Yeremia
23 “We bulanda ku bacemi abaleonaula no kupasa impaanga sha mu mukuni wandi!”+ e fyasosa Yehova.
2 E ico Yehova Lesa wa kwa Israele atila pa bacemi abacema abantu bakwe ati: “Imwe namupasa impaanga shandi; kabili lyonse mwaleshipasa, kabili tamushisakamana iyo.”+
“Moneni, ndemukanda pa micitile yenu iibi,”+ e fyasosa Yehova.
3 “Na ine nkalonganya impaanga shandi ishashalapo ukushifumya mu fyalo fyonse umo nashipashiile,+ nkashibwesesha na mu mpanga ya shiko iya mulemfwe;+ kabili shikasanda no kufula.+ 4 Kabili nkabika pali shena abacemi abakashicema;+ na sho tashakatiine na kabili, nangu kututuma,+ kabili tapakalube nangu imo,” e fyasosa Yehova.
5 “Moneni! Inshiku shileisa,” e fyasosa Yehova, “ilyo nkemya impyani* yalungama iya kwa Davidi.+ Kabili imfumu iikateka,+ ikaba no mucetekanya no mulinganya no bulungami mu calo.+ 6 Mu nshiku sha iko Yuda akapusuka,+ kabili Israele akekala umutelelwe.+ Ne shina akenikwa ni ili, Yehova E Bulungami Bwesu.”+
7 “E ico moneni! inshiku shileisa,” e fyasosa Yehova, “kabili tabakasose abati, ‘Na pali Yehova, uwafumishe abana ba kwa Israele mu calo ca Egupti,’+ 8 lelo bakasosa abati, ‘Na pali Yehova, uwafumishe no kuleta abana ba mu ng’anda ya kwa Israele ukubafumya mu calo ca ku kapinda ka ku kuso na mu fyalo fyonse ifyo nabatamfiisheko,’ kabili bakekala mu calo cabo.”+
9 Kabili pali bakasesema, umutima wandi naulwala mu nda. Amafupa yandi yonse yaletutuma. Ndi ngo muntu uwakolwa,+ kabili ngo mwaume uo umwangashi upwishishe amaka, pa mulandu wa kwa Yehova na mashiwi yakwe aya mushilo. 10 Pantu icalo caisulamo+ abacende.+ Kabili icalo cileloosha+ pa mulandu wa citiipu, ne mpanga sha mulemfwe isha mu matololo nashuma;+ ne mibele yabo naibipa, na bumpalume bwabo nabulubana.
11 “Pantu kasesema na shimapepo bonse bali abakowela.+ Kabili ninsanga ububi bwabo mu ng’anda yandi,”+ e fyasosa Yehova. 12 “E ico imibele yabo ikaba ngo mwatelela+ mu mfifi, umo bakasunkilwa no kuwa.”+
“Pantu nkaleta pali bena ububi, mu mwaka wa kubakanda,”+ e fyasosa Yehova. 13 “Kabili nimona imibele yabipa muli bakasesema ba mu Samaria.+ Balecita nga bakasesema abo Baali+ alecincisha, kabili balelenga abantu bandi abena Israele ukulalulumba.+ 14 Kabili nimona ifya bunani+ muli bakasesema ba mu Yerusalemu, ukucita ubucende+ no kubepa ubufi;+ kabili bakosha amaboko ya ncitatubi pa kuti umuntu no muntu efuma ku bubi bwakwe.+ Kuli ine bonse baba nga Sodomu,+ na bekashi ba uko baba nga Gomora.”+
15 E ico Yehova wa mabumba alanda pali bakasesema ati: “Moneni, ndelenga balye ifyalula sana, no kubapeela amenshi yalimo sumu ukuti banwe.+ Pantu ubusangu+ bufumine muli bakasesema ba mu Yerusalemu no kusalanganina mu calo conse.”
