Impendwa

9 Yehova alandile na Mose mu matololo ya Sinai mu mweshi wa ntanshi+ mu mwaka walenga bubili ukutula apo bafumiine mu calo ca Egupti, amwebele ati: 2 “Abena Israele balingile ukupekanya ilambo lya Cakucilila+ pa nshita iyo cilingile ukubelapo.+ 3 Pa bushiku bwalenga 14 ubwa uyu mweshi ilyo fye akasuba kawa,* mukalepekanya Icakucilila pa nshita iyo cilingile ukubelapo. Mukalecipekanya ukulingana na mafunde ayo mulingile ukukonka kabili ukulingana na fyonse ifyo mufwile ukukonka pa kucipekanya.”+

4 E ico Mose aebele abena Israele ukuti bapekanye ilambo lya Cakucilila. 5 Lyena bapekenye ilambo lya Cakucilila mu matololo ya Sinai mu mweshi wa ntanshi, pa bushiku bwalenga 14 ubwa uyu mweshi ilyo fye akasuba kawile.* Abena Israele balicitile fyonse ifyo Yehova aebele Mose.

6 Nomba kwali abaume abali abakowela pa mulandu wa kuti balikete icitumbi,*+ ica kuti balifililwe no kupekanya ilambo lya Cakucilila pali ubu bushiku. E ico baile kuli Mose na Aarone pali ubu bushiku+ 7 kabili bamwebele abati: “Natukowela pantu natwikata icitumbi.* Cinshi calalenga twiletela Yehova umutuulo pa nshita iyo tulingile uku-uletelapo pamo na bena Israele banensu?”+ 8 Lyena Mose abebele ati: “Loleleni apo pene, ntale ng’umfwe ifyo Yehova alanjeba pali imwe.”+

9 E lyo Yehova aebele Mose ati: 10 “Eba abena Israele auti, ‘Nga ca kuti umo pali imwe nelyo uukatuntuka muli imwe akowela pa mulandu wa kwikata icitumbi*+ nelyo nga ali pa lwendo ulutali, na o wine afwile ukupekanishisha Yehova ilambo lya Cakucilila. 11 Bakalecipekanya mu mweshi wa bubili,+ pa bushiku bwalenga 14 ilyo fye akasuba kawa.* Bafwile ukuliila ilambo pamo ne mikate ishatutumuka no musalu uwalula.+ 12 Bekashapo nangu fimo ifya kuti fikafike ulucelo,+ kabili bekatoba ifupa lye lambo nangu limo.+ Bafwile ukupekanya ilambo ukulingana na mafunde ayo balingile ukukonka pa kupekanya Icakucilila. 13 Lelo nga ca kuti umuntu ali uwasanguluka nelyo nga tali pa lwendo kabili ku mufulo fye tapekenye Icakucilila, uyo muntu* afwile ukwipaiwa,+ pantu taleteele Yehova umutuulo pa nshita iyo alingile uku-uletelapo. Uyo muntu akafwila pa lubembu lwakwe.

14 “‘Kabili nga ca kuti kwaliba umulebeshi uo mwikala nankwe, na o wine afwile ukupekanishisha Yehova ilambo lya Cakucilila.+ Alingile ukupekanya ukulingana na mafunde ya kukonka pa kupekanya Icakucilila kabili ukulingana na fyonse ifyo mufwile ukukonka pa kucipekanya.+ Nampo nga mulebeshi nelyo nga mwina Israele, bonse balingile ukukonka ifunde limo line.’”+

15 Nomba pa bushiku baimike itenti lya mushilo,+ ikumbi lyali pa muulu we tenti lya mushilo umwali icipao ca Cipangano, lelo ubushiku pa muulu we tenti lya mushilo pali icalemoneka ngo mulilo mpaka ulucelo.+ 16 Ifi fine e fyo caleba lyonse: Ikumbi lyalebapo akasuba, kabili icalemoneka ngo mulilo calebapo ubushiku.+ 17 Lyonse ikumbi nga lyafuma pe tenti lya mushilo, ilyo line fye abena Israele baleima baya,+ kabili apo ikumbi lyaiminina, e po abena Israele balepanga inkambi.+ 18 Yehova nga aeba abena Israele ukuti beme, baleima baya, kabili Yehova nga abeba ukuti beminine, balepanga inkambi.+ Ikumbi nga talifumine pa muulu we tenti lya mushilo, tabalefuma pa cifulo apo bapangile inkambi. 19 Ikumbi nga talifumine pa muulu we tenti lya mushilo pa nshiku ishingi, abena Israele baleumfwila Yehova, tabaleima baya.+ 20 Inshita shimo ikumbi lyaleba pa muulu we tenti lya mushilo pa nshiku fye ishinono. Yehova nga tabebele ukuti beme, baleba fye mu nkambi, lelo Yehova nga abeba ukuti beme, baleima baya. 21 Limo ikumbi lyalebapo fye ukutula icungulo ukufika ulucelo, kabili ikumbi nga lyafumapo ulucelo, baleima baya. Nampo nga ikumbi lyafumapo akasuba nelyo ubushiku, baleima baya.+ 22 Nampo nga ikumbi lyaba pa muulu we tenti lya mushilo pa nshiku shibili nelyo pa mweshi umo nangu ukucilapo, abena Israele baleba fye mu nkambi, lelo nga lyafumapo baleima baya. 23 Yehova nga abeba ukuti beima, baleba fye mu nkambi, kabili Yehova nga abeba ukuti beme, baleima baya. Baleumfwila Yehova kabili balekonka ifyo Yehova alebeba ukupitila muli Mose.