Ibuuku lya Bubili Ilya Ishamfumu

17 Mu mwaka walenga 12 ukutula apo Ahasi imfumu ya Yuda atendekeele ukuteka, e mo Hoshea+ umwana wa kwa Ela aishileba imfumu ya Israele mu Samaria kabili atekele imyaka 9. 2 Alecita ifyabipa mu menso ya kwa Yehova, lelo ifyabipa ifyo alecita tafyalingene ne fyo imfumu ishabalilepo ukuteka abena Israele shacitile. 3 Shalmanesere imfumu ya Asiria aishile mu kumulwisha,+ kabili Hoshea aishileba umubomfi wakwe, atampa no kulamutuulila umutuulo.+ 4 Lelo imfumu ya Asiria yaishileishiba ukuti Hoshea alepanga ukuipondokela, pantu atumine inkombe kuli So imfumu ya Egupti+ kabili tatwele umutuulo ku mfumu ya Asiria nge fyo alecita lyonse. E ico imfumu ya Asiria yalimukakile e lyo yamwisalila mu cifungo.

5 Imfumu ya Asiria yailesansa icalo conse, kabili yaileshinga umusumba wa Samaria pa myaka itatu. 6 Mu mwaka walenga 9 ukutula apo Hoshea atendekeele ukuteka, e mo imfumu ya Asiria yapokele Samaria.+ Yasendele abena Israele mu kuyaba bankole+ ku Asiria, kabili yalengele baikala mu Hala na mu Habore ku mumana wa Gosani+ na mu misumba ya bena Madai.+

7 Icalengele ukuti ici cicitike, ni co abena Israele balibembukile Yehova Lesa wabo uwabafumishe mu calo ca Egupti umo Farao imfumu ya Egupti+ alebacusha. Balepepa* tulesa tumbi,+ 8 balekonka intambi sha nko isho Yehova abatamfiisheko, kabili balekonka intambi isho imfumu shabo shabikileko.

9 Abena Israele balecita ifyo Yehova Lesa wabo alemona ukuti tafyaweme. Balekuula ififulo fya kupepelapo mu misumba yabo yonse,+ ukutendekela pa lupungu lwa kwa kalinda ukufika fye na ku musumba we linga.* 10 Baleimika ifimabwe ne fimuti fya kupepelapo*+ pa tupili tonse na mwi samba lya fimuti fyonse ifyafumba;+ 11 kabili baleocela amalambo pa fifulo fya kupepelapo fyonse nga fintu inko isho Yehova abatamfiisheko+ shalecita. Balecita ifyabipa ifyalekalifya Yehova.

12 Balebombela utulubi twa bunani,*+ uto Yehova abebelepo ukuti: “Tamufwile ukutubombela!”+ 13 Yehova alesoka abena Israele na baYuda ukupitila muli bakasesema bakwe bonse na muli bonse abalemona ifimonwa.+ Alebasoka ati: “Lekeni ukucita ifyabipa!+ Mulekonka amafunde yandi ne fyo imweba, ukulingana na mafunde yonse ayo napeele ifikolwe fyenu kabili ayo namutumiine ukupitila mu babomfi bandi bakasesema.” 14 Lelo batwalilile fye ukuba abatalama* nge fyo ifikolwe fyabo ifishatetekele Yehova Lesa wabo fyali.+ 15 Tabalekonka ifyo alebeba kabili tabasungile icipangano ico apangene+ ne fikolwe fyabo. Tabaleumfwa nga abasoka,+ kabili balepepa utulubi+ twa fye ica kuti nabo bene baishileba aba fye.+ Balepashanya inko ishabashingulwike isho Yehova abebele ukuti tabalingile ukushipashanya.+

16 Balesuula amafunde yonse aya kwa Yehova Lesa wabo kabili bapangile abana ba ng’ombe babili,+ baimike ne cimuti ca kupepelapo.*+ Balekontamina ifya mu muulu fyonse+ kabili balebombela Baali.+ 17 Baleoca na bana babo abaume na bana babo abanakashi,*+ balebuka+ kabili baleya ku basobela ifya ku ntanshi. Balecita ifyabipa mu menso ya kwa Yehova pa kuti balemukalifya.

18 E ico Yehova afuliilwe sana abena Israele ica kuti abafumishe ku cinso cakwe.+ Ashiileko fye aba mu mukowa wa kwa Yuda.

