Impendwa

29 “‘Kabili mu mweshi walenga 7, pa bushiku bwa kubalilapo, mukalelongana ukulongana kwa mushilo. Mwikalabomba umulimo nangu umo uwakosa.+ Bukaleba bushiku ubo mulingile ukulalisha ipenga.+ 2 Mukaletuula umutuulo wa koca uwa kuletela Yehova akacena akasuma.* Mukaletuula ing’ombe iilume iyana, impaanga iilume no twana twa mpaanga utulume utuli 7 utwa mwaka umo. Ishi inama shonse shifwile ukuba ishabula akalema. 3 Mukaleshituulila pamo no mutuulo wa ngano uwa buunga bwapeleka ubo basaakanya na mafuta, indupe shitatu pa ng’ombe imo iilume, indupe shibili pa mpaanga iilume, 4 no lupe lumo pa kana ka mpaanga akalume kamo na kamo pali tulya 7, 5 kabili mukaletuula na kana ka mbushi kamo akalume pa kuti kakaleba umutuulo wa pa lubembu uwa kumufutilako. 6 Iyi ikaba mituulo ya kulunda pa mutuulo wa koca uwa cila mweshi pamo no mutuulo wa ngano+ e lyo no mutuulo wa koca uo mukalatuula lyonse pamo no mutuulo wa uko uwa ngano,+ pamo ne mituulo ya mwangashi+ iya iyi mituulo. Mukalefituula ukulingana ne fyo mucita lyonse pa kuti fikaleba umutuulo wa pa mulilo uwa kuletela Yehova akacena akasuma.*

7 “‘Kabili pa bushiku bwalenga 10 ubwa mweshi walenga 7 mukalelongana ukulongana kwa mushilo,+ kabili mukalepusula imyeo yenu.* Mwikalabomba umulimo nangu umo.+ 8 Kabili mukaletuula umutuulo wa koca uwa kuletela Yehova akacena akasuma.* Mukaletuula ing’ombe iilume iyana, impaanga iilume no twana twa mpaanga utulume utuli 7 utwa mwaka umo. Ishi inama shonse shifwile ukuba ishabula akalema.+ 9 Kabili pa ng’ombe imo iilume, mukaletuulilapo indupe shitatu isha mutuulo wa ngano uwa buunga bwapeleka ubo basaakanya na mafuta, ne ndupe shibili pa mpaanga iilume, 10 ulupe lumo pa kana ka mpaanga akalume kamo na kamo pali tulya 7. 11 Mukaletuula na akana ka mbushi kamo pa kuti kakaleba umutuulo wa pa lubembu, ukulunda pa mutuulo wa pa lubembu uwa pa bushiku bwa cifuta mulandu+ no mutuulo wa koca uo mutuula lyonse pamo no mutuulo wa uko uwa ngano, pamo ne mituulo ya shiko iya mwangashi.

12 “‘Kabili pa bushiku bwalenga 15 ubwa mweshi walenga 7, mukalelongana ukulongana kwa mushilo. Mwikalabomba umulimo nangu umo uwakosa pali ubu bushiku, kabili mukalesefya umutebeto wa kwa Yehova pa nshiku 7.+ 13 Kabili mukaletuula umutuulo wa koca,+ umutuulo wa pa mulilo uwa kuletela Yehova akacena akasuma.* Mukaletuula ing’ombe ishilume ishana 13, impaanga ishilume shibili no twana twa mpaanga utulume 14 utwa mwaka umo. Ishi inama shonse shifwile ukuba ishabula akalema.+ 14 Kabili pa ng’ombe imo na imo iilume pali shilya 13, mukaletuulilapo indupe shitatu isha mutuulo wa ngano uwa buunga bwapeleka ubo basaakanya na mafuta, ne ndupe shibili pa mpaanga iilume imo na imo pali shilya shibili, 15 kabili pa kana ka mpaanga akalume kamo na kamo pali tulya 14 mukaletuulilapo ulupe lumo. 16 Mukaletuula na akana ka mbushi kamo pa kuti kakaleba umutuulo wa pa lubembu, ukulunda pa mutuulo wa koca uo mutuula lyonse pamo no mutuulo wa uko uwa ngano, pamo no mutuulo wa mwangashi.+

17 “‘Kabili pa bushiku bwalenga shibili mukaletuula ing’ombe ishilume 12 ishana, impaanga ishilume shibili no twana twa mpaanga utulume 14 utwa mwaka umo. Ishi inama shonse shifwile ukuba ishabula akalema,+ 18 kabili mukaleshituulila pamo no mutuulo wa shiko uwa ngano ne mituulo ya shiko iya mwangashi iya kutuulila pamo ne ng’ombe ishilume, impaanga ishilume e lyo no twana twa mpaanga utulume. Mukaletuula ukulingana ne mpendwa ya shiko kabili ukulingana ne fyo mucita lyonse pa kutuula. 19 Mukaletuula na akana ka mbushi kamo pa kuti kakaleba umutuulo wa pa lubembu, ukulunda pa mutuulo wa koca uo mutuula lyonse pamo no mutuulo wa uko uwa ngano, pamo ne mituulo ya shiko iya mwangashi.+

20 “‘Kabili pa bushiku bwalenga shitatu mukaletuula ing’ombe ishilume 11, impaanga ishilume shibili no twana twa mpaanga utulume 14 utwa mwaka umo. Ishi inama shonse shifwile ukuba ishabula akalema,+ 21 kabili mukaleshituulila pamo no mutuulo wa shiko uwa ngano ne mituulo ya shiko iya mwangashi iya kutuulila pamo ne ng’ombe ishilume, impaanga ishilume e lyo no twana twa mpaanga utulume. Mukaletuula ukulingana ne mpendwa ya shiko kabili ukulingana ne fyo mucita lyonse pa kutuula. 22 Mukaletuula imbushi imo pa kuti ikaleba umutuulo wa pa lubembu, ukulunda pa mutuulo wa koca uo mutuula lyonse pamo no mutuulo wa uko uwa ngano, pamo no mutuulo wa mwangashi.+

