Ibuuku lya Bubili Ilya kwa Samwele

19 Kwali abaebele Yoabu abati: “Imfumu ilelila kabili ileloosha Abishalomu.”+ 2 E ico insansa isho abashilika bonse bakwete pa mulandu wa kuti balicimfishe* pali bulya bushiku shasangwike ubulanda, pantu balyumfwile ukuti imfumu yali no bulanda pa mwana wa iko uwafwile. 3 Bulya bushiku abashilika babweleele mu musumba+ mu mutalalila kwati ni filya abantu abaseebene babwela nga bafulumuka inkondo. 4 Imfumu yafimbene ku menso kabili yalelila umusowa ileti: “Mwana wandi Abishalomu! Abishalomu mwana wandi, mwana wandi!”+

5 Lyena Yoabu aingile mu ng’anda umwali imfumu kabili ayebele ati: “Buno bushiku, abashilika benu abamupuswishe,* abapuswishe* abana benu abaume,+ abana benu abanakashi,+ abakashi benu na bakashi benu abanono,+ namubalenga insoni. 6 Mwatemwa abamupata kabili mwapata abamutemwa, pantu lelo mwalanga ukuti abakalamba ba bashilika na bashilika tabacindama, pantu ninjishiba ukuti Abishalomu aba uwa mweo e lyo ifwe bonse atufwa, nga tamuli no bulanda. 7 Nomba imeni, kabili fumeni muyeteka abashilika imitima, pantu ndelapa mwi shina lya kwa Yehova nati, nga tamwafume, ninshi takwabe umushilika uwalashala na imwe ubushiku. Nga caba ifi, ifintu fyalamubipila ukucila ifibi fyonse ifyamucitikilapo ukutula ku bwaice bwenu ukushinta na lelo.” 8 E ico imfumu yalimine yayaikala na pa mpongolo ya musumba, kabili abantu bonse babebele abati: “Nomba imfumu naikala pa mpongolo.” Lyena abantu bonse baishile ku mfumu.

Lelo abena Israele ninshi nabafulumukila cila muntu ku mwakwe.+ 9 Aba mu mikowa yonse iya bena Israele balekansana abati: “Imfumu yalitupokolwele ku balwani besu+ kabili yalitupuswishe ku baPelishiti; nomba yalifulumuka mu calo pa mulandu wa kwa Abishalomu.+ 10 Kabili Abishalomu uo twasubile pa kuti aletuteka,+ nafwa mu nkondo.+ Nomba cinshi mwikalile fye ukwabula ukubwesha imfumu?”

11 Imfumu Davidi yatumine amashiwi kuli Sadoke+ na Abiatari+ bashimapepo aiti: “Landeni na bakalamba ba bena Yuda+ amuti, ‘Amashiwi ayo abena Israele bonse balandile nayafika ku mfumu kuno ku ng’anda ya iko, nomba cinshi mulekokwela ukubwesesha imfumu ku ng’anda ya iko? 12 Imwe nimwe bamunyinane; tuli mulopa umo.* Cinshi mulekokwela ukubwesha imfumu?’ 13 Kabili mufwile ukweba Amasa+ amuti, ‘Bushe tauli lupwa wandi?* E ico Lesa ankande nga nshi nga ca kuti ukutula lelo nshakusonte ukuba umukalamba wa bashilika bandi pa kuti upyane Yoabu.’”+

14 E ico anashishe imitima ya baume bonse abaYuda ica kuti bali fye ngo muntu umo, kabili batumine amashiwi ku mfumu abati: “Bweleni kumo na babomfi benu bonse.”

15 Lyena imfumu yalitampile ukubwela kabili yafikile ku Yordani. AbaYuda baile ku Gilgali+ mu kupokelela imfumu, kabili bali-ishindike mpaka ba-abuka Yordani. 16 Lyena Shimei+ umwana wa kwa Gera umwina Benjamini, uwa ku Bahurimu, alyangufyenye ukuya mu kupokelela Imfumu Davidi pamo na baume abaYuda, 17 kabili ali na baume 1,000 abena Benjamini. Siba+ umubomfi wa mu ng’anda ya kwa Shauli na bana bakwe abaume 15 na babomfi bakwe 20 nabo babutukiile ku Yordani ninshi imfumu tailafika. 18 Ayabwike* pa cabu pa kuti abushe aba mu ng’anda ya mfumu kabili acite fyonse ifyo imfumu yalefwaya. Lelo Shimei umwana wa kwa Gera awile ubukupeme pa ntanshi ya mfumu ilyo yali mu kwabuka Yordani. 19 E lyo aebele imfumu ati: “Mwe shikulu mumbeleleko uluse pa fyo namucitile, kabili mwi-ibukisha ifyo ne mubomfi wenu namulufyenye+ pa bushiku mwe mfumu mwafumine mu Yerusalemu. Mwe mfumu shi mwingacifumya ku mutima, 20 pantu ne mubomfi wenu nalishiba ukuti nalibembuka; e ico pa ba mu ng’anda ya kwa Yosefe bonse nine nabalilapo ukwisa mu kupokelela shikulu imfumu.”