19 Nomba na bena Yuda bene tabalekonka amafunde ya kwa Yehova Lesa wabo;+ balekonka intambi isho abena Israele balekonka.+ 20 Yehova alikeene bonse abatuntwike mu bena Israele kabili alibasalapwile pa kuti baicefye kabili alekele abalwani babo babapoka ifipe, mpaka abafumya pa cinso cakwe. 21 Alengele abena Israele baleka ukutekwa na ba mu ng’anda ya kwa Davidi, kabili babikile Yeroboamu umwana wa kwa Nebati pa bufumu.+ Lelo Yeroboamu alengele abena Israele baleka ukukonka Yehova, kabili alengele bacita ulubembu ulukalamba. 22 Kabili abena Israele balecita imembu shonse isho Yeroboamu acitile.+ Tabalekele ukucita ishi imembu 23 mpaka Yehova abafumya pa cinso cakwe, nga filya fine alandile ukupitila mu babomfi bakwe bakasesema.+ E ico abena Israele babasendele mu kuyaba bankole ku Asiria+ uko bekala ukufika na lelo.

24 Lyena imfumu ya Asiria yafumishe abantu ku Babiloni, ku Kutu, ku Aba, ku Hamati na ku Sefarivaimu,+ e lyo yabaleta mu misumba ya Samaria umo bafumishe abena Israele. Baikele mu Samaria na mu misumba ya iko. 25 Ilyo batendeke fye ukwikala mulya, tabaletiina* Yehova. E ico Yehova abatumiine inkalamo,+ kabili shalipeyepo bamo. 26 Kwali abaile-eba imfumu ya Asiria abati: “Abantu abo mwasendele mu kuyaba bankole, abo mwatwele mu misumba ya Samaria tabaishiba imipepele* ya kwa Lesa wa cilya calo. E ico Lesa wa cilya calo alabatumina inkalamo kabili shilabepaya, pantu pali bena tapaba uwaishiba imipepele ya kwa Lesa wa cilya calo.”

27 E lyo imfumu ya Asiria yalandile aiti: “Lekeni umo pali bashimapepo abo mwafumishe kulya abwelelemo, ayeikala nabo pa kuti akabasambilishe imipepele ya kwa Lesa wa cilya calo.” 28 E ico umo pali bashimapepo abo bafumishe ku Samaria alibwelele aisa mu kwikala mu Betele,+ kabili atampile ukubasambilisha ifya kutiina* Yehova.+

29 Lelo uluko lumo na lumo lwaipangiile lesa* wa luko, kabili ishi nko shabikile tulesa twa shiko mu mayanda ayo abena Samaria bapangile pa fifulo fya kupepelapo. Ifi fine e fyo cila luko lwacitile mu misumba umo shaleikala. 30 E ico abaume ba ku Babiloni bapangile Sukote-benote, aba ku Kutu bapangile Nergali, aba ku Hamati+ bapangile Ashima 31 kabili abena Aba bapangile Nibhasi na Tartaki. Abena Sefarivaimu baleoca abana babo pa kutuulila Adrameleke na Anameleke, tulesa twa kwa Sefarivaimu+ amalambo. 32 Nangu ca kuti baletiina Yehova, basontele bashimapepo pa bantu babo kabili aba bene e balebombela mu mayanda ayo bapangile pa fifulo fya kupepelapo.+ 33 Baletiina Yehova, lelo balepepa tulesa twabo, ukulingana ne mipepele* ya nko isho babafumisheko.+

34 Ukufika na lelo, bakonka imipepele* yabo iya kale. Tapaba nangu umo uupepa* Yehova kabili tapaba uukonka amafunde yakwe, ubupingushi na mafunde ayo Yehova apeele abana ba kwa Yakobo, uo ayalwile ishina pa kuti abe Israele.+ 35 Ilyo Yehova apangene nabo icipangano,+ abebele ati: “Tamufwile ukulapepa* tulesa tumbi, kabili tamulingile ukulatukontamina nelyo ukulatubombela nangu fye ukulatutuulila amalambo.+ 36 Lelo Yehova uwamufumishe mu calo ca Egupti ku maka ayakalamba no kuboko ukwatambalikwa+ e o muletiina,+ e o mulekontamina kabili e o muletuulila amalambo. 37 Kabili lyonse mulebikako amano pa kuti mulekonka ifyo imweba, ubupingushi na mafunde ayo amulembeele,+ kabili tamulingile ukulapepa* tulesa tumbi. 38 Kabili tamufwile ukulaba icipangano ico napangene na imwe,+ kabili tamulingile ukulapepa* tulesa tumbi. 39 Lelo Yehova Lesa wenu e o mulingile ukulapepa,* pantu e ukamupokolola ku balwani benu.”

40 Nomba tabakonkele ifyo abebele, balekonka imipepele* yabo iya kale.+ 41 E ico ishi inko shatendeke ukupepa* Yehova,+ lelo shalebombela ne fimpashanya fya shiko ifyo shapangile. Abana ba shiko na beshikulu ba shiko bacita filya fine ifikolwe fyabo fyalecita, ukufika na lelo.