23 “‘Kabili pa bushiku bwalenga 4 mukaletuula ing’ombe ishilume 10, impaanga ishilume shibili no twana twa mpaanga utulume 14 utwa mwaka umo. Ishi inama shonse shifwile ukuba ishabula akalema,+ 24 kabili mukaleshituulila pamo no mutuulo wa shiko uwa ngano ne mituulo ya shiko iya mwangashi iya kutuulila pamo ne ng’ombe ishilume, impaanga ishilume e lyo no twana twa mpaanga utulume. Mukaletuula ukulingana ne mpendwa ya shiko kabili ukulingana ne fyo mucita lyonse pa kutuula. 25 Mukaletuula na akana ka mbushi kamo pa kuti kakaleba umutuulo wa pa lubembu, ukulunda pa mutuulo wa koca uo mutuula lyonse pamo no mutuulo wa uko uwa ngano, pamo no mutuulo wa mwangashi.+

26 “‘Kabili pa bushiku bwalenga 5 mukaletuula ing’ombe ishilume 9, impaanga ishilume shibili no twana twa mpaanga utulume 14 utwa mwaka umo. Ishi inama shonse shifwile ukuba ishabula akalema,+ 27 kabili mukaleshituulila pamo no mutuulo wa shiko uwa ngano ne mituulo ya shiko iya mwangashi iya kutuulila pamo ne ng’ombe ishilume, impaanga ishilume e lyo no twana twa mpaanga utulume. Mukaletuula ukulingana ne mpendwa ya shiko kabili ukulingana ne fyo mucita lyonse pa kutuula. 28 Mukaletuula imbushi imo pa kuti ikaleba umutuulo wa pa lubembu, ukulunda pa mutuulo wa koca uo mutuula lyonse pamo no mutuulo wa uko uwa ngano, pamo no mutuulo wa mwangashi.+

29 “‘Kabili pa bushiku bwalenga 6 mukaletuula ing’ombe ishilume 8, impaanga ishilume shibili no twana twa mpaanga utulume 14 utwa mwaka umo. Ishi inama shonse shifwile ukuba ishabula akalema,+ 30 kabili mukaleshituulila pamo no mutuulo wa shiko uwa ngano ne mituulo ya shiko iya mwangashi iya kutuulila pamo ne ng’ombe ishilume, impaanga ishilume e lyo no twana twa mpaanga utulume. Mukaletuula ukulingana ne mpendwa ya shiko kabili ukulingana ne fyo mucita lyonse pa kutuula. 31 Mukaletuula imbushi imo pa kuti ikaleba umutuulo wa pa lubembu, ukulunda pa mutuulo wa koca uo mutuula lyonse pamo no mutuulo wa uko uwa ngano, pamo ne mituulo ya mwangashi.+

32 “‘Kabili pa bushiku bwalenga 7 mukaletuula ing’ombe ishilume 7, impaanga ishilume shibili no twana twa mpaanga utulume 14 utwa mwaka umo. Ishi inama shonse shifwile ukuba ishabula akalema,+ 33 kabili mukaleshituulila pamo no mutuulo wa shiko uwa ngano ne mituulo ya shiko iya mwangashi iya kutuulila pamo ne ng’ombe ishilume, impaanga ishilume e lyo no twana twa mpaanga utulume. Mukaletuula ukulingana ne mpendwa ya shiko kabili ukulingana ne fyo mucita lyonse pa kutuula. 34 Mukaletuula imbushi imo pa kuti ikaleba umutuulo wa pa lubembu, ukulunda pa mutuulo wa koca uo mutuula lyonse pamo no mutuulo wa uko uwa ngano, pamo no mutuulo wa mwangashi.+

35 “‘Pa bushiku bwalenga 8 mukalelongana ukulongana kwacindamisha. Mwikalabomba umulimo nangu umo uwakosa pali ubu bushiku.+ 36 Mukaletuula umutuulo wa koca uwa kuletela Yehova akacena akasuma.* Mukaletuula ing’ombe iilume, impaanga iilume no twana twa mpaanga utulume utuli 7 utwa mwaka umo. Ishi inama shonse shifwile ukuba ishabula akalema,+ 37 kabili mukaleshituulila pamo no mutuulo wa shiko uwa ngano ne mituulo ya shiko iya mwangashi iya kutuulila pamo ne ng’ombe iilume, impaanga iilume e lyo no twana twa mpaanga utulume. Mukaletuula ukulingana ne mpendwa ya shiko kabili ukulingana ne fyo mucita lyonse pa kutuula. 38 Mukaletuula imbushi imo pa kuti ikaleba umutuulo wa pa lubembu, ukulunda pa mutuulo wa koca uo mutuula lyonse pamo no mutuulo wa uko uwa ngano, pamo no mutuulo wa mwangashi.+

39 “‘Ifi e fyo mukalatuulila Yehova pa nshita ya mitebeto yenu,+ ukulunda pa mituulo yenu iya milapo+ ne mituulo yenu iya kuitemenwa.+ Iyi mituulo ikalaba mituulo ya koca+ ne mituulo ya ngano+ ne mituulo ya mwangashi+ na malambo ya mutende.’”+ 40 Mose alyebele abena Israele fyonse ifyo Yehova amwebele.