11 E ico Hamani abuulile kabalwe, abuula ne ca kufwala afwika Mordekai,+ e lyo alamupisha mu lubansa lwa cintubwingi ulwa mu musumba ninshi Mordekai nanina pali kabalwe. Lyena Hamani alebilikisha ninshi ali pa ntanshi yakwe ati: “Ifi e fyo tucitila umuntu uo imfumu ilefwaya ukucindamika.” 12 Pa numa Mordekai abweleele ku mpongolo ye sano lya mfumu. Lelo Hamani ena alyangufyenye ukuya ku ng’anda ku mwakwe ninshi nafimba ku mutwe pantu ali sana ne nsoni kabili alyumfwile ububi.