Ibuuku lya Bubili Ilya Ishamfumu

16 Mu mwaka walenga 17 ukutula apo Peka umwana wa kwa Remalia atendekeele ukuteka, e mo Ahasi+ umwana wa kwa Yotamu imfumu ya mu Yuda aishileba imfumu. 2 Ahasi ali ne myaka 20 ilyo atendeke ukuteka, kabili atekele imyaka 16 mu Yerusalemu. Ahasi alecita ifyabipa mu menso ya kwa Yehova Lesa wakwe. Tali nga Davidi icikolwe cakwe uwalecita ifisuma.+ 3 Lelo alecita ifyabipa ifyo imfumu sha mu Israele shalecita,+ alyocele fye no mwana wakwe.*+ Ifi ifya bunani acitile, e fyo ne nko isho Yehova atamfiisheko abena Israele shalecita.+ 4 Aletuula na malambo no kuyocela pa fifulo fya kupepelapo,+ pa tupili na mwi samba lya fimuti fyonse ifyafumba.+

5 Pali ilya nshita, Resini imfumu ya ku Siria na Peka umwana wa kwa Remalia imfumu ya Israele baishile mu kulwisha umusumba wa Yerusalemu.+ Balishingile uyu umusumba umwali Ahasi, lelo balifililwe uku-upoka. 6 Pali ilya ine nshita, Resini imfumu ya ku Siria abweseeshe abena Edomu umusumba wa Elati.+ Lyena atamfishe abaYuda* mu Elati, e lyo abena Edomu baingilamo, kabili e mo bekala ukufika na lelo. 7 E ico Ahasi atumine abakuyaeba Tiglati-pilesere imfumu+ ya Asiria ati: “Ine ndi mubomfi wenu kabili ndi mwana wenu. Iseni mumpusushe ku mfumu ya Siria na ku mfumu ya Israele, abeshile mu kunsansa.” 8 Lyena Ahasi abuulile silfere na golde iyali mu ng’anda ya kwa Yehova na mu fipao fya mu ng’anda ya mfumu,* atumina imfumu ya Asiria ubupe.+ 9 Imfumu ya Asiria yalicitile ifyo ailombele, kabili yaile ku musumba wa Damaseke, yaupoka no ku-upoka e lyo yasenda abantu mu kuyaba bankole ku Kiri,+ kabili yalipeye na Resini.+

10 Lyena imfumu Ahasi yaile mu kukumana na Tiglati-pilesere imfumu ya Asiria ku Damaseke. Ilyo Imfumu Ahasi yamwene iciipailo icali mu Damaseke, yatumiine Uriya shimapepo apo balengele ifyo iciipailo conse calemoneka.+ 11 Uriya+ shimapepo akuulile iciipailo+ ukulingana na fyonse ifyo Imfumu Ahasi yamutumiine ninshi ili ku Damaseke. Uriya shimapepo apwishishe ukukuula iciipailo ninshi Imfumu Ahasi tailabwela ku Damaseke. 12 Ilyo imfumu yabwelele ku Damaseke, yamona ne ciipailo, yalipaleme pa ciipailo, yatuulilapo na malambo.+ 13 Kabili pali ici iciipailo e po yalefutumwina umutuulo wa koca no mutuulo wa ngano. Yaleitulwilapo ne mituulo ya mwangashi kabili yalesansapo no mulopa wa malambo ya mutende. 14 Lyena yaseseshe iciipailo ca mukuba+ icali pa cinso ca kwa Yehova ku ntanshi ya ng’anda. Yacifumishe apo cali pa kati ka ciipailo ca iko ne ng’anda ya kwa Yehova, kabili yacibikile ku kapinda ka kuso aka ciipailo ca iko. 15 Imfumu Ahasi yaebele Uriya+ shimapepo aiti: “Pa ciipailo icikalamba+ e po ulefutumwina umutuulo wa koca uwa lucelo, umutuulo wa ngano uwa cungulo,+ umutuulo wa koca uwa mfumu, umutuulo wa iko uwa ngano, imituulo ya koca iya bantu bonse, imituulo yabo iya ngano ne mituulo yabo iya mwangashi. Ufwile no kulasansapo umulopa onse uwa mituulo ya koca no mulopa onse uwa malambo yambi. Lelo pa ciipailo ca mukuba pena, nine nkeshiba ifya kucitapo.” 16 Kabili Uriya shimapepo alicitile fyonse ifyo imfumu Ahasi yamwebele.+

17 Kabili Imfumu Ahasi yaputawile ifya mu mbali ya fya kusendelapo amenshi+ tupimfya tupimfya, kabili yalifumishepo ifya kubikamo amenshi.+ Yalifumishe ne Cishiba pa ng’ombe ishilume isha mukuba+ apo caikele, yacitekele panshi apo balambatike amabwe.+ 18 Kabili yafimbwile umutenge wa cikuulwa umwalebela Isabata icali mupepi ne ng’anda ya kwa Yehova, kabili umwinshi wa kunse uwa kwingililapo imfumu yauseseeshe pambi. Ico yacitiile ifi, ni co yaletiina imfumu ya Asiria.

19 Amalyashi yambi aya kwa Ahasi ne fyo acitile, bushe tabafilemba mwi buuku lya malyashi ya mfumu sha mu Yuda?+ 20 Lyena Ahasi alifwile nge fyafwile ifikolwe fyakwe kabili bamushiikile uko bashiikile ifikolwe fyakwe mu Musumba wa kwa Davidi. Hisekia* umwana wakwe+ e wamupyene pa bufumu.