Ibuuku lya Bubili Ilya Ishamfumu

15 Mu mwaka walenga 27 ukutula apo Yeroboamu* abelele imfumu ya Israele, e mo Asaria*+ umwana wa kwa Amasia imfumu+ ya mu Yuda aishileba imfumu.+ 2 Ali ne myaka 16 ilyo atendeke ukuteka, kabili atekele imyaka 52 mu Yerusalemu. Nyina ali ni Yekolia uwa mu Yerusalemu. 3 Asaria alecita ifyalungama mu menso ya kwa Yehova, nga filya fine Amasia wishi acitile.+ 4 Lelo ififulo fya kupepelapo fyena tabafyonawile,+ kabili abantu balitwalilile ukutuula amalambo no kuyocela pa fifulo fya kupepelapo.+ 5 Yehova alwalike imfumu ifibashi,+ kabili yali ne fibashi mpaka ubushiku yafwile. Yaleikala yeka mu ng’anda,+ kabili Yotamu umwana wa iko+ e waleangalila ing’anda,* alepingula ne milandu ya bantu ba mu calo.+ 6 Amalyashi yambi aya kwa Asaria+ na fyonse ifyo acitile, bushe tabafilemba mwi buuku lya malyashi ya mfumu sha mu Yuda? 7 Lyena Asaria alifwile nge fyafwile ifikolwe fyakwe,+ kabili bamushiikile uko bashiikile ifikolwe fyakwe mu Musumba wa kwa Davidi. Yotamu umwana wakwe e wamupyene pa bufumu.

8 Mu mwaka walenga 38 ukutula apo Asaria imfumu+ ya mu Yuda atendekeele ukuteka, Sekaria+ umwana wa kwa Yeroboamu aishileba imfumu ya Israele mu Samaria kabili atekele imyeshi 6. 9 Alecita ifyabipa mu menso ya kwa Yehova nge fyo ifikolwe fyakwe fyacitile. Alecita imembu shonse isho Yeroboamu umwana wa kwa Nebati alengele abena Israele balecita.+ 10 Lyena Shalumu umwana wa kwa Yabeshe alimupangiile, kabili amwipaile+ mu Ibleamu.+ Ilyo amwipeye, alimupyene pa bufumu. 11 Amalyashi yambi aya kwa Sekaria, baliyalemba mwi buuku lya malyashi ya mfumu sha mu Israele. 12 Ifi fyafikilishe ifyo Yehova aebele Yehu ati: “Abana bobe bakekala pa cipuna ca bufumu mu Israele,+ ukufika fye na ku nkulo yalenga 4.”+ Kabili ifi fine e fyacitike.

13 Shalumu umwana wa kwa Yabeshe aishileba imfumu mu mwaka walenga 39 ukutula apo Usia imfumu+ ya mu Yuda atendekeele ukuteka, kabili atekele umweshi uutuntulu mu Samaria. 14 Lyena Menahemu umwana wa kwa Gadi afumine ku Tesa+ aya ku Samaria. Aileipaya Shalumu+ umwana wa kwa Yabeshe mu Samaria, kabili alimupyene pa bufumu. 15 Amalyashi yambi aya kwa Shalumu na mapange ayabipa ayo akwete, balifilemba mwi buuku lya malyashi ya mfumu sha mu Israele. 16 Pali ilya nshita, Menahemu afumine ku Tesa kabili aonawile Tifisa, aipaya na bantu bonse abalimo, na bali mu ncende ishali mupepi, pantu tabamwiswilile impongolo. Alyonawile Tifisa kabili alilepwile na banakashi abali na mafumo.

17 Mu mwaka walenga 39 ukutula apo Asaria abelele imfumu ya mu Yuda, e mo Menahemu umwana wa kwa Gadi aishileba imfumu ya Israele, kabili atekele imyaka 10 mu Samaria. 18 Alecita ifyabipa mu menso ya kwa Yehova. Alecita imembu shonse isho Yeroboamu umwana wa kwa Nebati alengele abena Israele balecita+ ilyo ali imfumu. 19 Pulu imfumu+ ya Asiria alishile mu calo, kabili Menahemu amupeele amatalanti* ya silfere 1,000, pa kuti amwafwe ukukosha ubufumu bwakwe.+ 20 E ico Menahemu apokele silfere ku baume abena Israele, abalumbwike kabili abali abakankaala.+ Apeele imfumu ya Asiria amashekele* ya silfere 50 ayo apokele kuli cila mwaume. Lyena imfumu ya Asiria yalibwelelemo, tayaikele mu calo. 21 Amalyashi yambi aya kwa Menahemu+ na fyonse ifyo acitile, bushe tabafilemba mwi buuku lya malyashi ya mfumu sha mu Israele? 22 Lyena Menahemu alifwile nge fyafwile ifikolwe fyakwe; kabili umwana wakwe Pekahia alimupyene pa bufumu.

