “Ko kun sa kpa’n i ti alɛ. Ko kun be bɔ be ti yalɛfuɛ bɔ be bu be lufle’n be ti alɛ. Yo maan sran’m be yo sa mun be nuan su.” Zoova kunngba cɛ yɛ ɔ fata kɛ ɔ sie nglo nin asiɛ’n niɔn. Sanngɛ Satan jasoli Zoova wun. Sɛ é kwlá sé’n, ɔ seli kɛ ɔ timan su kɛ Zoova sie nglo nin asiɛ’n. Kɛ ɔ fin i lɛ’n, anzi wie mɔ be wa flɛli be mmusu’n, be nin sran’m be wa suli Satan su. Blɛ m’ɔ fata kɛ Zoova i sran m’ɔ sieli i Famiɛn’n, ɔ kun Zoova i ti alɛ kle kɛ Zoova yɛ ɔ fata kɛ ɔ sie’n, w’a ju siɛn’n. “Sa kpa’n” mɔ Klist kun i ti alɛ’n yɛ ɔ o lɛ.
12. ?Ngue ti yɛ Famiɛn’n kun be mɔ be ti ‘wun ase kanfuɛ’n’ be ti alɛ ɔ?
12 Famiɛn’n “kun be bɔ be ti yalɛfuɛ [annzɛ “wun ase kanfuɛ”] bɔ be bu be luflɛ’n be ti alɛ” wie. Zezi bɔbɔ yoli wun ase kanfuɛ dan. W’a yoman ɲin kekle i Si su le. (Eza. 50:4, 5; Zan 5:19) Sran kwlaa ng’ɔ kunndɛ kɛ Famiɛn Zezi sie i’n, ɔ fata kɛ ɔ nian Zezi i ayeliɛ’n su. Yɛle kɛ ɔ fata kɛ ɔ koto Zoova m’ɔ sie mɛn wunmuan’n i bo. Yɛ ɔ yo like kwlaa nga Zoova se kɛ ɔ yo’n. Be nga be yo sɔ’n be ngunmin cɛ, yɛ bé kwlá trán mɛn nga Ɲanmiɛn seli kɛ ɔ́ fá mán sran mun’n, i nun ɔn.—Zkr. 14:16, 17.
13. ?Wafa sɛ yɛ Klist kun ‘sa mɔ be yo be i nuan su’n’ i ti alɛ ɔ?
13 Klist kun ‘sa bɔ be yo be i nuan su’n’ i ti alɛ wie ekun. Sa sɔ mun yɛle sa nga Zoova bɔbɔ bu be sa kpa’n. (Rɔm. 3:21; Mml. 32:4) Ɲanmiɛn nuan ijɔfuɛ Ezai kán Famiɛn Zezi Klist ndɛ ɔ seli kɛ: “Famiɛn kun ɔ́ nían mmla’n su ɔ́ síe mɛn’n.” (Eza. 32:1) Kɛ Zezi wá síe’n, ɔ́ mán e “nyanmiɛn su lɔ nin asiɛ uflɛ.” Lɔ yɛ “be nga be yo sa kpa’n” mɔ be yo sa’m be nuan su’n, bé trán ɔn. (2 Piɛ. 3:13) I sɔ’n kle kɛ be kwlaa nga bé wá trán mɛn klanman nun’n, wafa nga Zoova bu sa kpa’n nin sa tɛ’n i su yɛ bé wá nían bé nánti ɔ.—Eza. 11:1-5.
FAMIƐN’N “YO SA DANDAN MUN”
14. ?Ngue ti yɛ sa nga Klist wá yó be’n, jue tofuɛ waan be ti “sa dandan” ɔn? (An nian desɛn ng’ɔ o kan like suanlɛ’n bo i bo lɛ’n.)