21 Ilyo line fye Abishai+ umwana wa kwa Seruya+ atile: “Bushe tatufwile ukwipaya Shimei, apo asaalwile uo Yehova asuba?”+ 22 Lelo Davidi atile: “Bushe ili ilyashi bamwana Seruya+ nalimukuma pa kuti mufwaye ukucita ifyo nshimwebele? Bushe tufwile ukwipaya umuntu mu Israele buno bushiku? Bushe nshili mfumu ya bena Israele na kabili?” 23 Lyena imfumu yaebele Shimei aiti: “Tawafwe.” Kabili imfumu yalilapile kuli ena.+

24 Mefiboshete+ umwishikulu wa kwa Shauli na o alishile mu kupokelela imfumu. Tatalile asambapo ku makasa,* tabeyelepo umwefu kabili tatalile awashapo ifya kufwala fyakwe ukutula apo imfumu yailile ukufika ilyo yabwelele umutende. 25 Ilyo afikile* ku Yerusalemu mu kupokelela imfumu, imfumu yamwipwishe aiti: “Cinshi ushaishile na ine Mefiboshete?” 26 Na o atile: “Ni co umubomfi wandi+ alimbepele. Shikulu mwe mfumu mwalishiba ukuti nalilemana.+ E ico naebele umubomfi wandi nati, ‘Mpekanishisha impunda pa kuti ninepo ndeya ne mfumu.’ 27 Lelo abepeeshe ne mubomfi wenu kuli shikulu imfumu.+ Na lyo line shikulu imfumu aba nga malaika wa kwa Lesa wa cine, kanshi citeni ico mulemona ukuti e ciweme. 28 Shikulu imfumu nga apingwile aba mu ng’anda ya kwa tata bonse ukuti bafwe, lelo mwasuminishe ne mubomfi wenu ukuti ndelya na imwe pe tebulo limo pamo na bantu bambi.+ E ico finshi fimbi ifyo ningafwaya imfumu yancitila?”

29 Lelo imfumu yamwebele aiti: “Leka ukulanda. Napingula ukuti iwe na Siba mufwile ukwakana impanga.”+ 30 E lyo Mefiboshete aebele imfumu ati: “Lekeni asende fye yonse, pantu shikulu imfumu nabwela umutende ku ng’anda yakwe.”

31 Lyena Barsilai+ umwina Gileadi afumine ku Rogelimu kabili ashindike imfumu ukuyafika ku Yordani. 32 Barsilai ali mukote, ali ne myaka 80, kabili e walepeela imfumu ifya kulya ilyo yaleikala mu Mahanaimu,+ pantu ali ne fyuma ifingi nga nshi. 33 E ico imfumu yaebele Barsilai aiti: “Natwabuke bonse, kabili ukalalya na ine pe tebulo limo mu Yerusalemu.”+ 34 Lelo Barsilai aebele imfumu ati: “Myaka inga nshele nayo iya kuba no mweo pa kuti nje ne mfumu ku Yerusalemu? 35 Ine nimfisha imyaka 80.+ Bushe kuti nailuka icisuma ne cibi? Bushe ne mubomfi wenu kuti nasonda ifya kulya ne fya kunwa? Bushe kuti naumfwa abaume na banakashi nga baleimba?+ E ico cinshi umubomfi wenu engabela icisendo na cimbi ica kwa shikulu imfumu? 36 Ifi fine ne mubomfi wenu namushindika mwe mfumu ukufika ku Yordani, e cilambu candi. Cinshi imfumu ilefwaila ukumpeelela ici icilambu? 37 Shi lekeni umubomfi wenu abwelelemo, kabili lekeni nkafwile mu musumba wandi umwaba inshiishi ya kwa tata na mayo.+ Lelo umubomfi wenu Kimhamu+ uyu. Lekeni e o abuke na imwe shikulu mwe mfumu, kabili kuti mwamucitila ifisuma ifyo mulefwaya.”

38 E ico imfumu yatile: “Kimhamu aleabuka na ine, kabili nakulamucitila ifyo ulemona ukuti fisuma; conse ico wakulafwaya ukuti nkucitile nakulakucitila.” 39 Abantu bonse batampile ukwabuka Yordani, kabili ilyo imfumu ya-abwike, yatomwene Barsilai+ kabili yalimupaalile. Lyena Barsilai abwelelemo ku mwakwe. 40 Ilyo imfumu ya-abukile ku Gilgali,+ Kimhamu ayabukile pamo nayo. Abantu bonse aba mu mukowa wa kwa Yuda na hafu ya bena Israele ba-abwike pamo ne mfumu.+

41 Lyena abaume bonse aba mu Israele baishile ku mfumu kabili bayipwishe abati: “Cinshi bamunyinefwe abaume abaYuda bamufyushishe no kumwabusha Yordani pamo na ba mu ng’anda yenu na baume benu bonse?”+ 42 Abaume bonse abaYuda ba-aswike abaume abena Israele abati: “Ni co imfumu ya mu lupwa lwesu.+ Cinshi mwafulilwa pali ifi tucitile? Bushe pa mfumu twalililapo fimo, nelyo bushe yalitupeelapo fimo?

43 Lelo abaume abena Israele ba-aswike abaume aba Yuda abati: “Ifwe tuli ba mu mikowa 10, kanshi natukwatapo amaka pali Davidi ukumucila. Nomba cinshi mwatusuulila? Bushe te ifwe twalingile ukuba pa ntanshi mu kubwesha imfumu?” Lelo abaume abaYuda balicimfishe abaume abena Israele ilyo balekansana.