Ibuuku lya Bubili Ilya kwa Samwele

12 E ico Yehova atumine Natani+ kuli Davidi. Lyena aingile umwali Davidi+ e lyo atendeka ukumweba ati: “Kwali abantu babili abali mu musumba umo, umo ali mukankaala e lyo umbi ali mupiina. 2 Umukankaala alikwete impaanga ne ng’ombe ishingi nga nshi;+ 3 lelo umupiina akwete fye akana ka mpaanga akakota kamo ako ashitile.+ Alekasakamana, kabili kalekulila pamo nankwe na bana bakwe. Kalelya pa twa kulya utunono uto akwete, kalenwa muli kapu yakwe kabili kalesendama pa cifuba cakwe. Kaishileba fye ngo mwana wakwe umwanakashi. 4 Pa numa uyu umukankaala alipokelele umweni, nomba pa mpaanga shakwe ne ng’ombe shakwe talefwaya ukubuulapo iya kuti apekanishishe umweni wakwe. Lelo ailebuula akana ka mpaanga akakota aka mupiina e ko apekanishisha umweni wakwe.”+

5 Ilyo Davidi bamushimikile ifi, alikalipe sana pa fyo uyo muntu acitile, kabili aebele Natani ati: “Na pali Yehova,+ umuntu uwacitile ifyo afwile ukufwa! 6 Kabili afwile ukufuta utwana twa mpaanga 4 pali ako akana ka mpaanga abuulile+ pantu talangulukiileko umupiina.”

7 Lyena Natani aebele Davidi ati: “Uyo muntu nimwe! Yehova Lesa wa kwa Israele alanda ati, ‘Ine nakusubile ukuba imfumu ya bena Israele,+ kabili nakupuswishe kuli Shauli.+ 8 Nakupeele ing’anda ya kwa sokulu,+ abakashi ba kwa sokulu,+ kabili nakupeele ing’anda ya kwa Israele ne ya kwa Yuda.+ Kabili nalilundilepo na fimbi kwati nalimo ifyo nakupeele fyalicepele.+ 9 Nomba cinshi wasuulile Yehova* kabili cinshi wacitiile ifyo akaanya? Waipeye Uria umwina Hiti ku lupanga!+ Lyena wasendele umukashi wakwe pa kuti abe umukashi obe+ pa numa ya kumwipaisha ku lupanga lwa bena Amone.+ 10 E ico aba mu ng’anda yobe bakalafwa ku lupanga+ pa mulandu wa kuti walinsuulile pantu wasendele umukashi wa kwa Uria umwina Hiti aba umukashi obe.’ 11 Yehova atila: ‘Mona nkalenga ukakwate amacushi ayakafuma mu lupwa lobe mwine;+ kabili nkasenda abakashi bobe nkabapeele ku mwaume* umbi ninshi ulemonako,+ kabili akalaala nabo pa lwalaala.+ 12 Nangu ca kuti iwe wacitiile ifi mu bumfisolo,+ ine nkacita ifi pa menso ya bena Israele bonse kabili pa lwalaala.’”*

13 Lyena Davidi aebele Natani ati: “Nimembukila Yehova.”+ Natani na o aebele Davidi ati: “Yehova na o amubelela uluse*+ pa lubembu lwenu. Tamwafwe.+ 14 Nomba apo mwalisaalula Yehova pali ifi mwacita, umwana wenu uufyelwe, nangu cibe shani ali no kufwa.”

15 Lyena Natani aile ku mwakwe.

Kabili Yehova alwalike umwana uo umukashi wa kwa Uria afyalile Davidi. 16 Davidi alipaapaatileko umwana kuli Lesa wa cine, kabili alilekele ukulya. Cila cungulo Davidi aleingila mu muputule wakwe kabili alelambalala panshi ubushiku bonse.+ 17 E ico abakalamba ba mu ng’anda yakwe baleiminina apo alelambalala pa kuti bamwimye, lelo alekaana kabili talelya nabo. 18 Pa bushiku bwalenga 7 umwana alifwile, lelo ababomfi ba kwa Davidi balitiinine ukumweba ukuti umwana nafwa. Balandile abati: “Ilyo umwana ali no mweo twalilandile nankwe, lelo taumfwile ifyo twamwebele. Nomba kuti twamweba shani ukuti umwana nafwa? Nalimo kuti acita ifyabipa.”

19 Ilyo Davidi amwene ababomfi bakwe baletepeleshanya, alilwike ukuti umwana nafwa. E ico aipwishe ababomfi bakwe ati: “Bushe umwana nafwa?” Nabo bamwaswike abati: “Nafwa.” 20 E ico Davidi alimine panshi. Alisambile, alisubile amafuta,+ alifwele ifya kufwala fimbi e lyo aya ku ng’anda+ ya kwa Yehova mu kupepa. Pa numa abwelele ku ng’anda yakwe* kabili aebele aba kuti bamuletele ifya kulya. Ilyo bamuleteele aliliile. 21 Ababomfi bakwe bamwipwishe abati: “Cinshi mwacitila ifi? Ilyo umwana aali uwa mweo mwalilekele ukulya kabili mwaleloosha fye; nomba ilyo umwana acifwa mwacima mwalya ne fya kulya.” 22 Abebele ati: “Ilyo umwana aali uwa mweo nalilekele ukulya+ kabili naleloosha fye, pantu naleti, ‘Nalimo Yehova kuti ambelelako uluse, aleka no mwana wandi atwalilila ukuba no mweo.’+ 23 Nomba apo nafwa, cinshi ndelekela ukulya? Bushe kuti namubwesha?+ Ine nkaya ku nshiishi uko ali,+ lelo ena takabwele kuli ine.”+

24 Lyena Davidi asansamwishe Bati-sheba+ umukashi wakwe. Kabili aile kuli ena alaala nankwe. Mu kupita kwa nshita, afyele umwana umwaume, bamwinike no kuti Solomone.*+ Yehova alimutemenwe,+ 25 kabili atumine amashiwi ukupitila muli kasesema Natani+ aya kuti benike umwana ukuti Yedidia,* pa mulandu wa kwa Yehova.

26 Yoabu akonkenyepo ukulwa na baleikala mu musumba wa Raba+ uwa bena Amone+ kabili alipokele umusumba wa bufumu.+ 27 E ico Yoabu atumine abakuyaeba Davidi ukuti: “Nindwa na bekala mu musumba wa Raba,+ kabili nimpoka umusumba wa menshi.* 28 Nomba longanikeni abashilika abashalapo muyeshinga umusumba no ku-upoka. Nga tamwileupoka, e lyo nayaupoka ninshi bakatila nine naupokele.”*

29 E ico Davidi alonganike abashilika bonse baya na ku Raba kabili bailelwisha umusumba wa Raba baupoka no ku-upoka. 30 Lyena afuulile Malkamu* icisote ca bufumu icafinine amakilogramu 34 aya golde,* icakwete amabwe aya mutengo sana, kabili bafwikile Davidi. Alisendele ne fintu ifingi nga nshi ifyo apokolwele+ mu musumba.+ 31 Kabili asendele abantu abalimo e lyo abapeela umulimo wa kuputula amabwe, uwa kupanga ifyela ifyatwa na masembe ya cela no wa kutama injelwa. E fyo acitile aba mu misumba yonse iya bena Amone. Lyena Davidi na bashilika bonse babweleele ku Yerusalemu.