Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga isyu kan An Torrengbantayan? Bueno, helingon kun masisimbag nindo an minasunod na mga hapot:

• Ano an manonodan niato sa ilustrasyon ni Jesus manongod sa mapamirit na kag-imbitar? (Lucas 11:5-10)

Ipinapaheling kan ilustrasyon na ini kun ano an maninigong magin saboot niato kun kita namimibi. Kaipuhan na kita maghagad na may pagkamapamirit, o padagos na maghagad, nangorogna kan banal na espiritu nin Dios. (Lucas 11:11-13)—12/15, pahina 20-2.

• Ano an leksion para sa sato kan ilustrasyon ni Jesus manongod sa sarong babaeng balo asin hokom? (Lucas 18:1-8)

Idinodoon kaiyan an pangangaipo na mamibi. Bakong arog kan hokom, si Jehova matanos asin gusto kitang tabangan. Dugang pa, maninigo kitang magkaigwa nin pagtubod siring kan babaeng balo sa ilustrasyon.—12/15, pahina 26-8.

• Taano ta sinabihan ni apostol Pablo an mga Kristiano sa Corinto na “humiwas”? (2 Corinto 6:11-13)

Garo baga an nagkapira sa Corinto mayo nin pag-apresyar sa saindang mga kapagtubod, na nalilimitaran sinda asin mayo nin sa pusong pagkabuka nin palad. Kaipuhan niato na maghingoang pataluboon an tunay na pag-apresyar sa mga kapagtubod, na hinihingoa pa nganing magkaigwa nin bagong mga katood.—1/1, pahina 9-11.

• Anong pagtatak an nasambitan sa Kapahayagan 7:3?

Kan linahidan nin Dios an mga Kristiano nin banal na espiritu, an mga ini nag-ako nin enot na pagtatak. Alagad an nasambitan sa Kapahayagan 7:3 iyo an pangultimong pagtatak, kun an mga linahidan na iyan nakompirmar na lubos na nagpaheling kan saindang kaimbodan.—1/1, pahina 30-1.

• Ano an manonodan nin mga magurang sa rekord kan Biblia manongod ki Samuel?

Sarong bagay, maninigo nindang tokdoan sa tataramon nin Dios an saindang mga aki, kun paanong an mga magurang ni Samuel seguradong tinokdoan man sia. Dugang pa, kaipuhan na enkaminaron ninda an saindang mga aki na gibohon na magin karera an paglilingkod ki Jehova.—1/15, pahina 16.

• Paano niato ikakapaheling na maogma kitang naghahalat ki Jehova?

‘Hinahalat niato an aldaw ni Jehova,’ na inaantisipar an pakaginhawa kun haleon na nia an gabos na bakong diosnon na tawo. (2 Pedro 3:7, 12) Si Jehova gustong-gustong taposon an gabos na karompotan, alagad nagpupugol sia tanganing an kaligtasan kan mga Kristiano mangyari sa paagi na magpapamuraway sa saiyang ngaran. Maninigo kitang magtiwala na aram ni Jehova an tamang panahon na humiro, asin mientras tanto, maninigo na aktibo niatong omawon sia. (Salmo 71:14, 15)—3/1, pahina 17-18.

• Ilinaog daw ni Noe sa arka an pito sa lambang malinig na hayop o pitong padis sa lambang klase kaiyan?

Sinabihan si Noe na ‘kumua para sa saiya nin tigpirito’ kan lambang malinig na hayop. (Genesis 7:1, 2) Sa Hebreo, an pananaram na “tigpirito” literal na nangangahulogan “pito-pito.” An siring kaiyan na pagtaram dai nangangahulogan na pitong padis, arog kan ipinaparisa kan ibang teksto sa Biblia. Minalataw na si Noe nagkua nin pito kan lambang klase, tolong magkakapadis asin ikapitong hayop na magagamit nia sa huri sa pag-atang. (Genesis 8:20)—3/15, pahina 31.

• Taano ta maninigong ‘horophoropon’ nin mga Kristiano an resulta kan pagtubod kan kamagurangan na mga nangengenot?

Iniimbitaran kita ni apostol Pablo na ‘horophoropon,’ o maingat na obserbaran, an resulta kan maimbod na gawe-gawe kan kamagurangan asin na arogon an siring na mga halimbawa nin pagtubod. (Hebreo 13:7) Ginigibo niato ini huling dinidirehiran kita kan Tataramon nin Dios na gibohon iyan. Siring man, nakombensir kita na nasa isip kan kamagurangan an intereses kan Kahadean sagkod an pinakaikakarahay niato.—4/1, pahina 28.