Ibuuku lya Bubili Ilya Ishamfumu

18 Mu mwaka walenga butatu ukutula apo Hoshea+ umwana wa kwa Ela imfumu ya Israele atendekeele ukuteka, e mo Hisekia+ umwana wa kwa Ahasi imfumu+ ya Yuda aishileba imfumu. 2 Ali ne myaka 25 ilyo aishileba imfumu, kabili atekele imyaka 29 mu Yerusalemu. Nyina ali ni Abi* umwana wa kwa Sekaria.+ 3 Hisekia alecita ifisuma mu menso ya kwa Yehova,+ nga filya fine Davidi icikolwe cakwe acitile.+ 4 E waonawile ififulo fya kupepelapo,+ e watobawile ifimabwe fya kupepelapo ifyo baimike kabili e watemene icimuti ca kupepelapo.*+ Na kabili ashonawile insoka ya mukuba iyo Mose apangile;+ pantu na pali ilya ine nshita abena Israele baleocela iyi nsoka amalambo, kabili baleyita abati, akalubi ka nsoka ya mukuba.* 5 Hisekia alicetekele Yehova+ Lesa wa kwa Israele; pa mfumu shonse ishatekelepo kale mu Yuda ne shamukonkelepo, tapali nangu imo iyali nga ena. 6 Ali uwa cishinka kuli Yehova.+ Talekele ukumukonka; alekonka amafunde ayo Yehova apeele Mose. 7 Kabili Yehova ali nankwe. Fyonse ifyo alecita fyale-enda bwino. Alipondokele imfumu ya Asiria kabili alikeene ukulaibombela.+ 8 Alicimfishe na baPelishiti+ ukufika fye na ku Gasa ne fitungu fya uko, ukutendekela pa lupungu lwa kwa kalinda ukufika fye na ku musumba we linga.*

9 Mu mwaka walenga 4 ukutula apo Imfumu Hisekia yatendekeele ukuteka, e kutila mu mwaka walenga 7 ukutula apo Hoshea+ umwana wa kwa Ela imfumu ya Israele atendekeele ukuteka, e mo Shalmanesere imfumu ya Asiria aishile mu kulwisha umusumba wa Samaria kabili aliushingile.+ 10 Bapokele umusumba wa Samaria+ pa numa ya myaka itatu ukutula apo baushingiile, e kutila mu mwaka walenga 6 ukutula apo Hisekia abeleele imfumu, kabili mu mwaka walenga 9 ukutula apo Hoshea imfumu ya Israele atendekeele ukuteka. 11 Lyena imfumu ya Asiria yasendele abena Israele mu kuyaba bankole+ ku Asiria kabili yalekele balaikala mu Hala na mu Habore ku mumana wa Gosani na mu misumba ya bena Madai.+ 12 Icalengele ukuti ifi ficitike ni co tabalekonka ifyo Yehova Lesa wabo alebeba; tabalesunga icipangano cakwe kabili tabalecita fyonse ifyo Mose umubomfi wa kwa Yehova abebele.+ Tabalecita ifyo alebeba kabili tabalemumfwila.

13 Mu mwaka walenga 14 ukutula apo Imfumu Hisekia yatendekeele ukuteka, e mo Sankeribu imfumu ya Asiria+ aishile mu kulwisha imisumba yonse iya malinga iya mu Yuda, kabili ali-ipokele.+ 14 E ico Hisekia imfumu ya Yuda atumiine imfumu ya Asiria ku Lakishi amashiwi ya kuti: “Nine nalufyanya. Leka ukundwisha. Nkakupeela fyonse ifyo ukampingula.” E lyo imfumu ya Asiria yapingwile Hisekia imfumu ya Yuda amatalanti* ya silfere 300 na matalanti ya golde 30. 15 E ico Hisekia apeele iyi mfumu silfere yonse iyali mu ng’anda ya kwa Yehova na mu fipao fya ng’anda ya mfumu.*+ 16 Pali ilya nshita, Hisekia imfumu ya Yuda asokwele* ifiibi kwi tempele+ lya kwa Yehova ne nceshi sha pa mwinshi isho abikileko golde,+ e lyo apeela imfumu ya Asiria.

17 Ilyo abena Asiria bali ku Lakishi,+ imfumu yabo yatumine Tartani,* Rabsarisi,* Rabsake* ne bumba lya bashilika ilikalamba ku Yerusalemu+ ku Mfumu Hisekia. Ilyo bafikile ku Yerusalemu, baileiminina mupepi no mufoolo uukalamba uwa cishiba ca pa muulu, icabela mu musebo wa mu mpanga ya uuwasha insalu.+ 18 Ilyo balefwaya ukuti imfumu ifume pa kuti balande nayo, abafumine ni Eliakimu+ umwana wa kwa Hilkia uwaleangalila aba mu ng’anda ya mfumu,* Shebna+ kalemba na Yoa umwana wa kwa Asafi uwalelembela imfumu ifyebo.

