Ibuuku lya Kubalilapo Ilya Imilandu

5 Aba e bana baume ba kwa Rubene+ ibeli lya kwa Israele. Rubene e wali ibeli, lelo pa mulandu wa kuti alikoweshe* ubusanshi bwa kwa wishi,+ insambu sha kuba ibeli bapeele abana ba kwa Yosefe+ umwana wa kwa Israele. E ico tabamulembele ukuti ali libeli ilyo balelemba intuntuko sha fikolwe fyakwe. 2 Nangu ca kuti Yuda+ alicilile bamunyina kabili muli ena e mwafumine uwali no kuba intungulushi,+ insambu sha bubeli shena shali sha kwa Yosefe. 3 Abana ba kwa Rubene ibeli lya kwa Israele bali ni Hanoke, Palu, Hesrone na Karmi.+ 4 Yoele afyele Shemaya, Shemaya afyele Goge, Goge afyele Shimei, 5 Shimei afyele Mika, Mika afyele Reaya, Reaya afyele Baali, 6 Baali afyele Beera, uo Tilgati-pilnesere imfumu+ ya ku Asiria asendele pa kuti ayeba nkole. Beera ali ni ntungulushi ya bena Rubene. 7 Bamunyina mu ndupwa shabo abo balembele ukulingana ne ntuntuko shabo bali ni Yeiele, uwali intungulushi, Sekaria, 8 e lyo na Bela umwana wa kwa Asasi umwana wa kwa Shema umwana wa kwa Yoele. Bonse aba mu lupwa lwa kwa Bela baleikala mu musumba wa Aroere+ ukuyafika fye na ku Nebo na ku Baali-meone.+ 9 Baikele ku kabanga ukuyafika fye no kwatendekela amatololo ku Mumana wa Yufrate,+ pantu ifitekwa fyabo fyalifulile mu citungu ca Gileadi.+ 10 Ilyo Shauli aleteka, balwile na bena Hagari kabili balibacimfishe. E ico e batampile ukwikala mu matenti yabo mu citungu conse ica ku kabanga ka Gileadi.

11 Nomba abatuntwike muli Gadi baleikala mupepi nabo mu calo ca Bashani ukuyafika fye na ku Saleka.+ 12 Mu Bashani, Yoele e wali intungulushi, Shafamu e wali inkonkani yakwe. Yanai na Shafati nabo bali ni ntungulushi. 13 Kabili bamunyinabo aba mu ng’anda ya bashibo bali ni Mikaele, Meshulamu, Sheba, Yorai, Yakani, Sia na Ebere. Bonse pamo bali 7. 14 Aba e bali abana ba kwa Abihaile umwana wa kwa Huri. Huri ali mwana wa kwa Yoroa, Yoroa ali mwana wa kwa Gileadi, Gileadi ali mwana wa kwa Mikaele, Mikaele ali mwana wa kwa Yeshishai, Yeshishai ali mwana wa kwa Yaado, Yaado ali mwana wa kwa Busi. 15 Ahi umwana wa kwa Abdiele, umwana wa kwa Guni, e wali umukalamba wa ba mu lupwa lwabo. 16 Baleikala mu Gileadi,+ mu Bashani+ na mu misumba ya iko iinono e lyo na mu mpanga sha mulemfwe shonse isha Sharone ukuyafika fye no ko shapelelele. 17 Bonse babalembele ukulingana ne ntuntuko shabo ilyo Yotamu imfumu+ ya Yuda aleteka na lintu Yeroboamu* imfumu+ ya Israele aleteka.

18 Abena Rubene, abena Gadi na hafu ya mukowa wa kwa Manase bakwete abashilika ba maka 44,760. Aba bonse balishibe ifya kubomfya inkwela ne mpanga sha kulwilako na mata kabili balisambilile ifya kulwa inkondo. 19 Balwile inkondo na bena Hagari,+ abena Yeturi, abena Nafishi+ na bena Nodabu. 20 Kabili pa mulandu wa kuti balicetekele Lesa, ilyo balelwa na bena Hagari na bonse abo bali nabo, balilombele Lesa ukuti abafwe kabili alibafwile ica kuti balicimfishe abena Hagari na bonse abo bali nabo.+ 21 Balisendele ifitekwa fyabo, e kutila ingamila 50,000, impaanga 250,000 ne mpunda 2,000, kabili balisendele na bantu* 100,000. 22 Abengi balifwile pantu Lesa wa cine e wabalwilileko inkondo.+ E ico batampile ukwikala mu ncende umo abo baipeye baleikala. Umu mwine e mo baleikala mpaka babasenda mu kuyaba bankole.+

23 Abatuntwike muli hafu ya mukowa wa kwa Manase+ baleikala mu calo icatendekeele ku Bashani ukuyafika ku Baali-hermone na Seniri na ku Lupili lwa Hermone,+ kabili bali abengi sana. 24 Aba e bali intungulushi sha ba mu mayanda ya bashibo: Efere, Ishi, Eliele, Asriele, Yeremia, Hodabiya na Yaadiele. Bonse aba bali bashilika ba maka, abaume balulumbi, kabili e bali intungulushi sha ba mu mayanda ya bashibo. 25 Nomba balibembukiile Lesa wa fikolwe fyabo kabili balepepa* balesa ba bantu ba mu calo umo baleikala,+ abo Lesa abalofeesheko. 26 E ico Lesa wa kwa Israele alengele Puli imfumu ya Asiria+ (e kutila Tilgati-pilnesere imfumu+ ya Asiria) asenda abena Rubene, abena Gadi na ba muli hafu ya mukowa wa kwa Manase pa kuti bayeba bankole ku Hala, ku Habore, ku Hara na ku mumana wa Gosani,+ kabili baba kulya kwine ukufika na lelo.