Ibuuku lya Bubili Ilya Ishamfumu

9 Lyena Elisha kasesema aitile umo pa bana ba bakasesema e lyo amweba ati: “Ipekanye,* kabili senda umusashi wa mafuta uyu, wangufyanye uleya ku Ramote-gileadi.+ 2 Nga wafika kulya, uyefwaya Yehu+ umwana wa kwa Yehoshafati umwana wa kwa Nimshi. Nga waingila umo aleba na bamunyina, uye umusende mu muputule wa mu kati sana. 3 Lyena uyebuula umusashi wa mafuta no kuyetulwila pa mutwe wakwe e lyo umwebe auti, ‘Yehova atila: “Nakusuba pa kuti ube imfumu mu Israele.”’+ Lyena wisuleko iciibi ufulumuke ukwabula ukupoosa inshita.”

4 E ico umubomfi wa kwa kasesema alimine aya ku Ramote-gileadi. 5 Ilyo afikile, asangile abakalamba ba bashilika nabekala. E lyo alanda ati: “Kuli ifyo ndefwaya ukukweba we mukalamba wa bashilika.” Yehu amwipwishe ati: “Nani pali ifwe?” Na o amwaswike ati: “Niwe, we mukalamba wa bashilika.” 6 E ico Yehu alimine aingila mu ng’anda, kabili umubomfi wa kwa kasesema amwitulwilile amafuta pa mutwe e lyo amweba ati: “Yehova Lesa wa kwa Israele atila: ‘Nakusuba pa kuti ube imfumu ya bantu ba kwa Yehova, abena Israele.+ 7 Ufwile ukwipaya aba mu ng’anda ya kwa sokulu Ahabu, kabili nkalandula pa mulopa wa babomfi bandi bakasesema na pa mulopa wa babomfi ba kwa Yehova bonse abo Yesebele aipaya.+ 8 Kabili aba mu ng’anda ya kwa Ahabu bonse bakaloba; kabili nkepaya umwaume* onse uwa mu ng’anda ya kwa Ahabu, kumo na bashakwata abakubafwa na balanda bonse mu Israele.+ 9 Kabili nkalenga aba mu ng’anda ya kwa Ahabu bakabe nga ba mu ng’anda ya kwa Yeroboamu+ umwana wa kwa Nebati kabili bakabe nga ba mu ng’anda ya kwa Baasha+ umwana wa kwa Ahiya. 10 Yesebele ena, imbwa shikamuliila mwi bala lya mu Yesreele,+ kabili takwakabe uukamushiika.’” E lyo aiswileko iciibi afulumuka no kufulumuka.+

11 Ilyo Yehu abweleele ku babomfi ba kwa shikulu wakwe, bamwipwishe abati: “Bushe ifintu fili fye bwino? Cinshi ulya cipena acishila kuli iwe?” Na o abaswike ati: “Mwalimwishiba fye ulya muntu ne milandile yakwe.” 12 Lelo bamwebele abati: “Ulebepa fye! Twebe fye icishinka.” Lyena abebele ati: “Ifi e fyo acinjeba kabili acinjeba no kuti, ‘Yehova atila: “Nakusuba pa kuti ube imfumu mu Israele.”’”+ 13 Ilyo line cila muntu abuulile ica kufwala cakwe acanshika pa matabo apo Yehu aishile alenyanta,+ kabili balishishe intandala e lyo balabilikisha abati: “Yehu nomba ni mfumu!”+ 14 Lyena Yehu+ umwana wa kwa Yehoshafati umwana wa kwa Nimshi apangiile Yehoramu.

Yehoramu alelinda umusumba wa Ramote-gileadi+ pamo na bashilika bonse abena Israele, pa kuti baucingilile kuli Hasaele imfumu+ ya Siria. 15 Pa numa, Imfumu Yehoramu yabweleele ku Yesreele+ pa kuti ipole ifilonda ifyo abena Siria baicenene ilyo yalelwa na Hasaele imfumu ya Siria.+

Nomba Yehu atile: “Nga mulemona ukuti cili fye bwino,* mwileka umuntu nangu umo afyuke mu musumba aye ashimike ifi ku Yesreele.” 16 Lyena Yehu aninine mwi celeta aya ku Yesreele, pantu e kwali Yehoramu uwalwele pa mulandu wa kuti balimucenene. Pali ilya nshita ninshi Ahasia imfumu ya Yuda aliya mu kupempula Yehoramu. 17 Ilyo uwalelonda aiminine pa lupungu mu Yesreele, amwene abaume ba kwa Yehu abengi baleisa. Ilyo line atile: “Ndemona abaume abengi baleisa.” Yehoramu amwebele ati: “Tumako umo pa baume abanina pali bakabalwe aye akumane nabo, kabili abepushe ati, ‘Bushe uko mwafuma kuli umutende?’” 18 E ico umo pa balenina pali bakabalwe aile mu kukumana na Yehu kabili ailemweba ati: “Imfumu yatila, ‘Bushe uko mwafuma kuli umutende?’” Na o Yehu amwaswike ati: “Cinshi ulelandila pa ‘mutende’? Pitila ku numa yandi!”

