Abapingushi

19 Muli shilya nshiku ilyo mu Israele mushali imfumu,+ umwina Lebi umo uwaleikala ukutali sana mu citungu ca mpili ica kwa Efraimu,+ ailesenda umwanakashi ku Betelehemu+ mu calo ca Yuda pa kuti abe kanakashi wakwe. 2 Lelo uyu kanakashi atendeke ukucita ubucende, kabili alishiile umulume wakwe, abwelela na ku ng’anda ya kwa wishi ku Betelehemu mu Yuda. Aikele kulya kwine pa myeshi 4. 3 Lyena umulume wakwe alimukonkele pa kuti ayemunashanasha abwelele ku ng’anda. Aile no mubomfi wakwe ne mpunda ishilume shibili. E ico uyu mwanakashi amwingishe mu ng’anda ya kwa wishi. Ilyo wishi wa mwanakashi amumwene, alitemenwe. 4 E ico shifyala, alimutekele ica kuti aikele nankwe inshiku shitatu; balelya no kunwa, kabili alelaala kulya kwine.

5 Pa bushiku bwalenga 4, ilyo babuukile ulucelo pa kuti beme baleya, wishi wa mwanakashi aebele shifyala ati: “Lyeniko fimo pa kuti mukwate amaka, e lyo mwime muleya.” 6 E ico balikele, kabili bonse babili baliliile no kunwa; e lyo wishi wa mwanakashi aebele shifyala ati: “Mukwai mwiya, laleeni kuno kwine, kabili lekeni umutima wenu usekelele.” 7 Ilyo uyu mwaume aimine pa kuti aleya, shifyala alimupaapeete pa kuti eya, ica kuti alisumine ukulala kulya kwine na kabili.

8 Ilyo abuukile ulucelocelo pa bushiku bwalenga 5 pa kuti aleya, wishi wa mukashana amwebele ati: “Lyeniko fimo pa kuti mukwate amaka.” Baleshingashinga fye mpaka icungulo kasuba, kabili bonse babili batwalilile fye ukulya. 9 Ilyo uyu mwaume aimine pa kuti aleya pamo na kanakashi wakwe no mubomfi wakwe, shifyala amwebele ati: “Moneni akasuba kaya kalewa. Shi laleeni kuno kwine. Akasuba kali mu kuwa. Laleeni fye kuno kwine, kabili lekeni umutima wenu usekelele. Kuti mwaima mailo lucelocelo, mukabwelele ku mwenu.”* 10 Lelo uyu mwaume talefwaya ukuti alaale kulya bulya bushiku, e ico alimine ayafika fye na ku Yebusi, e kutila Yerusalemu.+ Ali na kanakashi wakwe no mubomfi wakwe e lyo ne mpunda ishilume shibili ishakwete ifya kwikalapo.

11 Ilyo bali mupepi na ku Yebusi, ninshi paleya palefiita, umubomfi aebele shikulu wakwe ati: “Bushe te kuti tulaale muli uyu musumba wa bena Yebusi?” 12 Lelo shikulu wakwe amwebele ati: “Tatufwile ukulaala mu musumba wa bantu abashili bena Israele. Twalapitilila mpaka tuyefika ku Gibea.”+ 13 Lyena aebele umubomfi wakwe ati: “Ale natutwalilile ukwenda tuyefika ku musumba wa Gibea nelyo uwa Rama, e ko tuyelaalila.”+ 14 E ico balitwalilile ukwenda, kabili akasuba katampile ukuwa ninshi bali mupepi na ku musumba wa Gibea, uwa bena Benjamini.

15 E ico baliingile mu musumba wa Gibea pa kuti balaale. Ilyo baingile, baileikala mu lubansa lwa musumba, lelo takwali nangu umo uwabasendele ku ng’anda ku mwakwe pa kuti e ko bayelaala.+ 16 Lyena kwali umwaume umukote uwafumine kwi bala cilya cungulo bushiku. Uyu mwaume ali wa ku citungu ca mpili ica kwa Efraimu,+ kabili pali ilya nshita aleikala mu Gibea; lelo abaleikala muli uyu musumba bali bena Benjamini.+ 17 Ilyo ainwine amenso amwene umulendo mu lubansa lwa mu musumba. E ico amwipwishe ati: “Wafuma kwi kabili uleya kwi?” 18 Amwaswike ati: “Tufumine ku Betelehemu mu Yuda kabili tuleya ku ncende iyabela ukutali mu citungu ca mpili ica kwa Efraimu, uko njikala. Naile ku Betelehemu mu Yuda,+ kabili ndeya ku ng’anda ya kwa Yehova,* lelo takuli uunsendele ku ng’anda ku mwakwe. 19 Natukwata ifya kulya fya mpunda shesu,+ kabili natukwata umukate+ no mwangashi uwa kuti ine, umwanakashi no mubomfi wesu tulye. Tapali ico tushikwete.” 20 Nomba umukote amwebele ati: “Natuleya ku ng’anda ku mwandi!* Ndeya kupeela conse ico ushikwete. Lelo wilaala mu lubansa.” 21 E ico amwingishe mu ng’anda kabili apeele ne mpunda ifya kulya. Lyena balisambile amakasa yabo, kabili baliliile no kunwa.

22 Ilyo baleipakisha, abaume bamo ifinangwa fya mu musumba balishingulwike ing’anda kabili balepuma ku ciibi, kabili bale-eba umukote umwine wa ng’anda abati: “Fumya umwaume uwishile mu ng’anda yobe, pa kuti tulaale nankwe.”+ 23 E lyo umwine wa ng’anda afumine alabeba ati: “Iyo bamunyinane, mwicita icabipa. Uyu mwaume mweni mu ng’anda yandi. Mwicita ici cintu ca museebanya. 24 Moneni, pali umwana wandi umukashana nacisungu no mukashi munono uwa uyu mwaume. Lekeni mbafumishe panse ebo mucite icintu ca museebanya nga ca kuti e fyo mulefwaya.+ Lelo tamufwile ukucita icintu ca museebanya kuli uyu mwaume.”

25 Lelo aba baume balikeene. E ico umwina Lebi abuulile kanakashi wakwe+ no kumusunkilisha panse apo baali. Balyulungene nankwe ubushiku bonse mpaka ulucelo. Lyena ilyo ubushiku bwaile buleca e lyo bamulekele aya. 26 Lyena lucelocelo uyu mwanakashi abwelele pa ng’anda ya ulya mukote apali umwaume* wakwe, e lyo awila pa mwinshi wa ng’anda, kabili e po aleele mpaka kwabuuta. 27 Ilyo umwaume wakwe abuukile ulucelo, aisula ne ciibi pa kuti akonkanyepo ulwendo lwakwe, amwene umwanakashi, kanakashi wakwe nalaala pa mwinshi wa ng’anda ninshi natambalika na maboko yakwe pa mwinshi. 28 E ico amwebele ati: “Ima tuleya.” Lelo ta-aswike. Lyena alimwimishe amubika pa mpunda, alaya na ku mwakwe.

29 Ilyo afikile pa ng’anda, abulile umwele wa kwipailako, aputaula na kanakashi wakwe mu fiputulwa 12 e lyo atuma ifi ifiputulwa mu fitungu fyonse ifya mu Israele. 30 Bonse abamwene ifi batile: “Ica musango uyu tacabala acicitikapo, kabili tatwatala atucimonapo ukutula pa bushiku abena Israele bafumine mu Egupti ukufika na lelo. Tontonkanyenipo, lanshanyenipo+ e lyo mutwebe ifya kucita.”