14 Jue tofuɛ’n waan kɛ Famiɛn kɔ́ alɛ kunlɛ’n, i tokofi’n sɛn i nvɛn wun. (Jue. 45:3) Kɛ ɔ́ kɔ́ i ɲrun’n, ɔ yi i tokofi’n kpɛkun ɔ fa “yo sa dandan mun maan be wun i.” (Jue. 45:4) Kɛ Armagedɔn alɛ’n nun Zezi Klist wá núnnún Satan mɛn’n, ɔ́ yó “sa dandan mun.” E siman wafa trele nga Famiɛn’n wá núnnún Satan mɛn’n. Like nga e si i’n yɛle kɛ sa nga Zezi wá yó be ti’n, be nga Ɲanmiɛn se be kɛ be koto Famiɛn’n i bo mɔ b’a kplinman su’n, be wla tɔ́ blo. (An kanngan Jue Mun 2:11, 12 nun.) Kɛ Zezi bɔbɔ kán sa nga bé wá jú awieliɛ blɛ’n nun’n be ndɛ’n, ɔ seli kɛ: “Sa sroesroe ng’ɔ́ wá jú asiɛ’n su’n ti, sran’m be wawɛ’n tɔ́ blo, nyanmiɛn su lɔ ninnge ngbli-ngbli’m be nun wá kéje. Yɛ bé wún M Bɔ N Kacili Sran’n kɛ n wo nyanmiɛn ble’n su n su ba, ḿ bá yasua su, min nyrun nyannyan kɛ sɛnzɛ’n sa, ɔ yo sro.”—Lik 21:26, 27.
15, 16. ?Wan mun yɛle ɲanmiɛn su lɔ ‘alɛ kunfuɛ’ mɔ be su Klist su’n?
15 Kɛ Famiɛn’n bá wá kwlá Ɲanmiɛn i kpɔfuɛ mun’n, ɔ́ bá ‘yasua su, i nyrun nyannyan kɛ sɛnzɛ’n sa, ɔ yo sro.’ Sa Nglo Yilɛ fluwa’n waan: “N wunnin kɛ nyanmiɛn su lɔ’n ɔ tili muaan, ń nían-an, nnɛn kpanngɔ ufue kun yɛ. Sran ng’ɔ fu su’n, be flɛ i Sran-bɔ-be-kwla-fa-be-wla-guɛ-i-su nin Nanwlɛfuɛ. I ndɛ b’ɔ di’n ɔ ti su, yɛ i alɛ b’ɔ kun’n, ɔ kun i i nuan su. Nyanmiɛn su lɔ alɛ kunfuɛ’m be fu nnɛn kpanngɔ ufue’m be su, be su i su. Be tralɛ nga be wla’n ti lɛn kplɔkɔɔ ufue yɛiin. Tokofi nnana kpa kun o sran sɔ’n i nuan nun, ɔ fa kun nvle-nvlefuɛ mun. Ɔ́ fá blalɛ kpɔnman kánkán be, ɔ́ wá cúɛn nzan nzan cuɛnwlɛ’n nun. I cuɛnwlɛ sɔ’n yɛlɛ Anannganman Nyanmiɛn b’ɔ kwla like’n kwlaa yo’n i ya b’ɔ fa’n.”—Ngl. 19:11, 14, 15.
16 ?Wan mun yɛle nyanmiɛn su lɔ ‘alɛ kunfuɛ’ mɔ be su Klist su’n? I klikli nun nga Klist fɛ́ i tokofi’n sɛ́n i nvuɛn wun’n, m’ɔ́ kán Satan nin mmusu’m be bo ɲanmiɛn su lɔ’n, “anz mun” be ukɛli i. (Ngl. 12:7-9) Ɔ maan kɛ Armagedɔn alɛ’n nun Klist nin i kpɔfuɛ’m bé wá kún’n, anzi’m bé trán ɲanmiɛn su lɔ alɛ kunfuɛ nga be úkɛ i’n be nun. ?Anzi’m be ngunmin yɛ bé trán ɲanmiɛn su lɔ alɛ kunfuɛ’m be nun ɔn? Zezi boli be nga Ɲanmiɛn kpali be sieli be ngunmin’n be kasiɛ kɛ: “Sran ng’ɔ kwla’n, b’ɔ yo n klun sa lele guɛ i ti nin i bo’n, ń yó maan ɔ́ síe nvle-nvle mun kɛ n Si fa min sieli be su’n sa. Ɔ́ fá blalɛ kpɔnman kánkán be, yɛ ɔ́ bó be kɛ be bo sɛ’n sa.” (Ngl. 2:26-28) Ɔ maan be nga Ɲanmiɛn kpali be sieli be ngunmin mɔ be ti wá yía ɲanmiɛn su lɔ’n, bé yó ɲanmiɛn su lɔ alɛ kunfuɛ wie. Kɛ Zezi wá yó “sa dandan” mun núnnún nvlenvle mun’n, bé súɛn i bo.
FAMIƐN’N KWLƐ́ I KPƆFUƐ MUN
17. (a) ?Kɛ ɔ́ fá jú mɔ Famiɛn’n ti nnɛn kpanngɔ ufue su’n, i sɔ’n kle sɛ? (b) ?Ninnge benin be nzɔliɛ yɛle tokofi nin ta’n?
