Impendwa

6 Yehova akonkenyepo ukweba Mose ati: 2 “Eba abena Israele auti, ‘Nga ca kuti umwaume nelyo umwanakashi alapa umulapo waibela uwa kuba umuNasiri*+ wa kwa Yehova, 3 tafwile ukunwa umwangashi ne fya kunwa fimbi ifikola. Tafwile ukunwa umwangashi uwakantuka nelyo ubwalwa.+ Tafwile ukunwa ifya kunwa fyonse ifyo bapangila no mwangashi, kabili tafwile ukulya ifisabo fya myangashi ifibishi nelyo ifyauma. 4 Inshiku shonse isho akaba umuNasiri tafwile ukulalya conse ico bapangila no mwangashi. Talingile ukulalya imyangashi iishilapya nangu fye fipapa fya myangashi.

5 “‘Inshiku shonse isho akaba umuNasiri ekalabeya umushishi wakwe.+ Ekalabeya umushishi pa kuti akaleba uwa mushilo mpaka inshiku isho aipeela kuli Yehova shikapwe. 6 Inshiku shonse isho akaba uwaipeela kuli Yehova ekalapalama ku citumbi.* 7 Nampo uwafwa nga ni wishi, ni nyina, ni munyina nelyo ni nkashi yakwe, tafwile kupalamako epali aikowesha,+ pantu umushishi wa ku mutwe wakwe e cishibilo ca kuti muNasiri wa kwa Lesa.

8 “‘Inshiku shonse isho akaba umuNasiri, Yehova akalamumona ukuti wa mushilo. 9 Lelo nga ca kuti mukupumikisha fye umo afwila mupepi na po ali+ kabili amukumya, akowesha no mushishi wakwe uwaba cishibilo ca kuti muNasiri wa kwa Lesa, afwile ukubeya+ umushishi wakwe pa bushiku ubo akasangululwa. Akabeye pa bushiku bwalenga 7. 10 Kabili pa bushiku bwalenga 8 akatwale utwana twa fipeele tubili nangu utwana twa nkunda tubili kuli shimapepo pa mwinshi we tenti lya kukumaninamo na Lesa. 11 Shimapepo akapekanye utu utuni, kamo kakabe umutuulo wa pa lubembu,+ kambi kakabe umutuulo wa koca. Kabili akamufutileko umulandu wa kukumya icitumbi.* Lyena umuNasiri akasangulule umutwe wakwe. 12 Kabili alingile ukutendeka cipya cipya inshiku isho aipeele ukuba umuNasiri wa kwa Yehova, kabili akatwale akana ka mpaanga aka mwaka umo pa kuti kakabe umutuulo wa pa mulandu. Lelo inshiku isho ali umuNasiri tashakapendwe pantu alikoweseshe ubuNasiri bwakwe.

13 “‘Nomba ili e funde ilyo umuNasiri alingile ukulakonka: Nga apwisha inshiku sha buNasiri bwakwe,+ alingile ukuya pa mwinshi we tenti lya kukumaninamo. 14 Pa mwinshi we tenti lya kukumaninamo akapeele Yehova uyu mutuulo: akana ka mpaanga aka mwaka umo akabula akalema pa kuti kakabe umutuulo wa koca,+ akana ka mpaanga akakota aka mwaka umo akabula akalema pa kuti kakabe umutuulo wa pa lubembu,+ impaanga iilume iyabula akalema iya kuba ilambo lya mutende,+ 15 umuseke wa mikate iishatutumuka iya buunga bwapeleka ubo basaakanyamo amafuta, imikate iyapaapaatala iishatutumuka iyo basubako amafuta, pamo no mutuulo wa ngano+ e lyo no mutuulo wa mwangashi.+ 16 Shimapepo akapalamike iyi mituulo pa cinso ca kwa Yehova. Akabalilepo ukutuulilako umuNasiri umutuulo wa pa lubembu no mutuulo wa koca. 17 Akatuulile Yehova impaanga iilume iya kuba ilambo lya mutende pamo no museke wa mikate iishatutumuka, kabili shimapepo akatuule umutuulo wa buunga+ no mutuulo wa mwangashi uwa pali ili ilambo.

18 “‘Lyena umuNasiri akabeye umushishi* wakwe+ pa mwinshi we tenti lya kukumaninamo, kabili akabuule umushishi akwete ilyo ali umuNasiri, akaubike na pa mulilo uukaba mwi samba lye lambo lya mutende. 19 Kabili shimapepo akabuule ukuboko kwa mpaanga iilume ukwaipikwa,+ umukate uushatutumuka mu museke, no mukate uwapaapaatala uushatutumuka, kabili akafibike mu minwe ya muNasiri ninshi napwisha ukubeya icishibilo ca buNasiri bwakwe. 20 E lyo shimapepo akafisunshe uku no ku, pa kuti fikabe umutuulo wa kusunsha pa cinso ca kwa Yehova.+ Fikaba fya kwa shimapepo, pamo ne cisao* ca nama ya mutuulo wa kusunsha no kulu ukwa kutuula umusangulo.+ Pa numa umuNasiri kuti anwa umwangashi.

21 “‘Ili e funde ilyo umuNasiri+ uwalapa umulapo alingile ukukonka: Nga alapa kabili nga kuti akwanisha ukutuulila Yehova umutuulo ukulunda pa o umuNasiri afwile ukutuula, lyena afwile ukufikilisha umulapo wakwe pa mulandu ne funde lya buNasiri bwakwe.’”

22 Lyena Yehova aebele Mose ati: 23 “Eba Aarone na bana bakwe abaume auti, ‘Ifi e fyo mulingile ukulapaala+ abena Israele. Mulebeba amuti:

24 “Shi Yehova amupaale+ kabili amucingilile.

25 Shi Yehova alenge icinso cakwe cimubalikile,+ kabili amupaale.

26 Shi Yehova abe ne cikuuku kuli imwe kabili amupeele umutende.”’+

27 Kabili bakalelumbula ishina lyandi pa kupaala abena Israele,+ pa kuti nkabapaale.”+