Yeremia

24 Lyena Yehova anangile imiseke ibili umwali amakunyu, ili pa ntanshi ye tempele lya kwa Yehova, kabili ninshi Nebukadnesari* imfumu ya ku Babiloni naisenda Yekonia*+ umwana wa kwa Yehoyakimu,+ imfumu ya mu Yuda, ne ntungulushi sha baYuda, na bacenjele mu fya kupangapanga na balefula ifyela.* Yabafumishe mu Yerusalemu, yabatwala ku Babiloni+ uko baileba bankole. 2 Mu museke umo mwali amakunyu ayasuma nga nshi nga makunyu ayabalilapo ukupya; e lyo mu museke umbi mwali amakunyu ayabi icine cine, ica kuti takuli umuntu nangu umo uwingayalya.

3 Lyena Yehova anjipwishe ati: “Finshi ulemona Yeremia?” Na ine namwaswike nati: “Ndemona amakunyu, amakunyu ayasuma, yasuma nga nshi, lelo amakunyu ayabi, yabi icine cine ica kuti takuli umuntu nangu umo uwingayalya.”+

4 E lyo Yehova anjebele ati: 5 “Yehova Lesa wa kwa Israele alanda ati, ‘Bankole abaYuda abo nafumya muli ici cifulo no kubatwala ku calo ca bena Kaldi, baba nga aya makunyu ayasuma, nakulabamona ukuti basuma. 6 Nshakafumye amenso yandi pali bena pa kuti ifintu fikabawamine, kabili nkalenga bakabwelele kuli cino calo.+ Nkabakuula kabili nshakababongolole; nkabalimba kabili nshakabanukule.+ 7 Nkabapeela umutima wa kunjishiba ukuti nine Yehova.+ Bakaba abantu bandi na ine nkaba Lesa wabo,+ pantu bakabwelela kuli ine no mutima wabo onse.+

8 “‘Lelo ifi e fyo Yehova alanda pa makunyu ayabi, ayabi icine cine ica kuti umuntu te kuti ayalye,+ alanda ati: “E fyo nkalamona Imfumu Sidekia+ iya mu Yuda, intungulushi shakwe, abashalapo mu Yerusalemu abali muli cino calo na baya mu kwikala ku calo ca Egupti.+ 9 Abantu ba mu mabufumu yonse bakalatiina nga bamona ubucushi nkabaletela.+ Abantu bakalabasaalula kabili bakalabalandapo nga balelanda pa bantu abacula, bakalabapumya kabili bakalabatiipa+ konse uko nkabasalanganishisha.+ 10 Kabili nkabatumina ulupanga,+ icipowe ne cikuko,*+ mpaka bakalobe mu calo ico nabapeele kabili ico napeele ifikolwe fyabo.”’”