Abapingushi

4 Lelo ilyo Ehudi afwile, abena Israele batendeke ukucita ifyabipa mu menso ya kwa Yehova na kabili.+ 2 E ico Yehova abapeele* mu minwe ya kwa Yabini imfumu ya ku Kanaani,+ uwaleteka mu Hasore. Umukalamba wa bashilika bakwe ali ni Sisera, uwaleikala mu Haroshete ya nko.*+ 3 Abena Israele baliliile kuli Yehova,+ pantu Yabini akwete amaceleta ya fyela ifyatwa 900,+ kabili alicushishe sana abena Israele+ pa myaka 20.

4 Nomba Debora, kasesema mwanakashi,+ umukashi wa kwa Lapidote, e walepingula abena Israele pali ilya nshita. 5 Pa kweba abena Israele ifyo Lesa alepingula, aleikala mwi samba lya kancindu kakwe akali pa kati ka Rama+ na Betele+ mu citungu ca mpili ica Efraimu; kabili abena Israele e ko baleya. 6 Bushiku bumo Debora atumine aba kuyaita Baraki+ umwana wa kwa Abinoamu ku Kedeshe-naftali+ kabili amwebele ati: “Yehova Lesa wa kwa Israele nalanda ukuti: ‘Kabiye pa Lupili lwa Tabore na bashilika 10,000 aba mu mukowa wa kwa Naftali no wa kwa Sebuluni. 7 Nkaleta Sisera umukalamba wa bashilika ba kwa Yabini na maceleta yakwe pamo na bashilika bakwe pa mulonga wa Kishone,+ kabili nkamupeela mu minwe yobe.’”+

8 Baraki amwebele ati: “Nga walaya ninshi na ine nalaya, lelo nga tawaye, ninshi na ine nshaye.” 9 Debora amwebele ati: “Twalaya bonse. Lelo nga wayasansa abalwani, te iwe bakacindika pantu Yehova akapeela Sisera mu minwe ya mwanakashi.”+ Lyena Debora alimine aya na Baraki ku Kedeshe.+ 10 Baraki alonganike abena Sebuluni na bena Naftali+ ku Kedeshe, kabili abaume 10,000 balimukonkele. Debora na o aile nankwe.

11 Nomba Heberi umwina Keni alipaatukene na bena Keni+ banankwe, abatuntwike muli Hobabu, shifyala wa kwa Mose,+ kabili atanike itenti lyakwe mupepi ne cimuti icikalamba mu Saananimu, icaba mu Kedeshe.

12 Bamo bashimikile Sisera ukuti Baraki umwana wa kwa Abinoamu alile pa Lupili lwa Tabore.+ 13 Ilyo line fye Sisera alonganike amaceleta yakwe yonse aya fyela ifyatwa ayali 900, pamo na bashilika bonse abo ali nabo. Bafumine ku Haroshete baya ku mulonga wa Kishone.+ 14 Debora nomba aebele Baraki ati: “Ima, pantu buno bushiku Yehova alepeela Sisera mu minwe yobe. Yehova alekutungulula.” Kabili Baraki atentemwike Ulupili lwa Tabore pamo na baume 10,000. 15 Lyena Yehova afulungenye Sisera na maceleta yakwe yonse na bashilika bonse,+ kabili alengele Baraki na bashilika bakwe baipaya abalwani babo ku lupanga. Sisera asukile aika pe celeta lyakwe no kufulumuka na makasa. 16 Baraki akonkele amaceleta ya nkondo na bashilika ukufika na ku Haroshete. E ico abashilika bonse aba kwa Sisera balibepeye ku lupanga; tapali nangu umo uwapuswike.+

17 Lelo Sisera afulumwike na makasa kabili aile kwi tenti lya kwa Yaele+ muka Heberi+ umwina Keni, pantu Yabini+ imfumu ya Hasore aleumfwana na ba mu ng’anda ya kwa Heberi umwina Keni. 18 Lyena Yaele afumine ku kusengela Sisera kabili amwebele ati: “Iseni mwe shikulu, iseni mwingile. Mwitiina.” E ico alingile mwi tenti kabili amufimbile ica kufimbana. 19 Lyena Sisera amwebele ati: “Shi mpeelako amenshi ya kunwa, pantu ndi ne cilaka.” E ico aiswile inyambi ya mukaka e lyo amupeela pa kuti anwe,+ lyena alimufimbile na kabili. 20 Sisera amwebele no kuti: “Iminina pa mwinshi we tenti, kabili nga kwaisa umuntu e lyo akwipusha ati, ‘Bushe napesa umwaume pano?’ ukaane!”

21 Yaele muka Heberi abuulile ulupoopo lwe tenti na sando. Lyena aile kuli ena alebendelela, kabili ashimpile ulupoopo mu nsensematwi shakwe e lyo alupoopa lwafika na panshi, ninshi Sisera napona mu tulo pantu alinakile sana. E fyo afwile.+

22 Baraki aishile alekonka Sisera kabili Yaele alifumine pa kuti amukumanye kabili amwebele ati: “Iseni imulange uo mulefwaya.” E ico bonse babili balingile mwi tenti kabili amwene Sisera nalaala panshi nafwa, no lupoopo nalupula mu nsensematwi shakwe.

23 E ico pali bulya bushiku Lesa alengele abena Israele bacimfya Yabini imfumu ya Kanaani.+ 24 Ukuboko kwa bena Israele kwalekoselako fye ukucila Yabini imfumu ya Kanaani,+ mpaka baipaya Yabini imfumu ya Kanaani.+