Impendwa

34 Kabili Yehova akonkenyepo ukweba Mose ati: 2 “Eba abena Israele auti: ‘Ilyo mukengila mu calo ca Kanaani,+ iyi e ikaba imipaka ya calo ca Kanaani conse ico nkamupeela.+

3 “‘Umupaka wa ku kapinda ka ku kulyo ukatendekela ku matololo ya Sini ku lubali lwa Edomu, kabili ku kabanga uyu umupaka ukatendekela ku mpela ya Bemba ya Mucele.*+ 4 Umupaka ukaluka pa kuti ukapite ku kapinda ka ku kulyo aka musebo wa Akrabimu+ kabili ukapita ku Sini, ukayafika ku kapinda ka ku kulyo aka Kadeshe-barnea.+ Lyena ukalola ku Hasari-adari+ no kuyafika ku Asmone. 5 Ku Asmone umupaka ukaluka pa kuti ukalole ku Mupokapoka* wa Egupti, kabili ukayafika kuli Bemba.*+

6 “‘Umupaka wa ku masamba, ukaba ni Bemba Mukalamba* no lulamba. Uyu e ukaba umupaka wa ku masamba.+

7 “‘Nomba uyu e ukaba umupaka wa ku kapinda ka ku kuso: Mukapange umupaka ukutendekela pali Bemba Mukalamba ukuyafika ku Lupili lwa Hore.+ 8 Ukutula pa Lupili lwa Hore mukapange umupaka ukuyafika ku Lebohamati,*+ kabili ukayepwila ku Sedadi.+ 9 Uyu umupaka ukayafika ku Sifrone, kabili ukayapwila ku Hasari-enani.+ Uyu e ukaba umupaka wa ku kapinda ka ku kuso.

10 “‘Lyena mukapange umupaka wa ku kabanga, ukutendekela ku Hasari-enani ukuyafika ku Shefamu. 11 Umupaka ukafuma ku Shefamu ukayefika ku Ribla ku kabanga ka Aini, kabili ukapita ku mpili shabela ku kabanga ka Bemba ya Kinerete.*+ 12 Umupaka ukalole ku Yordani kabili ukayepelela pali Bemba ya Mucele.+ Ici e cikaba icalo cenu ne mipaka ya ciko.’”+

13 E ico Mose aebele abena Israele ati: “Ici e calo ico mukaakana ukupitila mu kupendula pa kuti cikabe icalo cenu,+ nga filya fine Yehova alandile ukuti akapeela imikowa 9 e lyo na hafu ya mukowa wa kwa Manase. 14 Pantu aba mu mukowa wa kwa Rubene ukulingana na mayanda ya bashibo, na ba mu mukowa wa kwa Gadi ukulingana na mayanda ya bashibo, na hafu ya mukowa wa kwa Manase balipoka kale impanga yabo.+ 15 Aba muli iyi imikowa ibili na hafu balipoka kale impanga yabo ku kabanga ka citungu ca Yordani mupepi na Yeriko.”+

16 Kabili Yehova aebele Mose ati: 17 “Aya e mashina ya bakamwakanya icalo pa kuti cikabe icalo cenu: Eleasari+ shimapepo na Yoshua+ umwana wa kwa Nuni. 18 Kabili muli cila mukowa mukasalemo intungulushi iikamwakanya impanga iyo bakamupeela.+ 19 Aya e mashina ya ishi intungulushi: mu mukowa wa kwa Yuda,+ ni Kalebu+ umwana wa kwa Yefune; 20 mu mukowa wa kwa Simeone,+ ni Shemuele umwana wa kwa Amihudi; 21 mu mukowa wa kwa Benjamini,+ ni Elidadi umwana wa kwa Kislone; 22 mu mukowa wa kwa Dani,+ intungulushi mukasala ni Buki umwana wa kwa Yogli; 23 pa bana ba kwa Yosefe,+ aba mu mukowa wa kwa Manase,+ intungulushi mukasala ni Haniele umwana wa kwa Efode; 24 mu mukowa wa kwa Efraimu,+ intungulushi mukasala ni Kemuele umwana wa kwa Shifitani; 25 mu mukowa wa kwa Sebuluni,+ intungulushi mukasala ni Elsafani umwana wa kwa Parnaki; 26 mu mukowa wa kwa Isakari,+ intungulushi mukasala ni Paltiele umwana wa kwa Asani; 27 mu mukowa wa kwa Ashere,+ intungulushi mukasala ni Ahiudi umwana wa kwa Shelomi; 28 mu mukowa wa kwa Naftali,+ intungulushi mukasala ni Pedahele umwana wa kwa Amihudi.” 29 Aba e bo Yehova aebele ukuti bakaakanye abena Israele impanga mu calo ca Kanaani.+