147 Lumbanyeni Jah!
Cisuma ukwimbila Lesa wesu inyimbo sha kumulumbanya;
Caliwama kabili calilinga ukumulumbanya!+
2 Yehova alekuula Yerusalemu;+
Alelonganika abena Israele+ abasalangana.
3 Alondapa ababa no bulanda;
Alabakakila pa filonda fyabo.
4 Alapenda intanda;
Shonse alashiita amashina ya shiko.+
5 Shikulwifwe mukulu kabili alikwatisha amaka;+
Ifyo aishiba te kuti tufipende.+
6 Yehova emya abafuuka,+
Lelo ababifi alabapoosa panshi.
7 Imbileni Yehova inyimbo sha kumutootela;
Imbileni Lesa wesu inyimbo sha kumulumbanya ninshi mulelisha insango,
8 Uulenga amakumbi yafimba imyulu,
Uulenga imfula yalokela pe sonde,+
Uulenga icani camena+ pa mpili.
9 Apeela inama ifya kulya,+
Apeela no twana twa kwa mwankole utulilila ifya kulya.+
10 Tasekelela mu maka ya kwa kabalwe,+
Nangu mu molu ayakosa aya muntu.+
11 Yehova asekelela mu bamutiina,+
Abalolela ukutemwa kwakwe ukushipwa.+
12 Cindika Yehova we Yerusalemu.
Lumbanya Lesa obe we Sione.
13 Alenga imipindo ya mpongolo sha musumba obe yakosa;
Alapaala abana bobe.
14 Alalenga mu calo cobe mwaba umutende;+
Alakupeela ingano ishawamisha.+
15 Aleba isonde ifya kucita;
Ifyo alanda filabutukisha.
16 Alenga imfula ya bungululu bwabuuta yafimba isonde, ica kuti lyalamoneka ilya buuta nga masako ya mpaanga;+
Asalanganya imfula ya bungululu bwabuuta nge mito.+
17 Alenga imfula ya mabwe yaloka kwati tubufungau twa mukate.+
Nani engashipikisha impepo yakwe?+
18 Nga alanda, amenshi makasa yalasunguluka.
Alenga umwela wakwe wapuupa,+ na menshi yalakonkoloka.
19 Abila icebo cakwe kuli Yakobo,
Amafunde yakwe no bupingushi bwakwe kuli Israele.+
20 Tacitapo ifi ku nko shimbi;+
Tashaishiba nangu cimo pa bupingushi bwakwe.
Lumbanyeni Jah!+