25 Naishileba umubomfi wa ici cilonganino ukulingana no mulimo+ uo Lesa ampeele pa mulandu wenu pa kuti mbile sana icebo ca kwa Lesa. 26 Iyi mbila nsuma e nkaama ya kwa Lesa+ iyo asungile ukutula fye ku bwikashi bwa ku kale*+ na ku nkulo sha ku kale. Lelo nomba alisokolwela abantu bakwe aba mushilo iyi nkaama,+ 27 abena fyalo, abo Lesa umwine afwaya ukuti beshibe ubucindami bwa bukata ubwa iyi nkaama yakwe,+ e kutila Kristu uwaba muli imwe, uo musuubila ukucindamikilwa pamo nankwe.+