Abena Roma
9 Ndesosa icine+ pa menso ya kwa Kristu; nshilebepa+ iyo, pantu kampingu wandi ambela ubunte mu mupashi wa mushilo, 2 ukuti ndi no bulanda ubukalamba no kucululuka ukushipwa mu mutima wandi.+ 3 Pantu kuti nafwaya ukuti ine wine mpaatulweko kuli Kristu ngo watiipwa pa mulandu wa bamunyinane,+ abantu bandi,+ 4 e kutila abena Israele,+ abo Lesa asalile ukuba abana+ bakwe no kubapeela ubukata+ ne fipangano+ na Mafunde+ no mulimo+ ne filayo;+ 5 muli aba bene e mwali ne fikolwe+ umwatuntwike Kristu.+ Lesa,+ uwaba pali fyonse, acindikwe umuyayaya, umuyayaya. Ameni.
6 Lelo, te kutila icebo ca kwa Lesa califililwe.+ Pantu te bonse abatuntuka muli Israele ababa “abena Israele” bene bene.+ 7 Kabili te kutila pantu fye bafyalwa muli Abrahamu ninshi bonse bana iyo,+ lelo calembwa ati: “Uuketwa ati ‘umwana obe’ akafyalilwa muli Isaki.”+ 8 Kanshi abana abafyalwa ku buntunse+ tabali cine cine bana ba kwa Lesa iyo,+ lelo abana ba cilayo+ e bapendwa ukuti umwana. 9 Pantu Lesa alaile ukuti: “Umwaka uleisa pa nshita nga ino nkesa, na Sara akakwata umwana mwaume.”+ 10 E fyo cali na kuli Rebeka ilyo aimite bampundu+ kuli Isaki icikolwe cesu:11 pantu ilyo abana baali tabalafyalwa kabili tabalacita icisuma atemwa icibi,+ pa kuti ukufwaya kwa kwa Lesa ukwa kusala kwishibikwe ukuti tasala umuntu ukulingana ne milimo yakwe, lelo asala uo umwine alefwaya,+ 12 Rebeka aebelwe ati: “Umukalamba akaba umusha wa mwaice.”+ 13 Filya calembwa ati: “Natemenwe Yakobo, lelo Esau nalimupatile.”+
14 E ico tuletila shani? Bushe kuli ulufyengo kuli Lesa?+ Nakalya! 15 Pantu aebele Mose ati: “Nkabelela uluse uo nafwaya ukubelela uluse, kabili nkabela inkumbu uo nafwaya ukubela inkumbu.”+ 16 E ico, kanshi, tacaba ku fyo umuntu alefwaya nelyo ifyo acita, lelo caba ku luse+ lwa kwa Lesa+ umwine. 17 Pantu mu Malembo calembwa ukuti Lesa aebele Farao ati: “Ni pali ci cine nakulekela ukutwalilila ukubako, ukuti muli iwe e mo nangile amaka yandi, no kuti ishina lyandi lishibikwe mu calo conse.”+ 18 E ico, kanshi, uo afwaya ukubelela uluse alamubelela uluse,+ lelo uo afwaya ukutalama alamuleka atalama.+
19 Bamo kuti banjipusha abati: “Nga kanshi cinshi afwailishisha ifilubo? Pantu nani engakaanya ico umwine afwaya?”+ 20 We muntu+ we, bushe ni we nani we uletwishika Lesa?+ Bushe icabumbwa cingatila ku wacibumbile, “Cinshi ico wamumbiile fi?”+ 21 Bushe tamwaishiba ukuti nakabumba+ alikwata amaka pe bumba ku kubumbako kwi loba limo line icipe cimo ica mucinshi, na cimbi icabula umucinshi?+ 22 Lelo, nomba, ni shani nga Lesa alekelele no kushishimisha ukwingi ifipe fya bukali ifyapangilwa ubonaushi,+ nangu line alafwaya ukulanga ubukali bwakwe no kusokolola amaka yakwe? 23 Kabili ni shani nga acitile fi pa kuti asokolole ubucindami+ bwa bukata bwakwe pa fipe+ fya luse, ifyo apekanishishe libela ku kumona ubukata,+ 24 e kutila, ifwe, fwe bo aitile te mu baYuda beka fye lelo na mu bena fyalo+ mwine? 25 Cili fye nge fyo asosa na mwi buuku lya kwa Hosea ati: “Abashali abantu+ bandi nkabeta ati ‘abantu bandi,’ no mwanakashi uo nshatemenwe nkamwita ‘uwatemwikwa’;+ 26 kabili uko baebelwe ukuti, ‘Tamuli bantu bandi,’ e ko baketwa ati, ‘abana ba kwa Lesa wa mweo.’”+
27 Awe, Esaya abilikisha pali Israele ati: “Nangu abana ba kwa Israele bengafula ngo mucanga wa muli bemba,+ abanono fye abashalapo e bakapusuka.+ 28 Pantu Yehova akalubulwisha pano isonde, ukulubulwisha no kuputula imilandu bwangu bwangu.”+ 29 Kabili, nga filya fine Esaya asoseele libela ati: “Yehova, wa mabumba,+ nga tatushilileko abana, nga twaba fye nga Sodomu, kabili nga twaba fye kwati ni Gomora.”+
30 E ico tuletila shani? Ukuti abena fyalo, nangu tabakonkelele ubulungami, basukile basanga ubulungami,+ ubulungami ubufuma ku kutetekela;+ 31 lelo Israele wena, nangu akonkelele ifunde lya bulungami, tafikileko kwi funde ili iyo.+ 32 Nga cinshi? Pantu takonkele ifunde mu kutetekela, lelo ku milimo.+ Baipunwine ku “libwe lya kuipununako”;+ 33 filya calembwa ati: “Moneni! Ndebika mu Sione ilibwe+ lya kuipununako kabili icilibwe ca kupunwisha,+ lelo uulitetekela takalengwe insoni.”+