Ibuuku lya Kubalilapo Ilya kwa Samwele
12 Lyena Samwele aebele abena Israele bonse ati: “Moneni, nincita fyonse ifyo mwanjebele, kabili nalimusontela imfumu iya kuti ilemuteka.+ 2 Nomba iyi e mfumu iikalamutungulula!+ Ine ninkota, kabili ndi ne mfwi, e lyo abana bandi muli nabo,+ kabili nalimutungulula ukutula ku bwaice bwandi ukufika na lelo.+ 3 Ndi pano. Nshinineni pa menso ya kwa Yehova na pa menso ya wasubwa wakwe.+ Nani napokapo ing’ombe kabili nani napokapo impunda?+ Nelyo nani nafyengapo nangu nani natitikishapo?+ Ni kuli nani napokapo amafisakanwa pa kuti nipingula bwino? Nga nalicitapo ifi, ndemubwesesha.”+ 4 E lyo batile: “Tamwatala amutufyengapo, tamwatala amututitikishapo, kabili tamwatalapokapo amafisakanwa ku muntu.” 5 E ico abebele ati: “Yehova no wasubwa wakwe nabomfwa buno bushiku ukuti tamusangile nangu cimo ica kumpeelelapo umulandu.”* E lyo nabo batile: “Ca cine nabomfwa.”
6 E ico Samwele aebele abantu ati: “Yehova uwasalile Mose na Aarone pa kuti bafumye ifikolwe fyenu mu calo ca Egupti+ naumfwa. 7 Nomba palameni pa kuti imupingule pa cinso ca kwa Yehova pa fyalungama fyonse ifyo Yehova amucitila e lyo ne fyo acitiile ifikolwe fyenu.
8 “Yakobo akuukile ku Egupti.+ Pa numa abali ifikolwe fyenu batendeke ukulilila kuli Yehova pa kuti abafwe.+ Kabili ilyo balilile fye kuli Yehova, atumine Mose na Aarone pa kuti babatungulule pa kufuma mu Egupti. Lyena Mose+ na Aarone balengele abali ifikolwe fyenu baikala muli cino calo.+ 9 Lelo balilabile Yehova Lesa wabo. E ico alekele*+ Sisera+ umukalamba wa bashilika ba kwa Hasore abacimfya. Alekele na baPelishiti+ e lyo ne mfumu ya Moabu+ nabo babacimfya. Aba bonse balelwa nabo. 10 Kabili batampile ukulilila kuli Yehova pa kuti abafwe+ kabili batile, ‘Natubembuka,+ pantu natupondokela Yehova kabili tulebombela ba Baali+ ne fimpashanya fya kwa Astarte;+ nomba tupokololeni mu minwe ya balwani besu, pa kuti tulemubombela.’ 11 Lyena Yehova atumine Yerubaali,+ Bedani, Yefta+ na Samwele+ kabili alimupokolwele ku balwani benu abamushingulwike, pa kuti mwikale umutende.+ 12 Ilyo mwamwene ukuti Nahashi+ imfumu ya bena Amone amwimina, mwakoselepo fye ukunjeba amuti, ‘Awe, ifwe tulefwaya fye imfumu eyo iletuteka!’+ nangu ca kuti Yehova Lesa e Mfumu yenu.+ 13 Nomba iyi e mfumu iyo mwasala, iyo mwalefwaya. Yehova namusontela imfumu ya kuti ilemuteka.+ 14 Nga mwakulatiina Yehova,+ nga mwakulamubombela,+ nga mwakulakonka ifyo akulamweba,+ nga tamwakulasuula ifyo Yehova akulamweba, kabili nga ca kuti imwe ne mfumu iikalamuteka mwakulapepa Yehova Lesa wenu, ifintu fikalamuwamina. 15 Lelo nga tamwakaleumfwila Yehova kabili nga mukalasuula ifyo Yehova akulamweba, Yehova akamukanda kabili akakanda na bashinwe.+ 16 E ico nomba palameni pa kuti mumone ici cintu icikalamba ico Yehova alacita pa menso yenu. 17 Ino ni nshita ya kusombola ingano. Nalalilila kuli Yehova pa kuti alenge kube ukubulukuta ne mfula; lyena mwalaishiba kabili mwalamona ukuti ifi mwalefwaya ukuti mukwate imfumu+ mwalilufyanya sana kuli Yehova.”
18 Lyena Samwele alilile kuli Yehova, kabili pali bulya bushiku Yehova alengele kube ukubulukuta ne mfula, ica kuti abantu bonse balitiinine sana Yehova na Samwele. 19 Kabili abantu bonse baebele Samwele abati: “Pepeleniko ababomfi benu+ kuli Yehova Lesa wenu. Tatulefwaya ukufwa, pantu pa membu shesu shonse natulundapo no lubembu lwa kuilombela imfumu.”
20 E ico Samwele aebele abantu ati: “Mwitiina. Imwe mwalicita ubu ububi bonse. Lelo mwileka ukukonka Yehova+ kabili mufwile ukulabombela Yehova ne mitima yenu yonse.+ 21 Tamufwile ukuleka ukumukonka no kutampa ukukonka tulesa twa bufi+ utushingamwafwa+ kabili utushingamupokolola, pantu ni tulesa twa fye. 22 Yehova takalekeleshe abantu bakwe+ pa mulandu we shina lyakwe ilikalamba,+ pantu Yehova aitemenwe fye ukumulenga mwaba abantu bakwe.+ 23 Ine nshakaleke ukumupepelako pantu ninshi nabembukila Yehova, kabili nkatwalilila ukumusambilisha ifisuma kabili ifyalungama. 24 Mufwile ukulatiina Yehova,+ kabili mulemubombela ne cishinka ne mitima yenu yonse. Tontonkanyeni pa fikalamba ifyo amucitila.+ 25 Lelo nga mukalacita ifyabipa ku mufulo fye, Lesa akamulofya+ kabili akalofya ne mfumu yenu.”+