Impendwa

3 Nomba ifi e fyali ulupwa* lwa kwa Aarone no lwa kwa Mose pa nshita Yehova alandile na Mose pa Lupili lwa Sinai.+ 2 Aya e yali amashina ya bana baume ba kwa Aarone: Nadabu e wali ibeli, Abihu,+ Eleasari+ na Itamari.+ 3 Aya e yali amashina ya bana baume ba kwa Aarone, bashimapepo abasubwa abo babikile* pali bushimapepo.+ 4 Lelo Nadabu na Abihu bafwiliile pa ntanshi ya kwa Yehova mu matololo ya Sinai ilyo batuulile Yehova ifyo ashabasuminishe,*+ kabili tabakwete abana abaume. Eleasari+ na Itamari+ bena balitwalilile ukubomba bushimapepo pamo na shibo Aarone.

5 Lyena Yehova aebele Mose ati: 6 “Leta abena Lebi+ kabili bapalamike kuli Aarone shimapepo pa kuti balemwafwilisha.+ 7 Ilyo bakulabomba imilimo ya pe tenti lya mushilo, bakala-afwilisha Aarone kabili bakalabombela ulukuta lonse pa ntanshi ye tenti lya kukumaninamo. 8 Bakalesakamana ifipe fyonse+ ifya pe tenti lya kukumaninamo, kabili bakalebomba imilimo ya pe tenti lya mushilo+ pa kuti bakalebombela abena Israele. 9 Aarone na bana bakwe abaume ufwile ukubapeela abena Lebi. Aba e bo babapeela pa bena Israele.+ 10 Ukabike Aarone na bana bakwe abaume pali bushimapepo, kabili bakalebomba imilimo ya bushimapepo.+ Uushili wa mu lupwa lwa kwa Aarone uwaisa mu kubomba imilimo ya bushimapepo afwile ukwipaiwa.”+

11 Yehova aebele Mose no kuti: 12 “Lelo ine, mona! nabuula abena Lebi pa bena Israele pa kuti mbapyanikishe pa mabeli* yonse aya bena Israele,+ kabili abena Lebi bakaba bandi. 13 Pantu ibeli lyonse lyandi.+ Ukutula pa bushiku naipeye amabeli yonse mu calo ca Egupti,+ naipatwilile amabeli yonse aya bantu na ya nama,+ aya mu Israele. Yakulaba yandi. Nine Yehova.”

14 Yehova na kabili aebele Mose mu matololo ya Sinai+ ati: 15 “Lemba abana baume ba kwa Lebi ukulingana na mayanda ya bashibo ne ndupwa shabo. Umwaume onse uuli no mweshi umo no kuya pa muulu umulembe.”+ 16 E ico Mose alibalembele nga filya fine Yehova amwebele. 17 Aya e yali amashina ya bana baume ba kwa Lebi: Gershone, Kohati na Merari.+

18 Nomba aya e yali amashina ya bana baume ba kwa Gershone na batuntwike muli ena: Libni na Shimei.+

19 Abana baume ba kwa Kohati na batuntwike muli ena bali ni Amramu, Isari, Hebrone na Usiele.+

20 Abana baume ba kwa Merari na batuntwike muli ena bali ni Maali+ na Mushi.+

Ishi e ndupwa sha bena Lebi ukulingana na mayanda ya bashibo.

21 Muli Gershone mwatuntwike ulupwa lwa bena Libni+ no lupwa lwa bena Shimei. Ishi e ndupwa ishatuntwike muli Gershone. 22 Abaume bonse aba mweshi umo no kuya pa muulu abo balembele bali 7,500.+ 23 Indupwa sha bena Gershone shapangiile inkambi ku numa ye tenti lya mushilo+ ku masamba. 24 Eliasafi mwana Laele e wali intungulushi ya lupwa lwa bena Gershone. 25 Umulimo abana baume ba kwa Gershone+ bapeelwe mwi tenti lya kukumaninamo wa kusakamana itenti+ lya mushilo ne fya kufimba kunse na mu kati,+ insalu ya kucinga+ pa mwinshi we tenti lya kukumaninamo, 26 insalu sha kucingilako+ ulubansa, ica kucingilako pa mpongolo+ ya lubansa ulwashinguluka itenti lya mushilo ne ciipailo, imyando ya liko ne milimo yonse iyakuma ifi.