16 Yehova wa mabumba atila: “Mwiumfwila amashiwi ya bakasesema abalesesema kuli imwe.+ Balelenga imwe ukuba aba fye.+ Balanda ifimonwa fya mu mitima yabo+—te fyafuma kuli Yehova.+ 17 Balesosa imiku ne miku ku bantu abansaalula, abati, ‘Yehova atila: “Mukaba no mutende.”’+ Na ku muntunse uwenda mu kutalama kwa mutima wakwe,+ baleti, ‘Tapali ububi ubukesa pali imwe.’+ 18 Pantu nani aiminina mwi bumba lya fibusa+ fya kwa Yehova ukuti amone no kumfwa ifyo alesosa?+ Nani abika amano ku fyo alesosa pa kuti afyumfwe?+ 19 Moneni! Icikuuku ca mwela ica kwa Yehova cikema, ubukali bwakwe,+ icipuupu icaba nga kankungwe, kabili cikawila pa mitwe ya babifi.+ 20 Ubukali bwa kwa Yehova tabwakapwe mpaka akacite+ no kufikilisha amapange ya mu mutima wakwe.+ Mu nshiku sha ku mpela mukeshiba bwino bwino umo cilolele.+
21 “Nshatumine bakasesema, lelo baile ulubilo abene. Nshalandile kuli bena, lelo baliseseme abene.+ 22 Lelo nga baliminine mwi bumba lya fibusa+ fya bantu bandi, nga balilenga abantu bandi ukumfwa amashiwi yandi, kabili nga balilenga ukuti baleke ukukonka imibele yabo iyabipa ne micitile yabo iyabipa.”+
23 “Bushe ndi Lesa ilyo naba mupepi epela, kumfwa nga nataluka ninshi naleka ukuba Lesa?” e fyasosa Yehova.+
24 “Bushe umuntu kuti abelama umwafisama na ine nafilwa ukumumona?”+ e fyasosa Yehova.
“Bushe nshaba monse mu muulu na pe sonde?”+ e fyasosa Yehova. 25 “Ning’umfwa ifyo bakasesema balesesema ifya bufi mwi shina lyandi+ balesosa abati, ‘Nindota iciloto! Nindota iciloto!’+ 26 Kufika lilali cikaba mu mitima ya bakasesema abasesema ubufi, bakasesema abasesema ubucenjeshi bwa mu mitima yabo?+ 27 Balefwaya ukuti abantu bandi balabe ishina lyandi ku filoto fyabo ifyo baishimikila,+ filya fine na bashibo balabile ishina lyandi pa mulandu wa kwa Baali.+ 28 Lekeni kasesema ulesesema iciloto aseseme iciloto; lelo kasesema uli na mashiwi yandi, lekeni alande amashiwi yandi mu cishinka.”+
“Bushe ingano kuti shalingana ne mpimbili?”+ e fyasosa Yehova.
29 “Bushe amashiwi yandi tayaba ngo mulilo,”+ e fyasosa Yehova, “kabili bushe tayaba nga sando iitobaula icilibwe?”+
30 Yehova atila: “E ico moneni, ndelwisha bakasesema+ abaleiba amashiwi yandi, cila muntu aleibila umunankwe.”+
31 “Moneni, ndelwisha bakasesema,” e fyasosa Yehova, “ababomfya indimi shabo, no kulanda abati, ‘Ifi e fyo asosa!’”+
32 “Moneni ndelwisha bakasesema ba filoto fya bufi,” e fyasosa Yehova, “abafishimika no kulenga abantu bandi ukulalulumba pa mulandu wa bufi bwabo+ na pa mulandu wa matutumuko yabo.”+
“Lelo nshabatumine nangu kubeba. E ico tabakalenge ifintu ukuwamina aba bantu,”+ e fyasosa Yehova.
33 “Kabili nga bakwipusha aba bantu nangu ni kasesema nangu ni shimapepo, ati, ‘Bushe icisendo cafina ica kwa Yehova cinshi?’+ ubebe auti, ‘“Imwe bene ni mwe icisendo cafina!+ Kabili ndi no kumusha,”+ e fyasosa Yehova.’ 34 Kabili kasesema nangu shimapepo nangu abantu nga basosa abati, ‘Ici cisendo cafina ica kwa Yehova!’ nkakanda uyo muntu na ba mu ng’anda yakwe.+ 35 Ifi e fyo mulanda cila muntu ku munankwe kabili cila muntu kuli munyina ati, ‘Yehova aswike shani? Cinshi ico Yehova asosele?’+ 36 Lelo mwilumbula icisendo+ ca kwa Yehova na kabili,+ pantu amashiwi ya muntu onse e cisendo,+ kabili mwalyalula amashiwi ya kwa Lesa wa mweo,+ Yehova wa mabumba, Lesa wesu.
37 “Ukasose kuli kasesema, auti, ‘Yehova akwaswike shani? Cinshi ico Yehova asosele?+ 38 Kabili nga mwakonkanyapo ukusosa amuti “Icisendo ca kwa Yehova,” ifi e fyo Yehova asosa: “Pa mulandu wa kuti muleti, ‘Amashiwi aya e cisendo ca kwa Yehova,’ ilyo naletuma inkombe kuli imwe, nati, ‘Mwilasosa amuti: “Icisendo ca kwa Yehova!”’39 moneni, ndi pano! Kabili nangu cibe shani nkamulekelesha,+ kabili nkamusha no kusha umusumba uo namupeele imwe ne fikolwe fyenu, ukufuma pa cinso candi.+ 40 Kabili nkabika pali imwe umusaalula umuyayaya e lyo no museebanya umuyayaya, ifishakalabwe.”’”+