Lyena uwalelonda alandile ati: “Uo tutumine acifika kuli bena, lelo tabwelele.” 19 E ico atumine umbi pa balenina pali bakabalwe, kabili ilyo afikile kuli bena abebele ati: “Imfumu yatila, ‘Bushe uko mwafuma kuli umutende?’” Lelo Yehu amwaswike ati: “Cinshi ulelandila pa ‘mutende’? Pitila ku numa yandi!”

20 Na kabili uwalelonda alandile ati: “Uo tutumine acifika kuli bena, lelo tabwelele, kabili uule-ensha iceleta ale-ensha nga Yehu umwishikulu* wa kwa Nimshi, pantu ensha nge shilu.” 21 E lyo Yehoramu imfumu ya Israele alandile ati: “Kakeni bakabalwe kwi celeta!” E ico balikakile bakabalwe kwi celeta lyakwe ilya nkondo, kabili ena na Ahasia imfumu+ ya Yuda balininine mu maceleta yabo aya nkondo kabili baile mu kumonana na Yehu. Bakumene nankwe mwi bala lya kwa Nabote+ umwina Yesreele.

22 Ilyo Yehoramu amwene fye Yehu, amwipwishe ati: “Yehu, bushe uko mwafuma kuli umutende?” Lelo atile: “Kuti kwaba shani umutende apo noko Yesebele+ alacita ubulalelale kabili alacita ne finjelengwe ifingi?”+ 23 Ilyo line Yehoramu ayalulwile iceleta pa kuti afulumuke, kabili aebele Ahasia ati: “Ahasia, nabatubeleleka!” 24 Yehu abuulile ubuta e lyo alasa Yehoramu pa numa, ica kuti umufwi wafumiine pa mutima, kabili awilile mwi celeta lyakwe ilya nkondo. 25 Lyena aebele Bidkari umo pa bakalamba ba bashilika ati: “Mwimye umupoose mwi bala lya kwa Nabote umwina Yesreele.+ Ibukisha ukuti, iwe na ine twali bonse ku numa ya kwa Ahabu wishi tule-ensha amaceleta ayo bakabalwe baletinta, ilyo Yehova amupingwile+ ati: 26 ‘“Mailo namwene umulopa wa kwa Nabote+ no mulopa wa bana bakwe,” e fyo Yehova alanda, “kabili nangu cibe shani nkalandula+ imwe muli ili line ibala,” e fyo Yehova alanda.’ E ico mwimye umupoose muli ili line bala nga fintu Yehova alandile.”+

27 Ilyo Ahasia imfumu+ ya Yuda amwene ifyacitike, afulumukiile ku nshila ya ku ng’anda ya mwi bala. (Lelo Yehu alimukonkele kabili atile: “Na o wine mwipayeni!” E ico balimulashile mwi celeta ninshi aleya ku Guri iyaba mupepi na Ibleamu.+ Lelo alitwalilile ukufulumukila ku Megido, kabili e ko afwilile. 28 Lyena ababomfi bakwe balimusendele mwi celeta bamutwala ku Yerusalemu, kabili bailemushiika mu nshiishi yakwe iyali uko bashiikile ifikolwe fyakwe mu Musumba wa kwa Davidi.+ 29 Mu mwaka walenga 11 ukutula apo Yehoramu umwana wa kwa Ahabu atendekeele ukuteka e mo Ahasia+ aishileba imfumu mu Yuda.)

30 Ilyo Yehu afikile ku Yesreele,+ Yesebele+ alyumfwile. E ico apentele inkopyo ne fyafiita, asakula no mushishi bwino, kabili aile pe windo e lyo alolesha panse. 31 Ilyo Yehu aleingila pa mpongolo, Yesebele atile: “Bushe walaba ifyacitikile Simri uwaipeye shikulu wakwe?”+ 32 Yehu aloleshe pe windo e lyo atila: “Nani ali ku lubali lwandi? Nani?”+ Ilyo line bacilolo babili nelyo batatu aba kwi sano baloleshe Yehu ninshi ali panshi. 33 Lyena abebele ati: “Muponesheni panshi!” E ico balimuponeshe, kabili umulopa wakwe wasabukile ku cibumba na kuli bakabalwe, kabili bakabalwe ba kwa Yehu balimunyantawile. 34 Pa numa Yehu alingile mu ng’anda alalya no kunwa. Lyena alandile ati: “Kamoneni ulya umwanakashi uwatiipwa, muyemushiika, pantu na kuba mwana wa mfumu.”+ 35 Lelo ilyo baile mu kumushiika, basangileko fye icipanga na makasa ne fisansa.+ 36 Ilyo babwelele bamweba ne fyo basangile, atile: “Ifyo Yehova alandile+ ukupitila mu mubomfi wakwe Eliya umwina Tishbe ati, ‘Imbwa shikalya umubili wa kwa Yesebele+ mwi bala lya mu Yesreele, fyafikilishiwa. 37 Kabili icitumbi ca kwa Yesebele cikaba ngo mufundo mwi bala lya mu Yesreele, pa kuti bekatila: “Uyu e Yesebele.”’”