Impendwa

4 Nomba Yehova aebele Mose na Aarone ati: 2 “Mufwile ukupenda abana baume ba kwa Kohati+ aba mu bana baume ba kwa Lebi, ukulingana ne ndupwa shabo na mayanda ya bashibo, 3 ukutula pa wa myaka 30+ ukufika na ku wa myaka 50.+ Mufwile ukupenda bonse abo bapeela umulimo pe tenti lya kukumaninamo.+

4 “Iyi e milimo iyo abana baume ba kwa Kohati bakulabomba pe tenti lya kukumaninamo.+ Milimo ya mushilo nga nshi: 5 Pa nshita ya kukuuka, Aarone na bana bakwe abaume bakaleingilamo, kabili bakalekobola insalu ya kucingilako+ no kuifimba pa cipao+ ca Cipangano. 6 Bakalefimba impapa sha basilu pa muulu wa ciko, bakalefimbapo ne nsalu ya bluu kabili bakalebikako ne mitembo+ ya ciko.

7 “Kabili bakalefimba insalu ya bluu pe tebulo lya mukate wa kutuula,+ kabili bakalebikapo imbale, amakapu, imbale shafonka ne mitondo umwa kubika umutuulo wa mwangashi.+ Umukate wa kutuula lyonse+ ukalebapo cila nshita. 8 Bakalefimbapo insalu yakashika ce, bakalefimbapo ne mpapa ya kwa silu kabili bakalebikako imitembo+ ya liko. 9 Lyena bakalebuula insalu ya bluu no kuifimba pa ca kutekapo inyali+ ne nyali sha ciko,+ utwa kumanikilako twa ciko, ifya kuponenamo ifilefuma ku ciku icilepya+ na fyonse ifyo babikamo amafuta ayo babomfya pa kuti inyali shiletwalilila ukwaka. 10 Bakalecipomba mu mpapa ya kwa silu kumo ne fipe fya ciko fyonse kabili bakalecibika pa cimuti ca kucisendelapo. 11 Kabili bakalefimba insalu ya bluu pa ciipailo ca golde,+ bakalefimbapo ne mpapa ya kwa silu kabili bakalebikako imitembo+ ya ciko. 12 Lyena bakalebuula ifipe fyonse+ ifyo bakalabomfya lyonse ilyo bakalabomba pa cifulo ca mushilo, bakalefibika mu nsalu ya bluu kabili bakalefimbapo impapa ya kwa silu e lyo bakalefibika pa cimuti ca kusendelapo.

13 “Bakalefumya imito* mu ciipailo+ kabili bakalecifimba insalu iya bushishi bwakashikila. 14 Bakalebikapo ifipe fya ciko fyonse ifyo babomfya ilyo balebombela pa ciipailo: ifya kubikamo umulilo, ifya kutunkwilako, amafosholo ne mbale shafonka, ifipe fyonse ifya ciipailo;+ kabili bakalefimbapo impapa ya kwa silu kabili bakalebikako imitembo+ ya ciko.

15 “Pa kukuuka pa nkambi, Aarone na bana bakwe abaume bafwile ukulapwisha ukufimba pa fipe fya pa cifulo ca mushilo.+ Lyena abana baume ba kwa Kohati bakaleisa mu kufisenda,+ lelo tabalingile ukwikata ifipe fya pa cifulo ca mushilo pantu kuti bafwa.+ Uyu e mulimo wa bana baume ba kwa Kohati uwa pe tenti lya kukumaninamo.

16 “Umulimo wa kwa Eleasari+ mwana Aarone shimapepo, wa kwangalila ababombela ku mafuta ya mu nyali,+ ku bubani bwanunkila,+ ku mutuulo wa ngano uo batuula lyonse e lyo na ku mafuta ya kusubilako.+ E ufwile ukula-angalila itenti lya mushilo ne fipe fya liko fyonse kumo ne cifulo ca mushilo ne fipe fya ciko fyonse.”

17 Yehova akonkenyepo ukweba Mose na Aarone ati: 18 “Mwikaleka abatuntuka muli Kohati+ uwa mu mukowa wa kwa Lebi bakalobe. 19 Lelo mukalebacitila ifi pa kuti bekafwa ilyo bashilapalama ku fya mushilo nga nshi.+ Aarone na bana bakwe abaume bakaleingila mwi tenti lya mushilo, kabili cila muntu bakalemupeela umulimo ne fipe ifyo afwile ukusenda. 20 Tabafwile ukwingilamo no kumona ifipe fya mushilo nangu fye panono pantu kuti bafwa.”+

