Amalumbo

88 Mwe Yehova, Lesa we pusukilo lyandi,+

Nkuuta akasuba,+

E lyo no bushiku ku cinso cenu.+

 2 Ku cinso cenu e ko ipepo lyandi likesa.+

Teyamikeni ukutwi kwenu ku kupapaata kwandi.+

 3 Pantu umweo wandi wapita mu macushi ayengi,+

No mweo wandi wapalama fye na ku Nshiishi.+

 4 Bamona ukuti na ine ningile ukuya ku nindi;+

Nasanguka kwati muntu uwabulwa amaka,+

 5 Uwalubulwa kwati bantu bafwa,+

Nga bantu abaipaiwa abalaala mu nshiishi,+

Abo mushibukisha na kabili

Kabili abo mwatalusha ku kuboko kwenu ukwa kwafwa.+

 6 Mwambika mu nindi iyalepesha,

Umwafiita, mu muyenge uukalamba.+

 7 Ubukali bwenu bwaisa pali ine,+

Kabili ku mabimbi yenu ayaluma e ko mwancushisha.+ Seʹlah.

 8 Mwatalusha kuli ine abo twaishibana na bo;+

Mwanenga ukumoneka uwa bunani kuli bena.+

Ninjisalilwa kabili te kuti mfume.+

 9 Amenso yandi nayanaka pa mulandu wa bucushi bwandi.+

Nalilila kuli imwe, mwe Yehova, akasuba konse;+

Nafungulwila iminwe yandi kuli imwe pa kupepa.+

10 Bushe kuti mwacita icipesha amano ku bafwa?+

Nelyo bushe abafwa kuti baima,+

Bushe kuti bamulumbanya?+ Seʹlah.

11 Bushe icikuuku cenu kuti cabilwa mu manda,

Kabili bushe icishinka cenu kuti cabilwa ku cifulo ca ku bulobe?+

12 Bushe icipesha amano cenu kuti caishibikwa mu mfifi,+

Napamo ubulungami bwenu mu calo ca cilafi?+

13 Lelo kuli imwe, mwe Yehova e ko nakuuta ukuti mungafwe,+

Kabili ulucelo ipepo lyandi liisa kuli imwe.+

14 Mwe Yehova, cinshi ico mulekelesesha umweo wandi?+

Cinshi ico mufishila icinso cenu kuli ine?+

15 Nalicula ukutula ku bwaice bwandi ukuya na ku ntanshi kabili ndi mupepi no kuleka umweo;+

Nacula ku fingi ifya kutiinya ukufuma kuli imwe.+

16 Ubukali bwenu ubupya ngo mulilo bwapita pali ine;+

Ifya kulenga umwenso ukufuma kuli imwe fyampesha.+

17 Fyanshinguluka nga menshi akasuba konse;+

Fyonse fyaisa pali ine inshita imo.

18 Mwatalusha kuli ine icibusa no munandi;+

Imfifi yeka e munandi twaishibana na o.+