19 E ico Rabsake abebele ati: “Muye-eba Hisekia amuti, ‘Imfumu nkalamba, imfumu ya Asiria yatila: “Cinshi ucetekelemo?+ 20 Iwe ulelanda ati, ‘Ninjishiba ifya kulwa kabili ninkwata na maka ya kulwa,’ lelo ayo malanda kanwa fye. Nani ucetekele pa kuti umpondokele?+ 21 Mona! Wacetekela ukuti Egupti, itete ilyafunika, akakwafwa. Egupti+ litete lya kuti umuntu nga alikata pa kuti ashintilileko kuti lyakontoka lyatula no lupi lwakwe. E fyo Farao imfumu ya Egupti aba kuli bonse abamucetekela. 22 Kabili nga mwanjeba amuti, ‘Twacetekela Yehova Lesa wesu,’+ bushe Hisekia taonaula ififulo fyakwe ifya kupepelapo ne fiipailo fyakwe,+ e lyo ninshi eba abaYuda na ba mu Yerusalemu ati, ‘Mulepepela pali ici iciipailo mu Yerusalemu’?”’+ 23 E ico nomba panganeni na shikulu imfumu ya Asiria icipangano ca kuti: Nkakupeela bakabalwe 2,000 nga kuti wakumanisha ukukwata abantu bakuninapo.+ 24 Apo ucetekele Egupti ukuti e ukakupeela amaceleta na banina pali bakabalwe, bushe kuti wakumanisha ukucimfya nangu fye ni ntungulushi yacepesha pa babomfi ba kwa shikulu? 25 Bushe njishile mu konaula cino calo ukwabula ukuti Yehova ansuminishe? Yehova umwine anjebele ati, ‘Kabiye kalwishe ici calo, kabili uconaule.’”

26 E lyo Eliakimu umwana wa kwa Hilkia, Shebna+ na Yoa baebele Rabsake abati:+ “Landeni na fwe babomfi benu mu ciAramaiki*+ pantu tulomfwa; mwilanda na ifwe mu lulimi lwa baYuda, pantu abantu bali pe linga kuti baumfwako.”+ 27 Lelo Rabsake abebele ati: “Bushe shikulu antumine ukwisaeba fye shikulwinwe na imwe aya amashiwi? Bushe tantumine ukwisaeba na ba abaume abekala pa cibumba, abakalya amafi yabo kabili abakanwa imisu yabo pamo na imwe?”

28 Lyena Rabsake aliminine, e lyo abilikisha mu lulimi lwa baYuda ati: “Umfweni amashiwi ya mfumu nkalamba, imfumu ya Asiria.+ 29 Imfumu yatila, ‘Mwileka Hisekia amubepe, pantu te kuti amupusushe kuli ine.+ 30 Kabili mwileka Hisekia alenge mucetekele Yehova, nga amweba ati: “Nangu cibe shani, Yehova aletupokolola, kabili taleke imfumu ya Asiria+ icimfye uno musumba.” 31 Mwiumfwila Hisekia, pantu imfumu ya Asiria yatila: “Cimbeni pa kuti muleikala umutende, kabili cila muntu akulalya ku cimuti cakwe ica mwangashi na ku mukunyu wakwe, kabili akulanwa amenshi mu cishima cakwe, 32 mpaka nkesemutwala ku calo icaba nge calo cenu,+ icalo umwaba ingano no mwangashi uupya, umwaba umukate na mabala ya myangashi, kabili umwaba ifimuti fya miolife no buci. Lyena mukapusuka, tamwakafwe. Mwiumfwila Hisekia, pantu amubepa fye ifi amweba ati, ‘Yehova akatupususha.’ 33 Bushe kwaliba balesa ba nko abapusushapo ifyalo fyabo ku mfumu ya Asiria? 34 Bushe balesa ba ku Hamati+ na ku Aripadi baba kwi? Inga balesa ba ku Sefarivaimu,+ aba ku Hena na ba ku Iba baba kwi? Bushe balipuswishe Samaria mu kuboko kwandi?+ 35 Ni lesa nshi pali balesa bonse aba nko uwapusushapo icalo cakwe kuli ine, pa kuti Yehova apusushe Yerusalemu kuli ine?”’”+

36 Lelo abantu baikele fye tondolo, tabamwaswike nangu cimo, pantu imfumu yabebele aiti: “Mwimwasuka.”+ 37 Nomba Eliakimu umwana wa kwa Hilkia uwaleangalila aba mu ng’anda ya mfumu,* Shebna kalemba na Yoa umwana wa kwa Asafi uwalelembela imfumu ifyebo, baile kuli Hisekia ninshi nabalepula ifya kufwala fyabo, kabili bamwebele fyonse ifyo Rabsake alandile.