21 Lyena Yehova aebele Mose ati: 22 “Ufwile ukupenda abana baume ba kwa Gershone+ ukulingana na mayanda ya bashibo ne ndupwa shabo. 23 Ulembe abaume bonse ababa mwi bumba bapeela umulimo wa pe tenti lya kukumaninamo, ukutula pa wa myaka 30 ukufika ku wa myaka 50. 24 Uyu e mulimo aba mu ndupwa sha bena Gershone bakulabomba kabili ifi e fyo bakulasenda:+ 25 Bakulasenda insalu sha pe tenti lya mushilo,+ e kutila itenti lya kukumaninamo, ica kufimbako ca liko ne mpapa ya kwa silu iya kufimba pa muulu wa liko,+ ica kucingilako pa mwinshi we tenti lya kukumaninamo,+ 26 insalu sha kucingilako ulubansa,+ ica kucinga pa mpongolo ya lubansa+ ulwashinguluka itenti lya mushilo ne ciipailo, imyando ya shiko ne fipe fya shiko fyonse, na fyonse ifyo babomfya pa kubomba pe tenti lya mushilo. Uyu e mulimo bakalabomba. 27 Aarone na bana bakwe abaume e bafwile ukula-angalila imilimo yonse iya bana ba kwa Gershone+ e lyo ne fipe bakalasenda. Ukabapeele uyu umulimo. 28 Uyu e mulimo indupwa sha bena Gershone bakulabomba pe tenti lya kukumaninamo,+ kabili Itamari+ umwana mwaume wa kwa Aarone shimapepo e ukalabatungulula pa kubomba uyu mulimo.

29 “Nomba abana baume ba kwa Merari+ ukabalembe ukulingana ne ndupwa shabo na mayanda ya bashibo. 30 Ukalembe abaume bonse ababa mwi bumba bapeela umulimo wa pe tenti lya kukumaninamo, ukutula pa wa myaka 30 ukufika ku wa myaka 50. 31 Ifi e fyo bakalasenda,+ ukulingana ne milimo yabo iya pe tenti lya kukumaninamo: amafulemu+ ye tenti lya mushilo, imango sha liko,+ inceshi sha liko+ na mashinte ya liko,+ 32 ifya kukobekako+ insalu ukushinguluka ulubansa, amashinte ya fiko,+ impoopo sha fiko+ ne myando ya fiko pamo na fyonse ifyo babomfya pa kubomba uyu mulimo. Cila muntu ukamwebe ico afwile ukulasenda. 33 Uyu e mulimo indupwa sha bena Merari+ bakulabomba pe tenti lya kukumaninamo, kabili Itamari umwana mwaume wa kwa Aarone shimapepo+ e ukalabatungulula pa kubomba uyu mulimo.”

34 Mose na Aarone ne ntungulushi+ sha lukuta balembele abana baume ba bena Kohati+ ukulingana ne ndupwa shabo na mayanda ya bashibo, 35 bonse ababa mwi bumba bapeela umulimo wa pe tenti lya kukumaninamo, ukutula pa wa myaka 30 ukufika ku wa myaka 50.+ 36 Bonse abo balembele ukulingana ne ndupwa shabo bali 2,750.+ 37 Aba e bo balembele mu ndupwa sha bena Kohati, bonse abalebombela pe tenti lya kukumaninamo na Lesa. Mose na Aarone e babalembele ukulingana ne fyo Yehova aebele Mose.+

38 Abana baume ba kwa Gershone+ babalembele ukulingana ne ndupwa shabo na mayanda ya bashibo, 39 balembele bonse ababa mwi bumba bapeela umulimo wa pe tenti lya kukumaninamo, ukutula pa wa myaka 30 ukufika ku wa myaka 50. 40 Bonse abo balembele ukulingana ne ndupwa shabo na mayanda ya bashibo, bali 2,630.+ 41 Aba e bo balembele mu ndupwa sha bena Gershone, bonse abalebombela pe tenti lya kukumaninamo na Lesa. Mose na Aarone e babalembele ukulingana ne fyo Yehova aebele Mose.+

42 Abana baume ba kwa Merari babalembele ukulingana ne ndupwa shabo na mayanda ya bashibo, 43 balembele bonse ababa mwi bumba bapeela umulimo wa pe tenti lya kukumaninamo,+ ukutula pa wa myaka 30 ukufika ku wa myaka 50. 44 Bonse abo balembele ukulingana ne ndupwa shabo bali 3,200.+ 45 Aba e bo balembele mu ndupwa sha bena Merari, abo Mose na Aarone balembele ukulingana ne fyo Yehova aebele Mose.+

46 Mose na Aarone ne ntungulushi sha bena Israele balembele abena Lebi bonse ukulingana ne ndupwa shabo na mayanda ya bashibo; 47 abo balembele bali ne myaka ukutendekela pali 30 ukufika pali 50, kabili bonse babapeele umulimo wa kubombela pe tenti lya kukumaninamo+ na Lesa, no wa kusenda ifipe fya liko. 48 Bonse abo balembele bali 8,580.+ 49 Mose abalembele ukulingana ne fyo Yehova amwebele, cila muntu alimupeele umulimo ne fyo alingile ukulasenda; Mose abalembele ukulingana ne fyo Yehova amwebele.