Impendwa

12 Nomba Miriamu na Aarone batendeke ukulanda ifyabipa pali Mose pa mulandu wa kuti aupile umwanakashi umwina Kushi.+ 2 Balelanda abati: “Bushe Yehova alandila fye muli Mose eka? Bushe talandila na muli ifwe?”+ Kabili Yehova alekutika.+ 3 Nomba Mose ali uwafuukisha*+ pa bantu bonse abali pano isonde.

4 Ilyo line fye Yehova aebele Mose na Aarone na Miriamu ati: “Imwe batatu, kabiyeni kwi tenti lya kukumaninamo.” E ico bonse batatu balile. 5 Lyena Yehova aikiile mu ntumba ye kumbi+ no kwiminina pa mwinshi we tenti lya kukumaninamo kabili aitile Aarone na Miriamu. Bonse babili balile. 6 E lyo abeba ati: “Umfweni ifyo nalamweba. Pali imwe nga pali kasesema wa kwa Yehova, nga nalilenga anjishiba mu cimonwa,+ kabili nga nandila nankwe mu filoto.+ 7 Lelo ifi te fyo ncita ku mubomfi wandi Mose! E o naseekesha ing’anda yandi yonse.*+ 8 Nanda nankwe pa kanwa nkati,+ nshilandila nankwe mu milumbe; kabili alamona ne fyo Yehova amoneka. Nomba cinshi mushatiinine ukulanda ifyabipa pa mubomfi wandi Mose?”

9 E ico Yehova alikalipe nga nshi pa fyo bacitile, kabili alifuminepo. 10 Lyena ikumbi lyalifumine pa muulu we tenti lya kukumaninamo na Lesa, kabili ilyo line fye Miriamu alilwele ifibashi, abuuta na tuutu.+ Ilyo Aarone aloleshe Miriamu, amwene ukuti ali ne fibashi.+ 11 Ilyo line Aarone aebele Mose ati: “Napaapaata mwe shikulu! Mwileka tukandilwe pali ulu lubembu ulo tucitile. Ico tucitile buwelewele. 12 Mwileka Miriamu abe ngo mwana uwafyelwe uwafwa, uo umubili wakwe waliiwa lubali!” 13 E lyo Mose atendeke ukupaapaata Yehova ati: “Mwe Lesa, shi mundapeni!”+

14 Yehova aebele Mose ati: “Bushe nga ca kuti wishi alimufwishile amate pa menso, nga taseebene pa nshiku 7? Lekeni abe eka kunse ya nkambi pa nshiku 7,+ e lyo pa numa mukamubweshe.” 15 E ico Miriamu bamusungile eka kunse ya nkambi pa nshiku 7,+ kabili abantu tabafumine apo bapangile inkambi mpaka Miriamu bamubwesha. 16 Lyena abantu balifumine mu Haserote+ kabili baileikala mu mpanga ya Parani.+