Ibuuku lya Kubalilapo Ilya kwa Samwele

31 Nomba abaPelishiti balelwa na bena Israele.+ Kabili abaume abena Israele balifulumwike abaPelishiti. Lyena abaPelishiti baipaile abena Israele abengi pa Lupili lwa Gilboa.+ 2 AbaPelishiti baile balepalama kuli Shauli na bana bakwe, kabili abaPelishiti baipeye Yonatani,+ Abinadabu na Malkishua, abana ba kwa Shauli abaume.+ 3 Inkondo yakoseele Shauli, kabili ilyo abalepoosa imifwi bamusangile, balimucenene sana.+ 4 Lyena Shauli aebele uwalesenda ifyanso fyakwe ati: “Somona ulupanga lobe undase lupule no kupula pa kuti aba bantu abashasembululwa+ beisampulinkanya ulupanga no kunjipaya bunkalwe bunkalwe.” Lelo uwalemusendela ifyanso talefwaya ukumulasa pantu ali no mwenso nga nshi. E ico Shauli abuulile ulupanga aisonta e lyo awilako.+ 5 Ilyo uwalesendela Shauli ifyanso amwene ukuti afwa,+ na o abuulile ulupanga lwakwe aisonta e lyo awilako, e fyo na o afwile. 6 E ico Shauli, abana bakwe abaume batatu, uwalemusendela ifyanso na baume bakwe bonse balifwile bulya bushiku.+ 7 Ilyo abena Israele abaleikala mu mupokapoka* na baleikala mu citungu ca Yordani baishibe ukuti abashilika abena Israele balifulumwike, kabili ilyo baishibe no kuti Shauli na bana bakwe abaume balifwile, batendeke ukufulumuka mu misumba.+ Lyena abaPelishiti balishile, batampa no kwikalamo.

8 Ubushiku bwakonkelepo ilyo abaPelishiti baishile mu kusenda ifintu fya bantu abo baipeye, basangile Shauli na bana bakwe abaume batatu nabafwa pa Lupili lwa Gilboa.+ 9 E ico balimuputwileko umutwe, kabili balimufulile ifya kufwala fya nkondo, e lyo batuma aba kuyabila imbila+ mu calo conse ica baPelishiti pa kuti beshibishe aba mu mayanda* ya tulubi twabo+ na bantu. 10 Lyena babikile ifya kufwala fyakwe ifya nkondo mu ng’anda ya fimpashanya fya kwa Astarte, kabili icitumbi cakwe bacipoopeele pa cibumba ca Bete-shani.+ 11 Ilyo abena Yabeshe-gileadi+ baumfwile ifyo abaPelishiti bacitile icitumbi ca kwa Shauli, 12 abashilika bonse balimine kabili baendele ubushiku bonse. Bailefumya icitumbi ca kwa Shauli ne fitumbi fya bana bakwe abaume pa cibumba ca Bete-shani. Babweleele ku Yabeshe kabili e ko bafyocelele. 13 Lyena babuulile amafupa+ bayashiika mwi samba lya cimuti ca mutamariski mu Yabeshe,+ kabili balifungile pa nshiku 7.