27 Muli Kohati mwatuntwike ulupwa lwa bena Amramu, ulupwa lwa bena Isari, ulupwa lwa bena Hebrone no lupwa lwa bena Usiele. Ishi e ndupwa ishatuntwike muli Kohati.+ 28 Abaume bonse aba mweshi umo no kuya pa muulu bali 8,600. Aba bakwete umulimo wa kusakamana icifulo ca mushilo.+ 29 Indupwa sha bana baume ba kwa Kohati shapangiile inkambi ku kapinda ka ku kulyo ake tenti lya mushilo.+ 30 Elisafani mwana Usiele+ e wali intungulushi ya ndupwa sha bena Kohati. 31 Umulimo bakwete wa kusakamana Icipao,+ itebulo,+ ica kutekapo inyali,+ ifiipailo,+ ifipe fya kubomfya+ pa cifulo ca mushilo, insalu ya kucingilako+ iya mu kati ne milimo yonse iyakuma ifi.+

32 Eleasari+ mwana Aarone shimapepo e wali umukalamba wa ntungulushi sha bena Lebi, abalebomba imilimo ya pa cifulo ca mushilo.

33 Muli Merari mwatuntwike ulupwa lwa bena Maali no lupwa lwa bena Mushi. Ishi e ndupwa ishatuntwike muli Merari.+ 34 Abaume bonse aba mweshi umo no kuya pa muulu abo balembele bali 6,200.+ 35 Suriele mwana Abihaili e wali intungulushi pa ba mu ng’anda ya kwa Merari. Bapangiile inkambi ku kapinda ka ku kuso ake tenti lya mushilo.+ 36 Umulimo abana baume ba kwa Merari bakwete wa kusakamana amafulemu+ ye tenti lya mushilo, imango sha liko,+ inceshi sha liko,+ amashinte ya liko, ifipe fya liko fyonse+ ne milimo yonse iyakuma ifi,+ 37 ne fya kukobekako insalu sha kucingilako ulubansa na mashinte ya fiko,+ impoopo sha fiko ne myando ya fiko.

38 Abalepangila inkambi ku ntanshi ye tenti lya mushilo ku kabanga, ni Mose na Aarone na bana bakwe abaume. Umulimo bakwete wa kusakamana icifulo ca mushilo, pa kuti balebombela abena Israele. Uushili wa mu lupwa lwa kwa Aarone uwapalamako afwile ukwipaiwa.+

39 Abena Lebi abaume bonse aba mweshi umo no kuya pa muulu abo Mose na Aarone balembele ukulingana ne fyo Yehova abebele kabili ukulingana ne ndupwa shabo, bali 22,000.

40 Lyena Yehova aebele Mose ati: “Lemba abana baume ba bena Israele bonse amabeli ukutula pa wa mweshi umo no kuya pa muulu,+ ubapende no kulemba amashina yabo. 41 Ufwile ukumbuulila abena Lebi, abakupyanikisha pa mabeli yonse aya bena Israele,+ umbuulile ne fitekwa fya bena Lebi ifyakupyanikisha pa mabeli yonse aya fitekwa fya bena Israele.+ Nine Yehova.” 42 Lyena Mose alembele amabeli yonse aya bena Israele, nga filya fine fye Yehova amwebele. 43 Abaume bonse amabeli ukutula pa wa mweshi umo no kuya pa muulu abo balembele amashina bali 22,273.

44 Kabili Yehova aebele Mose ati: 45 “Buula abena Lebi ubapyanikishe pa mabeli yonse aya bena Israele, ne fitekwa fya bena Lebi ufipyanikishe pa fitekwa fyabo, kabili abena Lebi bafwile ukuba bandi. Nine Yehova. 46 Pa kulubula amabeli+ 273 aya bena Israele ayapulile pa mpendwa ya bena Lebi,+ 47 ibeli limo na limo ukalibuulile amashekele* 5,+ ukulingana ne cipimo ce shekele lya pa cifulo ca kupepelapo.* Ishekele limo lyalingene na magera* 20.+ 48 Ukapeele Aarone na bana bakwe abaume indalama sha kulubwilamo abapulile pa mpendwa ya bena Lebi.” 49 E ico Mose apokele indalama sha kulubwilamo amabeli ayapulile pa mpendwa ya bena Lebi. 50 Apokele indalama ku mabeli ya bena Israele. Apokele amashekele 1,365 ayalingene ne cipimo ce shekele lya pa cifulo ca kupepelapo. 51 Lyena Mose apeele Aarone na bana bakwe abaume indalama sha kulubwilamo amabeli ukulingana ne fyo Yehova amwebele. Filya fine fye Yehova amwebele e fyo acitile.