17 An kanngan Jue Mun 45:6 nun. Sa Nglo Yilɛ 6:2 se kɛ: “Ń nían-an, nnɛn kpanngɔ ufue kun yɛ. Ta o sran ng’ɔ ti su’n i sa nun, be mɛnnin i like kun kɛ sika kle sa, yɛ ɔ ɔli yasua su kɛ ɔ nin i kpɔfuɛ mun bé kó kún naan ɔ́ kwlá be.” Kɛ ɔ́ fá jú mɔ Famiɛn’n ti nnɛn kpanngɔ ufue su’n, ɔ kle kɛ alɛ m’ɔ kun’n, ɔ kun i i nuan su naan Zoova klun jɔ su. (Ngl. 19:11) Kɛ ɔ́ kɔ́’n, nán tokofi ngunmin yɛ ɔ sɛn i nvɛn wun ɔn. Ta o i sa nun wie. Tokofi nin ta’n, be ti ninnge nga Klist wá fá kwlɛ́ i kpɔfuɛ mun’n be nzɔliɛ.
18. ?Kɛ Klist wá tó i ‘cua’ mun’n, ngue sa yɛ ɔ́ jú ɔ?
18 Famiɛn’n i wun ndɛ nga Jue tofuɛ’n kan’n, ɔ kɛn i ɲanndra nun. I waan: “Ɔ cua’m be ti piembie, sɛ á tó be’n, bé srán famiɛn’n i kpɔfuɛ’m be anwlɛn ba’n sɛsɛsɛ. Nvle wie’m be nunfuɛ wie’m bé tɔ́ ɔ ja bo lɛ.” Asiɛ wunmuan’n su yɛ sran’m bé wú ɔ. I sɔ yɛ Ɲanmiɛn nuan ijɔfuɛ Zeremi kannin ɔn. Ɔ seli kɛ: ‘Sran nga Anannganman maan bé wú cɛn sɔ’n nun’n, kɛ ɔ fɛ i asiɛ’n i bue kun m’ɔ́ fá jú i bue uflɛ su’n, bé gúa lɛ sa.’ (Zer. 25:33) Ɲanmiɛn nuan ijɔfuɛ kun ekun seli kɛ: “I sin n wunnin anz kun, ɔ jin wia’n nun. Ɔ kpan seli anunman bɔ be su tu sin’n be kwlaa be kɛ: ‘An bla, an wa yia wa, cɛn dan nga Nyanmiɛn w’a di’n ti. Famiɛn mun, nin sonja sasufuɛ mun, nin safunyrɛn mun, nin nnɛn kpanngɔ mun, nin nnɛn kpanngɔ fufuɛ mun, nin sran’m be kwlaa, diewa mun o, kanga mun o, be bɔ be lɛ-man nyrun mun o, be bɔ be lɛ nyrun mun o, an bla be wa di be kwlaa sɔ’m be nnɛn’n.’”—Ngl. 19:17, 18.
19. ?Wafa sɛ yɛ Klist wá kwlɛ́ i kpɔfuɛ mun mlɔnmlɔn ɔn?
19 Kɛ Zezi Klist m’ɔ ti Famiɛn Dan wá núnnún Satan i mɛn tɛ’n, ɔ́ “wá yó kwlafuɛ.” (Jue. 45:5) Ɔ́ kwlɛ́ i kpɔfuɛ mun mlɔnmlɔn. Yɛle kɛ ɔ́ fá Satan nin i mmusu mun gúa kunman dan mɔ be simɛn i bo’n nun. Bé ká lɔ lele afuɛ akpi. Blɛ sɔ nun’n, Zezi nin i sran 144.000 bé síe asiɛ’n sufuɛ mun. (Ngl. 20:2, 3) Blɛ kunngba sɔ’n nun Satan nin i mmusu mun be su kwlá kleman sran’m be yalɛ kun. Ɔ ti kɛ b’a wu sa. Ɔ maan sran’m be kwlaa bé nánti Zezi i nuan ndɛ liɛ’n su. Kwlaa naan asiɛ wunmuan’n w’a kaci mɛn klanman’n, Famiɛn nin sran 144.000 bé wá dí sa kun su aklunjuɛ. Aklunjuɛ sa sɔ’n yɛ like suanlɛ ng’ɔ́ bá lɛ’n wá kɛ́n i ndɛ ɔ.
[Ndɛ kwle, bue 9]
E kan Zezi Klist m’ɔ ti e Famiɛn’n i ndɛ juejue su.