Ibuuku lya Bubili Ilya kwa Samwele

5 Mu kupita kwa nshita aba mu mikowa yonse iya kwa Israele baile kuli Davidi ku Hebrone+ kabili bamwebele abati: “Moneni! Ifwe tuli bamunyinenwe.*+ 2 Kale ilyo Shauli ali imfumu yesu, nimwe mwaletungulula* abashilika abena Israele mu nkondo.+ Kabili Yehova amwebele ati: ‘Niwe ukalacema abantu bandi abena Israele, kabili ukaba intungulushi yabo.’”+ 3 E ico abakalamba bonse aba mu Israele baile ku mfumu ku Hebrone, kabili Imfumu Davidi yapangene nabo icipangano+ mu Hebrone pa cinso ca kwa Yehova. Lyena balisubile Davidi pa kuti abe imfumu ya bena Israele.+

4 Davidi ali ne myaka 30 ilyo atendeke ukuteka, kabili atekele pa myaka 40.+ 5 Atekele aba mu mukowa wa kwa Yuda pa myaka 7 ne myeshi 6 mu Hebrone, kabili atekele abena Israele bonse pamo na ba mu mukowa wa kwa Yuda pa myaka 33 mu Yerusalemu.+ 6 Kabili imfumu na bantu ba iko baile ku Yerusalemu mu kulwa na bena Yebusi+ abaleikala muli cilya calo. Baletumfya Davidi abati: “Tawaingilemo muno! Abapofula na balemana e balekutamfya.” Baletontonkanya ukuti: ‘Davidi takatale engilamo muno.’+ 7 Lelo Davidi apokele umusumba wa Sione, uwali na malinga ayakosa. Uyu nomba Musumba wa kwa Davidi.+ 8 E ico pali bulya bushiku Davidi alandile ati: “Bonse abaleya mu kusansa abena Yebusi, bafwile ukupita mu mufoolo wa menshi, pa kuti bayeipaya abalemana na bapofula abo Davidi* apata!” E co abantu balandila abati: “Abapofula na balemana tabakatale abengila muli ino ing’anda.” 9 Lyena Davidi atampile ukwikala mu musumba wa malinga ayakosa, kabili batendeke ukuwita abati* Umusumba wa kwa Davidi. Kabili Davidi atampiile ukukuula ifibumba ne fikuulwa fimbi pa Milo*+ ukuya fye na mu kati ka musumba.+ 10 E fyo Davidi aile alekwatilako amaka,+ kabili Yehova Lesa wa mabumba ali nankwe.+

11 Hiramu+ imfumu ya Turi atumine inkombe kuli Davidi, amutumiine ne fimuti fya mikedari,+ bakabasa na baishiba ukuputula amabwe ya kukuulila ifibumba, kabili batampile ukukuuliila Davidi ing’anda.*+ 12 Kabili Davidi alishibe ukuti Yehova alimupeele insambu sha kuba imfumu ya bena Israele+ kabili alikoseshe ubufumu+ bwakwe pa mulandu wa bantu bakwe abena Israele.+

13 Ilyo Davidi afumine ku Hebrone aya ku Yerusalemu alyupiilepo abanakashi na bambi e lyo akwatilapo na bakanakashi.+ Kabili alifyalilepo abana abaume na bana abanakashi.+ 14 Abana abo afyalile mu Yerusalemu ni aba: Shamua, Shobabu, Natani,+ Solomone,+ 15 Ibhari, Elishua, Nefege, Yafia, 16 Elishama, Eliada na Elifelete.

17 Ilyo abaPelishiti baumfwile ukuti Davidi balimusubile ukuba imfumu ya bena Israele,+ bonse baile mu kufwaya Davidi.+ Ilyo Davidi aumfwile, ailebelama ku ncende uko ali no kucingililwa.+ 18 Lyena abaPelishiti balishile kabili basalanganine mu Mupokapoka* wa Refaimu.+ 19 Davidi aipwishe Yehova+ ati: “Bushe njelwisha abaPelishiti? Bushe muleyabapeela mu minwe yandi?” E lyo Yehova aebele Davidi ati: “Kabiye, pantu nangu cibe shani nalayapeela abaPelishiti mu minwe yobe.”+ 20 E ico Davidi aile ku Baali-perasimu, kabili kulya kwine e ko abepaile. E lyo alandile ati: “Yehova nancimfishako abalwani.”+ E co ainikile ilya ncende ati Baali-perasimu.+ 21 AbaPelishiti bashile utulubi twabo kulya kwine, kabili Davidi na bantu bakwe balitusendele.

22 Pa numa abaPelishiti balibwelele kabili basalanganine mu Mupokapoka* wa Refaimu.+ 23 Davidi aipwishe Yehova nga kuti ayabalwisha, lelo amwaswike ati: “Pa kuya mu kubalwisha wibalungama. Lelo upitile ku numa yabo, kabili ubasanshile ku ntanshi ya fimpusa fya bakha. 24 Kabili nga waumfwa kwati ni nshindo sha bantu pa muulu wa fimpusa fya bakha, ilyo line ubasanse pantu pali iyo nshita ninshi Yehova nakutangilila pa kuti wipaye abashilika ba baPelishiti.” 25 E ico Davidi acitile filya fine Yehova amwebele, kabili aipeye abaPelishiti+ ukufuma ku Geba+ ukuyafika fye na ku Gesere.+