23 Mu mwaka walenga 50 ukutula apo Asaria abelele imfumu ya mu Yuda, e mo Pekahia umwana wa kwa Menahemu aishileba imfumu ya Israele mu Samaria, kabili atekele imyaka ibili. 24 Alecita ifyabipa mu menso ya kwa Yehova. Alecita imembu shonse isho Yeroboamu umwana wa kwa Nebati alengele abena Israele balecita.+ 25 Lyena Peka+ umwana wa kwa Remalia umo pa bakalamba ba bashilika alimupangiile, kabili amwipaile mu Samaria mu lupungu ulwakosa ulwa ng’anda ya mfumu* pamo na Argobe na Ariya.* Ali pamo na baume 50 aba ku Gileadi. Pa numa ya kumwipaya, alimupyene pa bufumu. 26 Amalyashi yambi aya kwa Pekahia na fyonse ifyo acitile, balifilemba mwi buuku lya malyashi ya mfumu sha mu Israele.

27 Mu mwaka walenga 52 ukutula apo Asaria abelele imfumu ya mu Yuda, e mo Peka+ umwana wa kwa Remalia aishileba imfumu ya Israele mu Samaria, kabili atekele imyaka 20. 28 Alecita ifyabipa mu menso ya kwa Yehova. Alecita imembu shonse isho Yeroboamu umwana wa kwa Nebati alengele abena Israele balecita.+ 29 Ilyo Peka imfumu ya Israele aleteka, Tiglati-pilesere imfumu+ ya Asiria aishilesansa Iyone, Abele-bete-maaka,+ Yanoa, Kedeshe,+ Hasore, Gileadi+ na Galili, icitungu conse ica kwa Naftali,+ kabili abaleikalamo abasendele mu kuyaba bankole ku Asiria.+ 30 Lyena Hoshea+ umwana wa kwa Ela alipangiile Peka umwana wa kwa Remalia, kabili alimwipeye; e lyo amupyana pa bufumu mu mwaka walenga 20 ukutula apo Yotamu+ umwana wa kwa Usia atendekeele ukuteka. 31 Amalyashi yambi aya kwa Peka na fyonse ifyo acitile, balifilemba mwi buuku lya malyashi ya mfumu sha mu Israele.

32 Mu mwaka walenga bubili ukutula apo Peka umwana wa kwa Remalia abelele imfumu ya Israele, e mo Yotamu+ umwana wa kwa Usia+ aishileba imfumu mu Yuda. 33 Ali ne myaka 25 ilyo atendeke ukuteka, kabili atekele imyaka 16 mu Yerusalemu. Nyina ali ni Yerusha umwana wa kwa Sadoke.+ 34 Alecita ifisuma mu menso ya kwa Yehova nga filya fine Usia wishi acitile.+ 35 Lelo ififulo fya kupepelapo fyena tabafyonawile, kabili abantu balitwalilile ukutuula amalambo no kuyafutumwina pa fifulo fya kupepelapo.+ Yotamu e wapangile impongolo ya ng’anda ya kwa Yehova+ iyali apasansama. 36 Amalyashi yambi aya kwa Yotamu ne fyo acitile, bushe tabafilemba mwi buuku lya malyashi ya mfumu sha mu Yuda? 37 Pali ilya nshita, Yehova atendeke ukutuma Resini imfumu ya Siria na Peka+ umwana wa kwa Remalia mu kulwisha Yuda.+ 38 Lyena Yotamu alifwile nge fyafwile ifikolwe fyakwe kabili bamushiikile uko bashiikile ifikolwe fyakwe mu Musumba wa kwa Davidi uwali icikolwe cakwe. Ahasi umwana wakwe e wamupyene pa bufumu.